ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།　“རྒྱལ་ཁབ་གཅིག་ལ་ལམ་ལུགས་གཉིས”ཀྱི་ཕུལ་བྱུང་བྱས་རྗེས་འཇོག་མཁན་དང་།　མིང་དུ་གྲགས་པའི་རྒྱལ་གཅེས་མི་སྣ།　ཕུལ་དུ་བྱུང་བའི་སྤྱི་ཚོགས་ཀྱི་བྱེད་སྒོ་སྤེལ་མཁན།　ཀྲུང་གོའི་གུང་ཁྲན་ཏང་གི་བློས་ཐུབ་གྲོགས་པོ།　ཀྲུང་གོའི་མི་དམངས་ཆབ་སྲིད་གྲོས་མོལ་ཚོགས་འདུ་སྐབས་བཅུ་པ་དང་།　སྐབས་བཅུ་གཅིག་པ།　སྐབས་བཅུ་གཉིས་པ་དང་།　སྐབས་བཅུ་གསུམ་པ་བཅས་ཀྱི་རྒྱལ་ཡོངས་ཨུ་ཡོན་ལྷན་ཁང་གི་ཀྲུའུ་ཞི་གཞོན་པ།　ཞང་ཀང་དམིགས་བསལ་སྲིད་འཛིན་ཁུལ་གྱི་སྲིད་འཛིན་དཔོན་དང་པོ་དང་གཉིས་པ་འཁུར་མཁན་སྐུ་ཞབས་ཏུང་ཅན་ཧྭ་ཡི་སྤྱི་མཆོད་མཛད་སྒོ་དེ་ཟླ9པའི་ཚེས20ཉིན་ཞང་ཀང་གི་ཞུགས་འབུལ་ཁང་དུ་བསྡུས།

སྐུ་ཞབས་ཏུང་ཅན་ཧྭ་སྙུང་གཞིའི་རྐྱེན་གྱིས2026ལོའི་ཟླ9པའི་ཚེས8ཉིན་གྱི་ཆུ་ཚོད21དང་སྐར་མ57སྟེང་ཞང་ཀང་དུ་སྐུ་གཤེགས་ལ།　དགུང་ལོ89རེད།

སྐུ་ཞབས་ཏུང་ཅན་ཧྭ་སྙུང་གཞི་ལྕི་བའི་སྐབས་སུ།　ཀྲུང་དབྱང་གིས་ཁོང་གི་སྙུང་གཞི་ལ་ཐུགས་ཁུར་ཆེན་པོ་གནང་ཞིང་།　ཞི་ཅིན་ཕིང་སོགས་ཀྲུང་དབྱང་གི་འགོ་ཁྲིད་བློ་མཐུན་གྱིས་ཞང་ཀང་དུ་སྡོད་པའི་ཀྲུང་དབྱང་སྲིད་གཞུང་གི་འབྲེལ་གཏུག་གཞུང་སྒྲུབ་ཁང་ལ་འཚམས་འདྲི་གནང་དགོས་པའི་མཛུབ་སྟོན་གནང་སྟེ།　ནུས་ཤུགས་ཡོད་རྒུས་སྐྱོབ་བཅོས་བྱེད་དགོས་པའི་བླང་བྱ་བཏོན།

སྐུ་ཞབས་ཏུང་ཅན་ཧྭ་སྐུ་གཤེགས་རྗེས།　བློ་མཐུན་ཞི་ཅིན་ཕིང་དང་།　ལི་ཆང་།　ཀྲའོ་ལེ་ཅི།　ཝང་ཧུའུ་ཉིང་།　ཚའེ་ཆི།　ཏིང་ཞུའེ་ཞང་།　ལི་ཞི།　ཧན་ཀྲེང་།　ཧུའུ་ཅིན་ཐའོ་སོགས་ཀྱིས་བྱེད་ཐབས་སྣ་མང་བརྒྱུད་དེ།　སྐུ་ཞབས་ཏུང་ཅན་ཧྭ་སྐུ་གཤེགས་པར་མྱ་ངན་ཞུས་པ་མ་ཟད།　ཁོང་གི་གཉེན་ཉེ་ལ་འཚམས་འདྲི་གནང་།

ཀྲུང་དབྱང་གི་མངགས་བཅོལ་ལྟར།　ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན།　རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ཧྲི་ཐའེ་ཧྥིན་དང་།　རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ལེང་ཀྲེན་དབྱིན།　རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པའམ་དྲུང་ཡིག་ཆེན་མོའི་འགན་གཅིག་ལྕོགས་སུ་འཁུར་མཁན་ཝང་ཏུང་ཧྥིན།　ཀྲུང་གུང་ཀྲུང་དབྱང་ཞང་ཀང་དང་ཨའོ་མོན་བྱ་བའི་གཞུང་སྒྲུབ་ཁང་གི་ཀྲུའུ་རེན།　རྒྱལ་སྲིད་སྤྱི་ཁྱབ་ཁང་ཞང་ཀང་དང་ཨའོ་མོན་ལས་དོན་གཞུང་སྒྲུབ་ཁང་གི་ཀྲུའུ་རེན་ཞ་པའོ་ལུང་།　ཞང་ཀང་དམིགས་བསལ་སྲིད་འཛིན་ཁུལ་གྱི་སྲིད་འཛིན་དཔོན་ལི་ཅ་ཁྲའོ་བཅས་སྤྱི་མཆོད་མཛད་སྒོར་ཞུགས།

ཚེས20ཉིན་གྱི་སྔ་དྲོར།　ཞང་ཀང་གི་ཞུགས་འབུལ་ཁང་དུ་བཙུགས་པའི་སྐུ་ཞབས་ཏུང་ཅན་ཧྭ་ཡི་གདུང་ཁང་བརྗིད་ཉམས་ལྡན་ལ་མྱ་ངན་རོལ་མོ་དལ་གྱིས་གྲགས།　གདུང་ཁང་གི་སྟེང་ཕྱོགས་སུ“སྐུ་ཞབས་ཏུང་ཅན་ཧྭ་སྐུ་གཤེགས་པར་གདུང་སེམས་དྲག་པོས་མྱ་ངན་ཞུ”ཅེས་པའི་འཕྲེད་ཡིག་བཀལ་བ་དང་།　དེའི་ཞབས་ན་སྐུ་ཞབས་ཏུང་ཅན་ཧྭ་ཡི་སྐུ་པར་བཞག་ཡོད།　སྐུ་ཞབས་ཏུང་ཅན་ཧྭ་ཡི་པུར་སྒམ་སྟེང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་དར་བཀབ་ཡོད།　སྐུ་པར་གྱི་མདུན་དུ་སྐུ་ཞབས་ཏུང་ཅན་ཧྭ་ཡི་གཉེན་ཉེ་ཡིས་ཕུལ་བའི་མེ་ཏོག་གི་ཕྲེང་བ་སྤུངས་ཡོད།

སྔ་དྲོའི་ཆུ་ཚོད་དགུའི་སྟེང་།　སྐུ་ཞབས་ཏུང་ཅན་ཧྭ་ཡི་སྤྱི་མཆོད་མཛད་སྒོ་འགོ་བརྩམས་པ་དང་།　ཚང་མ་གུས་སྟབས་ཀྱིས་འགྲེང་ནས་མྱ་ངན་ཞུས།　སྤྱི་མཆོད་མཛད་སྒོ་དེ་སྐུ་ཞབས་ཏུང་ཅན་ཧྭ་ཡི་འདས་མཆོད་ཨུ་ཡོན་ལྷན་ཁང་གི་ཀྲུའུ་རེན་ཨུ་ཡོན་གཞོན་པ་ལེང་ཀྲེན་དབྱིན་གྱིས་འགོ་འཛིན་བྱས།

འདས་མཆོད་ཨུ་ཡོན་ལྷན་ཁང་གི་ཀྲུའུ་རེན་ཨུ་ཡོན་ཧྲི་ཐའེ་ཧྥིན་གྱིས་སྤྱི་མཆོད་མཛད་སྒོའི་སྟེང་མྱ་ངན་ཞུ་ཚིག་ཕུལ།　ཁོས་མྱ་ངན་ཞུ་ཚིག་ལས་སྐུ་ཞབས་ཏུང་ཅན་ཧྭ་ནི“རྒྱལ་ཁབ་གཅིག་ལ་ལམ་ལུགས་གཉིས”ཀྱི་ཕུལ་བྱུང་བྱས་རྗེས་འཇོག་མཁན་དང་།　མིང་དུ་གྲགས་པའི་རྒྱལ་གཅེས་མི་སྣ།　ཕུལ་དུ་བྱུང་བའི་སྤྱི་ཚོགས་ཀྱི་བྱེད་སྒོ་སྤེལ་མཁན་དང་།　ཀྲུང་གོའི་གུང་ཁྲན་ཏང་གི་བློས་ཐུབ་གྲོགས་པོ་བཅས་ཡིན་པའི་སྐུ་ཚེ་ཧྲིལ་པོར་ཕྱིར་དྲན་བྱས་པ་མ་ཟད།　དེ་བཞིན་ཁོང་གིས་རྒྱལ་ཁབ་དང་།　ཞང་ཀང་།　སྤྱི་ཚོགས་བཅས་ཀྱི་ཆེད་དུ་བྱས་རྗེས་གལ་ཆེན་བཞག་པའི་སྐོར་ཡང་ཕྱིར་དྲན་བྱས།

དེའི་རྗེས་སུ།　སྤྱི་མཆོད་མཛད་སྒོར་ཞུགས་པའི་མི་སྣ་ཡོངས་ཀྱིས་རེ་རེ་བཞིན་སྐུ་ཞབས་ཏུང་ཅན་ཧྭ་ཡི་སྐུ་པར་ལ་གུས་འདུད་ཐེངས་གསུམ་ཞུས་ཏེ།　རིམ་པ་བཞིན་སྐུ་ཞབས་ཏུང་ཅན་ཧྭ་ཡི་སྐུ་གདུང་གི་མདུན་དུ་སླེབས་ནས།　མིང་དུ་གྲགས་པའི་རྒྱལ་གཅེས་མི་སྣ་འདིར་མཐའ་མའི་གྱེས་བྲལ་ཞུས་པ་མ་ཟད།　སྐུ་ཞབས་ཏུང་ཅན་ཧྭ་ཡི་གཉེན་ཉེ་ལ་འཚམས་འདྲི་ཞུས།

ཞང་ཀང་དུ་སྡོད་པའི་ཀྲུང་དབྱང་ལས་ཁུངས་ཀྱི་འགན་ཁུར་བ་དང་།　ཞང་ཀང་དམིགས་བསལ་སྲིད་འཛིན་ཁུལ་སྲིད་གཞུང་གི་དཔོན་རིགས་གཙོ་བོ།　ཞང་ཀང་དམིགས་བསལ་སྲིད་འཛིན་ཁུལ་གྱི་རྒྱལ་ཡོངས་དམངས་ཆེན་གྱི་འཐུས་མི་དང་།　ཞང་ཀང་དམིགས་བསལ་སྲིད་འཛིན་ཁུལ་གྱི་རྒྱལ་ཡོངས་སྲིད་གྲོས་ཀྱི་ཨུ་ཡོན།　དེ་བཞིན་ཞང་ཀང་གི་སྤྱི་ཚོགས་ལས་རིགས་སོ་སོའི་འཐུས་མི་སོགས་ཀྱང་སྐྱེལ་མ་ཞུ་རུ་སླེབས།

ཀྲུང་དབྱང་གི་འབྲེལ་ཡོད་སྡེ་ཁག་དང་།　དབུས་རྒྱུད་ས་ཆའི་འབྲེལ་ཡོད་ཞིང་ཆེན།　རང་སྐྱོང་ལྗོངས་དང་།　ཐད་གཏོགས་གྲོང་ཁྱེར།　ཞང་ཀང་གི་ལས་རིགས་སོ་སོའི་མི་སྣ་དང་།　ལས་ཁུངས་དང་ཚོགས་པ་བཅས་དང་།　དེ་བཞིན་སྐུ་ཞབས་ཏུང་ཅན་ཧྭ་འཚོ་བཞུགས་སྐབས་ཀྱི་གྲོགས་པོས་མྱ་ངན་གློག་འཕྲིན་དང་མྱ་ངན་འཕྲིན་ཡིག་སྤྲིངས། །