སུམ་ཅུ་པའི་སྐོར་གྱིས་དྲིས་ལན། ༽ འཕྲིན་གྲོགས་ངུར་སྨྲིག་ལགས་ཀྱི་དྲི་བ་ལྔ་ཡི་ལན།
ལས་སམ་བྱ་ཡུལ་གཙོ་བོར་སྟོན་པའི་ཆེད་དུ་ལ་དོན་གྱི་ཕྲད་འཇུག་པ་རྣམ་དབྱེ་གཉིས་པའི་མཚན་ཉིད། བྱ་བའི་དགོས་ཆེད་གཙོ་བོར་སྟོན་པའི་ཆེད་དུ་ལ་དོན་གྱི་ཕྲད་འཇུག་པ་རྣམ་དབྱེ་བཞི་པའི་མཚན་ཉིད། མཚན་ཉིད་དེ་དང་མ་མཐུན་པ་ནི་བོད་རྣམ་དག་མིན་ནོ།
ཁོང་རྣམ་གཉིས་ཀྱིས་འགྲེལ་བཤད་མི་འདྲ་སར། ལེགས་སྦྱར་བོད་སྐད་དུ་བསྒྱུར་སྐབས། པྲ་ཏིས། ཕྱག་འཚལ་བ་ལ་ནི་བཞི་པའོ། ཞེས་པའི་ལུང་ལ་བརྟེན་ནས། དཀོན་མཆོག་གསུམ་ལ་ཕྱག་འཚལ་ལོ། ཞེས་པའི་ལ་དོན་དེ་བོད་སྐད་ལའང་བཞི་པ་ངོས་འཛིན་དགོས་དེ། ལེགས་སྦྱར་དེ་ལྟར་ཡིན་པ་རྒྱུ་མཚན་ཏུ་གསུངས་པ་རེད། རྗེས་སུ་སི་ཏུ་པཎ་ཆེན་གྱིས། ལེགས་སྦྱར་ལ་ཕྱག་འཚལ་བ་ལ་བཞི་པ་ཟེར་བ་དེ་དམིགས་བསལ་གྱི་སྐབས་སུ་ཡོད་པའི་ལ་དོན་སྦྱོར་ཚུལ་ཞིག་རེད། སྤྱིར་བཏང་ལེགས་སྦྱར་ལུགས་ལའང་ཕྱག་འཚལ་བ་ལ་ནི་གཉིས་པ་འཇུག དེས་ན་ལེགས་སྦྱར་ལ་སྤྱིར་བཏང་དང་དམིགས་བསལ་གཉིས་ཡོད་ཅིང་། བོད་སྐད་ལ་དེ་ལྟའི་དམིགས་བསལ་མེད་པའི་ཕྱིར་ན་ཕྱག་འཚལ་ལོ་ཞེས་པ་དེས་ན་གཉིས་པ་ཁོ་ནའོ། ཞེས་གསུངས་པ་རེད། །
༣ དྲི་བ་གསུམ་པ། ཚེ་སྐབས་བདུན་པའི་ནང་ཚན་དང་བྱེ་བྲག་ཏུ་བགྲང་བ་འགྲིག་གམ། འགྲིག་ན་བགྲང་ཚུལ་ཇི་ལྟར་ཡིན།
དེས་ན་ཚེ་སྐབས་ནི་ལ་དོན་གྱི་བྱེ་བྲག་ཡིན་པ་སུམ་ཅུ་པའི་རྩ་བ་ལས། ལས་དང་ཆེད་དང་རྟེན་གནས་དང་། །དེ་ཉིད་ཚེ་སྐབས་ལ་སྒྲ་ཡིན། ཞེས་གསལ་པོར་གསུངས་ཡོད་པ་རེད། དེས་ན་ཚེ་སྐབས་ལ་དོན་གྱི་ནང་ཚན་ཡིན་པ་ལས་བདུན་པའི་ནང་ཚན་ཡིན་པ་བཤད་སྲོལ་མ་མཐོང་། འོན་ཀྱང་སི་ཏུ་པཎ་ཆེན་གྱིས་དུས་བརྗོད་པའི་བདུན་པ་ཞེས་པ་ནི་བདུན་པའི་ནང་ཚན་དང་དོན་གཅིག་མ་ཡིན་ནོ། །
༤ དྲི་བ་བཞི་པ། རྣམ་དབྱེ་གཉིས་པའི་སྐབས་སུ་ལས་ཀྱི་དོན་ཅན་དུ་གྱུར་པ་དང་། ལས་སུ་བྱ་བ་སོགས་ཀྱི་ལས་ཞེས་པ་དང་། རྟགས་འཇུག་སྐབས་ཀྱི་ལས་གཉིས་ཀྱི་ཁྱད་པར་གང་འདྲ་ཡིན།
རྟགས་འཇུག་སྐབས་སུ། བྱ་བྱེད་ལས་གསུམ་ཞེས་པ་དེ་གང་ཞིག་ལ་ཟེར།
【ལན། 】བྱ་བྱེད་ཐ་དད་པའི་ལས་ཚིག་གང་ཞིག བྱེད་པ་པོ་དང་། བྱ་བའི་ལས་དང་། དེ་གཉིས་འབྲེལ་བའི་ལས་ཚིག་བཅས་གསུམ་ལ་ཟེར། དཔེར་ན། ཤིང་མཁན་གྱིས་ཤིང་གཅོད། ཅེས་པ་ཤིང་མཁན་བྱེད་པོ། ཤིང་བྱ་ཡུལ། གཅོད་ལས་ཚིག་ལ་ཟེར། འདིར་ལས་ཚིག་ཅེས་པ་བྱ་བའི་ཡུལ་ལ་ཡོད་པའི་ལས་དང་། བྱེད་པ་པོ་ལ་ཡོད་པའི་ལས་ཏེ་ལས་གཉིས་ཚོགས་ཀྱི་བདག་ཉིད་ཅན་གྱི་ལས་ཚིག་ཅིག་སྟེ། བྱ་ལས་དང་བྱེད་ལས་གཉིས་ཀ་འདུས་པ་ཞིག་ཡིན། །
བོད་སྐད་དུ། བྱེད་པོ། བྱ་ཡུལ། ལས་ཚིག རྒྱ་སྐད་དུ།
དྲིས་ལན།
གངས་ཅན་མཁས་དབང་རྣམས་ཀྱི་ཡིག་སྐད་མན་དང་། གྲོང་གི་རྒས་པོ་རྒན་མོའི་ཁ་སྐད་ཡན་བར། ལ་ན་གཉིས་ཀྱིས་བྱ་ལས་ངོ་བོ་གཅིག་པར་སྟོན་པའི་བརྗོད་པ་ཞིག་མེད་པས་ན་དེ་ལྟར་དུ་གསུངས་པ་རེད། །
ཡང་འགའ་ཞིག་གིས་དེ་ཉིད་ཀྱི་དཔེར་བརྗོད་དུ། བ་ལང་ལ་དཀར་ཟལ་ཡོད། ཤིང་ལ་ཙན་དན་ཡོད། བོད་མི་ལ་མཁས་པ་ཡོད། འབྲུ་ལ་གྲོ་ཡོད་སོགས་དེ་ཉིད་ཀྱི་དཔེར་བརྗོད་ཡིན་ཚུལ་སྐོར་མང་པོ་ཞིག་གསལ་བཤད་གནང་འདུག་ཀྱང༌། དེ་དག་འགྲེལ་བཤད་ཇི་ལྟར་བྱས་ཀྱང་རྣམ་དབྱེ་བདུན་པའི་དཔེར་ཁོ་ནར་སྣང༌། སྤྱིར་བཏང་ལ་དོན་གྱི་ཕྲད་དེ་བྱ་ལས་ངོ་བོ་གཅིག་པ་ལ་འཇུག་པའི་དཔེར་བརྗོད་ཅིག་དགོས་ཤིང་། དཔེར་བརྗོད་འདི་དག་གི་ལ་དོན་གྱི་ཕྲད་ཀྱི་རྗེས་སུ་བྱ་ཚིག་གཅིག་ཀྱང་མི་འདུག དེས་ན་ལ་དོན་གྱི་ཕྲད་བྱ་ལས་ངོ་བོ་གཅིག་པ་ལ་འཇུག་པའི་མཚན་ཉིད་ཚང་ཡོད་པ་མ་རེད། །
ན་ཡིག་དེ་ཉིད་ལ་འཇུག་པའི་དཔེར་ལའང་མངོན་པ་མཛོད་ཀྱི་རྩ་ཚིག བསམ་གཏན་དང་པོ་ན་ཐམས་ཅད། མི་ལྕོགས་མེད་ན་དགའ་མ་གཏོགས། ཞེས་པ་དེ་བཀོད་འདུག་ཀྱང་འདིའི་ནང་གི་ན་ཡིག་ནི་མཁས་བླུན་སུས་བལྟས་ཀྱང་རྣམ་དབྱེ་བདུན་པ་ཡིན་པ་རྩོད་མེད་ཅིག་རེད། ནད་པ་ཁ་མལ་ན་ཡོད། ཞེས་པ་འདིའང་ནད་པ་དེའི་ན་ཚ་སྔ་མ་ནང་བཞིན་བཟང་དུ་མ་སོང་ལ། ངན་དུ་ཡང་མ་སོང་བའི་དོན་ཡིན་པར་འདྲ། དེ་ལྟར་ན་འདིར་རང་སོར་ན་གནས། ཟེར་བའི་ན་ཡིག་དེ་ཡིན་པས་དེ་ནི་བདུན་པ་གནས་གཞི་དངོས་ཡིན་པ་ཐེ་ཚོམ་མེད་པ་ཞིག་སྟེ། འདི་ལ་བྱ་ལས་ངོ་བོ་གཅིག་པར་སྟོན་པའི་བྱ་ཚིག་མེད་པའི་ཕྱིར་དང༌། དེ་ལ་དེ་ཉིད་ཀྱི་མཚན་ཉིད་མ་ཚང་བའི་ཕྱིར་རོ། །
ཉེ་ལམ་ཆ་འཕྲིན་གྱི་ལམ་ནས་གོང་གསལ་གྱི་འདྲི་བ་འདི་དག་ཡང་ཡང་ནན་དུ་གཏོང་གིན་འདུག་པ་ལ། ཁོ་བོ་ཉེ་དུས་གླ་མི་ཁོམ་བསྐྲུ་བྲེལ་ཟེར་བའི་དཔེར་ལྟར། བྱ་བ་ཙག་ཙིག་གིས་བྲེལ་བས་དུས་ཐོག་ཏུ་ལན་གཏང་ཐུབ་མ་སོང་། དྲི་བ་འདི་དག་ཞེ་གཏིང་གི་དྲི་བ་ཡིན་ནམ། མཁས་པའི་བགྲོ་གླེང་གི་རྩོད་ངག་གང་ཡིན་མ་ངེས་ཀྱང་། གང་ལྟར་འདི་ལ་ལན་གནད་དང་ལྡན་པ་ཞིག་བཏབ་ན། སློབ་གྲྭ་ཆེ་འབྲིང་གི་སློབ་མ་མང་པོ་ཞིག་ལ་ཕན་ཐོགས་ཡོད་པར་སྙམ་ནས། རྒྱལ་ཁམས་པ་ཐུབ་བསྟན་ཕུན་ཚོགས་དེས། ཀུན་སློང་རྣམ་དག་གིས་སྤྱི་ལོ་༢༠༡༥ལོའི་ཟླ་བ་༧པའི་ཚེས་༧ཉིན་གྱི་ཞོགས་པའི་བར་མཚམས་ཞིག་ནས་བྲིས་སོ། །
རྩོམ་པ་པོ། ཐུབ་བསྟན་ཕུན་ཚོགས།
འཕྲིན་སྟེགས། weikangba