བཙན་བྷོ་ཊ། ༼མཚོ་ལྷོ ༽

　　རྒྱུ་དང་རྐྱེན་གྱིས་ཉེར་ལེན་འཛོམས་བྱས་ཏེ།།

　　སྟོང་བའི་དབྱིངས་སུ་བསྐུར་བའི་འཕྲིན་པ་དེ།།

　　གང་ལ་སྤྲིངས་འདོད་དེ་རུ་འབྱོར་བར་སྨོན།།

　　སེམས་པ་ལྡོམ་པོ་འཕྲིན་པ་སྐྱེལ་བྱེད་ཡིན།།

　　ཡིད་ཆེས་བརྟན་པོ་དམ་ཚིག་བསྲུང་བྱེད་ཡིན།།

　　མྱི་ཁའི་གཏམ་དང་བར་ཆད་གང་བྱུང་ཡང་།།

　　ཁྱེད་ཕྱོགས་འཆང་པའི་བརྩེ་བ་འགྱུར་ལེ་མིན།།

　　སྤྲིན་པ་དཀར་བོ་ཆིབས་སུ་མ་བྱས་ཤིང་།།

　　ཟླ་བ་དཀར་བོ་གྲོགས་སུ་མ་བརྟེན་པར།།

　　ཡིད་འོང་མཚོ་མོའི་རྫིང་ལས་བྱུང་བ་ཡི།།

　　མཛེས་ལྡན་བུ་མོ་ཀུན་ལས་འཕགས་སོ་ལོ།།

　　ཁྱེད་ཕྱོགས་འཁྲེང་བའི་སེམས་ཡིད་དྭངས་ཤིང་གཙང་།།

　　གཙང་བོ་མི་སྡོད་ལྷུང་ལྷུང་མཚོ་མོར་འདྲེས།།

　　བསྐལ་བའི་མེ་ཡིས་མཚོ་མོ་མ་བསྐམ་ན།།

　　མཚོ་འདི་མི་འཇིག་སྔར་ལྟར་ལྟེམས་ངེས་ཡིན།།

　　སེམས་ཀྱི་གཅེས་ལོ་སྙིང་གི་ནོར་བུ་ཡིན།།

　　རིན་ཐང་གཞལ་མེད་དགོས་འདོད་དཔུང་འཇོམས་ཡིན།།

　　སུས་ཀྱང་མ་བསྩལ་རང་གི་བགོ་བསྐལ་ཡིན།།

　　ཐོབ་པའི་ནོར་དེ་བདག་གེར་འཛིན་ངེས་སོ།།

　　དཀའ་སྡུག་ཁུར་བོ་མཉམ་དུ་ཁུར་ན་ཆོག།

　　སྐྱིད་ཀྱི་རྟ་ཕོར་མཉམ་ཞོན་བརྒྱབ་ཀྱང་རུང་།།

　　ཡིན་ཡང་སྐྱིད་སྡུག་འདྲེས་མའི་འཚོ་བའི་ཁྲོད།།

　　སོ་སོར་གྱེས་ཞེས་གཏམ་དེ་མི་འཆད་རོགས།།

　　ཁྱེད་ཐུགས་རབ་ཡངས་མཚོ་མོའི་ཀློང་དབུས་ལ།།

　　ས་རྡུལ་རི་རབ་བྱེ་མས་སྦགས་གྱུར་ན།།

　　ཁོ་བོས་སེལ་ནུས་ཁྱེད་ཉིད་མ་སྐྲག་ཅིག།

　　ང་ཡིས་ཁྱེད་ཀྱི་སླད་དུ་གང་ཡོད་འབུལ།།

　　དགའ་བའི་མི་ལ་གཅེས་པ་འགྲོ་བའི་སྲོལ།།

　　དུང་བའི་ནོར་དེ་འཛིན་པ་ཆོས་ཉིད་ཡིན།།

　　འཇིག་རྟེན་བྱ་དངོས་ཆོས་ལས་མི་འདའ་བས།།

　　ཁོ་བོ་དེ་དང་མཚུངས་ན་ཅིས་མི་ཆོག །