དབྱར་རྩྭ་དགུན་འབུ།

2019-03-29
202

དང་པོ།

ཐོ་རེངས་ཀྱི་སྐབས་སུ།   མཚོ་བོད་མཐོ་སྒང་གི་ཤར་སྣེའི་ལུང་བ་ཞིག་ཏུ་ཆོས་འཛིན་གཉིད་ལས་སད།  རྒྱུ་མཚན་ནི་གཅིན་སྦོས་ནས་ཁོའི་ཁོག་སྨད་ལ་ཟུག་གཟེར་བསྐྱེད་པས་རེད།  མགོ་ཐོག་ཏུ་ཕུབ་པའི་འགྱིག་ཤོག་བསེར་རླུང་གིས་ཧྲག་ཧྲག་ཏུ་སྒུལ་གྱིན་འདུག་ཅིང་།  མག་མོག་གི་གུར་ནང་དུ་གྲོགས་པོ་གཉིས་ཀྱི་རིང་ཐུང་དང་མཐོ་དམའ་མི་སྙོམས་པའི་སྔུར་བ་འགྲན་པ་བཞིན་དུ་གྲགས་ཡོང་།

ཆོས་འཛིན་གྱིས་གཅིན་གཏང་བར་འགྲོ་དགོས་མིན་ཐད་སེམས་ནས་འཐབ་རྩོད་ཡུད་ཙམ་བྱས་རྗེས།  མཇུག་མཐར་ལུས་པོའི་སྡུག་བསྔལ་གྱིས་སེམས་ཀྱི་སྒྱིད་ལུག་གི་མགོ་མནན་པས། ཁོ་ཡར་ལངས་ཏེ་གུར་སྒོར་བུད།  དབྱར་འགོ་མ་ཚེས་ནས་བར་མར་ཉེ་ཡང་།  མཚན་མོའི་མཐོ་སྒང་གི་གནམ་གཤིས་ནི་ད་དུང་གྲང་ཤུར་ཤུར་བྱེདཅིང་།  རླུང་བུ་ལྡང་བ་ཡིས་ཀྱང་མི་ལ་གྲང་འདར་སློང་བར་བྱེད།

གཅིན་ཤག་ཤག་གཏོང་དུས། ཆོས་འཛིན་གྱི་ལུས་སེམས་གཉིས་ལ་མཚོན་ན་ཁུར་བོ་ལྕི་མོ་ཞིག་ཕོག་པ་ལྟར་བདེ་སྣང་ཞིག་གིས་ཁྱབ། ཁོས་དབང་མེད་དུ་མིག་བཙུམ་ནས་རེ་ཞིག་འགོར་ཅིང་དེ་ནས་མགོ་བོ་དགྱེ་སྟེ་བར་སྣང་ཁམས་ལ་ལྟ་སྐབས། སྐར་ཚོགས་ཁྲ་ཆིལ་ལེར་འཚེར་བའི་མཐིང་ནག་གི་མཁའ་དབྱིངས་སུ། སྐར་མ་ཕུང་བོ་སྐེ་འཁྱོག་ཀྱང་ནུབ་ལ་བཟུར་འདུག དེ་ལྟར་ལྟ་བཞིན་ལྟ་བཞིན་ཆོས་འཛིན་ལ་རང་ཉིད་གོ་ལ་འདིའི་ཆེས་མཐོ་སའི་ཀླད་ཐོག་ཅིག་ཏུ་ཡོད་པའི་ཉམས་སྣང་བྱུང་ཞིང་། མཛུབ་མོ་ཀེར་ཙམ་གྱིས་ཀྱང་བར་སྣང་གི་སྐར་མ་རེ་གཉིས་ལ་རེག་སྲིད་སྙམ། ཁོར་ཡུག་གི་ཡོད་ཚད་ནམ་ལངས་ཁའི་མུན་ནག་གི་ཀློང་དུ་གཉིད་ལ་ཡུར་འདུགཉེ་འགྲམ་གྱི་ཁྱིམ་མཚེས་དག་གི་འགྱིག་ཤོག་གུར་ཆུང་གི་འདབས་སྣེ་རླུང་གིས་བསྐྱོད་པའི་ཧྲག་སྒྲའི་ཁྲོད། མཚམས་རེར་སྔུར་སྒྲ་ལྡིར་ལྡིར་ཞིག་གྲགས་ཡོང་། ཐག་རིང་གི་རི་བོའི་ཚོགས་ནི་མུན་ནག་གི་ཀློང་དུ་གསལ་ལ་མི་གསལ་བའི་གྲིབ་བརྙན་གྱི་ཐིག་རིས་ཙམ་དུ་ལུས་འདུག་ཅིང་།   འགྲིབ་ཕྱོགས་ཟླ་གཟུགས་ཟད་པོ་དེ་ནི་ཇ་ནག་ཁུའི་མཐའ་རུ་གཡེངས་ནས་ཞུ་ལ་ཉེ་བའི་མར་རྡོག་ཅིག་དང་མཚུངས་པར་མཁའ་མཐར་ཁེན་ནསནཡོད། ཐང་གཤོང་ནས་ཤུགས་དྲག་གིས་ལྡང་འོང་བའི་བསེར་མ་ཡིས་ས་སྒང་འདིའི་ལྷིང་འཇགས་ཀྱི་རྨི་ལམ་ལ་བྱིལ་བྱིལ་གཏོང་བ་དང་མཚུངས། འདི་ནི་མཚོ་བོད་མཐོ་སྒང་གི་ཤར་སྣེའི་ལུང་ཁོག་ཅིག་ཡིན་ཏེ། ཆོས་འཛིན་གྱིས་གཅིན་གཏོང་བཞིན་སེམས་སུ་རྡོག་འོག་གི་ས་གཞི་འདིའི་རྩྭ་གསེང་ཏུ་དབྱར་རྩྭ་དགུན་འབུ་མང་པོ་ཞིག་གིས་མགོ་བོ་ཀྲིག་ཀྲིག་ཏུ་རང་ལ་ལྟ་བཞིན་ཡོད་ངེས་རེད་སྙམ་བྱུང་།

ཕྱིར་གུར་ནང་དུ་སོང་སྟེ་ཉལ་རྗེས། ཆོས་འཛིན་གྱི་གཉིད་རྐུན་མས་བརྐུས་སོང་པ་ལྟར།    མིག་ཕྱེ་ཕྱེ་ལ་ཡུན་རིང་པོ་ཞིག་འགོར་བ་ན། གམ་གྱི་ཚེ་དཔག་སྐྱབས་ཀྱིས་གཉིད་བཤད་ལྡབ་ལྡིབ་ཅིག་རྒྱག་བཞིན་ཕར་འཁོར་ཚུར་འཁོར་བྱེད་པ་དང་། ཆོས་འཛིན་གྱིས་ཁོའི་ལག་པས་སྟོང་སྙོབ་ཅིག་བྱས་པ་མཐོང་ཞིང་ཁ་ནས་“དབྱར་རྩྭ་དབྱར་རྩྭ་”ཟེར་བ་མ་གཏོགས་ཅི་ཡང་གོ་རྒྱུ་མ་བྱུང་། དོན་དངོས་སུ། ཆོས་འཛིན་གྱི་གཉིད་རྐུ་མཁན་ཡང་དབྱར་རྩྭ་དགུན་འབུ་ཡིན་འདུག

ཁོ་ཚོ་ནི་སྨད་ཕྱོགས་རྨ་ཆུའི་འགྲམ་གྱི་རོང་ཁུལ་ཞིག་ནས་སྟོད་ཕྱོགས་གྱི་འབྲོག་ཁུལ་དེར་དབྱར་རྩྭ་དགུན་འབུ་བརྐོ་བར་ཡོང་མཁན་ཡིན། མི་རྣམས་ཀྱིས་ཁོ་ཚོར་“འབུ་རྐོན”ཞེས་པའི་མིང་སྟབས་བདེ་ཞིག་བཏགས་ཡོད་ལ། ཁོ་ཚོས་ཀྱང་རང་ཉིད་ལ་དེ་ལྟར་འབོད་པར་ཨ་ལན་སྟེར། དབྱར་རྩྭ་དགུན་འབུ་ནི་མཚོ་བོད་མཐོ་སྒང་དུ་སྐྱེ་བའི་སྨན་རྩྭ་ཁྱད་པར་བ་ཞིག་ཡིན་ཅིང་། གཞུང་རྟ་ལས་ལོ་མ་གསལ་བོ་ཞིག་མེད་ལ། རྩ་བ་ནི་དབྱིབས་ནར་ནར་ཤ་འབུ་དང་མཚུངས་ཏེ།    རྩྭ་གསེང་དུ་འབར་ཞུན་རྐང་གཅིག་བཙུགས་པ་ལྟར་མངོན་ཆུང་གིས་བསྐུངས་ནས་སྐྱེ་བ་ཞིག་རེད། ལོ་འདི་འགར། སྨན་རྩྭ་དེའི་རིན་གོང་ཤིན་ཏུ་མཐོ་བར་གྱུར་པས། ཆེད་དུ་དབྱར་རྩྭ་དགུན་འབུའི་ཉོ་འཚོང་གི་ཁེ་སྤོགས་གཉེར་བའི་ཚོང་པ་ཡང་སྣ་མང་བྱུང་ཞིང་། མི་རྣམས་ཀྱིས་དེ་དག་ལ་“འབུ་ཉོ”ཞེས་འབོད་བཞིན་ཡོད། དེ་དང་བསྟུན་ནས་“འབུ་ཚོང་རྒྱག་པ་”ཞེས་པའི་ཚིག་འདི་ཡང་ཁྱབ་གདལ་བྱུང་བ་དང་། དེ་ནི་“འབུ་བརྐོ”དང་“འབུ་ཉོ”ཞེས་པ་གཉིས་ཀྱིས་དབྱར་རྩྭ་དགུན་འབུ་ཉོ་འཚོང་བྱེད་པ་དེ་ལ་ཟེར་བ་རེད། འདི་ལྟ་བུའི་ཚོང་ར་ཞིག་རིམ་གྱིས་དར་རྒྱས་བྱུང་བས། འབྲོག་ཁུལ་དུ་སྨན་རྩྭ་དེའི་རིགས་རྐོ་བ་དང་ཉོ་རུ་ཡོང་མཁན་ཤིན་ཏུ་མང་བོ་ཡོད། འོན་ཀྱང་། མི་མང་ཆེ་བས་སྨན་རྩྭ་འདིའི་ཕན་ནུས་ཅི་འདྲ་ཡིན་པ་དང་དེ་འདྲ་བྲིན་པོ་ཞིག་ཡིན་དོན་ཅི་ཡིན་ཧ་གོ་མི་འདུག་ལ། དེའི་ཕྱོགས་སུ་བསམ་བློ་གཏོང་མཁན་ཡང་ཉུང་ཉུང་རེད།

སྨན་རྩྭ་ཉོ་འཚོང་བྱེད་མཁན་ཚོར་བསམ་རྒྱུ་དངུལ་སྒོར་མ་གཏོགས་མེད། དབྱར་རྩྭ་དགུན་འབུ་རྐང་ག་ཚོད་རྙེད་ན་དངུལ་སྒོར་དེ་ཙམ་གྱིས་མང་བ་རྙེད་པ་ཡིན་པས། དངོས་གནས་བོད་ཀྱི་གཏམ་དཔེར་“གསེར་ས་ནང་ནས་རྙེད”ཅེས་པ་ལྟར་རེད། དེ་བས་རྒྱལ་ན་དབྱར་རྩྭ་དགུན་འབུས་རྒྱལ་ཅིང་ཕམ་ན་དབྱར་རྩྭ་དགུན་འབུས་ཕམ་པར་བྱེད་པ་ནི་ཁོ་ཚོའི་བྱེས་ཀྱི་འཚོ་བའི་དྲོད་འཁྱག་ཡིན་འདུགམཚན་མོ་དེར། ཆོས་འཛིན་གྱིས་ཉིན་དེ་འགའི་རིང་གི་ལག་ཡོང་ཡིད་ལ་འཆར་བཞིན་ཤུགས་རིང་ནར་ནར་ཕྱུང་ཞིང་། མལ་ནས་མུན་ནག་ནང་ལ་ཅེར་ཏེ་སྔ་གཞུག་ཀུན་ལ་སེམས་ངལ་བྱས་པས། ཕྱི་རོལ་དུ་སྐྱ་མདའ་བཏང་ནས་ནམ་མག་མོག་གིས་ལངས་པར་ཡང་མཉམ་འཇོག་རྒྱུ་མ་བྱུང་།

ཞོགས་པར། གཡའ་དག་པའི་མཁའ་དབུགས་བསིལ་མོའི་ནང་དུ། ལང་ཁོག་དེའི་འགྱིག་ཤོག་གི་གུར་ཆུང་དེ་དག་ནི་ཤྭ་མོ་ཆེན་པོ་རེ་རེ་དང་མཚུངས་པར་ལྗང་མདོག་གི་སྤང་ཁུད་དེ་རུ་མིག་གི་དགའ་སྟོན་ཐུན་མོང་མ་ཡིན་པ་ཞིག་ཏུ་གྲུབ་འདུག  གུར་ནང་གི་མི་རྣམས་སྔ་རྗེས་སུ་གུར་སྒོར་བུད་དུས། ཞོགས་པའི་ཉི་འོད་སེར་པོ་རྒྱང་རིང་གི་རི་བོའི་རྩེ་ལ་འཕྲོས་ནས་སེར་ལམ་ལམ་བྱེད་པ་དང་། སྨུག་པ་བན་བུན་ཞིག་རི་ཚོགས་ཀྱི་ཐོང་གར་འཁྱུད་འདུག   རི་དེ་དག་ནི་དེ་ལྟར་རྔམ་བརྗིད་ཀྱིས་ཁེངས་ཤིང་བོད་ཀྱི་ལྷ་སྒྲུང་ཁྲོད་དུ་གྲགས་པའི་གསེར་རྨོག་མནབས་པའི་དམག་དཔོན་རེ་རེ་དང་མཚུངས། ཁོ་ཚོའི་གུར་ཆུང་རྣམས་རི་སྒང་ཞིག་གི་འདབས་རོལ་གྱི་ལུང་བ་རུ་ཕུབ་ཡོད་པ་དང་། ལུང་མཐིལ་གྱི་གྲམ་གཞུང་དེའི་རྡོ་ཚོགས་ཀྱི་བར་གསེང་ཏུ་རྫ་ཆུ་བསིལ་མ་ཤག་ཤག་ཏུ་འབབ་བཞིན་མཆིས་ལ། གྲམ་པའི་ཕ་རོལ་གྱི་ས་འཁོབས་ཡངས་ས་ཞིག་ཏུ་འབྲོག་ཁྱིམ་ཞིག་གི་རུ་བབས་ཡོད་དེ། སྦྲ་ནག་གི་ཀླད་དུ་དུ་བ་སྔོན་པོ་ཞིག་དྭངས་གཙང་གི་མཁའ་དབུགས་ཁྲོད་དུ་ལྷོག་ལྷོག་ཏུ་འཕྱུར་བཞིན་འདུགསྒོ་ཁྱི་རྒྱ་བོ་ཞིག་ཙོག་པུར་བསྡད་དེ་སྦྲ་སྒོའི་ཕྱོགས་སུ་བལྟས་འདུག་ལ། དེ་ཚང་གི་ལྷས་ནས་ལུག་ཁྱུས་འབའ་སྒྲ་སྒྲོག་བཞིན་རི་ལྡེབས་སུ་གཤར་བཞིན་འདུག

འབྲོག་ཁྱིམ་དེ་ཚང་གི་རྩྭ་ས་ཤིན་ཏུ་ཆེ། ཉིན་སྲིབ་དང་ལ་ཐང་མེད་པར་ལྕགས་དྲས་བསྐོར་ནས་ཡོད། འབྲོག་ཁྱིམ་དེ་ཚང་ནི་ལུང་པའི་ཚུ་རོལ་གྱི་འབུ་རྐོན་ཚོའི་མགོ་བདག་ཚང་རེད། “མགོ་བདག་”ཅེས་པ་ནི་དབྱར་རྩྭ་བརྐོ་མཁན་ཚོས་དབྱར་རྩྭ་བརྐོ་ཡུལ་གྱི་རྩྭ་སའི་བདག་པོ་ལ་ཟེར་བ་ཡིན། མགོ་བདག་ལ་འབུ་རྐོན་ཚོས་བརྐོས་རིན་སྟེར་དགོས་ཏེ།   བརྐོས་རིན་སྤྲད་རྗེས་ད་གཟོད་རྩྭ་ས་ནས་དབྱར་རྩྭ་དགུན་འབུ་གང་འདོད་ཀྱིས་བརྐོས་ཆོག་ལ།    དེ་ནི་སྒྲིག་ལམ་ལྟ་བུ་ཞིག་ཏུ་ཆགས་འདུག།

ཆོས་འཛིན་དང་ཚེ་དཔག་སྐྱབས། འབྲུག་བྱམས་གསུམ་པོས་གྲོང་རྡལ་ནས་ཉོས་ཡོང་བའི་བག་ལེབ་རེ་སྐམ་ཟ་བྱེད་བཞིན་ལམ་ལ་ཆས་པ་ན། ཉེ་འགྲམ་གྱི་རྒྱ་རིགས་བཟའ་ཟླ་དེ་གཉིས་ཀྱིས་ཀྱང་འགྲན་པ་ནང་བཞིན་ཁོ་ཚོའི་ཕྱི་བསྙེགས་ནས་སོང་། ཐག་ཅུང་རིང་སའི་གུར་ནང་གི་ན་གཞོན་དེ་གཉིས་ཁ་སང་གསར་དུ་ཡོང་བ་ཡིན་ལ། དེ་ལས་གདོང་བ་དཀར་ཞིང་སྐྲ་ལོ་རིང་བོར་བཞག་ཡོད་པའི་བོད་རིགས་ཕོ་གཞོན་དེས་ཁོ་ནི་ནང་ལོགས་ཀྱི་སློབ་ཆེན་ག་གེ་མོ་ཡི་སློབ་མ་ཡིན་པར་བཤད་ཅིང་། ཁོས་ཁྲིད་ཡོང་བའི་བུ་མོ་དེ་ནི་ཤ་རྩ་དཀར་ཞིང་རློན་ལ་ཉམ་ཆུང་བ་ཞིག་འདུགདེ་གཉིས་མདང་དགོང་ཁོའི་ཚོའི་གུར་འགྲམ་ལ་ཡོང་ནས་ཁོ་ཚོ་རེ་རེར་ལག་འཇུ་རེ་བྱས་ཤིང་།      ཕོ་གཞོན་དེས་སོ་སོར་ཐ་མག་རྐང་རེ་སྤྲད་རྗེས་“ངའི་མིང་ལ་མིག་གསུམ་པ་ཟེར་”ཞེས་རང་ཉིད་མཚམས་སྦྱོར་བྱས་ཀྱང་། ཆོས་འཛིན་སོགས་ཀྱིས་དེའི་ཚུགས་ཀར་ལྟ་བཞིན་དེ་ནི་བོད་མིང་ཞིག་ཡིན་རྒྱུ་མ་རེད་བསམས་པ་དང་། ཤོག་བུའི་ལྟེབས་ཁུད་ལས་གསར་ཏུ་བཏོན་འདྲའི་ཕོ་གཞོན་མོ་གཞོན་གཉིས་འདི་འདྲའི་འབྲོག་ཁུལ་གྱི་གནས་ཤིག་ཏུ་ཅི་བྱ་རུ་ཡོང་བར་བསམ་བློ་མ་འཁོར། དེ་ལ་ཕོ་གཞོན་དེས་གསལ་བཤད་ཀྱི་ཚུལ་དུ་“ངེད་གཉིས་དབྱར་རྩྭ་དགུན་འབུའི་དོན་དུ་ཡོང་བ་མིན། ཐེངས་འདིའི་དངོས་སྦྱོང་གི་གོ་སྐབས་དང་བསྟུན་ནས་རྩྭ་ཐང་ལ་དཔྱད་གཞིའི་རྒྱུ་ཆ་འཚོལ་སྡུད་བྱེད་དུ་ཡོང་བ་ཡིན། རྒྱུ་ཆ་་་་་་་རྒྱུ་ཆ་ཟེར་བ་ནི། ཧེ་་་་”ཕོ་གཞོན་དེས་གཡས་ལག་གི་མཛུབ་མོ་ལྔ་པོས་གདོང་ལ་བཀབ་ཡོང་བའི་སྐྲ་ལོ་ལྟག་པར་ཤད་ཙམ་བྱས་ནས་ཇི་ལྟར་བཤད་དགོས་པ་མ་ཤེས་པའི་ཉམས་ཤིག་བསྟན་ཏེ་“དཔེར་བཞག་ན་ཁྱོད་ཚོ་གྲོང་གསེབ་ཀྱི་མི་མཚམས་རེར་གྲོང་ཁྱེར་དུ་ཡོང་བ་ལྟ་བུ་རེད། མོ་་་་་”ཁོས་གན་གྱི་བུ་མོ་དེའི་མགོ་ལ་བྱིལ་བྱིལ་ཞིག་བྱས་འཕྲལ་“མོ་རི་མོ་འབྲི་མཁན་ཞིག་ཡིན། ད་ཐེངས་འབྲོག་ཁུལ་ལ་ཡུལ་ལྗོངས་འབྲི་བར་ཡོང་བ་རེད། ང་སྙན་ངག་་་་་་་ཧེ་་”ཁོས་ཡང་བསྐྱར་ཇི་ལྟར་བཤད་དགོས་པ་མི་ཤེས་པའི་ཉམས་ཤིག་བསྟན་རྗེས་ཐ་མག་གི་སྣེ་མོའི་མེ་སེམས་ཆུང་ངང་བསད་དེ་དུ་སྣེ་ཁུག་མར་བཅུག་པ་དང་།    མཐུད་ནས་“དྭངས་གཙང་གི་གནས་མཆོག་འདི་བཙོག་པས་སྦག་མི་རུང”ཟེར། ཁོའི་གཏམ་སྤྱོད་དེ་དག་གིས་ཆོས་འཛིན་དང་གྲོགས་པོ་གཉིས་ལ་ཚོར་སྣང་གསར་བ་ཞིག་བྱིན།

སློབ་གྲྭ་ཆེན་མོ་པ་དེ་གཉིས་ཀྱི་གུར་ནི་འགྱིག་ཤོག་གིས་སྟབས་བདེའི་ངང་ཕུབ་པ་ཙམ་མ་རེད། དེ་ནི་བལྟབས་ན་ཁུག་མ་ཆུང་ཆུང་ཞིག་ཏུ་གྱུར་འགྲོ་ཞིང་། ལྟེབ་བཤིགས་ཚེ་མི་གཉིས་ཤོང་ཐུབ་པའི་གུར་དམའ་མོ་ཞིག་ཏུ་གྱུར་འགྲོ་བས། ཆོས་འཛིན་སོགས་དང་རྒྱ་རིགས་བཟའ་ཟླ་གཉིས་ཀས་ངོ་མ་སྟབས་བདེ་རེད་ཅེས་བསྔགས་བརྗོད་དང་ངོ་མཚར་བའི་ཉམས་ཡང་ཡང་བསྟན།

ཁོ་ཚོ་དབྱར་རྩྭ་བརྐོ་བར་ལམ་ལ་ཆས་སྐབས། ན་གཞོན་ཕོ་མོ་དེ་གཉིས་ད་དུང་མལ་ལས་ཡར་ལངས་མི་འདུག

“ཝེ། དལ་ཙམ་གྱིས་དང་། ”ཚེ་དཔག་སྐྱབས་ཀྱིས་ཁོའི་མདུན་ཐད་ན་ཐག་ཚད་ཅིག་གི་མཚམས་སུ་གོམ་ཞེང་ཆེན་པོས་འགྲོ་བཞིན་པའི་ཆོས་འཛིན་གྱི་རྒྱབ་གཟུགས་ལ་ཕྱོགས་ནས་སྐད་བརྒྱབ།

“ཁྱོད་གཉིས་མགྱོགས་མོར་ཡོང་ན་མི་ཆོག་གམ”ཆོས་འཛིན་གྱིས་ཕྱིར་ལྟ་ཙམ་ཡང་མ་བྱས་པར་མུ་མཐུད་དུ་སོང་བས། ཚེ་དཔག་སྐྱབས་དང་འབྲུག་བྱམས་གཉིས་རྒྱུགས་མ་འདུར་གྱིས་ཁོའི་རྗེས་སུ་བསྙེགས་ཤིང་། རྗེས་ཟིན་རྗེས་དཔུང་བ་མཉམ་གཤིབ་ཀྱིས་མདུན་དུ་བསྐྱོད། སྐབས་དེར། ཞོགས་པའི་ཉི་འོད་ག་ལེར་ཐང་གཞུང་ཀུན་ཏུ་འཕྲོས་འོང་པས་ཁོ་ཚོའི་སྐམ་ཞིང་རིད་ལ་སྨུག་པའི་གདོང་དུ་གསེར་མདོག་གི་བཀྲག་མདངས་ཤིག་རྒྱས་འདུགཉི་འོད་ལ་ཁ་གཏད་ནས། ཆོས་འཛིན་གྱིས་ཀི་རིང་ལན་ཅིག་བཏབ་པ་ན། ཐག་རིང་གི་རི་ཚོགས་ཀྱི་གསེང་ནས་དེ་མ་ཐག་བྲག་ཅ་རེ་རེ་བསྟུད་མར་ཕྱིར་འཁོར་ཡོང་། དེ་དུས། ཁོ་ཚོ་གསུམ་པོའི་ཡིད་ལ་སྔར་མེད་པའི་རེ་བ་ཞིག་གིས་ཁེངས་ཤིང་། ལུས་ལ་སྟོབས་ཤུགས་གསར་བ་ཞིག་རྒྱས།

ཁོ་ཚོ་དཔུང་པ་མཉམ་གཤིབ་ཀྱིས་གོམ་ཞེང་ཆེན་པོས་མདུན་ལ་བསྐྱོད།

གཉིས་པ།

ཐག་རིང་གི་རི་ཟུར་དེ་ནས་རི་གླུའི་དབྱངས་ཤིག་ཆད་མ་མཐུད་དུ་གྲགས་ཡོང་། འོན་ཀྱང་གཞས་གཏོང་མཁན་མཐོང་ཡུལ་དུ་མི་འདུག་སྟེ།       ལུག་ཁྱུ་ནི་དཀར་ཐ་ར་ར་རེར་སྒང་གཤོང་ཀུན་ལ་བཀྲམ་ནས་རམ་དཀར་རྩྭ་ལ་རོལ་བཞིན་འདུག      མཚམས་རེར་ལུ་གུ་དང་མ་མོ་ཁ་ཐོར་ནས་ཕན་ཚུན་འཚོལ་བའི་འབའ་སྐད་ལྷང་མཆེད་ཡོང་ལ། མཁའ་དབྱིངས་སུ་སྤྲིན་དཀར་ཕོན་པོ་ཞིག་གི་འོག་ཏུ་ཁེར་རྐྱང་གི་བྱ་གླག་ཅིག་གིས་གཟན་གྱི་སྐབས་གླགས་འཚོལ་བའི་ལྡིང་སྐོར་ཡང་ཡང་རྒྱག་བཞིན་ཡོད་དེ། གྲིབ་མ་ནག་པོ་ལུག་ཁྱུའི་ཁྲོད་དུ་འཕོས་ནས་ཕར་ལྡིང་ཚུར་ལྡིང་བྱེད།

ལུང་མཐིལ་གྱི་རུ་ནང་ནས་མགོ་བདག་ཚང་གི་བུ་ཆེ་བ་སྦག་སྦག་འཁོར་ལོར་བཞོན་ནས་མདུན་ཕྱོགས་ཀྱི་ཐང་བདེ་མོ་གཡུ་ཡི་གཞོང་པ་ལྟ་བུ་དེ་བརྒྱུད་ནས་གྲོང་རྡལ་གྱི་ཕྱོགས་སུ་བསྐྱོད་སོང་། དེའི་ཆུང་མས་ལུག་ལྷས་སུ་ལུས་སྒུར་སྒུར་གྱིས་རིལ་མ་འཕྱག་བཞིན་འདུགམགོ་བདག་རྒད་པོ་ཧ་ཅང་བག་ཡངས་ངང་བྱིས་པ་གཉིས་ཀྱིས་བསྐོར་ཏེ་སྦྲ་འདབས་སུ་སྐྱིལ་ཀྲུང་གོར་གོར་བ་ཞིག་བཅོས་ནས་བསྡད་ཡོད་ལ། མཚམས་རེར་ལག་པས་ཐོད་པ་བཀབ་ནས་ཉི་མ་ཤར་ཕྱོགས་སུ་བལྟ་བཞིན་འདུགདེ་ནི་ཁོ་ཚང་གི་རྩྭ་སའི་འབུ་རྐོན་རྣམས་ལ་མིག་འཚོ་བྱེད་བཞིན་པའོ།  །

འབྲོག་པའི་འཚོ་བ་ནི་དེ་ལྟར་ལྷོད་འཇགས་སེ་གནས། འོན་ཀྱང་། འབུ་རྐོན་རྣམས་ནི་རི་ལུང་ཐང་གསུམ་ན་དབྱར་རྩྭ་དགུན་འབུ་བརྐོ་བར་བྲེལ་བཞིན་ཡོད།   རྫབས་མཐུག་པོར་སྐྱེས་པའི་རྩྭ་གསེབ་ལ་ཞིབ་ཏུ་འཚོལ་དུས། ཆོས་འཛིན་གྱིས་དེ་ན་ཡང་གསོན་ཤུགས་ཀྱིས་ཁེངས་པའི་འཇིག་རྟེན་གཞན་ཞིག་ཡོད་པ་མཐོང་། རྩྭ་ལྗང་གི་རྩི་དཔུང་དང་། འདབ་ལོར་འཁྱིལ་བའི་དྭངས་གཙང་གི་ཟིལ་བ། ཁ་དོག་སྣ་ཚོགས་འཛིན་པའི་མེ་ཏོག་ཐར་ཐོར། ཕར་འགྲོ་ཚུར་འོང་ལ་བྲེལ་བའི་སྲིན་འབུ་སྣ་མང་། ད་དུང་སྣ་ལམ་དུ་ཐུལ་འོང་བའི་སྨན་རྩྭ་སོགས་སྐྱེས་དངོས་སྣ་ཚོགས་ཀྱི་དྲི་མ་དག……ཆོས་འཛིན་ནི་འཆར་ཡན་ལ་དགའ་བའི་མི་ཞིག་ཡིན། ཁོ་དེ་ལྟར་རྩྭ་གསེང་གི་འཇིག་རྟེན་དེ་ལ་གཡེང་སྐབས། རང་ཉིད་གསེར་སྦྲང་ཞིག་ཏུ་སྤྲུལ་ནས་དེ་རུ་འཕུར་ཅིང་ལྡིང་བའི་ཉམས་སྣང་བྱུང་། སྐབས་ཤིག་ལ། མདུན་ཐད་ཀྱི་རྩྭ་གསེང་ནས་དབྱར་རྩྭ་དགུན་འབུ་རྐང་ཞིང་གི་ཁ་ལོ་མཐོང་བྱུང་བས། ཁོས་དེ་མ་ཐག་གསེར་སྦྲང་གི་སྤྲུལ་བ་བཤིག་ཏེ་ལག་གི་ཏོག་ཙེ་རྩྭ་གསེང་ལ་བཙུགས། རྩྭ་གསེང་ནས་འདབ་ལོ་དག་ལ་འཁྱིལ་བའི་ཟིལ་བ་ས་རུ་ཐོར་ཅིང་སྲིན་བུ་ཁ་ཤས་ཐོལ་གྱིས་འཕུར་སོང་། དེ་དང་མཉམ་དུ་ཆོས་འཛིན་གྱི་གདོངལ་དགོད་འཛུམ་ཞིག་མངོན་ཆུང་གིས་ལངས་ཡོང་།

དུས་ཚོད་གཅིག་ལྷག་ལ་རྩྭ་གསེང་དུ་མིག་མྱུལ་བྱས་རྗེས། ཆོས་འཛིན་གྱིས་གཞི་ནས་ཉིན་འདིའི་དབྱར་རྩྭ་དགུན་འབུ་རྐང་དང་པོ་དེ་རྙེད་པ་རེད། འོན་ཀྱང་། ཁོས་དབྱར་རྩྭ་དགུན་འབུ་རྐང་དེ་བརྐོས་མ་ཚར་བའི་སྔོན་ལ། མགོ་བོ་ཀྲོག་ཀྲོག་ངང་སློབ་གྲྭ་ཆེན་མོ་པ་དེ་གཉིས་གུར་ནང་ནས་ཕྱི་རོལ་ཏུ་ཐོན་རྗེས་གར་འགྲོ་གར་འདུག་ལ་ལྟ་བཞིན་པའི་འབྲུག་བྱམས་ཀྱིས་ཁོ་གཟས་ནས་བསླེབས་བྱུང་། དེར་ཏོག་ཙེ་བཟུང་ནས་ཆོས་འཛིན་གྱིས་རྐོ་བཞིན་པའི་དབྱར་རྩྭའི་ཉེ་འཁོར་གྱི་རྩྭ་གསེང་ཕར་སློག་ཚུར་སློག་བྱེད་པ་དང་། ཡུད་ཙམ་གྱི་རྗེས་ནས་“ཧ་ཧ་”ཞེས་གད་མོ་རྣར་མི་ཤོང་བ་ཞིག་བགད་རྗེས་“འདི་ན་ཡང་གཅིག་”ཅེས་བརྗོད་ཞོར་དུ་ཏོག་ཙེ་རྩྭ་གསེང་ལ་གཟབ་ནན་གྱིས་བཙུགས། དེ་ནི་བྱིས་པ་ཆུང་ཆུང་ཞིག་ལ་རྩེད་ཆས་གསར་བ་ཞིག་རེག་པ་དང་མཚུངས།

“ལྟས་ངན་ཁྱོད། ཡང་ཇི་ལྟར་ཤེས་པ་ཡིན། ”ཆོས་འཛིན་ཁོའི་སྤྱོད་སྟངས་དེར་ཤིན་ཏུ་མི་འཐད་མོད། ཐབས་གཞན་མ་བྱུང་པས་དེ་ལྟར་སྡིགས་མོ་བྱས།

“ཧིན། ཁྱོད་ཀྱི་གདོང་ལ་འཛུམ་ཞིག་ལངས་ཡོད་དུས། ཏན་ཏན་ལ་རྩྭ་འབུ་མང་རྙེད་ཡོད་པ་ཁོ་ཐག་རེད། ངས་སྔ་མོ་ནས་བརྟག་ཡོད……ཨ་ཧ་ཧ……ཡང་གཅིག…”

འབྲུག་བྱམས་ཀྱིསཡང་ཡང་འུར་རྒྱབ།

“བཙལ་དགོས་རྒྱུའི་དབྱར་རྩྭ་མི་འཚོལ་བར་ངའི་རྣམ་འགྱུར་ལ་བརྟགས་ནས་ཅི་བྱེད་དམ། གཞན་གྱི་སྐལ་འཕྲོག་ན་རང་གི་སེམས་བདེའམ། ”ཆོས་འཛིན་འུ་ཐུག་ནས་ཏོག་ཙེ་གཞོགས་སུ་གཡུགས་ཏེ་སྨིན་མཚམས་སུ་གཉེར་མདུད་ཟབ་མོ་ཞིག་བྱུང་ནས་བསྡད། ཐག་མི་རིང་བའི་དེའུ་འབུར་དེའི་སྒང་དུ་མིག་གསུམ་པས་ཁྲིད་ཡོང་བའི་བུ་མོ་དེས་མདུན་ལ་ཚོན་སྒྲོམ་རྐང་གསུམ་མ་ཞིག་བཙུགས་ཏེ་ཐག་རིང་ཐག་རིང་ཞིག་ལ་ལྟ་བཞིན་རས་གཞིའི་སྟེང་ལ་ཅི་ཞིག་འབྲི་བཞིན་འདུགམིག་གསུམ་པ་ནི་ལུག་ཁྱུའི་མཐའ་ཞིག་ན་ལུག་རྫི་བུ་མོ་དེ་དང་མཉམ་དུ་ལབ་གླེང་ལ་གཡེང་བཞིན་བསྡད་ཅིང་། མཚམས་རེར་བུ་མོ་དེའི་ཧབ་དགོད་རེ་བྱེད་པའི་སྒྲའང་རླུང་གི་རྒྱུ་ཕྱོགས་དང་བསྟུན་ནས་ཚུར་ཁུར་ཡོང་། དེ་ཡོད་ཚད་མཐོ་སྒང་གི་རྡུལ་དག་པའི་མཁའ་དབུགས་ཀྱི་ཁྲོད་ཆོས་འཛིན་གྱི་མཐོང་ལམ་དུ་གསལ་བོར་ཤར་བྱུང་།

“ངས་ཁྱོད་ཀྱི་སྐལ་ཇི་ལྟར་འཕྲོག་པ་རེད་དམ། ཨ…ཨ…འོ…”འབྲུག་བྱམས་ཀྱིས་མུ་མཐུད་དུ་རྩྭ་གསེང་སློག་བཞིན་“ས་འདི་རྒྱལ་པོའི་ས་རེད། ཆུ་འདི་བཙུན་མོའི་ཆུ་རེད། ཁྱོད་ཀྱི་ནི་མ་རེད། ཨ…ཧ་ཧ་ཧ…ཡང་གཅིག་རྙེད་བྱུང་། ཧ་ཧ་ཧ…”ཁོས་སྔ་གཞུག་ལ་རྩྭ་འབུ་རྐང་གཉིས་རྙེད་པས་དགའ་བའི་སེམས་འཕང་མི་མནོན་པར་གྱུར།

“རྒྱལ་པོ་དང་བཙུན་མོའི་ས་ཆུ་ཡིན་ན། ཁྱོད་ཀྱིས་འབྲོག་པར་བརྐོས་གླར་སྒོར་མོ་བདུན་བརྒྱ་སྤྲོད་སྐབས། ཅིའི་ཕྱིར་གནས་ལུགས་མ་བཤད་པ་ཡིན། ”ཆོས་འཛིན་གྱིས་ཁོའི་འཕོངས་ཚོས་ལ་རྡོག་ཐོས་གཅིག་བརྒྱབ་རྗེས་ས་སྤོར་ནས་ཕར་བུད་སོང་། འབྲུག་བྱམས་ཀྱིས་ཡར་སྔོན་ཡང་ཐེངས་མང་བོར་ཁོའི་ཡིན་ཐག་ཆོད་པའི་དབྱར་རྩྭ་དགུན་འབུ་མང་བོ་ཞིག་དེ་ལྟར་གླགས་བཙལ་ཏེ་མངོན་འཕྲོག་བྱས་མྱོང་། འབྲུག་བྱམས་ཀྱི་མགོ་བདེའི་སྤྱོད་སྟངས་དེ་ལ་ཆོས་འཛིན་གྱིས་ནམ་ཡང་བཟོད་བསྲན་བྱེད་བཞིན་ཡོད། ཁོ་ཚོ་གྲོང་སྡེ་གཅིག་ནས་ཡུལ་འདིར་བསླེབས་པས། འགལ་བ་བྱུང་ན་ཡག་པོ་ཡོང་རྒྱུ་མ་རེད་བསམས་པ་ཡིན། འོན་ཀྱང་ཚེ་དཔག་སྐྱབས་ཀྱིས་དེ་ལྟར་མི་སེམས་ཏེ། ཐེངས་ཤིག་འབྲུག་བྱམས་ཀྱིས་ཚེ་དཔག་སྐྱབས་ལ་གླགས་བཙལ་རྩིས་བྱས་པར། དེས་ཁོང་ཁྲོ་ཆེན་པོས་འབྲུག་བྱམས་ཀྱི་སྐྲ་ལ་འཇུས་པ་ན། ཆོས་འཛིན་གྱིས་མྱུར་དུ་བར་བཤོལ་ཅིང་། ཁོ་གཉིས་ལ་“གཉེན་ཉེ་བར་ལ་མི་འཛའ་བ་གྱོད་ཡིན་”ཅེས་སློབ་གསོ་ཡང་ཡང་བཏང་རུང་། ཚེ་དཔག་སྐྱབས་ཀྱིས་“ཁོ་ལྟ་བུའི་ཨ་ཞང་ཞིག་ཡོད་པ་ལས་མེད་ན་དགའ་ཨང་། ”ཞེས་སྡིགས་འདོན་པར་བྱེད།

འབྲུག་བྱམས་ནི་ཚེ་དཔག་སྐྱབས་ཀྱི་ཆུང་མའི་མིང་བོ་ཡིན། ཕར་བལྟས་མ་ཐག་གདོང་གི་མིག་ཟུང་རིག་རིག་ཏུ་གཡོ་ཞིང་། གྲུང་ཤ་དོད་མདོག་ཅིག་མངོན་ནས་ཡོད། ཁོས་པྲ་ཚགས་དང་ཀོ་ལོང་གིས་གཞན་ལ་ཞེ་གཅོད་པའི་ལས་བྱས་པ་མང་དྲགས་པས། ལོ་འགའི་སྔོན་ལ་རྫོང་མི་རིགས་སློབ་འབྲིང་གིས་ཕྱིར་བསྐྲད་པ་དང་། ཡུལ་ལ་ལོག་རྗེས་རང་འཁྲིའི་ལས་ཀ་བསྐྱུར་ནས་ཚོང་རྩག་རྩིག་ཅིག་རྒྱག་པར་བྲེལ་ནའང་། མ་རྩ་བརྡིབས་པའི་ཁར་བུ་ལོན་ཡང་ཁུར་དུ་མི་ཐེག་པ་རེ་བསྐྱུར་ཡོད། ཐེངས་དེ་ཚེ་དཔག་སྐྱབས་ཀྱིས་ཆུང་མའི་ངོ་བཟློག་མ་ཐུབ་པར་ཁོ་དང་བསྡེབས་ནས་རྩྭ་འབུ་བརྐོ་བར་ཡོང་རུང་།        ལམ་ཧྲིལ་བོར་ཁ་འཛིང་ཏག་ཏག་བྱས་ནས་ཡོང་བས། ཆོས་འཛིན་སུན་ནས་ཅི་ཞིག་བྱེད་དགོས་པའང་མི་ཤེས་པར་གྱུར།

དབྱར་གཞུང་གི་དུས་སུ་མཐོ་སྒང་གི་ཉི་འོད་ནི་ཐོགས་སྒྲིབས་ཅི་ཡང་མེད་པར་ཐད་ཀར་དུ་ས་ཆེན་གྱི་ཐོག་ཏུ་འཕྲོས་ཡོང་། སྐམ་ཤས་ཆེ་བའི་མཁའ་དབུགས་ཀྱི་ཁྲོད་དུ་ཉི་འོད་ཀྱི་ཟེར་མ་རེ་རེ་ནི་རྣོ་དབལ་གྱི་ཁབ་རྩེ་རེ་རེ་མཚུངས་པར་མིའི་གདོང་གི་སྐྱི་ལྤགས་ཀྱི་བ་སྤུའི་ཁུང་བུ་རེ་རེར་ཟུག་པ་ན། དེར་སིམ་པའི་རླན་གྱི་ཆ་མཐའ་དག་ནི་རིམ་གྱིས་སྐམ་ཞིང་། གདོང་གི་པགས་པའི་མདངས་ཀྱང་རིམ་གྱིས་ཉམས་ཏེ་སྐམ་ཞིང་རིད་པ་ཞིག་ཏུ་གྱུར། ཚུལ་དེ་ལ་ཆོས་འཛིན་ཁོ་ཚོས་སྣང་དོགས་ཅི་ཡང་མི་བྱེད་དེ།        ཁོ་ཚོ་སྐྱེས་མ་ཐག་ནས་བཟུང་ཉི་འོད་དང་འགྲོགས་ནས་འཚར་ལོངས་བྱུང་བ་ཡིན། འོན་ཀྱང་རྒྱ་རིགས་བཟའ་ཟླ་དེ་གཉིས་ཀྱིས་ཁ་ངོ་ཚང་མ་ཁ་རས་ཀྱིས་བཏུམས་ནས་རྩྭ་འབུ་བརྐོ་ཞིང་ཉི་འོད་ལ་འཛེམ་པར་བྱེད། རྣམ་ཀུན་དེ་གཉིས་ནི་ཁོ་ཚོ་དང་བར་ཐག་རིང་བོ་ཞིག་ཏུ་རྩྭ་ས་མྱུལ་བར་བྱེད་ཅིང་། ལག་ཡོང་ཅི་འདྲ་ཞིག་ཡོད་མེད་ཀྱང་གསང་ཅི་ཐུབ་བྱེད་པས། ཆོས་འཛིན་སོགས་ཀྱིས་“རྒྱ་མིའི་ཁོག་པ་ལོན་དཀའ་”ཟེར་བ་འདི་འདྲ་ཞིག་ཡིན་རྒྱུ་རེད་སྙམ།

ཚེ་དཔག་སྐྱབས་ཀྱིས“རྒྱ་མི་འདི་ཚོ་འབྲོག་ཁུལ་ལ་ཡོང་བ་ནི་ང་ཚོ་བོད་པ་གྲོང་ཁྱེར་ལ་ཕྱིན་པ་དང་འདྲ། ངས་བལྟས་ན་འདི་གཉིས་ཀྱིས་རྩྭ་འབུ་ང་ཚོ་ལས་མང་བོ་ཞིག་རྙེད་མེད་པ་ཁོ་ཐག་ཡིན་”ཅེས་ཁ་ཚོན་བཅད་ཀྱང་། ཆོས་འཛིན་གྱིས་“དེ་བཤད་དཀའ། ཁ་དཔེར་ཡང་‘རྒྱ་ལས་རིང་མོ’ཟེར་བ་ལྟར།    རྒྱ་མི་འདི་ཚོ་ང་ཚོ་བོད་མི་དང་མི་འདྲ་བར་ལས་ཀ་ཅི་སྒྲུབ་ཀྱང་ཡུན་ལ་བརྟེན་ནས་མཐའ་འཁྱོལ་བར་བྱེད་པ་ཞིག་རེད། ”ཅེས་རྒྱ་རིགས་བཟའ་ཟླ་གཉིས་ཀྱི་བརྩོན་འགྲུས་ལ་ཡི་རང་བྱེད། དོན་དངོས་སུ་དེ་འདྲ་ཞིག་ཡིན་པ་འདྲ། ནམ་རྒྱུན་རྒྱ་རིགས་བཟའ་ཟླ་དེ་གཉིས་ཀྱིས་ཁོ་ཚོས་བརྐོས་ཤུལ་ཏུ་དབྱར་རྩྭ་མང་བོ་ཞིག་རྙེད་སྲིད་དེ། དགོང་མོ་གུར་ནང་དུ་ལོག་རྗེས། རྒྱ་དེས་ཐུག་པ་འཐུང་ཞོར་དུ་ཁོ་ཚོའི་གུར་འགྲམ་ལ་ཡོང་ནས་ཀུ་རེའི་ཚུལ་དུ་“དེ་རིང་ཡང་ཁྱོད་ཚོས་དབྱར་རྩྭ་ཉིས་གཤིབ་མ་ཞིག་ལས་རྐང་གཅིག་ང་ཚོ་ལ་སྐལ་དུ་བཞག་འདུགཧ་ཧ་་བཀའ་དྲིན་ཆེ”ཞེས་ལབ།

དེ་རིང་། རྒྱ་རིགས་བཟའ་ཟླ་དེ་གཉིས་མི་ཆེན་གྱི་བརླ་བར་དང་མཚུངས་བའི་ལུང་ཕུག་དོག་མོ་དེར་འཛུལ་རྗེས་ད་བར་དུ་ཕྱིར་ཐོན་རྒྱུ་མ་བྱུང་། དེ་ལ་འབྲུག་བྱམས་ཀྱིས་“དེ་གཉིས་ཀྱིས་རི་ཉལ་བྱེད་པའི་བྲོ་བ་མྱོང་བཞིན་ཡོད་ངེས། ”ཞེས་ཚོད་དཔག་བྱེད་པ་དང། ཚེ་དཔག་སྐྱབས་ཀྱིས“ཕལ་ཆེར་དབྱར་རྩྭ་མང་ས་ཞིག་ཡིན་རྒྱུ་རེད”ཟེར། དེར་ཆོས་འཛིན་གྱིས་“ས་ཚང་མ་གཅིག་ཡིན། རྙེད་མིན་དེ་གཙོ་བོ་སོ་སོའི་སེམས་རྣལ་མི་རྣལ་ལ་ཐུག་ཡོད་པ་རེད”ཟེར། སྐད་ཆ་འདི་དག་བཤད་སྐབས་ཁོ་ཚོས་མཉམ་དུ་བསྡད་ནས་དྲོས་ཇའི་དོད་དུ་བག་ལེབ་ཟ་བཞིན་ཡོད། མིག་གསུམ་པ་དང་ལུག་རྫི་བུ་མོ་གཉིས་སྔར་མལ་ན་མི་འདུགརི་མོ་འབྲི་བའི་བུ་མོ་དེ་གཞི་ནས་མགོ་བདག་ཚང་གི་རུ་འདབས་སུ་བསླེབས་འདུག  མོས་སྦྲ་སྒོའི་རྒད་པོ་དེ་དང་བྱིས་པ་དེ་ཚོ་རི་མོར་འགོད་བཞིན་པ་འདྲ།

ཁོ་ཚོས་ཉེ་རྒྱང་ཀུན་ལ་མིག་ཟིམ་ཟིམ་གྱིས་ལྟ་ཞིང་གཞོགས་ཉལ་གྱིས་བག་ཕེབས་པོ་ལྟར་སྡོད་ཀྱང་། དོན་དམ་དུ་ཁོ་ཚོའི་སེམས་ནི་བག་ཕེབས་པོ་ཞིག་གཏན་ནས་མ་མིན། ཁོ་ཚོས་བརྐོས་གླ་བླངས་པའི་ས་ཆ་དེ་ནས་དབྱར་རྩྭ་མང་པོ་མ་རྙེད་པ་དེར་སེམས་ཁྲལ་བྱེད་བཞིན་ཡོད། འབྲོག་པས་དང་ཐོག་ནས་མི་རེ་རེའི་ལག་ནས་སྒོར་བདུན་བརྒྱ་རེའི་བརྐོས་གླ་བླངས་ཟིན། ཉིན་ཉི་ཤུའི་དུས་བཅད་ལས་ད་ནི་ཉིན་བཅུ་ལྷག་འདས་ཀྱང་།   རྙེད་པའི་རྩྭ་འབུ་ཡིས་སྤྲད་པའི་བརྐོས་གླའི་ཚབ་ཀྱང་ཕྱིར་མི་སོབས།   ད་ནི་ཅི་བྱས་ན་དག་འམ། ཁོ་ཚོས་དེ་ལྟར་སེམས་ཚེགས་བྱེད་དགོས་བྱུང་།

སེམས་ཚེགས་ཇི་ལྟར་བྱས་ན་དབྱར་རྩྭ་དེ་ལྟར་མི་རྙེད། ཕྱི་དྲོར་ཁོ་ཚོས་ས་ཡང་ཡང་སྤོར་ཅིང་རྩྭ་སར་ཡར་འགྲོ་མར་འོང་བྱས་ཀྱང་། དབྱར་རྩྭ་མང་པོ་ཞིག་མ་རྙེད། དེར་ཚེ་དཔག་སྐྱབས་ཀྱིས་“ཆོས་འཛིན། ང་ཚོའི་སེམས་མ་རྣལ་པ་ཡིན་ནམ་ས་འདིར་མ་གཞི་ནས་དབྱར་རྩྭ་མེད་པ་ཡིན་ནམ”ཞེས་དྲིས་སྐབས། འབྲུག་བྱམས་ཀྱིས་“རོ་ས་འདི།      མ་གཞི་ནས་དབྱར་རྩྭ་ཡོད་ས་ཞིག་མ་རེད། ང་ཚོར་མགོ་སྐོར་ཐེབས་འདུགའབྲོག་རྒན་འདི་ཚོ…”ཞེས་ལག་གི་ཏོག་ཙེ་ཐག་རིང་བོ་ཞིག་ལ་ཤུགས་ཀྱིས་གཡུགས་ཤིང་། དེ་ནས་སྡིགས་སྨྲེ་འདོན་བཞིན་ཕྱོགས་དེར་ཏོག་ཙེ་ལེན་དུ་སོང་། ཆོས་འཛིན་ནི་སྨིན་མ་སྡུད་ཐུབ་ཚོད་ཅིག་སྨིན་དབྲག་ཏུ་བསྡུས་ནས་ཅི་ཡང་མི་སྨྲ་བར་བསྡད་འདུག

ཉིན་འདིའི་ཉི་མ་ནུབ་རི་ལ་བཟུར་འདུགནུབ་ཁའི་འོད་མདངས་ཞན་པ་དདེ་དང་བསྟུན་ནས་རླུང་བུ་བསིལ་མོ་ཞིག་ཀྱང་ལྡང་ཡོང་། ཚེ་དཔག་སྐྱབས་ཀྱིས་ཏོག་ཙེ་གཞོགས་སུ་གཡུགས་ཏེ་སྐད་ངག་གཉོམ་པོས་ལ་གཞས་ཤིག་འཐེན་བྱུང་།

“ཡང་ཆུང་མ་དྲན་པ་ཨེ་རེད། ”ཐག་ཉེ་ས་ན་ཡོད་པའི་ཆོས་འཛིན་གྱིས་དེ་ལྟར་ཀུ་རེ་རྩེས།

ཚེ་དཔག་སྐྱབས་ཀྱིས་ལ་གཞས་ལེན་མཚམས་བཞག་ནས་ཁ་མ་གྲགས་པར་བསྡད་བྱུང་ལ། མིག་ཟིམ་ཟིམ་གྱིས་ཐག་རིང་གི་ཕྱི་ཕྲེང་ནང་ཕྲེང་དུ་བསྟར་པའི་རི་སྒང་དག་ལ་བལྟས་ནས་བསྡད་བྱུང་། ཁོའི་ཁ་སྣ་ཚང་མ་ཧ་ཅང་བཞུན་མོ་ཞིག་ཏུ་སྣང་ཡང་།   གདོང་ལ་སྡུག་ཉམས་ཞིག་མངོན་ཡོད་པས་རྒས་མདོག་ཅིག་ཤར་ཡོད། དེར་ཆོས་འཛིན་གྱིས་ཀྱང་རྩྭ་རྐང་ཞིག་ལྡོད་བཞིན་ཁོའི་མཐོང་ལམ་དེད་ནས་རྒྱང་རིང་ལ་བལྟས་ཤིང་། ཡིད་ལ་ཐག་རིང་གི་ཐག་རིང་དང་དེའི་ཐག་རིང་གི་ཐག་རིང་ནི་ཅི་འདྲ་ཞིག་ཡིན་ནམ་སྙམ་པ་དང་། ཐག་རིང་ལ་མཐའ་ཞིག་ཡོད་དམ་སྙམ་ཡང་ཚུལ་དེ་ཡིད་ལ་འཁོར་ཐབས་བྲལ་པས་འཆར་སྒོའི་མཚམས་བཅད། ཅུང་འགོར་རྗེས། ཚེ་དཔག་སྐྱབས་ཀྱིས་གཞོགས་ཀྱི་ཏོག་ཙེ་ཡར་བླངས་ཏེ་

“ངས་ད་ལོར་སྦག་སྦག་འཁོར་ལོ་ཞིག་ཅིས་ཀྱང་ཉོ་རྒྱུ་ཡིན”ཅེས་བརྗོད་བཞིན་ས་སྤོར་ནས་གཞན་ཞིག་ཏུ་བུད་སོང་།

ནུབ་ལ་བཟུར་པའི་ཉི་འོད་ཀྱིས་ཚེ་དཔག་སྐྱབས་ཀྱི་གྲིབ་གཟུགས་ཇེ་རིང་དུ་བསྲིངས་འདུགཁོའི་སྣང་བརྙན་གྱི་ཕ་རོལ་ན་མཐོ་སྒང་གི་ཡུལ་ལྗོངས་ནི་རྒྱ་ཆེ་ཞིང་གྲགས་འགུལ་མེད་པར་གནས་ལ། ཆོས་འཛིན་གྱིས་ཚེ་དཔག་སྐྱབས་ཀྱི་རྒྱབ་གཟུགས་ལ་མིག་སྐྱེལ་བྱེད་དུས་དབང་མེད་དུ་དེའི་ཆུང་མའི་སྙིང་དུ་སྡུག་པའི་བཞིན་རས་ཡིད་ལ་འཁོར་བྱུང་། དེ་ནས་ཡང་སྦག་སྦག་འཁོར་ལོར་ཞོན་རྒྱུར་དགའ་བའི་སྡེ་བའི་སློབ་ཆུང་དགེ་རྒན་འབྲུག་ཐར་ཡང་དྲན་པ་དང་། གཉིས་ཀའི་བར་གྱི་མི་ཁ་མང་བོ་ཞིག་ཀྱང་མཐུད་ནས་དྲན་འོང་མོད། ཨེ་བདེན་མི་བདེན་སྙམ་ནས་ཐེ་ཚོམ་ཞིག་ཀྱང་སྐྱེས་བྱུང་།

གསུམ་པ།

རི་མཐོན་པོ་གྲིབ་སོས་གཡོགས་དུས། འབུ་རྐོན་རྣམས་གཞི་ནས་གུར་ནང་དུ་ལོག ཁོ་ཚོའི་གུར་ནི་གུར་ཅེས་མིང་དུ་བཏགས་པ་ཙམ་མ་གཏོགས།    དོན་དངོས་སུ་ཚོང་རྭ་ནས་རིན་གོང་དམའ་བའི་འགྱིག་ཤོག་ཐར་ཆེན་པོ་ཞིག་ཉོས་ཡོང་རྗེས།  ཐང་བདེ་ས་ཞིག་ལ་ཨུ་ཚུགས་ཀྱིས་ཕུབ་ནས་ལུས་འཛུལ་ས་ཙམ་བཟོས་པ་ཞིག་རེད། དགོང་ཟས་ཟས་ཚར་རྗེས། མིག་གསུམ་པ་དང་བུ་མོ་དེ་གཉིས་ཁོ་ཚོའི་གུར་འགྲམ་ལ་ཡོང་། དེ་དུས་ཁོ་ཚོས་ཐབ་ཀྱི་ཞི་ལ་ཉེ་བའི་མེ་རོ་བསྐོར་ཏེ་ཁ་བརྡ་བྱེད་བཞིན་ཡོད་ཅིང་། ཏག་ཏག་མགོ་བདག་ཚང་གི་ཉིན་དཀར་ལུག་འཚོ་བའི་བུ་མོ་དེས་ཀྱང་ཞོ་ཟེའུ་གང་ཁྱེར་ཡོང་པས། རྒྱ་རིགས་བཟའ་ཟླ་གཉིས་ཀ་ཡང་དེར་འདུས་ནས་ཚང་མས་ཞོ་འཐུངས། ཞོ་འཐུང་སྐབས། ཆོས་འཛིན་སོགས་ཀྱིས་བུ་མོ་དེར་ཆགས་གཏམ་འདྲེས་མའི་ཀུ་རེ་སྣ་མང་རྩེས་པ་ལ། བུ་མོ་དེ་ཡང་ཁ་རྒོད་པོ་ཞིག་འདུག་པས་གཏམ་མཚར་པོ་རེ་བཤད་ནས་ཚང་མ་ཧབ་ཆ་དི་རེར་སོང་བ་ན། རྒྱ་རིགས་བཟའ་ཟླ་གཉིས་ཀས་ཅི་ཡང་གོ་མི་འདུག་ནའང་ཁོ་ཚོའི་ཉམས་ལ་བལྟས་ནས་གད་མོ་བསླུག་བསླུག་དགོད་པར་བྱེད། མིག་གསུམ་པ་ནི་ཐེངས་འགར་ཁོ་ཚོའི་ཀུ་རེའི་ཁྲོད་དུ་བསྲེ་རྩིས་བྱས་ཀྱང་། དེ་ཚོ་ལྟར་རང་བྱུང་གི་མཚར་གཏམ་ལག་པས་ཐལ་མོས་རྡེབ་དགོས་པ་ཞིག་དང་གྲོད་པ་ལག་པས་བསྐྱོར་ནས་དགོད་དགོས་

  • 顶 0