འཆི་མེད་མགོན་པོ།

འདི་ལ་ཕ་ཞེས་འདི་ལ་མ་ཞེས་པའི།།

ཐོག་མའི་སྐད་ཀྱི་དགེ་རྒན་ཕ་མ་གཉིས།།

འདི་ལ་ཀ་ཞེས་འདི་ལ་ཁ་ཞེས་པའི།།

ཡི་གེ་སློབ་པའི་དགེ་རྒན་དུ་མ་དང་།།

མིང་གི་རྣམ་གྲངས་ཚིག་གི་སྡེབ་སྦྱོར་སོགས།།

ཚིག་འཁྲུལ་གཅོད་པའི་སྒྲ་རིག་སློབ་དཔོན་ཚོ།།

ཕས་རྒོལ་བཟློག་དང་འདི་ཕྱི་བདེ་བའི་ལམ།།

གཏན་ཚིགས་ནང་དོན་རིག་པའི་མཁན་པོ་མཆོག།

འཇིག་རྟེན་རི་མོའི་ལམ་གྱིས་གསལ་བྱས་པའི།།

བཟོ་རིག་སྒོ་མོ་འབྱེད་པའི་དགེ་རྒན་སྟེ།།

བདག་ལ་མགོན་དུ་གྱུར་པའི་དམ་པའམ།།

འབྲེལ་ཐོགས་དྲིན་དུ་ལྕི་བའི་དགེ་རྒན་གཙོས།།

ས་སྟེང་དགེ་རྒན་བཟང་པོ་སྤྱི་ཡོངས་ལ།།

དུས་ཆེན་བསུ་ཞིང་ཤིས་ཚིག་བཟང་པོ་ནི།།

སྲོལ་རྒྱུན་སྐྱོང་དང་གསར་གཏོད་ཡིད་སྨོན་པོ།།

དུས་གཅིག་སྤེལ་བའི་རླབས་ཆེན་མཛད་བཟང་ཁྲོད།།

ཁྱེད་ཅག་སྐུ་ངལ་ཆེ་བར་མ་གྱུར་ཏམ།།

དེ་རིང་སྐུ་ཐུགས་ལྷོད་ལྷོད་བཞུགས་པའི་ངང་།།

དགྱེས་པའི་དཔལ་ལ་རོལ་ཅིག་འབྱུང་འགྱུར་ལ།།

འཕྲིན་ལས་དབྱར་མཚོའི་དཔལ་དང་གཉིས་མེད་པའི།།

གུས་པས་མཆོད་བསྟོད་སྨོན་ཚིག་ལྷན་དུ་སྤེལ།།