༄༅།། དེ་རིང་གི་ཆར་བ། 

　　    རྩོམ་པ་པོ། ཙ་སུར་སྦྱིན་པ། 

　　དེ་རིང་གི་ཆར་བ། 

　　དེ་རིང་གི་ཆར་བ་ཉི་མ་བླ་བྲང་ལ་བབས། 

　　ཉི་མ་བླ་བྲང་ལ་ཟགས་པའི་ཆར་བས། 

　　ས་རྡུལ་གྱི་རླུང་འཚུབ་ཁད་ཀྱིས་མིད་ཅིང་། 

　　དྭངས་གཙང་གི་དཔྱིད་དཔལ་ཞིག་མགྲོན་དུ་བོས། 

　　དེ་རིང་གི་ཆར་བ། 

　　དེ་རིང་གི་ཆར་བ་ས་ཆེན་པོར་བབས། 

　　ས་ཆེན་པོར་བབས་པའི་ཆར་བ་འདིས། 

　　ཐང་སྟོང་སྐྱ་བོ་དྲོད་ཀྱིས་འཚོད་པའི་ཡུལ་གྲུ་ལ། 

　　ཚ་གྲང་སྙོམས་པའི་རིན་ཆེན་གཏེར་མཛོད་ཅིག་འཁྲུངས་སུ་བཅུག 

　　དེ་རིང་གི་ཆར་བ། 

　　དེ་རིང་གི་ཆར་བ་ངའི་སེམས་ཁམས་ལ་བབས། 

　　ངའི་སེམས་ཁམས་ལ་བབས་པའི་ཆར་བ། 

　　ལྷོད་ཡངས་དང་ཞི་འཇམ་གྱིས་ཕེབས་དུས། 

　　ཁྱེད་ཀྱི་སྨོན་འདུན་ཁྲི་ཕྲག་འགྲོ་བ་འདིའི་འཛད་མེད་ལོངས་སྤྱོད་ཅིག་ཏུ་གྱུར་ཟིན། 

　　ཆར་བ་ཡ་ཆར་བ། 

　　སྨོན་ལམ་དང་རེ་བ་གྲངས་མེད་ཀྱི་ལྟེབས་ཁུག་ནས། 

　　རིགས་ཞེན་རྒོད་པོ་ཚོའི་ལྷད་མེད་ཀྱི་རུས་རྐང་དཀར་བོ་དེ། 

　　ལག་ཏུ་བླངས་ཤིང་རྒྱན་དུ་ཁུར་ནས་ནམ་ཡང་ཁྱོད་ཀྱི་གསོལ་སྟོན་ལ་བསྲིངས་ཡོད།།