༄༅།། ཉིན་གཅིག་གི་སྙན་ཚོམ། 

　　              རྩོམ་པ་པོ། བིས་མདོ་བ་ཆོས་སྐྱོང་། 

　　༡ ཉུང་བའི་མཐའ། 

　　ཉི་མ་སྔར་བཞིན་མགོ་ཐོག་གང་ཞིག་ན་འགྱིང་འདུག 

　　ང་རང་སྔོན་ཆད་སྦྲ་ནག་གཟིམ་མྱོང་སའི་ས་དེ་ན་ལངས་ཡོད། 

　　ངས་ད་དུང་བོད་ཡིག་ཅེས་པའི་སྨྱུ་གུ་ཞིག་འཆང་ཡོད། 

　　ངས་ད་དུང་བོད་སྐད་ཅེས་པའི་སྙིང་གཏམ་ཞིག་རུམ་ཡོད། 

　　ས་ཆེན་པོ་འདི། 

　　ཤོག་བུ་དཀར་བོ་ཡུག་ཅིག་ཡིན་པའི་སྣང་བ་ཞིག་ཡོད་ཆོག་ན། 

　　འབྲོང་བསྡད་མྱོང་བའི་ས་འདི་ན། 

　　རྟ་འཚེར་མྱོང་བའི་རི་ལུང་འདི་ན། 

　　འབྲོང་གཡག་གི་རྫི་བོ་བྱས་མྱོང་བའི། 

　　རྟ་མཆོག་གི་སྒ་སྟེང་མནན་མྱོང་བའི། 

　　ཞལ་དཀར་གྱི་མི་འདི་དག་དང་། 

　　སྨྱུ་གུ་འཆང་མཁན་གྱི་མི་ཇི་འདྲའི་མང་ཨང་། 

　　བོད་ཡིག་འདི་རྒྱན་ཆ་ཞིག་ཡིན་སྲིད་ན། 

　　སྨྱུ་གུ་འཆང་མཁན་གྱི་མི་དག་གི་གྲས་ན། 

　　རྒྱན་ཆ་འདི་བཏགས་ཡོད་མཁན་དུ་ཡོད་ཨང་། 

　　ཉུང་བའི་མཐའ་ན། 

　　ཀ་ཁའི་རོལ་དབྱངས་ལ་མིག་ཆུ་འཁྱིལ་འདུག 

　　ཉི་མ་ནམ་ཞིག་ལ། 

　　སྦྲ་ནག་གཟིམ་མྱོང་ས་འདི་ནས། 

　　བོད་ཡིག་གི་རྐང་རྗེས་འདི་ཡང་། 

　　རྟ་རྒྱུག་ཐང་དང་མཉམ་དུ་བྱེ་ཀླུང་ལ་འཐིམ་མམ། 

　　༢ རྩོད་པའི་སྙིང་། 

　　རྩོད་པ་ལ་སྙིང་རྗེ་མེད་ཨང་། 

　　དེ་ལ་མ་ཡིན་ཡིན་མདོག་གི་དཔའ་ཞིག་མངའ་འདུག 

　　ལོ་རྒྱུས་ལས་བོར་བའི་མིང་བྱང་གང་ཞིག 

　　རྩོད་པར་དགའ་བའི་ཁོང་ཚོས་རྙེད་འདུག 

　　ཚིག་མཛོད་ནས་དོར་བའི་ཡིག་འབྲུ་གང་ཞིག 

　　རྩོད་པ་ཅན་འདིས་ཐང་ནས་བླངས་ཤིང་ཐོད་ལ་བཀུར་འདུག 

　　ཐ་ན་རྩོད་པ་ཅན་འདིས། 

　　རང་གི་མིང་ཡིག་ཀྱང་། 

　　མ་ཡིན་ཡིན་མདོག་གི་རྩོད་པ་དང་འདྲ་བར། 

　　ནང་སྙིང་མེད་པའི་ཁོག་སྟོང་དུ་བསྐྱུར་འདུག 

　　ང་ཚོས་ཁོང་ཚོར་སྙིང་རྗེ་འོས། 

　　ཚིག་མཛོད་ལ་མ་ཤོང་བའི། 

　　མིང་ཡིག་ཁོག་སྟོང་ཅན་འདི། 

　　མི་ཤེས་ཤེས་མདོག་དང་མ་ཡིན་ཡིན་མདོག་གི་རྩོད་པ་འདིའི་འགྲམ་ལྕག་ཡིན་ལ། 

　　ང་ཚོར་འགྲམ་ལྕག་ཀྱང་ཅི་ལ་མིན་ཨང་། 

　　༣ གོམས་པའི་ལམ། 

　　ལམ་བུ་འདི་ཉག་ག་ཞིག་ལ་འཐེན་འདུག 

　　ལམ་བུ་འདི་ཟོག་ལམ་ཞིག་ཀྱང་ཡིན་འདུག 

　　ཁོད་ཡངས་ཤིང་སྤུས་ལེགས་པོའི་ལམ་བུ་ཞིག 

　　གོམས་གཤིས་ལ་འཁྱུད་པའི་མི་དག་གིས། 

　　འཇོར་དང་ལྕགས་ཁེམ་མི་མཁོ་བར། 

　　གང་འདོད་དང་མཁས་ཚུགས་ཀྱི་སྨྱུ་གུ་ཕྲ་མོས་གཤིག་ཚར། 

　　ད་ནི་ཁ་ཁུ་མི་སྙོམས་པའི་ལམ་ཞིག་ཏུ་གྱུར་འདུག 

　　ཁོ་རང་ཚོས་མིག་ཟུང་རྒྱང་ལ་བལྟས་མི་འདུག 

　　རྡོག་སྣེ་དང་ཟོག་རྗེས་གཅིག་པུ་དེར་བལྟས་འདུག 

　　ཁོ་རང་ཚོས་སྨྱུ་གུ་ཕྲ་མོ་དེ་ད་རུང་བཟུང་ཡོད། 

　　བུ་དང་ཚ་བོ་ལ་ལེགས་སྐྱེས་སུ་འབུལ་བརྩིས་ཀྱང་ཡོད་འདུག 

　　༤ འཁྱག་པའི་སེམས། 

　　ཁ་བ་རླུང་འཚུབ་དང་མཉམ་དུ་བབས་ཚར། 

　　སུ་ལ་ཡང་གྲང་གྲང་སྙམ་པའི་སྣང་བ་ཞིག་ཡོད་འདུག 

　　ལྕགས་ཐབ་ལ་ཨོང་བ་རབ་དང་རིམ་པ་བཞག་ཚར། 

　　ད་རུང་གྲང་གྲང་ཞིག་ཏུ་སྣང་ཨང་། 

　　སེམས་པ་མིག་ཆུ་དང་འདྲ་བར། 

　　སེམས་ཁུར་དང་མཉམ་པར། 

　　ཁ་བ་ལས་ལྡབ་འགྱུར་གྱི་འཁྱག་ཨང་། 

　　དགོད་སྒྲ་ཡིས་རལ་གྲི་ཐོགས་ཏེ། 

　　བོད་ཡིག་དང་མཉམ་དུ། 

　　ཡིག་ནོར་དང་མཉམ་དུ། 

　　རྩོད་པའི་སྙིང་ནས་ཟགས་ཤིང་། 

　　ཉུང་བའི་མཐའ་ན་ལུས་པའི། 

　　གོམས་པའི་ལམ་ནས། 

　　འཁྱག་པའི་སེམས་ལ་འཚང་ཐལ། 

　　༥ ཚོར་བའི་རྣག 

　　ཚོར་བ་རྣག་འདུག 

　　འགྲམ་ལྕག་ཚ་ཐག་ཆོད་པ་དེས་ཀྱང་། 

　　ཞལ་དཀར་ཚོ་དང་མཉམ་པའི་མི་དག་སློང་མ་ཐུབ། 

　　ང་སྔར་བཞིན་ཁེར་རྐྱང་དུ་ལུས། 

　　ཁེར་རྐྱང་ནི་ཚོར་བའི་བྲང་གཞུང་གི་ནུ་འབུར་ཞིག་རེད 

　　མཁྲང་ཞིང་ཟླུམ་པ་དེ། 

　　སྐྱིད་སྡུག་གི་རེག་བྱའི་ཚོར་བ་ཞིག་ཨང་། 

　　ཚོར་བ་རྣག་འདུག 

　　རང་ཉིད་ཀྱང་བོར་འདུག 

　　ཤ་ཚ་ཡི་པང་ནས་འཐོར་བའི་ཀི་སྒྲ་དེ་ཐོས་མ་སོང་། 

　　ཁོ་ཚོ་ཡང་བསྐྱར་གཉིད་སོང་། 

　　ཁྲག་རུལ་ནས་རྣག་བར་དུ་གཉིད་སོང་། 

　　ད་ནི་སེན་ཏོག་བྱེད་ཀྱང་། 

　　ཚོར་བ་ཞིག་ཡོད་ཚོད་མ་རེད། 

　　༦ ཆད་པའི་ལྕེ། 

　　ངག་ལྐུགས་པ་ནི་དུངས་དྲགས་པས་ཡིན་འདུག 

　　ལྕེ་ཆད་པ་ནི་དྲན་པའི་གཏིང་གི་ཞེན་ཆགས་ཤིག་ཡིན་འདུག 

　　དམུ་ཐག་གི་ལོ་རྒྱུས་གང་ཞིག་ནས་ཆད་སོང་། 

　　ལྷོག་ལྷོག་ཏུ་བཞུར་མྱོང་བའི་ཆུ་མིག་དེ་ཡང་ནམ་ཞིག་ལ་ཆད་སོང་། 

　　ད་ནི་ངག་ནས་ཅི་ཞིག་སྨྲ་འདོད་ཡོད་ཀྱང་། 

　　ཞལ་དཀར་ཚོའི་འཛུམ་མདངས་ཀྱི་རལ་གྲིའི་སོ་ཁ་ནས། 

　　ལྕེ་ཆད་སོང  ངག་ལྐུགས་སོང་། 

　　ད་ནི་ང་ལ་ཅི་ཡང་ལྷག་མེད། 

　　བཤད་པའི་ལྕེ་མེད། 

　　ངུ་བའི་ངག་མེད། 

　　ཐ་ན་ཞེ་མཐུན་གྱི་རོགས་ལོ་ཞིག་ཀྱང་མེད།།