རབ་སྙན་གསུང་གི་རོལ་མོ་འཕོས་པའི་རྒྱུད།   །སྟོང་ལྡན་པི་ཝང་བེ་ཟླུའི་རང་བཞིན་ཅན།   །ཡུན་ཐུང་ཞིག་ལ་བདག་གི་ཕང་བ་རུ།   །གཡར་བར་འཚལ་ལོ་བཅོམ་ལྡན་མ་གཅིག་ཀྱེ།   ། 

　　དེ་ཡི་སླད་དུ་ཚངས་སྲས་མ་ཁྱོད་ལྟར།   །ཡིད་འཕྲོག་ཙོག་པུའི་འདུག་སྟངས་སྔོན་བཏང་གིས།   །སྙིམ་པར་སྦྱར་བའི་ཐལ་མོ་མཐོར་བཏེགས་ཏེ།   །གུས་པས་ལེན་པར་ཆས་སོ་དབྱངས་ལྡན་མ།   ། 

　　དེ་ཡི་མོད་ལ་ཕང་འགྲོ་རྒྱུད་སྟོང་ཅན།   །རེག་པ་ཙམ་གྱིས་འཇིག་རྟེན་མྱོས་པའི་དབྱངས།   །དབང་མེད་འབྱིན་པར་རྩོམ་པ་ཐོབ་དང་ལྷན།   །ལག་སོར་དལ་བའི་གོ་སྐབས་རིང་དུ་དབེན།   ། 

　　ཨེ་མ་མཚར་སྡུག་རྣ་བའི་བཅུད་འཕྲོག་ཅིང༌།   །དོན་བཟང་སྒྲ་སྙན་རྒྱ་མཚོའི་སྙིང་པོས་ཕྱུག །སྐལ་བཟང་རྣ་བ་དོན་དང་ལྡན་སླད་དུ།   །ཡུད་ཙམ་གསན་པར་རིགས་སོ་ཤེས་ལྡན་དག ། 

　　                     རྩོམ་པ་པོ།  ཆེ་ཏན་ཞབས་དྲུང༌།