མིག་གསར་བ། 

                                                ངག 

                                              རླུང་བུ་ཞིག་དང་མཉམ་དུ་འགྲོགས་ཏེ། ། 

                                              རྩྭ་སྐྱ་ཞིག་ལ་སྐོར་ར་བྱས་པས། །  

                                              སྐོར་ལམ་དེ་དང་ངག་གིས་ལབ་མོལ། ། 

                                              འཇིག་རྟེན་མི་ལ་གད་མོ་ཤོར་བ། ། 

                                              སྤྲིན་དཀར་ཞིག་དང་མཉམ་དུ་འཕྱོ་སྟེ། ། 

                                              སེམས་པ་ཞིག་དང་མཉམ་དུ་འཁྱམས་པས། ། 

                                              ངག་ལ་འབྱོར་བའི་སྡེབ་པས་དབྱངས་ཤིག ། 

                                              མཐོ་རེངས་སྐར་ཆེན་དེ་ལ་སྐུལ་འབོད། ། 

                                              གཟུགས་རུས་ཤིག་གི་ཤོག་གིས་སྟེང་དུ། ། 

                                              ངག་གི་རི་མོར་འབྲི་བར་བྱས་པས། ། 

                                              འགྲིན་པའི་རྟ་ཕོ་སྐྱ་རེངས་གཏད་དེ། ། 

                                              ཨ་ཇོར་སེམས་ཀྱི་ངག་ཏེ་བཀུར་བ། ། 

                                              དད་འདུན་ངག་གི་མིག་ཆུ་བཞུར་སོང་། ། 

                                              ངག་དང་དར་ཆའི་བྱ་ཕོ་འཕུར་ཡོད། །

2015/11/26 

                                            སེར་ཤུལ་གྱི་མཚན་མོ་དེར། 

                                           སྤང་ཐང་ཡངས་བའི་སྟེང་སྤྲིན་དཀར་གྱིས་རྒྱན་ཏེ། ། 

                                           བྱིའུ་དཀར་པོ་ཞིག་འཕུར་ཏེ་སྒྲོ་ཞིག་ལྷག་པ། །  

                                           སྒྲོ་སྤུ་འཇམ་པའི་གྲུབ་གཟུགས་ཡིད་ལ་རྔམ་སྟེ། ། 

                                           རྒྱང་རིང་བྱིའུ་ལུས་དེ་ཇི་འདྲ་ཞིག་སྙམ་མོ། ། 

                                           བྱིའུ་སྒྲོའི་དྲི་དང་འགྲོགས་ཏེ་བྱིའུ་ཞིག་བཙལ་པས། ། 

                                           རླུང་གི་ཁམས་དང་འགྲོགས་ཏེ་མཁའ་ལམ་ཅེར་རོ། ། 

                                           བྱང་ཕྱོགས་རྒྱང་རིང་གི་དྲི་ཞིམ་དེ་འཚོལ་བས། ། 

                                           ལས་དབང་སྐར་གྱི་གནམ་ངོ་འུར་གྱིས་བཟུང་བ། ། 

                                           སྒྲོ་སྤུའི་དྲི་དང་འཇམ་གྱིས་གཉིད་ལོག་བྱས་སོ། ། 

                                           བྱིའུ་སྤུ་ཞིག་རྨི་ལམ་རུམ་ལོག་ཏུ་འཚོལ་ལོ། །

                                                                          2015/11/30 

                                            རྨི་ལམ་གྱི་ངོགས། 

                                           དབྱར་གྱི་མེ་ཏོག་བཀྲ་བས་མཛེས། །  

                                           ཡིད་དུ་ལྷུང་བ་མངོན་པར་བཞད། ། 

                                           ཆར་ཆུ་ངོགས་ཀྱི་བུ་མོ་ཞིག ། 

                                           རྨི་ལམ་ངོགས་སུ་མཛེས་པར་འཁྲུངས། ། 

                                           སྔོ་བསངས་ནམ་མཁའ་ཡངས་ཤིང་ཆེ། ། 

                                           རྨི་ལམ་ངོགས་ཀྱི་བུ་མོ་ཁྱོད། ། 

                                           སྤྱན་ཡངས་ཡིན་གྱི་བྱ་བ་དེ། ། 

                                           ལང་ཚོའི་ངོགས་ལ་རྒྱན་འདོགས་འདྲ། ། 

                                           གཏམ་སྙན་མོལ་བ་ལང་ཚོའི་གླུ། ། 

                                           ཕན་ཚུན་མཐུན་པ་བྱིའུ་ཆ་གཅིག ། 

                                           ཇི་སྙེད་ཚོགས་བཀྲའི་འཇིག་རྟེན་དུ། ། 

                                           རྨི་ལམ་ངོགས་ཀྱི་ལྷ་མོར་བསྔགས། །

                                        སྤྲིན་གྱི་མེ་ཏོག་གི་གསེབ་ན་སྙན་ངག་ཡོད། 

                                           སྤྲིན་གྱི་བར་གསེབ་གི་འོད་ལམ་དེ་ན། །  

                                           སྙན་ངག་བྲིན་ཟིན་གྱིས་ལོ་ཟླ་འཕྲོས་འདུག ། 

                                           མེ་ཏོག་དཀར་དམར་གྱི་སྤྲིན་གསེབ་དེ་ན། ། 

                                           ཆར་ཆུ་ན་ཟུག་གི་ངོགས་སུ་འདྲེས་ཡོད། ། 

                                           སྤྲིན་པ་ལྷད་མེད་ཀྱི་གོང་རིམ་བརྩེགས་དུས། ། 

                                           ལོ་ཟླ་རིང་མོ་ཡི་གཏམ་རྒྱུད་གྱེར་ཡོད། ། 

                                           མེ་ཏོག་དཀར་དམར་ཞིག་གནམ་ནས་ལྷུང་དུས། ། 

                                           སྙན་ངག་བྲིས་ཟིན་གྱི་གླེགས་བམ་འཐོར་འདྲ། ། 

                                           སྤྲིན་གྱི་མེ་ཏོག་གི་འཛུམ་འཛུམ་འཕྲོས་དུས། ། 

                                           ལུས་ཀྱི་ཤ་ལེབ་ཀྱིས་གཤོག་པ་བརྐྱངས་འདྲ། ། 

                                           སྙན་ངག་དུང་ཞེན་གྱི་ལོ་ཟླ་རེ་རེར། ། 

                                           སྤྲིན་གྱི་ཚོར་རླབས་ལ་སྙན་ངག་བྲིས་ཡོད། ། 

                                           སྤྲིན་གྱི་བར་གསེབ་དུ་མེ་ཏོག་བཞད་པས། ། 

                                           སྙན་ངག་སྡེབ་སྦྱོར་གྱི་གཞི་རྐང་བཙུག་ཡོད། ། 

                                           སྤྲིན་གྱི་འཕྱོ་ལྡིང་གི་ཡར་མར་ཞིག་སྟེ། ། 

                                           སྙན་ངག་ཚོར་བྲིས་ཀྱིས་ཟིན་ཐོ་བཀོད་ཡོད། ། 

                                           དྲན་གདུང་སེམས་འཚོལ་གྱི་མེ་ཏོག་བཞད་ཡོད། ། 

                                           སྙན་ངག་རྐང་གཅིག་དེ་སྤྲིན་གསེབ་ཡོད་དོ། ། 

                                           ཐོ་ཡོར་གཟུགས་བཅོས་ཀྱིས་ཉི་འོད་འཚེར་ཏེ། ། 

                                           སྤྲིན་གྱི་མེ་ཏོག་དེས་མེ་ཆར་བབས་ཡོད། །

                                         དྲན་པའི་གདུང་དབྱངས། 

                                          སྐྱབས་མེད་སློབ་བུ་འགའ་ཞིག་མཉམ་དུ་ལས། །  

                                          ངག་ནས་བྱུང་བའི་སྨྲེང་གླུ་མཉམ་དུ་སྒྲོགས། ། 

                                          དྲན་པའི་གདུང་འབོད་ཁྲོད་དུ་དབྱངས་ཤིག་དཀྲོལ། ། 

                                          བླ་རྣམ་ཁོང་དུ་ཆུད་པར་འགུར་བར་བྱེད། ། 

                                          གླིང་གིའི་མཛེས་སྡུག་གསོན་པོ་མི་ཡུལ་གྲགས། ། 

                                          མུན་པའི་སེམས་པ་གཉོམ་པོ་མཐའ་ན་ལྷག ། 

                                          སྐར་ཚོགས་ལུག་ཁྱུར་འདྲ་སྟེ་ཇི་འདྲའི་མཛེས། ། 

                                          ཟླ་བ་ཁེར་བུར་རྒྱུ་བས་མཚན་མོ་སྐྱོ། ། 

                                          ཉི་འོད་འཚེར་བ་མེད་པའི་ཀྱེ་མ་མུན། ། 

                                          སླར་ཡང་འོད་སྟོང་འཕྲོས་པར་རེ་སྒུག་ཆེ། ། 

                                          ཡིག་འབྲུ་ཀ་ཁའི་དབྱངས་རྟ་དཀྲོལ་ཐེངས་རེར། ། 

                                          ཚིག་འབྲུ་བླ་མའི་ཞལ་ཆེམ་བློ་རུ་སྦྲུམ། ། 

                                          མུན་པའི་ཁྲོད་དུ་གསལ་བའི་འོད་ཟེར་རེར། ། 

                                          ཉིན་མཚན་མགོ་མཇུག་ལོག་པར་སྒུག་རྩིས་ཡོད། ། 

                                          གདམས་ངག་ཡིད་དུ་འཛིན་པར་ཕྱིར་འབྱོན་བྱས། ། 

                                          འཇིག་རྟེན་མུན་ནག་ཁྲོད་དུ་འོད་འབྲུ་རྙེད། ། 

                                          གསལ་ཚེས་མཁའ་རུ་བྱོན་པར་སློབ་མས་བསྒུག།།

                                                           2015/11/18 

                                            འབྲོང་གཡག་གི་ངུར་སྒྲ། 

                                           གངས་ཅན་པའི་འབྲོང་གཡག་རྒོད་པོ་དེ། །  

                                           ངུར་སྒྲ་ཡི་གདུང་འབོད་ཁྲོད་དུ་ལས། ། 

                                           རི་སྒང་གི་འབྲོང་གཡག་བརྗིད་པོར་བཞུགས། ། 

                                           ས་མཐའ་ཡི་ཨ་ཇོ་ཕེབས་པར་བསྒུག ། 

                                           སྨྲེང་སེམས་ཀྱི་ན་བུན་སྙན་ངག་བསྒྱུར། ། 

                                           དད་འདུན་གྱི་མཆོད་སྤྲིན་ཁྱེད་ལ་ཚེས། ། 

                                           རེ་སྒུག་གི་རྩྭ་སྐྱའི་ཁ་དོག་འགྱུར། ། 

                                           དབུ་ནག་གི་སྐྲ་སྣེ་དཀར་པོར་ལོག ། 

                                           འབྲོང་གཡག་གི་ངུར་སྒྲ་རྫ་ཆུར་འགྲོགས། ། 

                                           ཨ་ཇོ་ཡི་ལས་དབང་གོས་དཀར་གཏད། ། 

                                           འབྲོང་གཡག་གི་ངུར་སྒྲ་རྫ་མགོར་སྒྲོགས། ། 

                                           ཕྱིར་ཚེས་ཀྱི་རྟ་བདུན་དབང་པོ་གང་། ། 

                                           ངུར་སྒྲ་དང་གདུང་འབོད་ནང་ནས་འཆར། །

                                                        2015/11/13 

                                            ཁ་བ་འབབ་ཐེངས་རེར། 

                                            ཁ་བ་མཐོ་སར་འབབ་པའི་དུས་སུ། །  

                                            ལོ་ངོ་གཉིས་ཀྱི་མི་ཞིག་ཕྱིར་སློང་། ། 

                                            ཁ་བའི་འདབ་མ་ལུས་སྟེང་ཆགས་ཏེ། ། 

                                            ཡིད་ཀྱི་ཀློང་ན་འབབ་ཐེངས་རེ་རེར། ། 

                                            རྣམ་ཤེས་རྐང་ངོར་མ་ཆགས་བུད་དེ། ། 

                                            དྲན་ཤེས་ཁྱེད་ཀྱི་སླད་དུ་སྨྱོས་པས། ། 

                                            སྙན་ངག་ཁ་བའི་ཐང་དུ་བྲིས་ཏེ། ། 

                                            ཁ་བ་རེ་རེར་ཕྱི་དྲན་ཆ་གཅིག ། 

                                            དགུན་གྱི་དུས་ཚིགས་ཁ་བ་བབས་ཏེ། ། 

                                            ཁ་བའི་མི་དང་ངེད་གཉིས་འགྲོགས་པས། ། 

                                            བྱ་ཁྱུད་དེ་དང་གླུ་ཞིག་མགུར་ཡོད། ། 

                                            དྲན་ཐེངས་དེ་དང་སྙན་ངག་གྱེར་བཞག ། 

                                            ཆགས་ཟིན་བརྩེ་བ་དྲན་ཐེངས་རེ་རེར། ། 

                                            ཁ་བའི་གཤོག་པ་དེ་དང་བསྐྱོད་དོ། །