སྤངས་རྟོགས་ཆ་ཤས་རྫོགས་པའི་དཀྱིལ་འཁོར་ལས།།
ཐུགས་རྗེ་བསིལ་བའི་ཟེར་ཕྲེང་འབུམ་འཕྲོ་བའི།།
དགེ་ལེགས་ཨུཏྤལ་གྲོལ་བའི་གཉེན་གཅིག་པུ།།
འདྲེན་མཆོག་ལྷ་ཡི་ཡང་ལྷ་དེ་ལ་འདུད།།

རྒྱལ་ཀུན་མཁྱེན་པའི་ཆུ་གཏེར་ལས་འཁྲུངས་པའི།།
ཀུན་རྨོངས་དབུལ་བ་སེལ་བ་ན་གའི་རྒྱན།།
མཚམ་སྤྲིན་གསར་བའི་མདངས་ཀྱིས་སྒེག་པའི་ལྷ།།
ཟུར་ཕུད་ལྔ་པས་ཚེ་རབས་ཕྲེང་བར་སྐྱོངས།།

འཕོ་མེད་ཆོས་སྐུའི་རང་རྩལ་མ་འགག་པའི།།
བཅུ་དྲུག་ལང་ཚོ་ངོམ་པའི་ཆོ་འཕྲུལ་གྱིས།།
མི་རྟོག་ཡེ་ཤེས་གར་མཛད་འཇམ་དཔལ་དབྱངས།།
ཆགས་བྲལ་མལ་ལས་སློང་བའི་མགོན་དེར་འདུད།།

མེས་པོའི་བློ་ཡི་ར་བ་ལས་འགོངས་པའི།།
ཕྱོགས་དུས་རྒྱལ་བའི་འཕྲིན་ལས་གཅིག་བསྡུས་གར།།
ཞིང་འདིར་ངོམ་པའི་ཆེ་བ་མཐར་སོན་པ།།
བློ་བཟང་གྲགས་པའི་མཚན་འཆང་ངས་འདིར་བསྔགས།།

སྙིགས་ལྔའི་དགྲ་བོ་འཇོམས་ལ་མཐུ་བཙན་པའི།།
གསང་གསུམ་མཛད་བརྒྱའི་རོལ་རྩེད་གཅིག་གིས་ཀྱང་།།
འཇིག་རྟེན་འདུལ་བའི་མཁྱེན་པ་ལས་བརྒལ་བས།།
བྱིས་པའི་བློ་ཡི་བུམ་པར་ག་ལ་ཆུད།།

འོན་ཀྱང་དད་གསུམ་ཆུ་མཚོ་ལས་འཁྲུངས་པའི།།
སྙིམ་པའི་མེ་ཏོག་ཟུམ་པའི་རྒྱན་འཆང་སྟེ།།
རྒྱལ་སྲས་སྤྱོད་པའི་ནོར་རྩེན་གན་མཛོད་ལས།།
ཆ་ཙམ་བརྗོད་པ་བསོད་ནམས་བྱེ་བའི་ཕུལ།།
 
ཡོན་ཏན་རྒྱན་གྱིས་མཛེས་པའི་སེངྒེ་རྩེན།།
གང་ཁྱེད་ཞིང་འདིར་མི་ཡི་གར་བསྒྱུར་རམ།།
ཆོས་དོན་གནད་དུ་སྨིན་པ་ལ་བརྟེན་ནས།།
སུ་ཞིག་སྟོབས་བཅུའི་ལང་ཚོ་རྫོགས་པ་ཡིན།།

ཁོ་བོ་འདི་འདྲའི་ཤན་ལ་རབ་རྨོངས་ཀྱང་།།
ཁྱེད་ཀྱི་འཕན་མེད་མཛད་བཟང་གླེང་ཙ་ན།།
ལུས་མེད་སྙིང་ལ་མུན་པའི་ཁུར་བླངས་ཏེ།།
མདའ་ལྔའི་གྲོགས་དང་བྲལ་བའི་ནད་ཀྱིས་ཟིན།།

དུག་གསུམ་ལང་ཀའི་བདག་པོའི་མགྲིན་པ་ལ།།
འཁྱུད་པའི་དམ་ཆོས་གཞུ་འཛིན་རྗེ་བོའི་མཚོན།།
སྙིང་བོར་སྨོན་པའི་རྩེ་དགའ་ལ་ཆགས་པས།།
དཀར་མིན་བྲང་འགྲོའི་མདུད་པ་རང་སར་གྲོལ།།

མཁའ་གླིང་དལ་གྱིས་བགྲོད་པའི་ཕང་བ་ནས།།
སྤྲིན་གྱི་ལྕུག་མ་དགོད་པའི་རྗེས་འགྲོ་བའི།།
མི་རྟག་འཁོར་བའི་དཔལ་གྱི་སྐྱེ་བས་མཐོ།།
ངེས་འབྱུང་མཚམས་ལྡན་མ་ཡི་མཛའ་བོ་ཉིད།།

འདི་སྣང་སྲིན་མོའི་མལ་དུ་གནས་འཆའ་བའི།།
འདོད་ཡོན་ནག་པོར་འཆར་བའི་མཚང་རིག་སྟེ།།
ཚངས་སྤྱོད་ཛམ་བུའི་རྐང་འཐུང་རྒྱས་པའི་ཚུལ།།
དགེ་ལེགས་བསིལ་བའི་ཡོན་ཏན་ལྷས་ཀྱང་གླེང་།།

མང་ཐོས་སིནྡྷུ་བདག་པོ་ལས་བྱུང་བའི།།
ལྔ་རིག་མཁྱེན་པའི་ཟླ་གཞོན་གསར་བའི་གཟི།།
འགྲན་པར་མ་ནུས་འོད་ཀྱི་ནོར་ཅན་ཡང་།།
བང་ལྡན་རི་ཡི་རྩལ་ལ་བརྟེན་ནས་བྲོས།།

བཀའ་བསྟན་མེས་པོའི་གཙུག་སྐྱེས་གཡོས་པ་ལས།།
བྱུང་བའི་དོན་བཟང་སྙིང་བོར་སྦྲུམས་པའི་ཆབ།།
གཅིག་ཏུ་འཁྱིལ་བའི་ལེགས་གསུང་གང་ག་མ།།
ལྷུག་པར་བབ་པས་ས་གསུམ་ཆོས་ཀྱིས་ཁྱབ།།

དོན་ཟབ་མཁས་བྱའི་རིན་ཆེན་རྒྱ་མཚོའི་གོས།།
དྲི་མེད་མཁྱེད་དཔྱོད་གོམ་སྟབས་གཅིག་གིས་ཀྱང་།།
གཞལ་བས་རིག་ཚུལ་ཀུན་ད་གྲོལ་བའི་གཉེན།།
ལེགས་བཤད་བཅུ་དྲུག་ཆ་ཅན་མཁའ་ནས་འཛུམ།།

འཇིགས་མེད་རྣམ་དཔྱོད་གཙུག་ཕུད་ལྔ་བ་ཡིས།།
དྲངས་བའི་བརྒལ་རྟགས་སྦར་མོའི་མཚོན་རྣོན་པོ།།
ཕས་རྒོལ་གཉིས་འཐུང་སྤྱི་བོ་ལ་བཀོད་པས།།
ལྟ་ངན་ཝ་སྐྱེས་སྲོག་ཀྱང་ལྟུངས་བར་བྱས།།
 
ཚད་མ་གསུམ་གྱི་མདའ་བསྐྱོད་ལ་བརྟེན་པའི།།
སྒྲུབ་དང་སུན་འབྱིན་དྲང་འགྲོ་འཕངས་གྲོལ་ཏེ།།
མ་རྟོག་མགྲིན་བཅུ་མགོ་བོ་དབྱིག་འཛིན་གྱི།།
པང་དུ་ལྷུང་བས་ལྷ་ཆེན་བྱིན་ཤ་འདར།།

ཤེས་རབ་མིག་སྟོང་པ་ཡི་ལག་ཉལ་གྱིས།།
མཐར་འཛིན་རི་བོའི་བགྲོད་བྱེད་ཀུན་བཅོམ་ཏེ།།
ངེས་དོན་ལྟ་བའི་ནགས་ཀློང་གཡོ་བའི་ཚུལ།།
དཔལ་ལྡན་ཀླུ་དབང་དགྱེས་པའི་མཆོད་སྤྲིན་ཉིད།།

མཐའ་བརྒྱད་དམ་བཅའི་སྣོད་དུ་ཤོང་མིན་པའི།།
བརྗོད་བྲལ་ཤེས་རབ་ཟབ་མོའི་མཐར་སོན་ཀྱང་།།
དང་པོའི་ལས་ཅན་ཚོགས་ལ་རབ་མཛེས་པའི།།
བདེན་སྟོང་བདུད་རྩིའི་འོད་ཀྱིས་སྣང་བར་བྱས།།

སྲིད་ལམ་དུབ་པ་དག་གི་ངལ་གསོའི་གནས།།
བསྟན་དང་སྟོན་པ་གཉིས་མེད་བདུད་བརྩིའི་མཛོད།།