རང་གི་ཉེས་ཚོགས་ལག་པས་འགེབ་བྱེད་ཅིང་།།            གཞན་གྱི་སྐྱོན་ཆ་ཁབ་ཀྱིས་འཚོལ་བ་ཡི།།

　　བདག་དང་བདག་འདྲའི་སྙིང་མེད་སེམས་ཅན་ཚོར།།          བླང་དོར་བློ་མིག་གསལ་བར་བྱིན་གྱིས་རློབས།།

　　འདི་ན་རང་གི་སྐད་གདངས་མི་ཤེས་པའི།།              མདོ་མེད་ཁྱི་ནག་ཚོགས་ཀྱི་འཚིང་ཁ་ལས།།

　　རང་སྐད་གསོང་པོར་བརྗོད་པའི་མི་བུ་ལ།།              ནམ་ཡང་གཙེས་པས་གཏམ་བརྗོད་འདི་ནས་གླེང་།།

　　ཡུལ་དང་དུས་ཀྱི་ཁྱད་པར་ཡིན་ནམ་ཅི།།               མི་ཆོས་རྩ་བ་གཏན་དུ་བྲལ་ལམ་ཅི།།

　　མི་ཡིས་ཁྱི་སྐད་སྒྲོག་པའི་ཅོལ་ཆུང་འགའ།།              ཁྱི་རྐུན་འོ་ཟངས་ཁ་ན་མཐུན་ནས་འདུག།

　　རྣམ་ཀུན་བཟའ་བཏུང་རྩེད་འཇོ་ཁོ་ནར་རོལ།།            དོན་མེད་ཅ་ཅོའི་ཉོག་གཏམ་ཅི་ཡང་འབྱིན།།

　　བག་མེད་འཚོ་བའི་ཁུག་ནས་ཁ་མཐུན་ཚེ།།              རང་གི་རིགས་ལ་ལྷག་པར་གནོད་དོན་ཅི།།

　　ལེགས་ཉེས་བླང་དོར་ཅི་ཡང་མི་ཤེས་པའི།།              ཁྲོམ་ཚོགས་དབུས་ན་བྱང་སེམས་ང་ཡིན་ཞེས།།

　　གཞན་ལ་སེམས་པར་རྫི་བའི་མིག་ཆུ་ཡང་།།              མགོ་སྒོག་སྐམ་པོའི་ནང་ནས་འབྱིན་དོན་ཅི།།

　　གཞན་ཕན་ལྷག་བསམ་བཟང་པོའི་རྩིས་ཟིན་ན།།            ཕན་པའི་བྱ་བ་སྣ་གཅིག་མི་སྒྲུབ་པར།།

　　མིག་ཆུ་ཁོ་ནས་གཞན་དོན་བྱེད་ནུས་པ།།               སྔར་མ་བྱོན་པའི་སངས་རྒྱས་ཡིན་ནམ་ཅི།།

　　གཉིད་དང་བཟི་ཡིས་ཁྱེར་བའི་གནས་སྐབས་ན།།            རང་གི་རིགས་ལ་དུང་བའི་ལ་རྒྱ་ཞེས།།

　　ཁུ་ཚུར་མཐོ་སར་བཏེགས་པའི་ལབ་རྡོལ་རྣམས།།            གཉིད་ལ་བསྐུར་རམ་ཆང་གིས་སྤོད་དེ་ཟོས།།

　　ཧ་ཅང་སྐྱིད་པའི་དུས་དང་སྡུག་པའི་དུས།།              འགྱུར་ལྡོག་གནམ་ས་གཡོ་བའི་ལས་བྱེད་ཀྱང་།།

　　དོན་ཆེན་རི་བོ་སྤོར་བའི་འདུན་ས་ནས།།               ཁྱི་ནག་ལབ་རྐྱལ་ཁྱོད་ཚོ་གང་དུ་སོང་།།

　　ས་ཆེན་གོམ་པས་གཞལ་བའི་སྙིང་སྟོབས་དང་།།             དོན་ཆེན་ཁུར་དུ་ལེན་པའི་སྤོབས་པ་སོགས།།

　　གང་ལའང་མེད་པའི་ཁ་ཕོ་སྟོང་བ་ཡིས།།               གཞན་ལ་རྒོལ་བའི་ནུས་པ་སྤུ་ཙམ་མེད།།

　　ལྷག་བསམ་དཀར་པོས་གཞན་དང་གཞན་དག་ལ།།           ཕན་པར་འདོད་པའི་བློ་དང་ལྡན་པ་ན།།

　　ཕྲ་ཞིང་ཕྲ་བའི་ལས་ཀྱིས་མགོ་བརྩམས་ཏེ།།             ཚུལ་ལྡན་ལས་སུ་ཞུགས་ན་མི་ཆོག་གམ།།

　　དྲང་བདེན་གནས་ལུགས་སྐྱོང་བའི་མཐུ་མེད་ཀྱང་།།          གཡོ་སྒྱུའི་དྲན་འཕྲུལ་ཀུན་ལ་མ་ལོབས་ནའང་།།

　　ཡང་དག་དུས་རབས་ཤིག་གི་རུ་དཔུང་དུ།།              ཞུགས་པའི་གོ་སྐབས་ནམ་ཡང་མེད་དམ་ཅི།།

　　རིགས་ལ་མི་ཞེན་དྲང་པོའི་ལམ་མི་འཚོལ།།              གནས་ལུགས་མི་བརྩི་ཁྱི་ཚོགས་ནང་དམུར་བྱེད།།

　　ངག་ནས་བདེན་བདེན་འདྲ་བ་མང་པོ་ལབ།།             འདི་དག་དོན་ལ་སྐྱག་རྫུན་མིན་ནམ་ཅི།།

　　གཅིག་གིས་བཟང་པོའི་ལག་པས་འཐེན་པ་ན།།            ཁ་ཅིག་ངན་པའི་རྐང་ནས་འདྲུད་པར་བྱེད།།

　　དེ་འདྲ་དེ་ལས་འབྲས་བུ་མི་རྙེད་པས།།               དོན་དམ་རང་ངོ་ཤེས་ན་མི་ལེགས་སམ།།

　　རང་ལ་བརྩེ་ཞིང་རིགས་ལ་དུང་བ་ཡི།།               སེམས་ཀྱི་འདུན་པས་གཞན་ལའང་མཉམ་པ་ན།།

　　ད་གཟོད་གནས་ལུགས་དོན་གྱི་སྙིང་པོ་ཉིད།།             ལོང་བས་རྙེད་པའི་རིན་ཆེན་མ་ཡིན་ནམ།།

　　དོན་ལ་མི་དཔྱོད་རྩེད་མཚར་ཁོ་ནར་འབད།།             གནད་ལ་མི་དམིགས་བཟའ་བཏུང་འབའ་ཞིག་གླེང་།།

　　སྙིང་པོ་མེད་པའི་ཉི་མ་སྟོང་ཟད་ན།།                 མི་བུ་ཟེར་ཡང་དོན་གྱིས་སྙིང་པོ་ཅི།།

　　འདི་ལྟར་བྲིས་པའི་ཚིག་གི་ཕྲེང་བ་ཡང་།།               ང་ལ་མི་ཕན་ཁྱོད་ལ་བྲིས་པ་ཡིན།།

　　དོན་གྱི་གནད་ལ་དཔྱོད་པའི་སེམས་ཡོད་ན།།             གུས་པས་ལེན་པར་རིགས་སོ་ཁྱི་སྤྱང་ཚོགས།།