སྒྲ་སྦྱོར་བམ་གཉིས་ལ་རགས་ཙམ་དཔྱད་པ། ༼ ༣ ༽
༢. ཐད་བསྒྱུར། ཐད་བསྒྱུར་ནི་ལེགས་སྦྱར་གྱི་སྐད་དོད་རེ་རེ་བཞིན་བོད་ལ་ཐད་ཀ་ཐད་སོར་བསྒྱུར་བ་ལ་བྱ་སྟེ། རིན་པོ་ཆེ་ཨིནྡྲ་ནཱི་ལ་ཞེས་པ་དབང་སྔོན་ཏེ་ཨིནྡྲ་ནི་དབང་པོ་དང་ནཱི་ལ་ནི་སྔོན་པོ་ཡིན་པས་དབང་སྔོན་དུ་བསྒྱུར་པ་དང་། བུམྱཀཱཾ་བུདྡྷ་ཞེས་བྱ་བ་སམྱཀ་ནི་ཡང་དག་པ། སམ་ནི་ས་མནྟའམ། སམ་པུརྞྞ་སྟེ་མ་ལུས་པའམ་རྫོགས་པ། སུངྔྷ་ནི་སངས་རྒྱས་ལ་བྱ་སྟེ། ཡང་དག་པར་རྫོགས་པའི་སངས་རྒྱས་སུ་བསྒྱུར་པ་དང་། ཨ་པ་ར་གོ་དཱི་ན་ཡ་ཞེས་བྱ་བ་ཨ་པ་ར་ནི་ནུབ་ཕྱོགས། གོ་ནི་བ་གླང་དཱི་ནི་སྦྱིན་ཞིང་སྤྱོད་པ་སྟེ། ནུབ་བ་ལང་སྤྱོད་དུ་བསྒྱུར་པ་སོགས་མཐའ་ཡས་པ་དང་། དེ་ལ་གཞུང་འདི་ཉིད་ལས། སྐད་རྐྱང་པ་བཤད་མི་འཚལ་བ་སྒྲ་བཞིན་དུ་བསྒྱུར་བར་རིགས་པ་རྣམས་ཀྱང་སྒྲ་བཙན་པར་བགྱིས་ཏེ་མིང་དུ་བཏགས་ནས་ཞེས་གསུངས་པ་སོགས་ཀྱིས་བསྟན་ཅིང་། སྐད་རྐྱང་བ་བཤད་མི་འཚལ་བ་ནི་འདོད་རྒྱལ་གྱི་མིང་སྟེ་ཉི་མ་དང་ཟླ་བ་ལ་སོགས་པ་རྣམས་ནི་མིང་དེ་ལྟར་འདོགས་པའི་རྒྱུ་མཚན་ནམ་གཏན་ཚིགས་བཤད་དུ་མེད་པས་སོ་སོའི་སྐད་དོད་བཞིན་ཐད་ཀ་ཐད་སོརྩང་བསྒྱུར་དགོས་པའི་དོན་ནོ། །ལུང་ཚིག་འདིས་སྒྲ་བསྒྱུར་གྱི་ཐབས་བསྟན་པར་བཞེད་མཁན་མང་ཡང་། བློ་དམན་ངས་འདི་སྙམ་དུ་བསམ་སྟེ། སྤྱིར་བསྟན་བཅོས་འདི་ཉིད་ལས་སྒྲ་བཞིན་དུ་བསྒྱུར་པར་རིགས་ཞེས་དང་། སྒྲ་བཞིན་དུ་སྒྱུར་ཅིག་ཅེས་སྒྲ་བསྒྱུར་ཞེས་པ་ལན་དུ་མར་བྱུང་ཡང་། དཔེར་ན་འཕྲལ་བ་ཞེས་པ་བརྡ་གསར་ལ་སོ་སོར་ཕྱེ་པའི་དོན་ལ་འཇུག་ན་ཡང་བརྡ་རྙིང་ལ་དཔྲལ་པའི་སྐད་དོད་ཡིན་པ་ལྟར། དུས་ཀྱི་འགྱུར་བའི་དབང་གིས་དེང་སང་སྒྲ་བཞིན་དུ་བསྒྱུར་རིགས་ཞེས་པ་སྒྲ་བསྒྱུར་བྱ་རིགས་ཞེས་པར་གོ་སྲིད་ཀྱང་། གནའ་དུས་སུ་སྒྲའམ་སྐད་དོད་ཇི་བཞིན་ཏེ་ཐད་ཀར་བསྒྱུར་རིགས་ཞེས་པའི་དོན་ལ་འཇུག་པ་དང་།
འཕྲིན་སྟེགས། weikangba