སྒེའུ་སྟེང་ཚང་གི་ཞུ་འཕྲིན་གཞོན་ནུ་དོན་འགྲུབ།
འདི་ནས་བྱང་དུ་དཔག་ཚད་ཁྲི་ཕྲག་ན། ། རྒྱལ་ཀུན་ཡེ་ཤེས་ཐིག་ལེ་ལྟར་ཆགས་པ། ། བདག་གི་དཔྲལ་བའི་མིག་དང་ཁོང་བའི་སྙིང་།། མཚན་ཙམ་གྱིས་ཀྱང་རྣ་བའི་བཅུད་ལེན་ཡོད། ། དེ་རུ་ལས་བཤོལ་མེད་པར་དགོས་པའི་དོན། ། ཆ་གཅིག་རིངས་པར་སྒྲུབ་པའི་ཕོ་ཉ་བ། ། རིག་བྱེད་ཚིག་གིས་སྤྱི་བོར་དབང་བསྐུར་ན། ། ཡོན་ཏན་ཁོ་ལག་རྫོགས་པ་འགའ་ཡོད་དམ། ། དེ་ཚེ་རྟེན་འབྱུང་ཚོགས་པ་མ་འགགས་པས། ། སྤྲིན་དཀར་གཡོན་མ་འཛུམ་པའི་རྒྱ་གྲོལ་ཏེ། ། ལེགས་བྲིས་བུས་པ་བལྟ་བས་མི་ངོམས་ཤིག ། དལ་བུར་འཆགས་པ་ས་སྲུང་གཞོན་ནུའི་སྤུན།། ཀྱེ་ཀྱེ་དོན་ཆེན་རབ་ཏུ་གྲུབ་པའི་བུ།། ཚུར་ཤོག་ཚུར་ཤོག་ཕྱི་ནང་གཙུག་ལག་ལས། ། བདེ་ལེགས་སྐྲུན་པའི་བདེན་ཚིག་མེ་ཏོག་གིས། ། ཁྱོད་ལ་ཕོ་ཉ་ཏེ་བོར་མངའ་གསོལ་བགྱིད། ། ཞབས་སེན་ལུས་སྐྱེས་ཕྲ་མོའི་ཟེར་མ་ཡང་། ། སྲིད་ཞིའི་གཡུལ་ལས་རྒྱལ་བའི་རུ་མཚོན་གྱིས། ། མཁའ་ཁྱབ་བདུད་ལ་མཚོན་དུ་རྣོ་བའི་དཔྱིད།། དེ་ཡི་དགེ་ལེགས་དམ་པས་ཁྱོད་ལ་སྲུངས། ། དཀར་ཕྱོགས་ལྷ་ཀླུ་མཐུ་དང་རྫུ་འཕྲུལ་གྱི། ། ཤུགས་ལྡན་གཞན་ཕན་བརྩེ་བའི་བ་དན་ཅན། ། འདི་ལ་ལུས་ཀྱི་གྲིབ་མ་ལྟར་འགྲོགས་ནས། ། སྲུང་ཞིང་སྐྱོབ་པ་ཉམས་ལས་གཡེལ་མི་འཚལ། ། བདག་གི་ཁྱིམ་ན་རྟ་དང་གླང་བོའི་ཁྱུ།། བྱ་རྒོད་ཤུགས་ཀྱིས་ཉིན་ཞག་བཅོ་བརྒྱད་ཙམ།། ཉུལ་ཡང་ཕྱི་མའི་མཐའ་ནི་མི་དམིགས་པའི། ། སྟོབས་དང་འབྱོར་བ་ནོར་རྩེན་ཕོ་བྲང་བཞིན། ། དེ་ལྟ་མོད་ཀྱི་ཁོ་བོ་ཡིད་བྱུང་ནས། ། གྱོ་མོའི་སྣོད་ཐོགས་ངུར་སྨྲིག་ཙམ་བླངས་ཏེ། ། ཆགས་པ་མེད་པར་ཞི་བའི་བས་མཐའ་རུ།། ཨེ་མ་དྲང་སྲོང་འདི་འདྲ་ཆེད་དུ་བྱས།། དེ་བས་སྣ་ཚོགས་ནོར་བུའི་རྒྱན་བྱིན་པའི། ། རྟ་དང་གླང་བོ་ཁྱོགས་ཀྱི་བྱེ་བྲག་མང་། ། རྫོངས་བརྡ་བྲལ་འདིས་དགོངས་ཚོམ་མི་བཞེས་པར།། ཤིང་འབྲས་ཤས་ཙམ་ཕྲག་ལ་སྣོམས་ཏེ་བཞུད། ། ཡང་ན་སྒོ་སྲུང་རྒྱ་སྟག་གཞོན་ནུ་མས། ། སྤུ་གྲིའི་རྗེས་འགྲོ་མཆེ་བའི་གཅོང་རོང་དུ། ། དྲངས་པའི་ཝ་སྐྱེས་བསད་པའི་ཤ་གཟུག་གི། ལྷག་མར་སྤྱོད་པ་འདི་ཡང་ཆས་སུ་ཟུངས། ། ད་ནི་ཛ་ལནྔྷར་ཡི། ། ཉལ་འགྲོ་ཛ་ཧུའི་བུ་མོ་ལྟའི། ། འགྲམ་པའི་རི་མོ་སྐྱེས་ཀྱི་བཤུལ། ། འགྲིམ་པའི་དཀའ་ཐུབ་ལོངས་སུ་བྱོས། ། གྱེན་དང་ཐུར་ལ་བྱེད་པོ་ཡིས། ། བཙུགས་པའི་ལམ་ནི་ཐེམ་པའི་སྐས། ། མཐོང་ན་དབུགས་དང་དོན་སྙིང་ཟུང་། ། འགྲན་བཞིན་ལྡང་བའི་ཟློས་གར་རྩེན། མཐོན་མཐིང་ནེའུ་གསིང་རྨ་བྱའི་མགྲིན་འདྲ་ལ། ། མཐོ་རིས་འོད་ལྔ་ཆགས་འདྲའི་མེ་ཏོག་ལྡེམ།། ཟིར་ཟིར་སྦྲེང་བའི་རྐང་དྲུག་རི་སྐྱེས་ཀྱི། ། བུ་རྣམས་རྩེད་འཇོ་རེས་འགར་ཉམས་སུ་འབབ།། གངས་དཀར་རལ་བ་སྟུག་པོའི་ཐོར་ཅོག་གི། རྩེ་མོ་མཁར་བསྙེགས་ཉི་ཟླའི་རྣ་ཆ་ཟུང་། ། མགུལ་བར་བཟུང་བའི་འབིགས་བྱེད་རི་བོའི་སྤུན།། སྨིག་རྒྱུའི་ཀ་བ་དགུང་ལ་བཙུགས་པ་འདྲ། ། གཡའ་དང་རྫ་ཡི་གླེགས་བུ་མ་འཐོར་བའི། ། ས་འཛིན་རྩེ་མོ་མཐོངས་ལས་མཐོང་དཀའ་སྟེ། ། འདབ་བཟང་དབང་པོ་བྱེའུའི་གོ་འཕང་ལ། ། འགོད་ན་འདབ་ཆགས་ཕལ་རྣམས་སྤྲེའུའི་ཁྱུ། ། ཤིང་སྐམ་མི་རོ་ལྟར་རེངས་ཤིང་། ། ཁ་བ་བུ་ཡུག་སོག་ལེ་བཞིན། ། འཐོར་རླུང་དྲག་པོའི་མུན་གཏིབས་པ། ། ལུས་དང་སྲོག་གི་ཆོམ་པོར་རྒྱུ། ། འཇིགས་རུང་གཅན་གཟན་ནགས་ཀྱི་གཤིན་རྗེའི་ཚོགས། ། ཟ་བྱེད་མཆེ་བ་ཁྲག་གི་རྣོ་རྒྱུན་ཅན། ། དཔུང་བ་མཉམ་དུ་བསྒྲིགས་པས་སྲིན་པོའི་ཡུལ་། ། དག་པའི་ཞིང་དུ་འཁྲུལ་བ་སུར་མི་སྐྱེད། ། འཇིགས་དང་ཚ་གྲང་བཀྲེས་སྐོམ་མི་སེམས་ཤིང་། ། རིད་ཀྱང་འཛུམ་པའི་གཟི་བྱིན་མི་གཏོང་བར། ། དགེ་ལེགས་སླད་དུ་མཁའ་ལྡིང་འདབ་མའི་གར། ། སྐྱེ་བོའི་རྒྱུན་ལམ་ངོས་ལ་དྲག་ཏུ་སྒྱུར། ། གསེར་ལྗོངས་ཞེས་བྱ་ས་ཡི་ཐིག་ལེ་ནི། ། གྲགས་པ་དཀར་པོའི་དོ་ཤལ་རིང་སོང་བས། ། ལྕགས་ཀྱུ་མེད་པར་ལྷ་མིའི་ཡིད་དབང་ཀུན་། ། འཛིན་པའི་རྩེ་དགའ་ཟད་དུ་མེད་པ་ཡོད། ། དེ་ཡི་ཕང་བར་གྲོང་དང་གྲོང་ཁྱེར་གྱི། ། ཚོམ་བུ་སྔོ་བསངས་གདོང་བར་རྒྱུ་སྐར་མའི། ། དོག་པས་མ་འགྲན་ཆུ་ཁུར་སྟོད་གཡོགས་ཀྱིས། ། སྒྲིབ་པའི་ངལ་བ་སྟོངས་པའི་མཐའ་མ་དཔོག ། རོང་སྟོན་འཕྲིན་ལས་བསྐྱངས་པའི་མུ་ཁྱུད་ཀྱི། ། ཁོར་ཡུག་ཟླ་ཤེལ་བརྩེགས་པའི་ས་འཛིན་ལ། ། བཤད་དང་སྒྲུབ་པའི་ལང་ཚོ་མ་རྙིང་བའི། ཆོས་ཀྱི་སྡེ་ནི་ཀུ་མུད་བཞད་པ་བཞིན། ། དེའི་སྙིང་ཤེས་རབ་གསེར་གྱི་ཁུ་བ་ཡིས།། བྲན་པས་བཀྲ་ཤིས་པདྨོ་བཞད་པའི་རྫོང་། ། རྣམ་པར་དཀར་བའི་གེ་སར་འཐུལ་བ་ཅན། ། མུ་ཏིག་འབྲས་བུ་ལྷག་གེར་འཛུམ་པས་མཚོན།། ཆུ་ནགས་གཡང་ས་བྲག་སྣ་འཐབ་པའི་གཅོང་།། ལྟ་བྱེད་སྟོང་ཕྲག་བཀྲ་ཡང་བཙལ་དཀའ་བའི།། གསེབ་ལམ་ཆོམ་པོའི་སྦས་ཡུལ་སྐྱི་གཡའ་བར།། མ་ཐེགས་སྲོག་ཀྱང་ལྔ་བའི་ལམ་དུ་འདྲེན།། དེ་གཞན་ལྷོ་བྱང་དོན་མཐུན་ཁྲི་ཕྲག་གིས།། བགྲོད་པ་གཅིག་པའི་གཞུང་ལམ་དར་དཀར་གྱི།། ཁུག་པ་བརྐྱངས་པས་མིའུ་ཐུང་གོམ་པ་ཡང་།། གྲོག་མའི་སུག་པའི་རྗེས་ལ་ཡང་དག་རྟོག། འཕྲང་ཞེས་རྒྱ་ཁབ་ཕྲ་མོའི་བུ་ག་ལས། ། ལུས་ཕྲ་ཐོ་རངས་བསེར་བའི་གཟུགས་སྒྲ་ཅན། ། འཇིགས་པས་སྐྱི་གཡའ་སྲིད་པ་བར་མའི་འཕྲང་།། གསལ་བྱེད་མེ་ལོང་གཉིས་པ་གཞན་ཡོད་མིན། ། དེ་ན་ནོར་བུའི་བ་གམ་འོད་ཚོགས་ཀྱི། ། དགའ་མར་འཁྱུད་པས་མི་ངོམས་ཁང་བཟང་གི། དྲ་བ་ཆ་བསགས་ལྟེ་བའི་ཕོ་བྲང་ཀུན། ། དུས་ཀྱིས་འཕོས་འདྲའི་དགའ་ཚལ་ཡི་གར་འོང་། ། ངུར་སྨྲིག་གསར་བའི་བླ་གོས་ཀྱིས།། ལི་ཁྲིའི་ཆུ་རྡུལ་གྲངས་ལ་འཕྱ། ། མཁྱེན་བཟང་མཁའ་ཡི་ཕ་མཐའ་ནི། ། འཇལ་ལ་ཐུབ་པ་ཀུན་ཀྱང་ངལ། ། ལུང་དང་རིགས་པའི་ཆུ་གཏེར་རླབས། ། གྱེན་དུ་འཆེལ་བས་ལུས་མེད་ཀྱི།། མྱ་ངན་ལག་པས་བྲང་ལ་འཐབ། ། ཐར་པའི་སྒོ་འཕར་ངང་གིས་གྲོལ། ། རོང་སྟོན་རིམ་བྱོན་མཛད་པའི་གུར་ཀུམ་གྱིས། ། བྲིས་པ་ནམ་མཁའི་མེ་ལོང་ངོས་གཉིས་པ། ། ལུགས་བརྒྱར་གསལ་བ་ས་ཡི་སྙིང་པོ་ཞེས། ། སྙན་ལས་སྙན་པ་ཆུ་སྒྲོགས་མཐའ་ལ་བཅས།། འཇིགས་མེད་གདོང་ལྔ་འཁྱུག་པས་མཐོར་བཏེག་པའི། ། ཡིད་འོང་ནོར་བུའི་འཁྲི་ཤིང་བཀྲམ་པའི་ཁར།། ཞབས་སྐྱེས་མེ་ཏོག་རྩེན་པའི་པཎ་ཆེན་མང་།། བསྟན་ལས་སྐྱེས་པའི་རྩེ་དགའ་ཅི་ཡང་འཛིན།། ཁྱད་པར་རིང་ནས་མཛའ་བ་མ་བཏང་བའི། ། གྲུ་འཛིན་དབང་ཕྱུག་ལག་པའི་པདྨ་ཅན།། དྲེགས་མྱོས་བྱེ་བའི་གཙུག་ཏོར་མཁར་འཕགས་ནས། ། ཕན་བདེ་བསིལ་བ་སྙིམས་ལ་གུས་པ་འཆའ། ། ཕྱི་ནང་དྲུང་འཁོར་ཉེ་དབང་རྣམ་རྒྱལ་གྱི། ། ཁང་བར་འགྱིང་བའི་ཁེངས་པ་སྙོལ་བྱེད་ཅིང་།། གསོལ་ཁ་བ་དང་སྣངས་ཆེན་དུད་པའི་ཉམས། ། དྲི་བཞོན་ལྡན་པའི་རྐང་འཐུང་ཚལ་གྱིས་གཞལ།། གསུང་མཉན་སྐུ་ཡི་རྒྱལ་མཚན་བལྟ་བའི་སླད།། ཕྱོགས་འགྲུལ་སྙིམ་པའི་གཞོང་བ་རིན་ཆེན་གྱིས། ། ཕྱུར་བུར་བཀང་རྣམས་དབང་ཆེན་མཚན་མའི་ལྟོར། ། འཇིགས་སྡེ་མ་ནི་རྒྱུན་ཆད་མེད་ལ་རྟོག། སྙན་ཤལ་གངས་ཀྱི་དུ་ཀཱུ་ལ། ། སྙིམ་པའི་སྲིད་ལ་འཕུར་ལྡིང་ཅན། ། བསྐྱོད་དེ་ཐུགས་རྗེ་རང་མལ་ནས། ། ལངས་པའི་རྫ་རྔ་ཁྱོད་ཀྱིས་རྡུངས།། ཚོང་ཟོང་དར་ཟབ་རིན་ཆེན་ཐང་མའི་རྡུལ། ། ཁོར་ཡུག་བརྡལ་བ་གདེངས་ཅན་ལམ་སྲང་ཉིད།། མི་རིགས་ཐ་དད་ཕྱོགས་ཀྱི་འདུ་འགོད་ཀྱིས། ། ཀཱ་ཤིའི་ཡུལ་གྱི་གཟུགས་བརྙན་གསལ་བར་བྱེད།། ངུར་བའི་འགྲོས་ལྡན་ནུ་ཁུར་དུད་པ་ཅན། ། པདྨའི་གཞོན་ལུས་ཨུཏྤལ་མིག་ཅན་མ། ། ཟླ་བཞིན་མཛེས་པ་བིམྤའི་མཆུ་སྒྲོས་ཀྱིས།། གཅིག་ལས་གཅིག་ལྷག་ཡིད་སྲུབས་མཚམས་སྦྱོར་མང་། ། དེ་ལྟའི་ཡུལ་ལ་འདོད་པའི་དཔུང་ལྕི་ཡང་།། ངེས་འབྱུང་ལ་ཐོད་དཀར་པོའི་མིག་དར་དང་།། སྒྱུ་མའི་ཏིང་འཛིན་བག་ཡོད་འཁར་བའི་གྲོགས། ། བསྟེན་ལས་བློ་བྲིད་ཕྱོགས་ལ་མྱ་ངན་བྱིན། ། དེ་ནས་ཉི་ཟླའི་རྒྱུ་ལམ་ཡང་། ། འགོག་སྙམ་ས་ཡི་བདག་པོའི་མཁར། ། ལམ་སྲང་བུ་མོའི་རྣ་བ་ལ། ། མཚོན་ཆའི་ཕོན་པོ་སྙིང་ལ་གཟན། ། བཀར་བཏགས་ལོག་པའི་གཉའ་ཤིང་ཁུར། ། འབངས་ཀྱི་ཕྲག་ལ་ཐེག་མིན་ཏེ། ། ཉིན་བྱེད་གཟའ་ཡིས་ཟིན་པ་ལྟར། ། ཕལ་ལ་སྡིག་པའི་མཚནམར་བཀྲ། ། གདོང་ལ་རྒྱུ་བའི་དགྲ་སྡེའི་ཚོགས། ། མགོ་བོ་སྙེ་མ་ལྟར་བྲེགས་ནས། ། ཁྲག་ཞག་འཁྱིལ་བའི་རྒྱ་མཚོ་མར། ། འབྱུང་བོའི་རྐན་སྒྲ་མཚན་མོའི་དབྱངས། ། ཚ་གཅུན་དྲག་པོས་འགྲོ་འདིའི་ཁྱུ།། རང་ཁྱིམ་ལ་ནི་འགྲོ་འོང་བཞིན། ། རྐང་རྡུལ་གཡོས་པས་ཉི་ཟླ་ལས། ། དུད་པས་བསྒོས་པའི་ཤེལ་དག་གསལ། ། ཆོས་དང་ཕྱི་མ་བཏང་ནས་འདོད་ཆེན་གྱི། ། མེ་གང་སྟོང་གསུམ་དངོས་འདིས་མི་ངོམས་ན།། ནམ་ཞིག་རང་གི་ཕ་མའི་མགོ་བོ་ཡང་། ། བསྲེག་བྱའི་བུད་ཤིང་བྱེད་ལ་སོམ་ཉིས་དབེན། ། ཀྱེ་ཧུད་ཡ་མུ་ན་གྲོང་ཡང་། ། འཇིགས་པའི་ཡུལ་ཞེས་ཅི་ལ་གྲགས། ། རྣམ་དཀར་ཅན་ལ་བདེ་བ་ཡིས། ། ལེགས་པར་དབུགས་རབ་མི་དབྱུང་ངམ། ། ཨནྡ་རྙིལ་གྱི་མདོག་ལྟར་རབ་སྔོ་བའི། ། གཏིང་དཔོག་དཀའ་བ་ལྷ་མིའི་གྲུ་རྫིངས་ཅན། ། དེ་ལ་ས་ཡི་ལྷ་བཙུན་ན་རིམ་གྱིས།། བཙུགས་པའི་ཟམ་པ་དགུ་ཚིགས་ཞགས་པའི་གཉེན།། ཉེ་བར་ཟངས་མདོག་རྒྱ་མཚོའི་གོས་ཅན་ལ། ། གསེར་དངུལ་དར་ཟབ་ཕོན་པོའི་བང་བ་ཡིས། ། རྨུགས་འཛིན་གྲོང་ཡང་པྲེ་ཏའི་ཡུལ་འཁོར་དུ།། གཏོང་བའི་དཔལ་དང་འབྱོར་བས་བརྒྱན་པ་ཡོད། ། ངག་ཚིག་མི་གཅིག་ཤ་ཟའི་རང་སྐད་ཀྱིས།། ཅ་ཅོ་རྣ་བར་འཚེར་ཡང་ཟབ་ཆོས་ཀྱི། ། དབྱངས་སྙན་རོལ་མོ་ལྟར་འཁྲོལ་ལེགས་བྱས་ཀྱི།། བྱིན་རྟེན་གཞལ་མེད་ཁང་སོགགས་རྩིས་པས་བྲལ། ། གནའ་བོའི་ཆོས་རྒྱལ་གོང་མའི་སུག་རྗེས་སུ། ། བྱུང་བའི་རྒྱ་མཁར་རབ་མཐོ་གྲགས་པ་ཅན། ། ཕྱི་ནང་རྡུལ་གྱིས་ལྷག་གེར་མི་སྡུག་པ། ། མ་སྟོངས་རོ་མ་ཙམ་ཞིག་ཉེ་བར་སྣང་། ། འཛམ་གླིང་སྟག་ཤར་དཔའ་བོའི་གྲྭ་གྱེས་པ། ། མཐོང་ན་དོན་སྙིང་འབྲས་ཡོས་ལྟར་འགས་ཤིང་།། ཐུར་དུ་འབུབ་པས་རྡུལ་མང་ཐུ་བའི་ཕྱག ། དབང་མེད་འཚལ་བའི་མཇིང་བ་བསྣོལ་མར་བསྡེབས། ། ཕྱེ་ཚན་ཉི་ཟེར་ཚ་བས་དམ་ཁྱུད་ལ། ། གཤོག་ཡངས་མཁའ་ལྡིང་གིས་ཀྱང་བགྲོད་མིན་པའི།། ལུང་སྲང་མྱ་ངམ་ཐང་གི་རྗེས་འགྲོ་བའི། ། སྣེ་མོ་དཔག་ཚད་འདང་བའི་ཁྱོན་ལ་བརྐྱངས། ། དེ་རུ་ལྕགས་སྐུད་བསྒྲིལ་བའི་ལྷམ་སྒྲོག་ནི། ། གཞུ་རྒྱུད་ལྟར་འཐེན་བུམ་པ་ཅན་བསྟེན་ལ། ། རྡུལ་གྱི་ཐིགས་པ་ཐོད་ལ་དོ་ཤལ་དུ།། བཟུང་ནས་སྐྱེན་པོའི་འགྲོས་ལ་ལྕག་ཀྱང་ཆུག། མདའ་ལྟོང་དབྱིབས་ལྡན་གསེར་སྒའི་བི་ས་ཎི་། ། རྒྱ་བོད་དོན་མཐུན་རྒྱུ་བ་ཟམ་མི་འཆད། ། བཟོད་པའི་མུ་ཁྱུད་ཁྱུ་མཆོག་ལས་ལྷག་པའི།། འཕོངས་ལ་བཀལ་བ་གཟིངས་ཀྱི་རིན་ཆེན་བཞིན། ། ག་ཞ་གླུ་གཞས་སྣང་གླུའི་རྒྱུད་མངས་སྒྲ། ། འགྱུར་ཁུག་འདེགས་འཇོག་དྲི་ཟའི་རྗེས་སྙེག་པས།། རེས་མོས་དགའ་བར་སྤྱོད་པའི་རྐང་དྲུག་ཁྱུ། ། ཇི་སྙེད་ཚོགས་ཀྱང་ཚོར་བདེ་སྐྱེད་དོ་ལོ།། སྣ་ཚོགས་མནྡཱ་ར་བའི་དྲ་བ་ཡི། ། འདབ་བཟང་ཚེམས་ཕྲེང་ལས་ཟེགས་སྦྲང་རྩིའི་ཆང་། ། ལྕེ་ཆུང་ལ་གཞིབ་དུབ་ལས་ངལ་བསོས་ལ། ། ལང་ཚོ་ཉམས་པ་གསོ་བའི་བཅུད་ལེན་སྟེན། ། ཙག་རྡེའུ་ཞེས་གྲགས་མ་ལ་ཡ་འདྲ་བའི། ། ས་འཛིན་ཉི་མའི་ཐོར་ཚུགས་ལྡེམ་པ་ལས། རབ་རིབ་དྲི་མ་བསྲིངས་པའི་སྣང་བྱེད་ཀྱིས།། ཁོར་ཡུག་སྣོད་བཅུད་ལག་པའི་རྫས་བཞིན་ལྟོས། ། ཡན་ལག་བཞི་ཟུང་དང་ལྡན་རྨ་ཆུའི་ཀླུང་། ། གནམ་སྔོན་ཞུ་བའི་གཟི་མདངས་ལ་འཁུ་བ། ། རྣམ་མང་གྲུ་ཡི་རྩེ་དགས་འཇུགཔའི་གནས། ། ལྷུང་ལྷུང་དབང་པོའི་ཕྱོགས་སུ་དལ་གྱིས་འབབ།། ཟངས་ཞུན་རྒྱ་སྐྱེགས་ཁུ་བ་བསྲེས་པའི་ཚོན། ། བྱུགས་རིས་ལང་ཚོས་སྒེག་ལྡན་རི་བོའི་ཕྲེང་། ། ཉི་ཟེར་ཁུ་བས་རབ་མྱོས་ངོ་ཚའི་གོས། ། བྲལ་བ་ཡིད་ལ་མཚོན་གྱི་གདེངས་ཀ་ཉིད།། ལོག་ལྟའི་ཁྲག་རྒྱུན་འཐུངས་པས་ནགས་ཕྱོགས་ཀྱི། ། རང་རྩལ་ཡོན་པོར་རྫོགས་པ་ཀླ་ཀློའི་སྡེ། ། སྨུག་རྩིའི་ཕུང་བོ་ས་ཡི་འགྲམ་པ་ལ། ། ཐང་མར་བརྡལ་བའི་སྙེམས་པ་རི་བས་མཐོ། ། སྟོབས་འབྱོར་ཟླ་བའི་མྱུ་གུ་ཆེས་ཕྲ་ཡང་། ། དད་པའི་མཁུར་ཚོས་འབུམ་ཕྲག་ཉི་ཟླའི་གཟི།། གཅིག་དུ་བཟླུམས་འདྲའི་གྲོང་སྡེ་འབྲུ་དཀར་གྱི། ། སྙེ་མ་དུད་པ་བསྔག་བྱའི་ཡུལ་དུ་སོན། ། ཆོས་ཀྱི་ཚོང་རྡལ་ལ་ནི་ལུང་རིགས་ཀྱི། ། དྲིལ་ཆུང་དུས་བཞིར་འཁྲོལ་བ་ཀློག་གི་གྲྭ་། ། རྒྱལ་བྱེད་ཚལ་གྱི་རི་མོ་གཟུགས་ཅན་དུ།། མེས་པོས་བྲིས་པ་ཐབས་ཀྱི་ཕྱོགས་སུ་འཚེར། ། རྐང་དྲུག་འཕུར་ལྡིང་རོལ་པའི་མཛུབ་རྩེ་ཡིས། ། རེག་པས་འདར་ལྡན་སྣ་ཚོགས་དྲི་བཟང་ཅན། ། ཁུ་བྱུག་རྨ་བྱ་མྱོས་པའི་གྲེ་འགྱུར་དབྱངས། ། ལ་སོགས་དྲི་ཟའི་འཇིག་རྟེན་ས་ལ་སྣང་། ། གཡུ་ལོ་གསེར་གྱི་གང་བུ་དུད་པ་ཡི། ། ཡོངས་རྫོགས་རོ་ལྡན་འབྲས་བུའི་བང་མཛོད་ཅན།། ཚང་ཚིང་མཛའ་བོར་འཐམས་པའི་དྲ་བ་ན། ། དབེན་གསུམ་སྙིང་པོའི་ཐིག་ལེ་གཅིག་པུ་ཡོད།། དེ་ན་གང་གིས་བཤད་སྒྲུབ་མི་ནུབ་པའི། ། རྒྱལ་མཚན་དང་པོར་བསྒྲེངས་པའི་བ་གམ་ཅན། ། མཉན་ཡོད་ཚལ་གྱི་གཞལ་མེད་གནྡྷོ་ལ། ། ཚངས་ཆེན་པིར་གྱིས་བྲིས་པ་སུས་མ་རིག ། ཕུ་ན་མརྒད་མྱུ་གུ་སྣ་ལྔ་བའི། ། ཚོན་གྱིས་སྤྲས་འདྲ་མེ་ཏོག་བཞད་ལྡན་པ།། མ་སྨད་འབྲས་བཟང་རོ་བརྒྱའི་བཅུད་ལེན་ཅན། ། ཉིན་ཡང་མུན་པ་གཏིབས་པའི་ཚང་ཚིང་འཁྲིགས། ། མདོ་རུ་རང་བྱུང་བྲག་རིའི་མུ་ཁྱུད་ལ། ། མ་བསླངས་གོར་མའི་ཀ་བ་མཐོངས་ལ་བསྙེགས། ། སྔོ་བསངས་རང་ལུས་ལ་ནི་སྙིང་ཉེ་སྟེ། ། རགས་པའི་གཟུགས་ནི་སྦས་པའི་ཟོལ་ལ་བརྟེན།། བར་དུ་ཁོ་སྙོམས་ཞིང་ལ་འབྲུ་དྲུག་གི། མགོ་ལྕོག་གུས་པ་དཔྱིད་ཀྱི་མ་མ་བརྒྱས། ། སྐྱེད་བསྲིང་གཡུར་གྱི་དུད་པའི་འདབ་གཤོག་ཅན། ། བསེར་བུས་བདས་པ་གར་གྱི་རི་མོ་བཞིན། ། ཉལ་འགྲོ་ལྦུ་བ་ཟིལ་བའི་མུ་ཏིག་གི། ། ཕྲེང་བ་ཙནྡན་གུར་ཀུམ་དྲི་ལེན་གྱིས། ། བསྒོས་པའི་ལྗོན་བཟང་སྙེ་མར་སྨིན་པ་ཅན། ། མི་ཆུང་མི་ཆེ་གདྒཱ་གཉིས་པ་བཞིན། ། ཁང་བ་ཁང་ཆེན་མཛེས་པའི་བ་གམ་ཅན། ། སྐར་ཁུང་སྒོ་གླེགས་གང་འཚམ་འབབ་སྟེགས་ཀྱི།། རྟ་བབས་མཐོར་བརྩེགས་ལྟ་ན་སྡུག་པའི་གྲོང་། ། རིག་བྱེད་དབང་པོས་སྤྲུལ་པས་འོལ་མི་དབྱི་། ། ཡན་ལག་སྟུག་ཅིང་ལུས་བོངས་ཁོ་ལག་ཆེ།། འཁྲུགས་པའི་སྡང་མིག་སོར་གཏུབས་སྐས་ཀྱི་གདངས། ། སྒྲ་བརྒྱར་གླལ་བའི་ང་རོ་འཚེར་བ་ཅན། ། དཔའ་བོའི་ཚོགས་ནི་གནོད་སྦྱིན་ཁྲོས་དང་མཚུངས།། ཟླ་བཞིན་འཕར་བ་ལག་བྲིས་གཞོན་ནུ་ལས། ། རྣམ་པར་འགོངས་པ་སྐྱེ་བོས་གོས་བགོས་ཤིང་། ། རྒྱན་བཟང་འོག་པག་འཕུར་བའི་མདངས་ལྔ་བ། ། ཅི་ཡང་དཀྲིགས་པ་རོལ་པའི་རྩེ་མོར་གཡེངས།། ལང་ཚོའི་མྱོས་བུམ་མཛེས་སྡུག་དོ་ཤལ་བརྒྱའི། ། ཁུར་གྱིས་ལྕི་སྟེ་དལ་བུའི་གོམ་སྟབས་ནི། ། ངུར་བ་བཞིན་དུ་རྒྱུ་བའི་སྐད་མེད་མ། ། འཆི་མེད་བུ་མོའི་དགྲ་ཟླས་ཕྱོགས་ཀུན་གསལ། ། གླུ་གཞས་ཟློས་གར་འཁྲབ་པའི་ཡོ་ལང་གིས། ། དྲི་ཟ་དགའ་བའི་ཚལ་དང་དཔལ་སྙོམས་པའི།། ཡིད་འོང་དོ་རར་དུས་བཞིའི་དགའ་སྟོན་གྱིས། ། ལུས་དང་སེམས་ཀྱི་རིཥྚ་འགུགས་ལ་བརྩོན། ། དགའ་མགུ་འདོད་ལྷའི་མེ་ལོང་ལ་ཆགས་ནས།། མདའ་ལྔས་རེག་པ་མ་ཐུབ་དུས་བཏབ་ཀྱིས། ། རེ་བ་རྫོགས་དང་མ་རྫོགས་ཧ་རི་ཎིའི། ། ཁྱུ་མཆོག་མཛའ་བའི་རྒྱ་ལས་འགོང་མི་ནུས། ། སྐབས་རེར་རང་དང་མུ་སྟེགས་ཀུ་ཅོའི་སྒྲས། ། ཐོས་བྱེད་རྡོ་རྗེའི་ཁང་བར་ཡོངས་བསྒྲུབས་ཀྱང་།། བྱེ་མར་རློག་འདིས་འཇིགས་རུང་གཤིན་རྗེའི་གྲོང་། ། ཕྱིན་འདྲའི་སྣང་བ་རོ་ཟན་མཚོན་དུ་འབར། ། དེ་ཡི་ལྟེ་བར་སྐར་ཚོགས་ནི། ། པིར་གྱིས་བྲིས་པའི་རི་མོ་བཞིན།། དེ་ཡི་ལྟེ་བར་སྐར་ཚོགས་ནི། ། པིར་གྱིས་བྲིས་པའི་རི་མོ་བཞིན། ། ཆོས་ཀྱི་སྡེ་ནི་བསོད་ནམས་ཀྱིས། ། ཡོངས་སུ་དཀར་བའི་ཐིག་ལེ་ཤར། ། རིན་ཆེན་ལས་གྲུབ་གཙུག་ལག་ཁང་། ། མདངས་མཚར་དབང་པོའི་གཞུ་ལ་བརྟག ། ཆུ་འཛིན་འོད་ཀྱི་ལྡིང་ཁང་མར། ། བ་གམ་ཅན་དུ་འཁྲུལ་བ་འཛིན། ། རྩིག་པ་རྩིག་སྐྱབས་འབབ་སྟེགས་དང་། ། ཀ་བ་གདུང་ལྕམ་ལན་ཀན་ཚོགས། ། རིན་ཆེན་མཐོན་ཀ་ལོ་ཧི་ཏ་། ། གསེར་དངུལ་མན་ཤེལ་རྡོའི་སྙིང་བོ། ། དབང་སྔོན་མརྒད་བྱི་རུའི་བྱ་འདབ་རྣམས། ། རིམ་པར་འཕུར་བའི་ཆུ་སྲིན་ཁ་འགྲམ་ལས། ། སྨིན་པའི་དྲ་བ་གཡེར་ཁའི་དྲིལ་ཆུང་ཅན། ། དྲི་བཞོན་བུ་མོས་མྱོས་ཏེ་རྒོད་པ་བཞིན།། འཇིགས་མེད་གྲུབ་པས་ཟུང་འཇུག་སྒྱུ་མའི་གཟུགས་། ། རྙེད་དེ་རྒས་ཁོགས་ནོར་བུའི་ཟ་མ་ཏོག ། རང་བསྲེལ་ཟོལ་གྱིས་མ་ལུས་སྲི་ཞུའི་མགྲོན།། ཕྲོགས་པས་བདེ་གཤེགས་གཞན་ལ་གནོང་བ་སྦྱིན། ། ཉི་ཟླའི་ར་བ་གདེངས་ཅན་འཛིན་མའི་མཐིལ། ། གནོད་སྦྱིན་རྟ་བབས་ལྷ་ཡི་གཞལ་མེད་ཁང་།། དྲི་ཟའི་དགའ་ཚལ་སྐབས་གསུམ་ཁྲུས་ཀྱི་རྫིང་། ། ཚངས་པའི་ཁང་བརྩེགས་འཕོས་འདྲའི་ཡང་ཐོག་ན། ། སྣ་ཚོགས་རིན་ཆེན་རིམ་པའི་རྐང་སྟེགས་ཅན། ། གསེར་གྱི་ཁྲི་འཕང་ནོར་བུའི་འཕྲས་སྤྲས་པ། ། ཟ་འོག་པཉྩ་ལི་ཀ་བརྩེགས་པའི་གདན། ། ཙམ་པའི་མེ་ཏོག་ཕྲེང་མཛེས་ཤལ་བ་དེར། ། རྒྱལ་བ་ལས་ཀྱང་ཆོས་ཀྱི་ཟ་མ་ཏོག ། དཔལ་ལྡན་ས་བཅུའི་རྩེ་མོར་ཡོངས་སོན་པ། ། དག་པའི་བརྟན་གཡོ་ཇི་སྙེད་ལུས་སྐྱེས་ཀྱི། ། ཁང་བར་འཕྱན་ཏེ་གསང་བའི་སྤྲིངས་ཡིག་ནི། ། ཀློག་པས་ཐུན་མིན་སྐལ་བ་བཟང་པོའི་ཚོགས་། ། སྨིན་པའི་ཡོན་ཏན་བསམ་པས་ག་ལ་ལང་། ། གསང་བའི་སྒོ་འཕར་ནམ་མཁས་ཟིན་མིན་པ། ། དབྱེ་བ་ལྟ་ཅི་ཐུན་མོང་གཞན་དབང་གིས། ། སྣང་བའང་ཚུལ་གནས་མང་ཐོས་ཤེས་རབ་མཆོག ། སྙིང་རྗེ་ལྷག་བསམ་བྱམས་དང་དེས་པའི་མཛོད།། བརྟན་དང་ངང་བཟང་བྱིན་ཆེན་གྲགས་པའི་རྒྱན། ། ཆེན་པོ་ལ་འོས་ཡོན་ཏན་འཕགས་པའི་ཚོགས། ། མཐའ་དག་རི་མོར་བཀོད་པའི་གཟུགས་ཅན་བཞིན།། ལྟ་ན་སྡུག་པ་བྱ་རྒོད་ཕུང་བོའི་རིར། ། མཚན་དཔེའི་སྐྱེ་མཆེད་བཀྲ་བ་ལྷ་ཡི་ལྷ། ། འཚོ་ཞིང་གཞེས་པའི་དཔལ་དེ་རྗེས་སུ་དྲན། ། གང་སྐུ་གཟི་བྱིན་ལྷམ་མེ་བ། ། གསེར་ཞུན་རྡུལ་བརྩེགས་ལྷུན་པོའི་ཟླ། ། མཛེས་ཞལ་དཀྱིལ་འཁོར་རབ་མཛེས་པས། ། བསིལ་སྦྱིན་དབང་པོ་ཡང་དག་གསལ། ། ངུར་སྨྲིག་འདབ་མའི་འཕྱང་འཕྲུལ་གྱིས། ། འཆི་མེད་དབང་པོའི་གཞུ་རིས་བསླུ། ། འཛུམ་ཟེར་དྭངས་མས་འོད་ལྡན་གྱི། ། ཀུན་སྣང་བྱེ་བའི་དཔལ་ལ་འཁུ། །དེ་ལྟར་ཐུབ་དབང་གཙུག་གི་ཆུ་སྐྱེས་ཀྱང་། ། འདི་ཞབས་འདེགས་པ་སྐལ་བ་བཟང་ངོ་ཞེས། ། ཁེངས་པས་རབ་མཐོ་ཚངས་སོགས་དྲེགས་པའི་དབང་།། འདར་ལྡན་རྔུལ་གྱི་མཆོད་ཡོན་ལུས་ལ་སྦྲེངས། ། རང་སྲིད་ཉམས་པའི་གདུང་བ་ཆེས་ལྕི་བས། ། ཞི་བའི་དགའ་མར་རོལ་པའི་ཙོང་ཁ་པ། ། རང་བསྟན་ལང་ཚོ་རྫོགས་ལ་མངོན་ཆགས་ནས། ། གར་བརྒྱས་འདི་ཡི་སྐུ་ལ་དམ་དུ་འཁྱུད།། རྫུ་འཕྲུལ་ཤུགས་ཀྱིས་ལྷག་པའི་འཕགས་ཆེན་མང་། ། མཁའ་དང་ས་ལ་ཏིལ་གྱི་གང་བུ་བཞིན། དད་འདུན་ཤེས་རབ་ནོར་བུའི་རྣ་ཆ་ཅན། ། ཐུན་མོང་བགྲང་ཡས་གུར་ཀུམ་བཀྲམ་པ་བཞིན།། བསྐལ་པར་བསོད་ནམས་ཟོང་གིས་ཁུགས་མིན་པའི། ། རྙེད་དཀའི་ལེགས་བཤད་རྣ་བའི་རྒྱན་བྱས་ཏེ། ། ཐུན་མོང་ཐུན་མོང་མིན་པའི་རིག་པའི་གནས། ། ཅི་ཡང་སྦྱོང་བའི་རྩེ་དགས་སུ་མ་མྱོས།། འདི་གཞན་ལྷག་པའི་དག་ཞིང་ཞེས། ། མཆིས་སྐད་རྫུན་གྱི་ངག་ཚིག་ཅེས། ། བཟླས་བརྗོད་ལས་དེར་རོ་འཛིན་ནི། ། འབར་བའི་ངལ་བ་ཁ་ལ་བརྟེན། ། དགའ་དད་སྤྲོ་བའི་བདེ་འཐུང་རོ། ། ཁྱབ་འཇུག་གནས་ལ་ཆུ་རྒྱུན་བཞིན། ། འཐུངས་འདིས་ཆེན་པོ་གཞན་དག་ལ། ། གང་ཞིག་ཆགས་བྲལ་བླང་མི་འགྱུར། ། དེ་སྐད་མཐོང་ན་ལྟ་ཅི་ཐོས་པས་ཀྱང་།། དགའ་དང་རངས་པས་དག་དང་མ་དག་ན། ། རང་རང་ལས་ལ་ལེ་ལོའི་མཆོག་བྱིན་ནས། ། ལྡང་དང་ཀྱེ་ཧོའི་ཅ་ཅོ་ཁོ་ནས་བྲེལ། ། ཨེ་ཧོ་བཟང་པོའི་ལས་ཀྱིས་མ་པ་བཏང་བས།། འདིར་སླེབས་འཁྲུལ་ལམ་རྨི་ལམ་མིན་ནམ་ཞེས། ། སྐད་ཅིག་ཡུན་ལ་ཟུང་འཇུག་གྲུབ་པའི་ས་།། རྡོག་པས་མནན་འདྲའི་དགའ་དད་མངོན་བྱས་ནས།། ཐལ་མོའི་རྩེ་ཕྲན་སྤྱི་བོར་སོན་པའི་མོད། ། མིག་སེར་དབང་གིས་རལ་བ་ས་ལ་ལྷགས།། འཚོལ་ཕྱིར་ཐོད་པ་མདུན་སར་ལན་བརྒྱའི་བར། ། རྒྱུག་པའི་ལྷ་ཕྱག་རྩིས་ཀྱིས་ལང་མི་འཚལ། ། བསོད་ནམས་ཡན་ལག་བདུན་དང་ལྡན་པའི་གཞུང་། ། དྲུག་སྐྱེས་ས་འཛིན་གླུ་ཡིས་ངེས་བཅིངས་པ། ། བདག་སྐྱེས་རི་མོ་གསུམ་པ་ལྟར་སྙན་པས། ། བརྗོད་དང་བསྟོད་པས་སྒྲ་གཞན་ཕོངས་སུ་ཕྲོགས། ། དྲི་མེད་ཆུ་སྔོན་བེེཌཱུརྱའི། ། དྭངས་མར་འཁྱིལ་བའི་ཨརྒྟཾ་ནི། ། ཟག་མེད་བདེ་བའི་རོ་ནུས་ཅན། ། སྙིམ་པས་དར་དང་བཅས་ཏེ་མཆོད། ། པུས་མོའི་ལྷ་ང་དབྱིག་འཛིན་མའི། ། མཁུར་ལ་ཐིག་ལེར་སྦྱིན་བྱས་ནས། ། སྟོད་གོས་ཕྲག་པའི་གྲོགས་མོ་དེར། ། རྩེ་དགའི་དོ་ཤལ་ཉིད་དུ་བསྟར། ། ཚེམས་དཀར་གངས་རིའི་མེ་ལོང་ལས། ། འཛུམ་པའི་འོད་ཀྱིས་མདངས་བྱིན་པའི། ། ཆུ་ཤེལ་དག་པའི་བཞིན་རས་ནི། ། གསལ་བཞིན་གསལ་བཞིན་འདི་སྐད་གསོལ།། ཤིང་བལ་བཞིན་དུ་ལྡང་དང་བསྐྱོད་པ་རྣམ་པར་ཡང་།། རྩི་མ་གྷི་བཞིན་བགྲེས་རྒུད་དུག་གིས་རེག་མ་གྱུར། ། ཉི་མ་བཞིན་དུ་འོད་དང་འོད་ཟེར་ལྷམ་མེ་བར། ། ཁྱོད་ཀྱི་སྐུ་ནི་སྐྱེ་འབྲི་མེད་པར་བཞུགས་ལགས་སམ།། སྒྲིབ་མེད་གཟིགས་པ་ཡངས་ལ་མཆོག་ཏུ་སྙན་གསལ་ཞིང་། ། འཛེར་དང་དོག་བྲལ་གསུང་དབྱངས་ལེགས་བཤད་ཁོ་ནར་འགྱུ། ། ཐུགས་ལ་གསལ་འགྲིབ་མིང་ཙམ་མ་གྱུར་ཐབས་ཤེས་རྒྱས།། ཁྱོད་ཡོན་སྲིད་ཞིའི་སྙིང་བོར་བྲི་གང་མེད་ལགས་སམ། ། རྒྱལ་བའི་མཛད་ཀུན་ཟུར་ཕུད་ངོས་ལ་རབ་བཅིངས་ནས།། བློ་བཟང་རང་སྲིད་ཁོང་བའི་སྙིང་ལ་བཅངས་བཞིན་དུ།། གཅེས་ཤིང་བསྐྱངས་པས་ས་ཆེན་ཀུན་ལ་དབང་བྱས་པའི། ། རྨད་བྱུང་སྤྱོད་པར་དུས་ཀྱི་དྲི་མས་མ་གོས་སམ། ། ཁྱོད་བཤེས་བློ་གྲོས་བཟང་པོའི་དཔལ་མངའ་ནས།། སྡེབ་ལེགས་སྙན་འཕྲིན་དབྱངས་ཅན་ངག་གི་སྒྲ། ། མི་ཕྱེད་སྒྲོམ་ལ་རིམ་པ་བདུན་གྱི་རྒྱ། ། བཏབ་སྟེ་བདག་ལ་ཁུར་དུ་བསྐུར་འདི་བཞེས། ། རྡོ་རྗེ་རྫོང་ཞེས་གསང་བའི་སྙིང་པོ་ཀུན། ། ལང་ཚོའི་འཁོར་ལོར་རྒྱུ་སྐར་ལྟར་བཀྲ་ཞིང་། རབ་མཐོ་བརྩེགས་པ་བྲག་རིའི་ཕུང་བོ་གང་། ། གདྒཱའི་ཡབ་གཅིག་ཏི་སེར་སུ་ཡིས་ཕྱེ། ། རྐང་འཐུང་ཡལ་ག་གཡོབ་པས་དྲང་སྲོང་ཚོགས།། རིངས་པར་འབོད་པས་ཅི་བགྱི་དུས་གསུམ་དུ། ། གནས་གསུམ་དཔའ་བོ་དུ་མའི་རོལ་རྩེད་ལ། ། གསེར་ཅན་དགྲ་ཡང་ལྟ་བྱེད་སྟོང་གིས་ངལ། ། ཆུ་ཤིང་མཆོག་ལུས་པད་རྩའི་མྱོས་བུམ་དང་། ། བྱུ་རུའི་མཆུ་སྒྲོས་སྦྲང་རྩིའི་འགྲམ་ཆང་ཅན། མཐོན་མཐིང་ལྕང་ལོ་ཨུཏྤལ་འདབ་མའི་སྤྱན།། སྙིང་སྡུག་ལྷན་ཅིག་སྐྱེས་པ་དུས་སུ་འདུ། ། དེ་ཕྱིར་འཇམ་མགོན་ཁྲོས་པ་གར་དགུའི་ཉམས། ། ཕྱོགས་ཆར་རྫོགས་པ་དུས་དགྲའི་དབང་པོ་ཡང་།། འདི་ན་སྙོམས་འཇུག་ལས་ལས་མ་བཞེངས་པས། ། བདེ་གཤེགས་ཕལ་ཆེར་རྗེས་ཆགས་ཟོལ་ལ་བརྟེན། ། འདི་ན་གང་གནས་ཐབས་ཤེས་མཉམ་འཇུག་པའི།། བརྡ་མཚོན་ཤརལྷོའི་ཆུ་བོ་གཉིས་སྦྱོར་ལ།། འདབ་ཆགས་བུང་བ་ལྷག་ལྷག་དགོད་པ་དང་། ། མེ་ཏོག་མགྲིན་པ་འཁྱོག་སྟེ་ལྟ་བ་བཞིན །། ལྟེ་བའི་གསང་ལྕམ་མྱོས་པའི་འཛུམ་ཟེར་གྱིས། ། བསུས་པ་གྲོང་ཁྱེར་སྟོང་ཕྲག་དོན་གཉིས་ནས།། མི་འགྱུར་ལྷན་སྐྱེས་དགའ་བའི་རོལ་གར་ཅན། ། རྒྱུ་ནས་དུས་ཀྱིས་མཁའ་སྤྱོད་སར་གཤེགས་སྙམ། ། དེ་ན་ཆོས་སྡེ་གསེར་གྱི་པདྨ་འབུམ། ། བཞད་ལས་དྲི་མེད་མདོ་སྔགས་ལི་ཤིའི་དྲི། ། ཁོར་ཡུག་འཐུལ་བས་སར་སྤྱོད་འོག་མིན་ཞེས། ། ཐེ་ཚོམ་དཔྱང་ཐག་འཛིན་ལ་མངོན་པར་ཕྱོགས། ། ཀུན་ཡིད་མུན་པའི་ལང་ཚོ་བཅིལ་བ་ལ། ། ཞལ་དབུགས་རྩེ་ཡང་ཟླ་རྒྱས་འབུམ་ཕྲག་ལས།། རབ་གསལ་ཁྲི་ཆེན་དུས་ཀྱི་རྡོ་རྗེ་འཆང་། ། འཚོ་གཞེས་ཚེ་དང་ཡེ་ཤེས་དཔག་པར་ཡས། ། རྩོད་པའི་དུས་ཀྱི་བློ་བཟང་པཎྚི་ཏ། ། མི་ཕྱེད་རྡོ་རྗེའི་སྐྱིལ་ཀྲུང་ལ་བརྟེན་ནས། ། ཟབ་མོ་སྒྱུ་མའི་ཏིང་འཛིན་དཔག་ཡས་པར། ། རོལ་ཅིང་ལེགས་བཤད་རྩེ་དགས་ཅི་ཡང་བྲེལ། ། གང་ཞིག་ཁྱོད་ཞལ་མཐོང་བ་ལ། ། བྲེལ་བའི་ཡིད་ཀྱིས་བརྣངས་བྱས་པ། ། རིན་ཆེན་གླིང་ཕྱིན་དེད་དཔོན་ནི། ། རང་སྲས་མཐོང་ལ་དེ་ལྟ་མིན། ། ཁ་བ་ནག་པའི་མདངས་ཀྱིས་འབབ། ། སྦྲུལ་གྱི་སྐྲ་ལོ་སྐྱེ་ཡང་སྲེད། ། མྱུར་བར་དངོས་ཞལ་མི་མཇལ་རི། ། ཞེས་པའི་བྲོ་ཚིག་བཟླས་བུར་བརྩོན། ། དབང་ཕྱོགས་རི་བོའི་ཕྲག་པ་ལས། ། ཉིན་བྱེད་ལྷག་པ་ལ་འཁྲུལ་ནས། ། མཇལ་ཕྱིར་གོམ་པ་བརྡེག་འཆོས་ཏེ། ། བརྒྱལ་ཞིང་ཁྱོར་ཆུ་སྦྱིན་བྱར་གྱུར། ། རྨ་བྱ་འཇོལ་མོའི་གྲེ་འགྱུར་དབྱངས།། ཁྱོད་གསུང་ཉིད་དུ་རྣམ་བརྟགས་ནས། ། མགྲིན་པ་ཡོ་བའི་ཆོ་ག་ལ། ། མཚན་ཡང་མནལ་ཐབས་དགུང་ལ་ཡལ། ། ད་ནི་ཞག་བཅུའི་མཇུག་རྩེ་ན། ། ཆོས་ཀྱི་བགྲོ་བ་མཛད་དོ་ཞེས། ། རེ་བའི་མིག་འབྲས་རི་མོ་བཞིན། ། ཟུམ་པ་མེད་པར་ཁྱོད་ལ་བཙུགས། ། ཉེ་བའི་མངག་གཞུག་རིན་པོ་ཆེ་ཡི་མིང་། ། བཀོལ་བདེ་གཞོན་ནུ་ཕྲ་མོ་ལས་འཕགས་ནས། ། སྲི་ཞུར་སྒྲིམ་པའི་བག་ཡོད་ཉིན་མཚན་དུ། ། རང་གིར་འཁུར་ལ་ལས་བཤོལ་ག་ལས་རྙེད། ། མ་གོམས་ཕྱིར་ན་གཡོས་སྦྱོར་སྣ་ཚོགས་ལ། ། ལག་སོར་ཤིང་སྐམ་ཡལ་ག་ལྟར་གྱོང་བས། ། སྨྲས་ཀྱང་ཧྲིག་ཧྲིག་མིག་དང་ཅག་ཅག་གི། འདེགས་འཇོག་མང་པོས་ས་ལ་ངལ་བ་སྟེར། ། སྣུམ་ཁུ་ཁོལ་མ་སྤྲིན་གྱི་སྙིང་བོ་གང་། ། གྲོ་ཕྱེ་ཐུལ་བ་རལ་བས་མ་ཐེག་སྟེ། ། འགྱོད་པའི་ཤུགས་ཀྱིས་སོ་ཕྲེང་བུད་པའི་ཤུལ། ། སྤྲིན་བྲལ་གློག་སྟོང་འགྱུ་བའི་གཅོང་རོང་ཉིད། ། ཤ་ཚིལ་མངར་བའི་རོ་བཅུད་སྲོག་བྱས་པའི། ། རྒྱུ་མའི་ཚོད་མ་གྱ་གྱུ་ལྷུང་བའི་ལྕི། ། མ་ཟིན་ཟངས་མཐིལ་གོར་མོར་བརྡོལ་བ་ལ། ། བླ་གོས་གླན་པ་བཞད་གད་རྒྱུན་མའི་གསོས། ། ཉིན་གཅིག་མཐར་བྱེད་དབྱུག་ཏོ་སོག་མ་ལྟར།། ཟིལ་གནོན་འཁར་བ་རིང་བོས་འཇིགས་བསྐྱེད་ནས། ། གཡང་དཀར་ཅེ་སྤྱང་དྲག་པོས་བདས་པ་ལྟར། ། བགྲོད་བྱེད་ས་ལ་བརྡེག་འཆའ་བཞིན་དུ་དེད། ། བྲེད་ཤ་ཐོན་པའི་ཕྱི་མིག་བགྲད་བཞིན་དུ། ། ལྷམ་དང་བཅས་པར་དམར་ནག་འདྲེས་མའི་ཆུར།། ཚོམ་མེད་བརྒལ་ཚེ་བར་སྣང་ལེགས་བྲིས་བུའི། ། བཞད་གད་དབྱར་དུས་འབྲུག་སྒྲའི་ཟོལ་གྱིས་བྱུང་། ། མཛོད་གཉེར་ལས་ཚན་སོ་སོར་མ་དམིགས་པས། ། གང་གང་དགའ་བ་དེ་དེས་རེས་མོས་སུ། ། གཏོང་བའི་ཕྱག་རིང་སྣ་ཞགས་ལྟར་རྐྱོང་བས། ། བྱིན་ཟས་ནམ་མཁའ་མཛོད་ལ་སྐྱེངས་པ་སྟེར། ། དེ་སྐད་གང་འོས་གཏམ་གྱི་མེ་ཏོག་ནི། ། ལྷུགས་པར་བཀྲམ་ན་རབ་དགེའི་ཕོ་ཉ་བ། ། ཁྱོད་ལ་བཟང་དགུའི་ཟས་སྣ་སྟོང་ལྡན་པས། ། རྣམ་པར་དགེས་པའི་དགའ་སྟོན་ཅི་ཡང་འགྱེད། ། ལེགས་བཤད་སྨྲ་བའི་ལྕེ་རྩེ་གློག་ལྟར་རྣམ་པར་དགའ་འགྱུ་ཞིང་།། མགྲིན་པའི་ཕུག་དག་རིག་པའི་དབྱངས་ཀྱི་ང་རོ་འཛིན། ། མཁས་ལས་མཁས་པའི་ཟུར་ཕུད་ལ་ནི་རྐང་སྟེགས་རབ་འཆའ་རྣ་བར་སྔོན་མེད་ཨུཏྤལ་རྒྱན་བྱིན་རྩེ་དགས་འཁྲིད།། མ་ཁོལ་དབྱངས་དང་ཆོས་དབང་གྲགས་པའི་ངག་རིག་གཅིག་ཏུ་འདྲེས་པ་མིན་ནམ་ཉམས་ཀྱིས་འཕགས་པའི་ལང་ཚོ་འབར། ། དུས་ཀྱི་བསོད་ནམས་ཟོང་གིས་ཁུགས་མིན་ཀུན་མཁྱེན་ཇི་བཞིན་དཔག་ཡས་མཐུ་ལས་སྨྲ་བའི་ཉི་མ་གཅིག་པུར་གྲུབ། ། དེ་ཡི་རྐང་སེན་བཀོས་པའི་འཛིན་མ་ཡང་། ། དབྱངས་ཅན་རིག་པ་འབྱུང་བའི་ཆུ་གཏེར་ཞེས། ། ངང་བའི་བུ་མོ་བས་ཀྱང་ཟུར་ཕུད་ཀྱིས། ། རེག་པའི་དྲེགས་ལྡན་སྲིད་ན་གཞལ་ཡོད་མིན། ། དེ་ཕྱིར་ཀུན་ཏུ་མྱོས་པ་ལ། ། ལུས་མེད་དགའ་མ་སྐྱེངས་བྱེད་པའི། ། ཨེ་ཧོ་ངག་གི་ཟླ་བ་འདི།། ཐེངས་གཅིག་རྩེད་མོའི་རྣམ་འགྱུར་ཙམ།།
བདའ་ཚང་སྙེམས་གྲོལ་གྱིས་འོས་སྦྱོར་བྱས།
འཕྲིན་སྟེགས། weikangba