ཡུལ་བག་ཆགས་སྔན་བའི་གྲོང་ཁྱེར་ཞེས་པར། རྗེ་རང་རིགས་རྒྱལ་པོ་འཁོར་བཅས་དཔལ་འབྱོར་ལྷུན་གྲུབ་ཁང་དུ་འཚོགས་ཏེ་བཟང་བཏུང་ལོངས་སྤྱོད་ཀྱིས་དགྱེས་སྟོན་རྒྱ་ཆེར་རོལ་བ་མངོན་པར་ཕྱོགས་པ་དེའི་ཚེ། རྗེ་ཉིད་ཀྱི་དགོངས་པར་ཆང་འདི་བཏུངས་ཆེས་ན་འཕྲལ་ཉམས་དགའ་ཡང་རྟིང་སོར་ཤེས་པ་ཉོག་ཅིང་ཁམས་མི་བདེ་བའི་ཆོས་ཅན་ཁོ་ན་ཡིན་གཤིས། རང་ཉིད་ནས་ཀྱང་གང་འཚམས་དང་གྲལ་བྱིངས་ལའང་འདོད་སྦྱར་ལས་ཨུ་ཚུགས་ཆེ་བ་རང་མི་འགབ་པས། དེ་རྩིས་ཀྱིས་གསོལ་ང་ལན་མང་ཙམ་གཏོང་བའི་བཀོད་པ་བྱས་ན་སྙམ་པ་ན། གྲལ་གྱི་དབུས་ན་ཆང་སིལ་མའི་ཟོམ་བུ་དང་རྫ་མ་འབོར་ཆེ་བསྒྲིགས་པའི་གྲལ་ནས་ཟོམ་ཆེ་་ཤོས་རྒྱབ་ཏུ་དེར་ལྕོག་ཅན་བརྗིད་ཅིང་ལྷན་ཆགས་པ་དེའི་ནང་ནས་ཆང་གི་ལྷ་མོ་སྐུ་མདོག་བཞིན་རས་མཛེས་ཤིང་འཛུམ་ལ་ཤ་མཆོར་ཅིང་བག་དྲོ་བ། དབུ་སྐྲ་ལྗང་སྔོན་གྱི་ཐོར་གཙུག་མེ་ཏོག་དམར་པོ་ཤས་ཆེ་བའི་དྲྭ་བས་བརྒྱན་པ་ཞིག་སྐེད་པ་ཡན་ཐོན་ཏེ། གཏིང་ནས་ཁྲོ་ཉམས་གཡོ་བཞིན་དུ་རྣམ་པར་གུས་པའི་ཚུལ་གྱིས་སོར་མོ་སྦྱར་ཏེ། གཏིང་ནས་ཁྲོ་ཉམས་གཡོ་བཞིན་དུ་རྣམ་པར་གུས་པའི་ཚུལ་གྱིས་སོར་མོར་སྦྱར་ཏེ་འདི་སྐད་དོ།།

ཀྱེ་ལགས།

རྗེ་རང་རིགས་རྒྱལ་པོ་གང་དུ་དགོངས།།

ཐུགས་གཞན་དུ་མ་ཡེངས་ཚུར་གསོན་དང་།།

ངེད་བཏུང་བའི་མཆོག་གྱུར་ཨ་མྲི་ཏ།།

དངོས་གནས་ཀྱི་བབ་རྐྱེན་འདི་སྐད་དོ།།

ཕྱི་སྣོད་ཀྱི་འཇིག་རྟེན་ཆགས་པའི་ནང་།།

བཅུད་སེམས་ཅན་སྣ་ཚོགས་ལས་ཀྱིས་སྐྱེས།།

དེ་སྐྱེས་པ་འཚོ་བར་བཟའ་བཏུང་བྱུང་།།

མ་དྲིན་ཅན་དཀར་མོའི་ནས་འབྲུ་དེ།།

སྤྱིར་སེམས་ཅན་ལེགས་བྱས་གཟུགས་ཟུ་གྲུབ།།

སྒོས་རྒྱལ་བའི་ཐུགས་བསྐྱེད་དྲོད་གཤེར་སོགས།།

ཐབས་རྟེན་འབྲེལ་དུ་མས་གྲུབ་པ་དང་། །

དམ་དེ་ལས་སྤུན་གཉིས་བྱུང་བ་ལ།།

ཁོང་ཕུ་བོར་རིན་ཆེན་རྩམ་པ་དང།།

ང་ནུ་མོར་བདེ་ལྡན་བདུད་རྩི་ཐོགས།།

ངེད་སྤུན་གཉིས་ཆེ་བའི་ལོ་རྒྱུས་རྣམས།།

ཡོངས་བརྗོད་ན་རྡོ་རྗེའི་ལྗགས་ཀྱང་འཛད།།

དེ་བས་ན་གནས་ཚུལ་ཆ་ཤས་ཙམ།།

འུ་ཐུག་གིས་མི་ཞུ་དབང་མེད་ལ།།

སྔོན་རྒྱ་གར་འཕགས་པའི་ཡུལ་ཕྱོགས་དང་།།

ལྗོངས་གངས་རིས་བསྐོར་བའི་ཞིང་མཆོག་འདིར།།

བླ་མ་དང་ཡི་དམ་མཁའ་འགྲོ་ཡིས།།

མཆོད་སྤྲིན་དུ་བདེ་ལྡན་ང་རོལ་བས།།

ཟག་མེད་ཀྱིས་ཐུགས་དམ་དབྱིངས་སུ་བསྐངས།།

བྱིན་རླབས་དང་དངོས་གྲུབ་ཆར་ལྟར་བསྟིལ།།

མཁན་སློབ་དང་གྲུབ་ཐོབ་རིག་སྔགས་འཆང་།།

སྐྱེམས་མཆོད་དུ་བདེ་ལྡན་ང་གསོལ་བས།།

ཉམས་རྟོགས་ལ་འབྲས་བུ་སྨིན་སྨིན་བྱུང་།།

རྒྱལ་བློན་དང་སྡེ་དཔོན་ཆེ་དགུའི་ཚོགས།།

མཉེས་ཆེད་ལ་བདེ་ལྡན་ང་གསོལ་བས།།

བློ་གྲོས་ལ་དབྱར་མཆོ་རྒྱས་རྒྱས་དང་།།

གཟི་བརྗིད་ལ་ཉི་གཞོན་འབར་འབར་བྱུང་།།

བཙུན་མོ་དང་ཡིད་འོང་མོ་གཞོན་ཀུན།།

བཏུང་བའི་མཆོག་བདེ་ལྡན་ང་རོལ་བས།།

དགའ་སྐྱིད་ཀྱི་དགྱེས་ཞལ་འཛུམ་མེར་མེར།།

གླུ་དབྱངས་སོགས་རྒྱ་གླིང་འགྱུར་འགྱུར་བྱུང་།།

དམག་དཔོན་དང་ཇག་དཔོན་དཔའ་བོའི་ཚོགས།།

དཔུང་གྲོགས་སུ་བདེ་ལྡན་ང་བསྟེན་པས།།

སྙིང་སྟོབས་ལ་མེ་ལྕེ་འབར་འབར་དང་།།

དགྲ་ཐོག་ཏུ་སེང་གེ་མཆོངས་མཆོངས་བྱུང་།།

མཇའ་འབངས་ཀྱི་ཕོ་མོ་རྒན་གཞོན་ཚོགས།།

ཁ་སྐོམ་དུ་གསེར་ཆང་ང་བཏུངས་པས།།

བདེ་སྐྱིད་ལ་ཉི་མ་ཤར་ཤར་དང་།།

ཨ་པོ་ལ་དབྱར་རྩྭ་སྐྱེས་སྐྱེས་བྱུང་།།

དུས་སྙིགས་མ་ཡང་མཐའི་འགོ་ཚུགས་ནས།།

ཤར་ཙི་ནའི་བཏུང་བ་འཁྱམས་པོ་ཞིག །

བྱུར་རིན་གྱི་ཉོས་ནས་ས་འདིར་སླེབས།།

ཁོས་སྡིག་ལྟུང་སྤེལ་བའི་ས་བོན་ལ།།

མིང་རྒྱ་ཇར་བསྙད་ནས་ཀུན་གྱིས་གསོལ།།

དེ་གསོལ་བས་ཉམས་རྟོགས་འཇའ་སྤྲིན་ཡལ།།

གྲུབ་ཐོབ་ཀྱི་མུ་གེས་ཐར་ལམ་ཕྲ།།

ནང་བློ་གྲོས་ཀྱི་མཚོ་མོ་ཁྱགས་ཀྱིས་བསྡམ།།

ཕྱི་གཟི་བྱིན་གྱི་འོད་སྣང་མོག་པོར་སོང་།།

རྩལ་དཔའ་མཛངས་ཀྱི་རྒྱ་སྟག་རི་ལ་ཤོར།།

དམུ་བསམ་ངན་གྱི་སྤྲུལ་དུག་ཕུག་ཏུ་འཛུལ།།

ཁོ་བཏུང་བ་ཕུང་བྱེད་སྣ་གཅིག་ལ།།

ཚྭ་མར་སོགས་སྡིག་ཟས་མང་པོ་ཞིག །

སྒྲུབ་རྩོལ་གྱིས་འཇིག་རྟེན་དབུལ་པོར་བཏང།།

ཚེ་ཕྱི་མ་དམྱལ་བའི་རོང་དུ་བསྒྲིལ།།

ལྟས་འདི་ཕྱི་གཉིས་མེད་འཁྱམས་པོ་འདིས།།

ངེད་བདེ་ལྡན་བདུ་རྩིའི་ལས་སྒོ་བཀག །

རྗེ་རང་རིགས་ཀྱི་རྒྱལ་པོ་རིན་པོ་ཆེ།།

བསྟན་བཤིག་གི་བཏུང་བ་ཁྲག་མདོག་འདི།།

རབ་བོད་ཁམས་ཡུལ་ནས་གནས་དབྱུང་མཛོད།།

དེ་མིན་ན་རྗེ་ཡི་མངའ་ཞབས་ནས།།

ཡུལ་དབུད་དང་མཐར་གྱི་བཞུགས་གྲལ་འདིར།།

ཁོ་དྲི་ཙམ་མེད་པའི་བཀའ་ཁྱབ་ཞུ།།

ཞེས་ཟེར་བའི་སྐབས་དེར་མ་བྱན་ནས་གསོལ་ཇ་བཏེགས་ཏེ་སྡོད་སྐབས་གསོལ་ལྟིར་གྱི་ཁ་གཅོད་རང་དབྱེའི་དབུས་ནས་ཇའི་ལྷ་མོ་སྐུ་མདོག་རྒྱ་མ་མཚར་ཞིང་མིག་རྩ་གྲུང་བ། མེ་ཏོག་གི་ཐོད་བཅིངས་དང་ཞག་གི་བཟོ་རིགས་ཀྱིས་བརྒྱན་པ་ཞིག་ཀྲོང་འོངས་འདི་སྐད་ཟེར་རོ། །

ཧེ་ཧེ། གནས་མཚན་དཔེས་སྤྲས་པའི་ཁང་བཟང་ནས།།

རྗེ་རང་རིགས་ཡེ་ཤེས་ཉི་མ་དགོངས།།

བཅུད་རོ་ལྡན་རྒྱ་ཇའི་སྙིང་པོ་འདི།།

ཁུངས་རྒྱུད་པ་མི་ངན་རྒྱུད་པ་བཟང་།།

སྔོན་ཐུབ་ཆེན་གསང་ཆེན་མཚོ་རྒྱལ་གྱི།།

ཕྱག་མཉམ་བཞག་སྟེང་གི་གསོལ་ལྷུང་ནང་།།

ངེད་ལྗོན་པའི་ཡང་མེས་པད་སྡོང་ཆེ།།

རབ་འཁྲུངས་པ་བསྙོན་དུ་སུ་ཡིས་དགོངས།།

དེ་རྗེས་ཀྱི་མི་མཇེད་འཇིག་རྟེན་འདི།།

ཆུ་གཏེར་གྱི་ཕུང་པོས་ཁེངས་པའི་དབུས།།

ངེད་ལྗོན་པའི་མེས་པོ་དཔག་བསམ་འཕགས།།

མེ་ཏོག་ཁྲི་སྟོང་ཚར་དུ་དངར་བའི་དཔལ།།

ཁོང་ལྷ་གནས་གོང་མས་མཐོང་བའི་ཚེ།།

བསྐལ་ཆེན་འདིར་སངས་རྒྱས་སྟོང་འབྱོན་པའི།།

དགེ་མཚན་དང་རྟེན་འབྲེལ་བཟང་པོར་ངེས།།

བསྐལ་བཟང་ཞེས་རབ་ཏུ་མངགས་པ་ལ།།

རྒྱུད་དེ་ལས་ཆས་པ་སྤུན་གསུམ་གྱི།།

ཕུ་བོ་ཁོང་ཡོངས་འདུའི་འཁྲི་ཤིང་ཆེ།།

སྟོང་ཕྱོགས་ལྷ་ཡི་ཡུལ་དུ་བཞུགས།།

ལྷ་ལ་དགོས་འདོད་ཡིད་བཞིན་སྟེར།།

བར་པ་བྱང་ཆུབ་ལྗོན་ཤིང་ཆེ།།

འཕགས་ཡུལ་རྡོ་རྗེ་གདན་དུ་འཁྲུངས།།

སེམས་དཔའ་རྣམས་ཀྱི་སྐུ་རྟེན་དང་།།

རྫོགས་སངས་རྒྱས་པའི་གནས་མལ་ཡིན། །

གཞོན་མ་ཤེས་རབ་སྒྲོལ་མ་ང།།

འཇམ་དཔལ་གཞོན་ནུས་བྱིན་བརླབས་ནས།།

དཔྱིས་དགསུམ་ཕུད་ཀྱི་ལོ་མ།།

གོང་མ་མཆོད་ཡོན་ལ་སོགས་པའི།།

བླ་དཔོན་ཆེ་རྒུའི་སྤྱོད་ཡུལ་གྱུར།།

སྐུ་གཟི་བརྗིད་ཆེ་བ་དེ་ནས་བྱུང་།།

དབྱར་གསུམ་པོ་འདབ་རྒྱས་པ་དེ།།

ཁོང་སྐྱ་སེར་བྱིངས་ཀྱི་སྐྱེམས་མཆོག་ཡིན།།

རོ་བཅུད་ལྡན་པས་སྐྱིད་ཚོར་ཞིང་།།

ཞོད་འཇགས་དྲག་རྩུབ་འདོད་པ་ཆུང་།།

སྟོན་གསུམ་ལོ་མའི་རྩ་བ་དེ།།

འབྲེལ་མཚུངས་ཨ་རོག་ཁམས་པར་ཐོབ།།

མདོག་དཀར་རོ་བཅུད་ལྡན་པ་དང་།།

ངར་འཚུབ་ཆེ་བ་དེ་ལས་བྱུང་།།

ཁྱད་པར་བླ་མ་དགེ་འདུན་རྣམས།།

མཉེས་པའི་མཆོད་སྤྲིན་ང་ལས་མེད།།

ང་ཡི་སྐྱེམས་གསོལ་རིག་པ་དྭངས།།

ཤེས་རབ་འཕེལ་ཞིང་དགེ་སྦྱོར་བརྩོན།།