རྫ་སྟེང་ཆེན་དགོན།

    དེ་ཡང་རྫ་སྟེང་ཆེན་དགོན་པ་འདི་ཉིད་ཡུལ་གང་དུ་ཆགས་པའི་གནས་ཀྱི་ཆེ་བའི་བཀོད་པ་བཤད་པ་ནི། བསྐལ་པ་བཟང་པོའི་དུས་འདིར་སངས་རྒྱས་སྟོང་རྩ་གཉིས་བྱོན་པའི་གནས་ཀྱི་སྙིང་པོ་སྐུ་གསུང་ཐུགས་ཀྱི་བསྟན་པ་མ་ཉམས་པར་བཞུགས་པ་དཔལ་ལྡན་ཛམ་བུ་པྲིཀྵས་མཚན་པའི་གླིང་ཆེན་པོའི་ཡུལ་དབུས་ན་བརྗིད་ཅིང་ཆགས་པའི་གནས་མཆོག་གངས་རྒྱལ་ཏི་སེ་ལྷུན་པོ་བླ་ན་མཐོ་ཞིང་། ཡུལ་གྱི་ཁོར་ཡུག་ཐམས་ཅད་ནས་གངས་དཀར་གྱི་ཕྲེང་བ་ཚར་དུ་དངར་བས་ཕྱོགས་ཀུན་ནས་ཡོངས་སུ་བསྐོར་ཞིང་མི་ལོ་ཁྲི་ཕྲག་ཡར་སྔོན་ནས་རྒྱལ་བ་རྫོགས་པའི་སངས་རྒྱས་ཀྱི་ཞབས་དངོས་སུ་བཅགས་པའི་གནས་གངས་ཅན་བོད་ཀྱི་ཞིང་ཁམས་འདི་ལ་སྟོད་ན་མངའ་རིས་སྐོར་གསུམ། བར་དུ་དབུས་གཙང་རུ་བཞི། སྨད་ན་མདོ་ཁམས་སྒང་དྲུག་གམ་ཡང་ན་ཆུ་བཞིས་ཕྱེས་པའི་སྒང་བཞི་ལས་བསྡ་སྒང་རིང་མོའི་སའི་ཆར་གཏོགས་པ། ཤར་རྫ་ཟླ་བ་ཤེལ་ཀླུང་དུ་འབོད་པའི་བསྡའི་རི་རྒྱུད་ན་རྫ་ཁོག་ཅེས་གྲགས་པའི་གནས་དེར་ལྷུན་ཆགས་སེ་ཡོད།

　　

　　 སྲིད་པ་སངས་པོ་འབུམ་ཁྲི།

    གནས་དེ་ན་མེ་ཏོག་གི་ཁྲ་ཚོམ་བཀྲ་བའི་སྤང་ལྗོངས་དང་ནེའུ་གསིང་གི་ཐང་ཆེན་ན་སྤུ་སྡུག་གི་རི་དྭགས་སྣ་ཚོགས་རྒྱུ་ཞིང་། ཚང་ཚིང་གཡུ་ལོས་བརྒྱན་པའི་ནགས་ཚལ་ན་སྐད་སྙན་བྱ་རིགས་ཀྱི་འཕུར་ལྡིང་རྩེན་པ། དྭངས་གཙང་གི་རྫ་ཆུ་དང་མཚོ་དང་མཚེའུ་རྣམས་སུ་ཉ་གསེར་མིག་ཅན་གྱི་འཁྱུག་རྩལ་འགྲན་པ་སོགས་ཕུན་སུམ་ཚོགས་པའི་གནས་ཀྱི་བཀོད་པ་ཡོངས་སུ་རྫོགས་པའི་གྲོང་དང་གྲོང་ཁྱེར་གྱི་ཚུལ་དུ་ཆགས་པའི་ཡུལ་གྱི་དབུས་ན། མདོ་ཁམས་གནས་ཆེན་ཉེར་ལྔའི་ནང་ཚན། རིག་འཛིན་གོང་མ་རྣམས་ཀྱི་ལུང་གིས་བསྔགས་ཤིང་ཡབ་མཁའ་འགྱིང་དཀར་པོས་བྱིན་གྱིས་བརླབས་པ། འཆི་མེད་དྲན་པ་ཡབ་སྲས་ཞབས་ཀྱིས་བཅགས་པའི་གནས་མཆོག་གཡུང་དྲུང་ལྷུན་པོའམ་རྫ་ཁྲ་ལྡོམ་ཝེར་སྙིང་མི་འགྱུར་ཞེས་པ། སྟོད་ལྷུན་པོའི་རྩེ་མོ་དགུང་སྔོན་གནམ་ལ་ཟུག་ཅིང་དལ་བུར་རྒྱུ་བའི་སྨུག་སྤྲིན་དར་དཔྱང་དཀར་པོ་བླ་བྲེ་བྲེས་པ། རི་སྐེད་ཀྱི་ཕྱོགས་དང་ཕྱོགས་ཀུན་ཏུ་སྤང་རི་དང་རྫ་རི་བྲག་སྐྱིབས་ཀྱི་རྣམ་པ་དུ་མས་ཡོངས་སུ་ཁེངས་པ། མཐའ་འཁོར་ན་སྔོ་ལྗང་གཡུ་མདངས་ཀྱིས་སྤུད་པའི་ལྷ་ཤིང་ལྗོན་པའི་ཚང་ཚིང་གིས་མཛེས་པར་བརྒྱན་པའི་གྱེར་ཟ་མཆེད་གསུམ་གྱི་མདུན་ཞོལ། ཡུམ་མཁའ་ལ་གདུག་མོས་བྱིན་གྱིས་བརླབས་པའི་ལྕམ་མོ་ཀླུ་སྨན་དཀར་མོ་ཞེས་བླ་མཚོ་ཝ་ན་མཚོ་གསུམ་གྱི་གཡོན་ཟུར། མདུན་རི་དགེ་བསྙེན་ཁྱུང་ཐོག་གི་རྩ་བ། རྒྱབ་རི་ཟེ་མོ་གཡུ་རྩེ་ཞེས་རི་བོ་གླང་ཆེན་འགྱིང་པ་འདྲ་བའི་མགོའི་ཐོག ཐང་ཆེན་མེ་ལོང་སྦུབས་པ་ལྟ་བུའི་དབུས་སུ་ནི་དགོན་སྡེ་འདི་ཉིད་གང་དུ་ཆགས་པའི་གནས་གཞི་ཡིན།

　　

　　

                      རྫ་སྟེང་ཆེན་དགོན་གྱི་གཙུག་ལག་ཁང་རྙིང་པའི་མདུན་ངོས་ཀྱི་རྣམ་པ། 

 

　　དེ་ལ་དགོན་སྡེ་འདི་ཐོག་མར་ཕྱག་འདེབས་པ་པོ་ནི། ལོ་ཟླ་ཞིབ་ཕྲའི་རྩིས་ལ་བགྲངས་མ་ནུས་ཀྱང་མཁས་པ་རྨེའུ་ཚང་གི་གདུང་བརྒྱུད་ཟམ་མ་ཆད་པ་ལས་བྱུང་བའི་རྨེའུ་གྲུབ་ཆེན་ཨ་ཡུ་དང་ར་བྱོན་ཏེ་དུས་རབས་ལྔ་པའི་ནང་ཐོག་མར་དགོན་པ་ཕྱག་བཏབ་པ་ཡིན་པར་གསུངས། དགོན་པའི་གནས་གཞི་དང་པོ་བཟུང་ཚུལ་ནི། དེ་ཡང་རྒྱལ་སྲས་རིག་འཛིན་གོང་མ་ཐམས་ཅད་རང་ཉིད་ལྟ་སྤྱོད་སྒོམ་པའི་འབྲས་བུ་མངོན་དུ་བྱས་ཏེ་གཏན་བདེའི་རྒྱལ་ཁབ་ཆེན་པོར་རིག་པའི་བཙན་སར་ཟིན་ཀྱང་། རིགས་དྲུག་ཏུ་འཁོར་བའི་སེམས་ཅན་གྱི་སྡུག་བསྔལ་ལ་དམིགས་པའི་ཤས་མི་བཟོད་པའི་སྙིང་རྗེ་ཆེན་པོས་འགྲོ་ལ་རྗེས་སུ་ཆགས་པས་ནམ་ཡང་ཐུགས་རྗེས་ཡལ་བར་མི་འདོར་བའི་དཔག་ཏུ་མེད་པའི་ཐུགས་བསྐྱེད་ཀྱི་བདག་ཉིད་ཅན་དུ་བཞུགས་པས། གནས་ངེས་མེད་ཀྱི་རྒྱལ་ཁམས་འགྲིམ་ཞིང་བོན་ངེས་མེད་ཀྱི་གདམས་ངག་བསྟན་ཏེ་འགྲོ་དོན་འགྲུབ་པའི་གནས་གང་ལྷག་པ་དེར་ཕེབས་ནས་འགྲོ་བའི་དོན་དུ་སྐུ་མི་ཕོངས་པའི་རླབས་ཆེ་བའི་མཛད་འཕྲིན་བསྐྱངས་པ་བཞིན། རྨེའུ་སྟོན་ཨ་ཡུ་དང་ར་མཆོག་ཉིད་ཀྱང་དེ་ལས་མི་གཞན་ཏེ་མདོ་ཁམས་སྨད་ལ་འགྲོ་དོན་ཆེ་བར་དགོངས་ཏེ་དྲེལ་དཀར་པོ་ཞིག་ལ་གསུང་རབ་རྒྱབ་གཅིག་བཀལ་ནས་གཤེགས་ཏེ་འོང་། དྲེལ་དཀར་མོ་དེ་གོང་ནས་བཤད་པའི་ས་མིག་དེར་སླེབས་པ་དང་ངལ་གསོ་བྱས་ཏེ་འགྲོ་ཁ་མ་ཉན་པའི་ཚུལ་ལ་བླ་མའི་རྟེན་འབྲེལ་ལེགས་པར་དགོངས་ཏེ་གནས་དེར་དགོན་པ་འདི་ཉིད་བཏབ་པ་ཡིན།

　　

　　མཉམ་མེད་ཤེས་རབ་རྒྱལ་མཚན། 

  　རྫ་སྟེང་དགོན་གྱི་གཙུག་ལག་ཁང་རྙིང་བའི་རྒྱ་མཐོང་ཁའི་རྣམ་པ། 

　　

  སྲུང་མ་ཁང་། 

　　

   དགོན་པའི་མཚན་ལ་བསྟན་པ་འགྱུར་མེད་སྟེང་ཆེན་རྣམ་རྒྱལ་གླིང་ཞེས་གསོལ། དེ་ནས་མཁས་ཤིང་གྲུབ་པའི་བདག་ཉིད་རྨེའུ་སྟོན་གཡུང་དྲུང་གཙུག་གཤེན་རྒྱལ་བ་བྱོན་ཏེ་དགོན་འདིར་སྲུང་མའི་བསྐང་གསོལ་སོགས་མཛད་པ་དང་འཆད་ཉན་སྒོམ་སྒྲུབ་ཀྱི་གཞུང་བཟུང་སྟེ་དགོན་པའི་བསྟན་དོན་རྒྱ་ཆེར་བསྐྱངས། དུས་རབས་བཅུ་པའི་སྔ་གཞུག་ཙམ་ན་རྨེའུ་བསོད་ནམས་དབང་གྲགས་རྫ་སྟོད་སྨད་ཀུན་ཏུ་བསྟན་འགྲོའི་དོན་ལ་ཆིབས་བསྐྱོད་གནང་བ་དང་བསྟུན་ཏེ་དགོན་འདིར་ཕེབས་ནས་བསྟན་སྲིད་ལ་བཀའ་དྲིན་བླ་མེད་བསྩལ། དེ་མཚུངས་སུ་རྨེའུ་ཚང་གྲུབ་ཆེན་ནམ་མཁའ་གཡུང་དྲུང་བྱོན་ཏེ་རྨེའུ་སྟོན་ཆེན་པོ་རྨེའུ་ལྷ་རི་གཉེན་པོའི་སྐུ་གདུང་རིང་བསྲེལ་གདན་དྲངས་ཏེ་དེ་ཉིད་བཞུགས་པའི་གདུང་རྟེན་སོགས་རྟེན་གང་མང་བཞེངས་པའི་འཕྲིན་ལས་བསྐྱངས། གཞན་ཡང་རྨེའུ་ཚང་གི་མཁན་རབས་དང་བླ་རབས་ཇི་སྙེད་ཅིག་བྱོན་ཏེ་དགོན་པའི་གདན་ས་བཟུང་ཞིང་སྨིན་གྲོལ་གྱི་འཕྲིན་ལས་རྒྱ་ཆེར་བསྐྱངས་ཏེ་སྐུ་གསུང་ཐུག་ཀྱི་རྟེན་གྲངས་མེད་པ་བཞེངས་སུ་གསོལ་བར་མཛད། དེ་ལྟར་མདོ་སྨད་དུ་མཁས་པ་རྨེའུ་ཚང་གི་བསྟན་འགྲོའི་དོན་རྣམས་མཐར་ཕྱིན་ཏེ་རེ་ཞིག་སྟེང་ཆེན་དགོན་དུ་གདུང་བརྒྱུད་ཀྱི་སྐྱེ་རབས་ཕྲེང་བའི་མཇུག་བསྡུ་བ་ལ་ཉེ་བར་ཕྱོགས་སོ། །