མཚན་རྒྱས་པར་དཔལ་གྱི་སྟོད་ལུང་མཚུར་ཕུ།   འོག་མིན་ཐུགས་ཀྱི་གནས་མཆོག   མ་དང་མཁའ་འགྲོའི་གདན་ས་ཞེས་ཞུ།   ལུམ་པ་ཟམ་པ་ནས་མཚུར་ཕུའི་ངོས་སུ་སྤྱི་ལེ་ཉི་ཤུ་རྩ་བཞི་ཙམ་སྤྱིར་བཏང་འཁོར་ལམ་བརྒྱུད་སོང་ན་རྒྱ་མཚོའི་ངོས་ལས་སྤྱི་ཁྲེ་བཞི་སྟོང་གསུམ་བརྒྱ་ལྷག་ཙམ་གྱིས་མཐོ་བའི་སར་ཆགས་པའི་དགོན་དེར་སླེབས་ཀྱི་རེད།   ཐོག་མར་གནས་དེར་སྤྱི་ལོའི་དུས་རབས་དགུ་པའི་ནང་བཙན་པོ་མངའ་བདག་ཁྲི་རལ་བཞུགས་མྱོང་བའི་ལྕང་ཕུའི་ཕོ་བྲང་ཉན་མཁར་ཞེས་པ་ཞིག་ཡོད་པ་ལ་དེ་ནི་མངའ་བདག་ཁྲི་རལ་གྱི་བློན་པོ་ཞང་པོ་ཚེས་སྤོང་སྟག་བཟང་ཉ་སྟོས་ཞེས་པའམ་ཚེ་སྤོང་སྟོ་རེ་ཞེས་པས་བཞེངས་པ་དང་།  དེར་དགེ་སློང་བཞི་གྲྭ་གཅིག་བཙུགས་གནང་ནས་ཀ་རུ།   ཐང་པ།   གྲྭ་ཚང་སོགས་དགོན་དེའི་ཆོས་གཞིས་སུ་གནང་།  དེ་རྗེས་མཉམ་མེད་དྭགས་པོ་ལྷ་རྗེའི་དངོས་སློབ་ཁམས་པ་མི་གསུམ་ནང་ཚན་ཁམས་པ་དབུ་སེ་ཞེས་ཀརྨ་པ་དུས་གསུམ་མཁྱེན་པས་བླ་མའི་བཀའ་བཞིན་སྐུ་ཡི་གདན་ས་ཁམས་ལི་ཐང་ཕྱོགས་སུ་སྐམ་པོ་གནས་གནང་ཞེས་བཏབ་གནང་པ་དང་གསུང་གི་གདན་ས་ཁམས་རི་བོ་ཆེར་ཀརྨ་ལྷ་སྟེང་དགོན་བཏབ།   འགྲོ་དོན་རྒྱ་ཆེར་མཛད་ས་དབུས་གཙང་ཕུག་ཏུ་ཡོད་ཅེས་གསུངས་པ་ལྟར་སྙེ་མོ་ཕྱོགས་སུ་ཕེབས་པས་མ་རྙེད།  དེ་ནས་གནས་དེར་སྣ་མཁར་ས་ཁུལ་སྟག་ལུང་ནང་ཞེས་པར་ཟམ་པར་ཟག་མེད་ཤེས་བྱ་ཀུན་མཁྱེན་ཕོ་བྲང་ཞེས་རི་ཁྲོད་ཅིག་ཕྱག་བཏབ་གནང་མཛད།   དེ་ཁུལ་དུའང་དགོན་པ་མང་པོ་ཆགས།   འོན་ཀྱང་ད་དུང་རྟེན་འབྲེལ་མ་འགྲིག་པར་སྤྱི་ལོ་༡༡༥༥ལོར་ད་ལྟའི་དགོན་ཆགས་ཡུལ་དུ་ཕེབས་པས་བདེ་མཆོག་དངོས་སུ་ཞལ་གཟིགས་བྱུང་བ་དང་ཐོག་མར་གྲྭ་མ་གྲུ་བཞི་ཞེས་པའི་གཟིམ་ཆུང་ཆུང་ཆུང་ཞིག་ནང་སྐུ་མཚམས་སུ་བཞུགས།  དེ་ནས་དེ་དང་ཉེ་བར་ཡང་དགོན་སྦུག་ཅེས་ད་ལྟའི་དུས་མཁྱེན་མགོན་ཁང་ཞེས་པར་དགོན་ཆུང་ཞིག་བཏབ།   སྐབས་དེར་རྒྱའུ་ནང་ཞེས་པར་བོན་དགོན་ཆེན་པོ་ཞིག་ཡོད་པར་གནས་མ་ཀིར་བན་དེའི་དགོན་པ་ཞིག་ཆགས་ཡོང་གི་འདུག་པས་མཐུ་བརྒྱབ་སྟེ་མེད་པ་བཟོ་དགོས་ཟེར་ནས་ལྕགས་ཀྱི་རྩམ་ཁོར་ཞིག་ནང་མཐུ་རྫས་རྣམས་བླུགས་ནས་མཐུ་སྒྲུབ་པའི་ཚེ་རྩམ་ཁོར་ཁ་དགྱེས་ཏེ་མཐུ་རྫས་རྣམས་མཚུར་ཞེས་ལུད་པས་གནས་དེར་ཡང་མཚུར་ཕུ་ཞེས་པའི་མཚན་དེ་ལྟར་བཏགས་གནང་མཛད།   ཀརྨ་པ་དུས་གསུམ་མཁྱེན་པ་གནས་དེར་ཡུན་རིང་བཞུགས་ཏེ་མཛད་པ་ཤིན་ཏུ་རྒྱས་པས་ཀརྨ་བཀའ་བརྒྱུད་ཅེས་པའི་ལུགས་ཀྱང་དེ་ནས་ཆགས།   མཐར་དགུང་ལོ་བརྒྱད་ཅུ་གྱ་བཞིར་སྐུ་གཤེགས།   སྐུ་གཤེགས་ཁར་སྤྲུལ་པའི་སྐུ་དངོས་སུ་འབྱོན་པར་དོན་གྱི་ལུང་བསྟན་པ་ལྟར་སྐུ་ཕྲེང་གཉིས་པ་ཀརྨ་པཀྴིས་ཆོས་ཀྱི་བླ་མ་བྱོན་པ་འདི་ནི་གངས་ཅན་བོད་ཀྱི་ལྗོངས་སུ་སྤྲུལ་པའི་སྐུ་ཐོག་མ་དེ་ཡིན།   སྐུ་ཕྲེང་གཉིས་པ་ཀརྨ་པ་ཀྴི་ཁོང་གི་རྣམ་སྤྲུལ་བཟོ་པ་པཀྴི་བྱ་བར་ཁྱོད་ཀྱིས་འདམ་ལྕོག་རྩེ་ལ་ནས་མཐོང་བའི་ལྷ་ཞིག་བཞེངས་དགོས་གསུངས།  བཟོ་པས་ལྷ་དེ་ལྟ་བུ་ཞིག་བཞེངས་པར་རྒྱུ་ཆ་གང་ནས་འཚོལ་དགོས་སམ་ཞུས་པར།   སྟོད་ལུང་རམ་པ་ཕུར་ཟངས་གཏེར་ཡོད་པས་དེ་ལས་ལོངས།   ངས་ཧོར་གྱི་ཡུལ་ནས་གསེར་བསྐུར་འོང་གསུངས་པ་བཞིན་མཚུར་ཕུའི་ལྷ་ཆེན་གཞུ་འདོམ་བཅུ་གསུམ་ཅན་ཞེས་པའི་ལི་ལས་གྲུབ་པའི་ཐུབ་པའི་སྐུ་བརྙན་ཆེན་པོའང་སྐབས་དེར་བཞེངས།  རྒྱ་ནག་ཏུ་གོང་མ་སེ་ཆེན་གྱིས་གདན་ཞུས་ལྟར་ཕེབས་ནས་སྐྱེས་མང་པོ་ཕུལ་བ་རྒྱ་ནག་གི་མཚོ་ལ་བཏབ་གནང་ནས་ཡར་ལམ་བཀའ་འགྱུར་ཁྲོ་པར་སྡེ་དགེ་ནས་བཏོན་ཏེ་དེ་གར་བཞག་གནང་།   ཞལ་དཀར་ཞིག་ཡོད་པ་གསོལ་དཔོན་གྱིས་ཆུ་ནང་འཕངས་འདོད་མ་བྱས་སྟབས་རྒྱབ་ཏུ་འཁུར་འོང་པས་མཚུར་ཕུར་འབྱོར་ལ་ཁད་དུ་གསོལ་འཛར་གནང་སྐབས་ཞལ་དཀར་ཆག་པས་ས་དེར་ཕང་ཐོད་ཅེས་བཏགས་གནང་མཛད།  གནས་དེར་ཆུ་མིག་གཅིག་བཏོན་གནང་ནས་དེར་རྒྱ་གར་ཆུ་མིག་ཐོགས་ཞེས་གསུངས།  གཞན་ཡང་ཁ་སྟོད།   སྣ་མཁར།   མིག་སེར་སྒང་སོགས་ཀྱང་ཀརྨ་སྐུ་ཕྲེང་གཉིས་པས་བཏགས་གནང་མཛད།   དེ་ནས་ཀརྨ་སྐུ་ཕྲེང་རིམ་བཞིན་བྱོན་ཏེ་ཀརྨ་པ་འགྲོ་འདུལ་འཕྲིན་ལས་རྡོ་རྗེ་བར་སྐུ་ཕྲེང་བཅུ་བདུན་བྱུང་།   ཀརྨ་ཞེས་པ་ནི།  ལེགས་སྦྱར་གྱི་སྐད་ཡིན་ཞིང་བོད་སྐད་དུ་འཕྲིན་ལས་ཞེས་པའི་དོན་ཡིན།  དུས་གསུམ་མཁྱེན་པར་སངས་རྒྱས་ཐམས་ཅད་ཀྱི་འཕྲིན་ལས་ཀྱི་བྱེད་པོ་ཞེས་དཔལ་འཁོར་ལོ་སྡོམ་པའི་ལྷ་ཚོགས་ཀྱི་དབང་སྐུར་ཞིང་མཁའ་འགྲོ་འབུམ་གྱི་དབུ་སྐྲ་ལས་བྱས་པའི་ཞྭ་ནག་པོ་དབུ་ལ་གསོལ་བས་འཕྲིན་ལས་པ་སྟེ་ཀརྨ་པ་ཞེས་མཚན་གསོལ་བར་གྲགས།   དེ་ནས་བཟུང་སྐུ་ཕྲེང་ན་རིམ་ལ་ཀརྨ་པ་ཞེས་ཞུ།   ཀརྨ་པ་སྐུ་ཕྲེང་གཉིས་པ་ནས་བཟུང་རིམ་བཞིན་རྒྱ་སྐྱེད་ཆེན་པོ་བྱུང་།  ཚོགས་ཆེན་ཏེ་སྒར་པ་དང་།   གཞིས་པ་གྲྭ་ཚང་།   ཆོས་ཁང་གོང་།   ཟུར་རུ་སོགས་བཅས་པར་ཁྱོན་སྤྱི་ཁྲི་གྲུ་བཞི་མ་ཆིག་ཁྲི་ལྔ་སྟོང་མ་ཟིན་ཙམ་ཡོད།   ཀརྨ་སྐུ་ཕྲེང་དྲུག་པས་གཞིས་པ་གྲྭ་ཚང་རྒྱ་སྐྱེད་དང་།  སྐུ་ཕྲེང་བཅུ་པས་རིགས་སྲས་རྒྱལ་ཚབ་ནོར་བུ་བཟང་པོར་སྐུ་སྐལ་གྱི་ཚུལ་དུ་ཆོས་ཁང་གོང་གནང་།  དེ་ནས་བཟུང་རྒྱལ་ཚབ་སྤྲུལ་སྐུའི་བཞུགས་གནས་སུ་གྱུར།   ཚོགས་ཆེན་ནི་སྐུ་ཕྲེང་བདུན་པའི་སྐབས་བཞེངས།   དེའི་གོང་ཀརྨ་པ་གནས་ངེས་མེད་དུ་ཡུན་རིང་བྱོན་བཞུགས་མཛད་སྐབས་སྒར་གྲྭ་ཚང་ཞེས་སུ་འབོད།  དེ་ནས་རིམ་བཞིན་ཚོགས་ཆེན་གཅིག་དང་།  མཚུར་ཕུ་སྒར་པ།  ཆོས་ཁང་གོང་།  གྲྭ་ཚང་།  ཟུར་རུ་བཅས་ཁང་ཚན་བཞི།   གཙོ་ཁང་གསེར་སྡོང་ཆེན་མོ།  དངུལ་གདུང་ཆེན་མོ་བཅས་ཡོད་པ་ལ་འདུ་ཁང་ཚོགས་ཆེན་ཆེ་མོར་རྟེན་གཙོ་གསེར་ཟངས་ཀྱི་རིགས་གསུམ་མགོན་པོ་ཐོག་སོ་གཅིག་ལྷག་དང་།   བདུན་པ་ཆོས་གྲགས་རྒྱ་མཚོའི་གསེར་གདུང་ལ་སོགས་རྟེན་སྐུ་ཇི་སྙེད།  ཞལ་རས་ལྷ་ཁང་ནང་བརྒྱད་པ་མི་བསྐྱོད་རྡོ་རྗེའི་དབུ་བླ་སྒྲུ་ཐོབ་སངས་རྒྱས་མཉན་པའི་སྐུ་བརྙན་དངུལ་སྐུ་བར་སྣང་མ་ཞེས་པ་ཞིག་ཡོད་ཅིང་།   སྐུ་དེ་བཞེངས་བསྒྲུབས་རྗེས་གསོལ་དཔོན་ལ་ངའི་བླ་མ་འདྲ་འདུག་གམ་ཞེས་གསུངས་པར།  ང་འདྲ་ཡོད་ཅེས་སྐུ་དེས་གསུང་བྱོན་པ་དང་།   རབ་གནས་ཉིན་སྐུ་དེ་ས་ལ་མ་རེག་པར་བར་སྣང་ལ་ཉིན་བདུན་བཞུགས་སྟབས།   དངུལ་སྐུ་བར་སྣང་ཞེས་པའི་མཚན་དེ་ལྟར་བྱུང་།   གཙོ་ཁང་ནང་གོང་གསལ་གྱི་ཐུབ་སྐུ་གཞུ་འདོམ་བཅུ་གསུམ་འཁོར་དང་བཅས་པ་དང་།  གསེར་གདུང་ཆེན་མོའི་ལྷ་ཁང་ནང་གསེར་གདུང་བཞི།   དངུལ་གདུང་ལྷ་ཁང་ནང་དངུལ་གདུང་བཞི།   ཁང་ཚན་སོ་སོ་ལའང་སྐུ་གསུང་ཐུགས་རྟེན་ཇི་སྙེད་ཅིག་བཞུགས་སུ་གསོལ་ཡོད།

　　ད་ལྟ་དངུལ་གདུང་ལྷ་ཁང་ལས་དེ་མིན་ཀུན་གསར་བཞེངས་གནང་བའི་གཙོ་ཁང་ནང་སྔོན་གྱི་ལྷ་ཆེན་གྱི་སྐུ་ཚབ་གསེར་ཟངས་ལས་བཞེངས་པའི་སྐུ་ཚད་དེ་འདྲ་དང་།   གཞན་ཡང་སྔོན་གྱི་སྐུ་བརྙན་སོ་སོའི་སྐུ་ཚབ་གསར་བཞེངས་གནང་བ་མང་པོ།   ཚོགས་ཁང་ཆེན་མོའི་ནང་སྔོན་གྱི་དངུལ་སྐུ་བར་སྣང་མས་གཙོས་རིགས་གསུམ་མགོན་པོ་སོགས་སྐུ་ཚབ་གསར་བཞེངས་གནང་བ་དང་།   རྡོ་གཅལ་དུ་ཆོས་རྒྱལ་མངའ་བདག་ཁྲི་རལ་དུས་བཙུགས་པའི་རྡོ་རིང་ཡང་མཇལ་རྒྱུ་ཡོད། །