བོད་རིགས་ཀྱིས་ཕུང་པོ་བྱ་གཏོར་བྱེད་པ་མཐོང་ཐོས་བྱུང་སྐབས་རྒྱུས་མེད་ནུབ་ཕྱོགས་པ་སོགས་ནི་ཤིན་ཏུ་ཡ་ང་བ་ཞིག་ཏུ་མཐོང་གི་ཡོད་མོད།     འོན་ཏེ་བོད་རིགས་རང་ངོས་ནས་བལྟས་ན་ནི་ཤེས་རིག་གོང་འཕེལ་བྱུང་བའི་ལུགས་བཟང་ཞིག་ཏུ་ངོས་འཛིན་བྱེད་ཀྱི་ཡོད་པ་རེད།     གོང་དུ་བརྗོད་པ་ལྟར་གནའ་དུས་སུ་ནི་ཕུང་པོ་བྱ་གཏོར་བྱེད་པ་སོགས་ཀྱི་སྲོལ་མེད་པར་དུར་དུ་སྦེད་པ་མ་ཟད་གཤིན་པོའི་ཕུང་པོ་དང་མཉམ་དུ་རྟ་དང་གཡག་སོགས་ཀྱང་སྦེད་ཀྱི་ཡོད་ཀྱང་དུས་ཕྱིས་སངས་རྒྱས་ཀྱི་ཆོས་ལུགས་ཤིན་ཏུ་དར་འཕེལ་བྱུང་ནས་མི་ཡི་རྣམ་ཤེས་ལུས་པོ་དང་བྲལ་བའི་རྗེས་སུ་ཕུང་པོ་དེ་ནི་ས་རྡོ་དང་མཚུངས་པར་བེམ་པོའི་དངོས་པོར་གྱུར་ཟིན་པས་ལུས་དེ་སྐྱོན་མེད་དུ་བཞག་ཐོག་དེ་ལ་སྤྱོད་དབང་དང་སྤྱོད་པའི་ནུས་པ་གང་ཡང་མེད་བཞིན་དུ་དེ་དང་མཉམ་དུ་དངོས་པོ་འཇོག་པ་དང་ལྷག་པར་དུ་ཉེས་མེད་རྟ་གཡག་ཀྱང་བསད་ནས་མཉམ་དུ་སྦ་བ་ནི་དགོས་པ་གང་ཡང་མེད་པ་མ་ཟད་སྡིག་པའི་རྒྱུ་རུ་མཐོང་བ་དང།     སངས་རྒྱས་བཅོམ་ལྡན་འདས་ཀྱིས་བཀྲེས་ལྟོག་ཀྱིས་མནར་བའི་སྟག་མོ་མ་བུར་སྐུ་ལུས་སྦྱིབ་པར་བཏང་བ་ཡིན་པས་དེ་ལྟ་བུ་མ་བྱུང་ཡང་རྣམ་ཤེས་དང་བྲལ་ཏེ་བེམ་པོར་གྱུར་ཟིན་པའི་ཕུང་པོ་ལ་དེ་ཙམ་ཆགས་ཞེན་བྱ་རིན་མེད་པས་ལུས་ཀྱི་ལྷག་མ་དེའང་སྦྱིན་པར་བྱས་ན་རང་གཞན་ཀུན་ལ་དགེ་ཚོགས་དེའི་འབྲས་བུ་བཟང་པོ་འཐོབ་པའི་ཡིད་ཆེས་བྱས་ཏེ་ཕུང་པོ་བྱ་གཏོར་བྱེད་པའི་སྲོལ་དེ་དར་ཞིང་བོད་དུ་རྒྱ་ཁྱབ་ཏུ་སྲོལ་དེ་འགྱུར་བ་མེད་པར་གནས་མུས་ཡིན།    འོན་ཀྱང་གོང་དུ་བཤད་པ་ལྟར་དུག་གིས་ཤི་བ་དང་འགོས་ནད་ཀྱི་ཤི་བ།    མཚོན་ཐོག་ཏུ་ཤི་བ་སོགས་ནི་བྱ་གཏོར་བྱེད་མི་ཆོག་པ་ཡིན་པས་མཚོན་འོག་ཤི་བ་ནི་ཆུར་བཤམས་པ་དང་འགོས་ནད་དང་དུག་འཕོག་སྟེ་ཤི་བ་དེ་རིགས་ནི་ས་ལ་སྦེད་ཀྱི་ཡོད་པ་ནི་དེང་དུས་ཀྱང་འགྱུར་བ་ཕྱིན་མེད་པ་ཞིག་རེད།