ཀྲུང་གོ་བོད་ཀྱི་དྲ་བའི་འཕྲིན། ཟླ8པའི་ཚེས23ཉིན། གསར་འགོད་པས་མཚོ་སྔོན་ཞིང་ཆེན་ཞིང་ལས་ཞིང་སྡེ་ཐིང་ནས་ཤེས་གསལ་ལྟར་ན། ཏ་ཐུང་རྫོང“8·18”ཉིན་གྱི་ཆུ་ལོག་གི་གནོད་འཚེ་བྱུང་རྗེས། ཞིང་ཆེན་ཞིང་ལས་ཞིང་སྡེ་ཐིང་གིས་ནོར་སྲིད་སྡེ་ཁག་བར་མཐུན་སྦྱོར་བྱས་ཏེ་གནོད་སྐྱོབ་མ་དངུལ་སྒོར་ཁྲི30བཏང་སྟེ། ས་སློག་འཕྲུལ་ཆས་དང་ས་འདེད་འཕྲུལ་ཆས་གླས་པ་དང་། ཁྲེ་སྣུམ་སོགས་འབྲེལ་ཡོད་ཀྱི་སྒྲིག་ཆས་དང་དངོས་རྫས་ཉོས་ནས། གནོད་ཐེབས་ས་ཁུལ་དུ་ཤི་བའི་ཕྱུགས་ཟོག་གི་བེམ་རོ་གནོད་ཐེབས་ཐག་གཅོད་བྱེད་པའི་བྱ་བ་བཟང་བོར་བསྒྲུབས་ཏེ། གནོད་ཐེབས་ས་ཁུལ་དུ་སྲོག་ཆགས་ཀྱི་རིམས་ནད་རྒྱ་ཁྱབ་དུ་འགྲོ་བར་སྔོན་འགོག་བྱེད་པའི་བྱ་བར་རྒྱབ་སྐྱོར་བྱས། 

རྒྱུས་ལོན་པ་ལྟར་ན། ཞིང་ཆེན་དང་གྲོང་ཁྱེར། རྫོང་བཅས་རིམ་པ་གསུམ་གྱི་ཞིང་ལས་ཞིང་སྡེ་སྡེ་ཁག་གིས་ད་རུང་མཉམ་འབྲེལ་གྱིས་གནོད་ཐེབས་ས་ཁུལ་གྱི་ཁོར་ཡུག་དུག་སེལ་ཚན་ཆུང་དང་། སྲོག་ཆགས་ཤི་བའི་བེམ་རོའི་རྩད་ཞིབ་གཅིག་བསྡུས་ཚན་ཆུང་། གནོད་མེད་ཐག་གཅོད་ཚན་ཆུང་། རིམས་ནད་ཞིབ་བཤེར་དང་གནོད་འཚེའི་བསྡོམས་རྩིས་ཚན་ཆུང་བཅས་རྩ་འཛུགས་བྱས་ཏེ། དུས་ལྟར་སྲོག་ཆགས་རིམས་ནད་འབྱུང་བའི་ཉེན་ཁར་དཔྱད་འཇོག་དང་། གནོད་འཚེའི་དབང་གིས་ཤི་བའི་སྒོ་ཕྱུགས་ཀྱི་ཁ་གྲངས་བསྡོམས་རྩིས་བྱེད་པ་སོགས་ཀྱི་བྱ་བ་སྤེལ་ཏེ། སྲོག་ཆགས་ཀྱི་རིམས་འགོག་དང་གནོད་ཁུལ་གྱི་ཁོར་ཡུག་དུག་སེལ་བྱ་བ་བཟང་བོར་བསྒྲུབས་པར་རོགས་འདེགས་དང་། གནོད་འཚེ་ཆེན་མོའི་རྗེས་སུ་རིམས་ནད་མི་འབྱུང་བར་འགན་སྲུང་བྱས། །