ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།　ཟླ2པའི་ཚེས27ཉིན། པེ་ཅིན་མེ་ཏི་ཡ་ལྟེ་གནས་སུ་བཙུགས་པའི་རྒྱལ་ཡོངས་ཚོགས་ཆེན་གཉིས་ཀྱི་གསར་འགྱུར་ལྟེ་གནས་དངོས་སུ་སྤྱོད་མགོ་བརྩམས་ནས། ཚོགས་ཆེན་གཉིས་ཀྱི་གསར་འགྱུར་སྒྲོག་སྤེལ་ནང་ཞུགས་མཁན་གྱི་ཀྲུང་གོ་དང་ཕྱི་རྒྱལ་གྱི་སྨྱན་སྦྱོར་གསར་འགོད་པར་ཞབས་ཞུ་བྱེད་མགོ་བརྩམས།

སྤྱི་ཁྱབ་ལས་ཁུངས་ཀྱི་ཀྲུང་དབྱང་བརྙན་འཕྲིན་ལས་ཁུངས་ཀྱི་གསར་འགོད་པ་ཀྲང་ཙུང་ཅིན་གྱིས་བཤད་རྒྱུར།　ད་ལོའི་རྒྱལ་ཡོངས་ཀྱི་ཚོགས་ཆེན་གཉིས་སྐབས་སུ།　གསར་འགྱུར་ཁྱབ་སྒྲོག་ཐིང་གིས་དཔལ་འབྱོར་དང་དམངས་འཚོ།　ཕྱི་འབྲེལ་སོགས་བརྗོད་དོན་བྱས་པའི་གསར་འགྱུར་སྒྲོག་སྤེལ་ཚོགས་འདུ་མང་པོ་འཚོག་རྒྱུ་རེད།　གསར་འགྱུར་ལྟེ་གནས་ཀྱིས་རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་སྡེ་ཁག་གི་འགན་འཁུར་པ་གཙོ་བོ་གསར་འགྱུར་སྒྲོག་སྤེལ་ཚོགས་འདུར་གདན་འདྲེན་ཞུས་ཏེ།　སྤྱི་ཚོགས་ཀྱིས་དོ་ཁུར་བྱེད་པའི་གནད་དོན་ལ་ལན་སློག་པ་དང་།　རྒྱལ་ཁབ་ཀྱི་སྲིད་ཇུས་དང་འཕེལ་རྒྱས་ཀྱི་ཁ་ཕྱོགས་གསལ་འགྲེལ་བྱ་རྒྱུ་རེད།

ད་ལོར་རྒྱལ་ཡོངས་ཚོགས་ཆེན་གཉིས་ཀྱི་གསར་འགྱུར་ལྟེ་གནས་སུ་བྱེད་ནུས་ཁུལ་མང་པོ་བཀོད་སྒྲིག་བྱས་ཡོད་ལ།　དེའི་ནང་གསར་འགྱུར་ཁྱབ་སྒྲོག་ཐིང་དང་བཅར་འདྲི་ཁང་སོགས་བཀོད་སྒྲིག་བྱས་ཟིན།　མིག་སྔར།　ཀྲུང་གོ་དང་ཕྱི་རྒྱལ་གྱི་གསར་འགོད་པ3000ལྷག་གིས་རྒྱལ་ཡོངས་ཀྱི་ཚོགས་ཆེན་གཉིས་ལ་བཅར་འདྲི་བྱེད་པར་མིང་ཐོ་བཀོད་ཡོད་པཔ་དང་།　དེའི་ནང་རྒྱལ་ནང་གི་གསར་འགོད་པ2000ལྷག་དང་།　ཞང་ཀང་དང་ཨའོ་མོན།　ཐའེ་ཝན་བཅས་ཀྱི་གསར་འགོད་པ་དང་ཕྱི་རྒྱལ་གྱི་གསར་འགོད་པ1000ལྷག་ཡོད།

ཚོགས་ཆེན་སྐབས་སུ།　ཚོགས་ཆེན་གཉིས་ཀྱི་གསར་འགྱུར་ལྟེ་གནས་ཀྱིས་ཀྲུང་གོ་དང་ཕྱི་རྒྱལ་གྱི་གསར་འགོད་པར་ཚོགས་ཆེན་གྱི་ཡིག་ཆ་གཙོ་བོའི་གློག་རྡུལ་པར་གཞི་མཁོ་འདོན་བྱ་རྒྱུ་ཡིན་པ་དང་།　འཐུས་མི་དང་ཨུ་ཡོན་སྡོད་ཡུལ་དུ་གསར་འགྱུར་ལྟེ་གནས་ཀྱི་བཅར་འདྲི་ཁང་བཙུགས་ནས།　འཐུས་མི་དང་ཨུ་ཡོན་གྱིས་སྨྱན་སྦྱོར་གྱི་བཅར་འདྲི་དང་ལེན་བྱེད་པར་སྟབས་བདེའི་ཞབས་ཞུ་མཁོ་འདོན་བྱ་རྒྱུ་རེད།　　དེ་མིན།　སྨྱན་སྦྱོར་གསར་འགོད་པས་ཚོགས་ཆེན་གཉིས་ཀྱི་གསར་འགྱུར་ལྟེ་གནས་ཀྱི་དྲ་ཚིགས་དང་སྐད་འཕྲིན་སྤྱི་སྟེགས་ཐོག་ཡོངས་བསྒྲགས་བྱས་པའི་བརྡ་ཐོ་བརྒྱུད་དེ་གསར་འགོད་པའི་ཚོགས་འདུ་རེ་རེའི་དུས་ཚོད་བཀོད་སྒྲིག་དང་ནང་དོན་ལ་རྒྱུས་ལོན་བྱས་ཆོག