བརྡ་ཆད་གསར་པ་བསྒྱུར་བསྐྲུན་གྱི་ཐབས་ལ་མདོ་སྡེ་དཀོན་མཆོག་སྤྲིན་དང་ལངྒར་གཤེགས་པའི་མདོ་སོགས་སྔོན་བཀས་བཅད་ཀྱིས་གཏན་འབེབས་བྱས་ཟིན་པའི་གཞུང་ལས་ཇི་སྐད་དུ་བསྒྱུར་བ་དང་། ཐེག་པ་ཆེ་ཆུང་གི་གཞུང་ལས་ཇི་ལྟར་འབྱུང་བ་དང་། སློབ་དཔོན་ཀླུ་སྒྲུབ་ལ་སོགས་པས་ཇི་སྐད་གསུངས་པ་དང་། བོད་སྐད་ཀྱི་སྡེབ་སྦྱོར་སོགས་བརྡ་སྤྲོད་པའི་བསྟན་བཅོས་ལས་ཇི་སྐད་དུ་འདྲེན་པ་སོགས་ལ་ལེགས་པར་བསྟུན། སྔར་མིང་མ་ཐོགས་པ་རྣམས་གསར་དུ་བཏགས། བོད་རང་གི་མིང་སྙན་ཞིང་ལེགས་པ་གང་མཆིས་པ་ཐམས་ཅད་བསྣན། གོ་དཀའ་བ་རྣམས་ཚིག་དོན་སོ་སོར་ཕྲལ་ནས་གཏན་ཚིགས་ཀྱིས་བཤད་དེ་བྲིས་པ་སོགས་མང་དུ་བསྟན་ཅིང་། དེ་ལྟར་གཅིག་གྱུར་བཟོ་དགོས་པའི་རྒྱུ་མཚན་གཙོ་བོ་ཡང་སྲོང་བཙན་སྒམ་པོ་ནས་རྒྱལ་རབས་རིན་བྱོན་ལ་བསྒྱུར་བའི་སངས་རྒྱས་ཀྱི་བཀའ་དང་བསྟན་བཅོས་ཡོད་དོ་ཅོག་ལས། ཆོས་ཀྱི་གཞུང་དང་བརྡ་སྤྲོད་པའི་བསྟན་བཅོས་ལ་མི་མཐུན་པ་རྣམས་སྤང་བ་དང་བརྡ་ཆད་གསར་པ་མང་དུ་བྱུང་བའི་ཕྱིར་རོ། །བརྡ་ཆད་གཅིག་གྱུར་དང་དབང་འཛིན་པས་ཐད་ཀར་རྒྱབ་སྐྱོར་བྱས་པ་དང་། ལོ་པཎ་རྣམས་བསྒྱུར་བྱ་དང་སྒྱུར་བྱེད་ཀྱི་སྐད་བྱང་ཆུབ་ཅིང་གཞུང་དོན་ཇི་ལྟ་བ་བཞིན་ཐུགས་སུ་ཆུད་ནས་བསྒྱུར་བ་དང་། བསྟན་པ་ཕྱི་དར་གྱི་སྐབས་སུ་ལོ་ཙཱ་བ་རྣམས་ཀྱི་མཆོག་རིན་ཆེན་བཟང་པོ་དང་། བློ་ལྡན་ཤེས་རབ་ལ་སོགས་པས་ཀྱང་གཉི་ཟླ་ལ་ཉི་ཟླ་དང་། བསྟན་ཆོས་ལ་བསྟན་བཅོས་དང་། སྟུག་པོ་ལ་མཐུག་པོ་སོགས་ཅུང་ཟད་ཙམ་ལས་བྱེ་བྲག་རྟོགས་བྱེད་ཆེ་འབྲིང་ཆུང་གསུམ་གྱི་བརྡ་ཆད་ལས་མ་གཡོས་ཤིང་། བཀའ་ཁྲིམས་བརྩི་སྲུང་སོགས་ཕྱི་ནང་གི་ཆ་རྐྱེན་དུ་མར་བརྟེན། བརྡ་ཆད་དེ་རྣམས་རྒྱ་མཚོའི་ཆུ་རྡུལ་ཇི་སྙེད་དང་མཚུངས་པར་བོད་ཀྱི་ཤེས་རིག་གི་ཁང་ཆེན་གྲུབ་པའི་རྨང་རྡོ་དང་ཀ་གདུང་སོགས་སུ་གྱུར་ཡོད་དོ། །
