སིལ་སྙན།
སིལ་སྙན་ནི་སྦུག་དང་འདྲ་བར་དཀྲོལ་བྱའི་རོལ་ཆ་ཞིག་སྟེ། དེ་ཡང་སྦུག་ཆལ་གྱི་སྐབས་སུ་བསྟན་པ་ལྟར་ན་འཇིག་རྟེན་མགོན་པོ་སྲོང་བཙན་སྒམ་པོའི་དུས་སུ་ཟ་ཧོར་ནས་དར་བ་ཞིག་ཡིན་པ་དང་། ཕྱིས་སུ་དུས་རབས་རིམ་བྱུང་གི་སྐབས་སུའང་ཧོར་དང་རྒྱ་བལ་བཅས་ནས་དར་ཡོང་པ་ཡིན་ནོ། །
སིལ་སྙན་གང་ཞིག་དཀྲོལ་བའི་ཚེ་ན། སྦུག་དང་ཐ་དད་ཡིན་པ་སྟེ། སིལ་སྙན་འཐེབ་སོར་བསྒྲིམས་པས་གཟུང་དགོས་པ་གང་ཞིག སིལ་སྙན་ཡིན་ན་ཐད་ཀར་དཀྲོལ་དགོས་ལ། སྦུག་ཆལ་ཡིན་ན་སྟེང་འོག་བྱས་ཏེ་དཀྲོལ་དགོས་པ་ཡིན། དེ་ཡང«རོལ་མོའི་བསྟན་བཅོས་གཅིག་ཤེས་ཀུན་གྲོལ»ལས། སིལ་སྙན་འཁྲོལ་བ་ལྟ་བུ་ཞིག །ཡིན་ན་སིལ་སྙན་ཆེ་ཆུང་ལ། །ལྟོས་པའི་དཀྲོལ་ལུགས་འབྱུང་འགྱུར་ཏེ། །ཆེ་ལ་མཐོ་དང་ཆུང་ལ་དམའ། །ཡང་དོག་ཀྱང་ནི་གོ་རིམ་བཞིན། །དེས་ན་ཆེ་ཆུང་གང་ཡིན་ཀྱང་། །སིལ་སྙན་ཡིན་ན་ཐད་ཀར་དཀྲོལ། །སྦུག་ཆལ་ཡིན་ན་སྟེང་འོག་བྱ། །ཞེས་གསུངས་ཤིང་། སིལ་སཉན་ནི་མདོ་སྔགས་གཉིས་ལས་མདོའི་ཆོ་ག་དང་། སྔགས་ལས་ཞི་བའི་ཆོ་ག་གཏོང་སྐབས་མཆོད་ལྔ་དང་ལྷན་ཏུ་དཀྲོལ་སྲོལ་ཡོད། དེ་ཡང་མཆོད་རོལ་ལྟ་བུའི་སྐབས་སུ་སུམ་བརྡེག་ལན་གསུམ་བཅས་བརྡེག་པ་ན། གཅིག་ལ་མནན་ཞིང་གཅིག་ལ་འདེག །གསུམ་པ་བཞི་བ་ལྔ་བ་རྣམས། །དེ་ཁའི་ངང་ཡིན་དྲུག་པ་ནི། །ཅུང་ཟད་མནན་ཞིང་ཆུང་བར་བྱ། །བདུན་བརྒྱད་དགུ་རྣམས་ཆེ་ཞིང་མཐོ། །བཅུ་བ་མནན་ཞིང་ཆུང་བར་བྱ། །བཅུ་གཅིག་ཆེ་ཞིང་རྡོག་རྗེས་འཇོག །འདིར་ནི་སྟར་གཅིག་བགྲངས་པ་ཡིན། །སོ་སོར་འདྲེན་འདི་ལྟར་བྱ། །དང་པོ་ཆུང་ཡིན་གཉིས་པ་ཆེ། །འདི་གཉིས་རོལ་མོ་ཕལ་ཆེར་གྱི། །སྔོན་དུ་ངེས་པར་དགོས་པ་ཡིན། །དེ་རྒྱུ་མཚན་དང་པོས་ནི། །རོལ་མོ་བཅམ་ཞིང་གཉིས་པས་ནི། །རོལ་མོ་ལེན་པ་ཡིན་པས་ན། །བཅམ་ལ་ཆུང་དང་ལེན་ལ་ཆེ། །སོ་སོར་ཆེ་བ་མཁས་པའི་ལུགས། །ཞེས་སོགས་རྒྱས་པར་གཞུང་གཞན་དུ་བསྟན་ཡོད་པས་དགོས་དབང་ལ་གཞིགས་ཏེ་བལྟ་གལ་ཆེ་ཞིང་།ཁྱད་པར་ས་དགེ་རྙིང་གསུམ་སོགས་ཆོས་ལུགས་གྲུབ་མཐའ་སོ་སོའི་གདན་ས་ཁག་ལ་ཡང་ཐུན་མིན་ཕྱག་རྒྱུན་རེ་ཡོད་དེ། དཔེར་ན། རྗེ་ཙོང་ཁ་བའི་སློབ་མ་སྲད་རྗེ་བཙུན་ཤེས་རབ་སེང་གེས་ཕྱག་བཏབ་པའི་ལྷ་སའི་རྒྱུད་སྨད་གྲྭ་ཚང་ལ་མཚོན་ན། འཇིགས་བྱེད་ཀྱི་བདག་བསྐྱེད་ཆོ་ག་གཏོང་སྐབས་དམིགས་བསལ་སིལ་སྙན་ནམ་མཁའ་བྱ་འཛིན་ཞེས་པ་ཞིག་དཀྲོལ་སྲོལ་དང་། རྒྱུད་སྟོད་གྲྭ་ཚང་ལ་ནི་བྱང་ཆུབ་ཕྱག་རྒྱ་མ་ཞེས་པའི་དཀྲོལ་ཚུལ། མཚུར་ཕུ་དབྱར་འཆམ་ཆེན་མོའི་སྐབས་ཟླ་བ་ཡར་ཚེས་ཞེས་པའི་སིལ་སྙན་དཀྲོལ་ལུགས་ཡོད་པ་སོགས་ལས་མཚོན་ནུས་ཤིང་། དེ་ལྟའི་ཕྱག་རྒྱུན་རྣམས་ཉམས་པ་སོར་ཆུད་དང་མ་ཉམས་གོང་འཕེལ་དུ་གཏོང་བའི་སླད་དུ་རིམ་པར་བརྒྱུད་ཅིང་སྤེལ་ན་ཕན་པ་རྒྱ་ཆེར་ཡོད་དོ། །
འཕྲིན་སྟེགས། weikangba