རྫོགས་ཆེན་དུ་མཆིན་ནད་བརྟག་བཤེར་དང་སྔོན་འགོག་གི་བྱེད་སྒོ་སྤེལ།

2020-07-29
2

དབྱར་དུས་ཀྱི་བོད་ཡུལ་མཐོ་སྒང་ནི་ནམ་མཁའ་གཡའ་དག་ཅིང་མེ་ཏོག་རྣམ་པར་བཀྲ་ལ། ཟླ་བདུན་པའི་གནས་མཆོག་རྫོགས་ཆེན་ནི་སྤྲིན་དཀར་ལང་ལོང་རྒྱུ་ཞིང་དགུང་སྔོན་རབ་ཏུ་སྔོ་བའི་མཛེས་ལྗོངས་ཤིག་ཡིན།སྐབས་འདིར། སྐལ་བཟང་ཀུན་ཕན་ཐེབས་རྩ་ཚོགས་པས་དམངས་སྒོར་ཁྲི་སུམ་བརྒྱ་མ་ཟིན་ཙམ་གྱི་འགྲོ་སོང་བཏང་ནས་རྫོགས་ཆེན་གྲོང་རྡལ་གྱི་ལོ་ཚོད་རན་པའི་མི་དམངས་ཆིག་ཁྲི་ལྷག་ལ་རིན་མེད་སྙིང་རྗེའི་སྒོས་མཆིན་ནད་ལྡེམ་བུ་བརྟག་བཤེར་དང་མཆིན་ནད་འགོག་སྨན་བརྒྱག་ཐུབ་པ་བྱུང་ཞིང་། ཐེངས་འདིའི་བྱ་འགུལ་སྤེལ་ཡུལ་རྫོགས་ཆེན་གྲོང་རྡལ་མ་ཟད་སྡེ་དགེ་ཨ་ཕྱུག་དང་རྫ་ཁོག མཛེས་པ། ལམ་མདོ། དུང་མདའ། ཡ་དིང་། ཡིད་ལྷུང་། གླིང་ཚང་། རྫ་ཆུ་ཁ། ཇོ་བོ། སྟག་དགོན་སོགས་ཕྱོགས་ཉེ་དག་དང་ཡུལ་ཚོར་གཏན་སྡོད་ཀྱི་རྒྱ་རིགས་བཅས་མི་དམངས་ཁྲི་སྟོང་ལ་རིན་མེད་མཆིན་ནད་ལྡེམ་བུ་བརྟག་བཤེར་དང་འགོག་སྨན་བརྒྱག་ཐུབ་པར་བྱུང་བས་རྒྱ་ཆེའི་མང་ཚོགས་ཀྱི་འཚོ་གནས་ལ་ཕན་ངེས་ཀྱི་ཞབས་ཕྱི་ལེགས་འགྲུབ་བྱུང་སོང་།

རྫོགས་ཆེན་གྲོང་རྡལ་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་སྡེ་དགེ་རྫོང་གི་མངའ་ཁོངས་སུ་ཆགས་ཤིང་། ཆ་སྙོམས་ཀྱིས་ས་མགོ་མཐོ་ཚད་སྨི4325ཡོད་ལ། གནས་འདི་ནི་རི་བོ་བརྗིད་ཆགས་ལ་ཆུ་མོ་དྭངས་ཤིང་གཙང་བ་དང་། གནས་ལ་ལོ་རྒྱུས་དང་བྱིན་རླབས་ལྡན་ཞིང་རང་བྱུང་གི་ཡུལ་ལྗོངས་ལྟ་ན་སྡུག་པ་ཞིག་ཡིན།

རྫོགས་ཆེན་གྲོང་རྡལ་གྱི་སྡོད་དམངས་ཕལ་ཆེ་བ་བོད་རིགས་ཡིན་ཞིང་ཕྱུགས་ལས་གཙོ་བོར་བརྟེན་བཞིན་ཡོད། གོང་རིམ་སྲིད་གཞུང་གི་ཐུགས་ཁུར་དང་རྒྱབ་སྐྱོར་འོག ད་སྔ་ཡུལ་འདིའི་འཛུགས་སྐྲུན་དང་འབྲོག་པའི་འཚོ་བ་སྔར་ལས་ཇེ་ལེགས་སུ་ཕྱིན་ཡོད། འོན་ཀྱང་གྲོང་ཁྱེར་དང་ཁད་རིང་བའི་ས་བབ་ཀྱི་དབང་དང་དུས་ཚིགས་བཞིན་རུ་སྤོར་བའི་འབྲོག་པའི་འཚོ་བའི་གོམས་སྲོལ་གྱི་དབང་གིས་གཙང་སྦྲ་དང་འཕྲོད་བསྟེན་ཚད་ལྡན་མ་ལོང་པའི་རྐྱེན་གྱིས་འགོས་ནད་རིགས་འགའ་དང་ལྷག་པར་དུ་མཆིན་ནད་ལྡེམ་བུའི་འགོས་ཚད་ཧ་ཅང་མཐོ།

མཁྱེན་ལྡན་མ་ལྕམ་རིག་འཛིན་དབང་མོ་ལགས་ཀྱིས་ཉེ་བའི་ལོ་འགའི་རིང་དངོས་ཤུགས་བརྒྱུད་གསུམ་གྱི་ཐབས་ལམ་སྣ་ཚོགས་པའི་སྒོ་ནས་བྱམས་བརྩེའི་ཉིན་བྱེད་ཀྱི་འོད་སྣང་སྤྲོ་བའི་དམངས་ཕན་སྙིང་རྗེའི་ཕྱག་ལས་མང་པོ་གནང་དང་གནང་མུས་ལས། ཐེངས་འདིར་སླར་ཡང་པེ་ཅིན་སྐལ་བཟང་ཀུན་ཕན་ཐེབས་རྩ་ཚོགས་པ་དང་ཟུང་འབྲེལ་གྱིས་རྫོགས་ཆེན་གྲོལ་རྡལ་དུ་མཆིན་ནད་ལྡེམ་བུ་བརྟག་བཤེར་དང་མཆིན་ནད་འགོག་སྨན་རྒྱག་པའི་ཚེ་སྲོག་ཉེན་སྲུང་གི་ལས་ལ་ནུས་ཤུགས་ཡོད་དགུ་འདོན་བཞིན་འདུག

པེ་ཅིན་སྐལ་བཟང་ཀུན་ཕན་ཐེབས་རྩ་ཚོགས་པས་མཚོ་སྔོན་ཞིང་ཆེན་གྱི་འབྲེལ་ཡོད་འགོ་ཁྲིད། ལས་མི་མཉམ་འབྲེལ་ལྷན་ཚོགས་བཅས་ཀྱི་རྒྱབ་སྐྱོར་འོག མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དུ་ཐོག་མར་བསྐྱོད་དེ། མགོ་ལོག་ཁུལ་མི་དམངས་སྨན་ཁང་དུ་རྨ་སྟོད་རྫོང་གི་ལིང་ཏོག་ནད་པ་ལྔ་བཅུ་ལྷག་ལ་གཤགས་བཅོས་བྱས། པེ་ཅིན་སྐལ་བཟང་སྤྱི་ཕན་ཐེབས་རྩ་ཚོགས་པའི་དྲུང་ཡིག་ཆེན་མོ་ཀྲང་ཀྲི་ཁྲའོ་ཡིས་དམུས་ལོང་སེལ་བའི་མཛད་སྒོའི་རྗེས་སུ་བཤད་རྒྱུར། ནད་པར་གཤགས་བཅོས་བྱས་ཏེ་མིག་སྟེང་གི་སེང་རས་བླངས་རྗེས། བོད་རིགས་རྒན་པ་ཞིག་གིས་རྒྱ་སྐད་འཁྱོངས་མ་འཁྱོངས་ཀྱིས་ངས་མིག་གིས་མཐོང་སོང་ཞེས་བཤད། གནས་ཚུལ་དེ་མཐོང་རྗེས་བདེ་སྐྱིད་དང་འགན་འཁྲིའི་ཚོར་བ་ཞིག་རང་དབང་མེད་པར་སྐྱེས་སོང་། དེས་མཐོ་སྒང་དང་དབུལ་ཕོངས་ས་ཁུལ་ལ་མུ་མཐུད་དུ་དགེ་སྒྲུབ་རོགས་སྐྱོར་བྱེད་པའི་འདུན་པ་ཇེ་བརྟན་དུ་བཏང་།

2020ལོའི་ཟླ1པོར། པྲོག་གསར་གློ་ཚད་རིམས་ནད་བྱུང་རྗེས། ལས་ཡུལ་དང་པོའི་སྨན་པར་ཁ་ཐུམ་ཚར་པའི་གནས་ཚུལ་ཚབས་ཆེན་ལ་འཕྲད། སྐབས་དེར་སྨན་བཅོས་དངོས་རྫས་ཧ་ཅང་དཀོན་པའི་གནས་བབ་འོག པེ་ཅིན་སྐལ་བཟང་སྤྱི་ཕན་ཐེབས་རྩ་ཚོགས་པས་ནུས་ཤུགས་ཡོད་རྒུས་ཐོན་ཁུངས་ཡོད་ཚད་བེད་སྤྱད་དེ། ལྷོ་ཁོ་རེ་ཡ་ནས་མ་དངུལ་ཉིས་འབུམ་ཆིག་ཁྲི་བཏང་ནས་ཁ་ཐུམ་KF95ཆིག་ཁྲི་ཉོས་ཏེ་མྱུར་དུ་ཝུའུ་ཧན་དང་དར་རྩེ་མདོ། སེར་ཤུལ། རྟའུ། ཏིན་ཀྲིག་བཅས་ཀྱི་རིམས་འགོག་ཡུལ་དངོས་ལ་ཞལ་འདེབས་སུ་ཕུལ། དེ་བཞིན་སྔ་གཞུག་ཏུ་སྐལ་བཟང་ཀུན་ཕན་ཐེབས་རྩ་ཚོགས་པས་དམངས་ཕན་གྱི་བྱ་འགུལ་རིམ་པ་སྣ་ཚོགས་སྤེལ་མྱོང་བ་ཡིན་ལ།

ཐེངས་འདིར་སླར་ཡང་སྡེ་དགེ་རྫོང་རྫོགས་ཆེན་གྲོང་རྡལ་དུ་ཡོང་ནས། མཆིན་ནད་ལྡེམ་བུ་བརྟག་བཤེར་དང་འགོག་སྨན་རྒྱག་པའི་དགེ་སྒྲུབ་ཞལ་འདེབས་ཕུལ་བའི་བྱེད་སྒོ་སྤེལ་བ་མ་ཟད། སྡེ་དགེ་རྫོང་གི་འབྲེལ་ཡོད་འགོ་ཁྲིད་དང་སྡེ་དགེ་རྫོང་འཕྲོད་བསྟེན་བདེ་ཐང་ཅུའུ། སྡེ་དགེ་རྫོང་ནད་ཡམས་སྔོན་འགོག་ཚོད་འཛིན་ལྟེ་གནས། རྫོགས་ཆེན་གྲོང་རྡལ་འཕྲོད་བསྟེན་ཁང་བཅས་ཀྱི་རྒྱབ་སྐྱོར་ཆེན་པོ་ཐོབ། གཞན་ལ་དགེ་བ་སྒྲུབ་ན། བསོད་ནམས་རང་ལ་འཁོར་ཞེས་པ་ནང་བཞིན། སྐལ་བཟང་མེ་ཏོག་བཞད་པའི་འཇིག་རྟེན་འདིར་མི་ལ་བརྩེ་བས་ཁེངས་ཤིང་། སེམས་ཅན་ཐམས་ཅད་བདེ་སྐྱིད་དཔལ་ལ་རོལ་བར་ཤོག

  • 顶 0