བདེ་སྐྱིད་ཀྱི་གཞི་མ།

2020-02-14
552

བདེ་སྐྱིདཅེས་བྱ་ཀུན་གྱི་རེ་འདོད་ཅིག། 

རྨི་ལམ་ན་ཡང་འབྲལ་མི་འདོད་པ་ཞིག།

ཆུ་བོ་བཞིན་དུ་རྒྱུན་མི་ཆད་འདོད་ཅིག། 

བུ་ཆུང་ལྟ་བུ་ལག་གི་གཅེས་ནོར་ཅིག།

ཁ་ཤས་ལ་ནི་རྒྱ་མཚོའི་མཐའ་རུ་མཆིས།། 

འགའ་རེ་ལ་ནི་ལུས་དང་གྲིབ་མའི་སྤུན།།

ལ་ལར་མྱུར་ཟད་གློག་དམར་རྗེས་སུ་འགྲོ། 

རེ་ཟུང་གཞིགས་བྲལ་རྡོ་རྗེ་བྲག་གི་ཟླ།

ཡོད་ཚད་རང་གི་བསམ་བློའི་འཁྱེར་སོ་ཙམ།། 

ཕྱི་རོལ་རྐྱེན་གྱི་རྗེས་སུ་འཇུག་ལྡོག་མིན།།

ཤེས་རབ་དང་ནི་བློ་ཁོག་ཡངས་པ་ན།། 

འགལ་རྐྱེན་རྦ་རླབས་འཕྱུར་ཡང་ཚུགས་པ་མེད།།

དཔེར་ན་སྐྱེས་བུས་རྡོ་མོ་འཕངས་ཙ་ན།། 

ཁྱི་གུ་རྡོ་ཡི་རྗེས་སུ་ཕན་མེད་རྒྱུགས།།

སེང་གེས་རྡོ་ཡི་ཡོང་ཁུངས་བཅད་པས་ན།། 

མི་འདོད་སྣ་དགུ་ཆུ་རླངས་ཡལ་དང་མཚུངས།།

སེམས་ཅན་ཞིང་སར་བདེ་སྐྱིད་སོན་འདེབས་ན།། 

བདག་ལ་འབྲས་བུ་བདེ་སྐྱིད་གཡུར་ཟ་འབྱུང་།།

བརྩེ་མེད་ཐ་རྒོད་གནས་སུ་བསྐྱུར་བྱས་ན།། 

མི་འདོད་རྩྭ་ལྡུམ་མ་ལུས་ཡོངས་སུ་ཁྱབ།།

གཞན་གྱིས་བདག་ལ་མི་འདོད་བྱས་ཙ་ན།། 

དེ་ཚེ་བཟོད་པའི་གོ་ཆ་བགོ་བ་ན།།

བཟླས་བརྗོད་ཕྱག་བསྐོར་བརྒྱ་ལས་ལྷག་པས་ན།། 

རང་གིས་རང་ཉིད་འཆོས་པའི་ཆོས་དངོས་ཡིན།།

ཐོག་བབས་རྐྱེན་ངན་གྲོགས་སུ་བསྒྱུར་བ་དང་།། 

བདེ་སྐྱིད་སྒོ་བརྒྱ་འབྱེད་པའི་ལྡེ་མིག་དང་།།

ཤཱཀྱའི་རྒྱལ་པོའི་བཀའ་གསུང་སྙིང་པོ་སྟེ།། 

འདུ་ཤེས་ལེགས་པའི་ལམ་དུ་བསྒྱུར་འདི་ཡིན།།

སྟོན་པ་མཆོག་དང་སྤྱན་རས་གཟིགས།། 

རྗེ་བཙུན་མ་དང་པད་མ་འབྱུང།།

ལྷ་སྐལ་མཆོག་རྣམས་བྱིན་ཆར་ཕོབས།། 

བདེ་སྐྱིད་མྱུ་གུ་རྒྱས་པར་ཞུ།།

མི་ཕྱུགས་ནད་མུག་འཁྲུག་རྩོད་ཞི།།

དུས་ཀྱི་ཡམས་ནད་མྱུར་དུ་ཞི།།

བདེ་སྐྱིད་ཉི་མ་སླར་ཡང་འཆར།།

ཆོས་ཀྱི་དཔལ་ལ་ལོངས་སྤྱོད་ཤོག།

ཅེས་མི་སྡུག་པའི་དུས་ནད་འཇའ་ཡལ་མ་མྱུར་དུ་ཆད་པའི་རེ་སྨོན་སྐོམ་པ་ཆུ་འདོད་ཀྱི་ངང་རྩོམ་ཐུང་འདི་འཆི་མེད་མགོན་པོས་སྤེལ་ལོ།།

  • 顶 0