རང་གྲོལ།

2016-12-06

དཔལ་དོན་གྲུབ་རྒྱལ་སྐུ་གཤེགས་ནས་ལོ་འཁོར་སོ་གཅིག་ལོན་པའི་རྗེས་དྲན་དུ།

                འཕགས་ཆེན།  ༼ཡུལ་ཤུལ༽

  དུས་ཀྱི་ངོས་གཉིས་སྙུག་གུས་སྦྲེལ

  རྡུལ་འཚུབ་ནང་ནས་རལ་པ་བཅད་རྗེས་སུ

  ཤ་གསེང་ནས་འབར་བའི་སྐད་སྒྲ་ཚ་པོ་དེས

  ད་ལྟ་ང་ཚོ་གསོན་པར་བྱས་ཡོད

  དྲན་སྣང་གི་སྤྲིན་པ་རླུང་གིས་གཏོར་ཏེ

  དབྱངས་ཀྱི་ནམ་མཁའ་གསལ་བར་བྱས

  ད་ལྟ་ཁྱེད་ཀྱི་དཀར་མོ་རྒྱང་གྲགས་ཉན་པའི་རྣ་གཤོག་དེ་དག

  མི་རབས་ཤིག་གི་མགོ་བོ་དགྱེ་ཆོག་པའི་ཡན་ལག་ཅིག་ཨང

  མེ་ལོང་ནང་གི་གཟུགས་བརྙན་བསད

  བོད་ཡུལ་དུ་རླངས་འཁོར་ཤར་གཏོང་བྱས་རྗེས

  གངས་རིའི་ཡོལ་བ་འབྱེད་པའི་ལག་པ་རིང་མོ་ཞིག་བསྲིངས

  ཞིང་ནང་གི་ལྡུམ་བུ་མང་པོ་བཅད་དེ

  འབྲུ་དྲུག་སྙེ་མ་སྨིན་པའི་དུས་ཀྱི་ཤོག་ལྷེ་འདི

  ད་ལྟ་བསིལ་གཡབ་བཞིན་འགུལ་ཞིང

  སྙན་ངག་གི་ཆར་པ་འབབ་པའི་ནམ་ཟླ་ཡོལ་མེད

  ང་གཙང་པོ་བཞིན་འབབ་འདོད

  རང་གིས་རང་གསལ་བའི་རྗེས

  ལང་ཚོའི་རྦབ་ཆུ་དྲག་ཏུ་འཕྱོས་པ་ནས་བཟུང

  ཆར་རླུང་འཇགས་པ་མེད་ཅིང

  ཉིན་མཚན་བརྗེ་བའི་མི་ཇེ་མང་དུ་ཕྱིན

  འཁྱག་གྲང་གི་བདེ་བ་མྱོང་བའི་ང་ཚོ་ད་དུང་རྒས་མི་སྲིད

  དབྱངས་ཀྱི་གཙང་པོའི་བརྒལ་བའི་དྲི་ཟ་ཁྱེད་རང

  དོ་ནུབ་སུ་ཞིག་གི་རྨི་ལམ་དུ་འཁོར་འོང་།

            ༢༠༡༦.༡༡.༢༩ཉིན་ཟི་ལིང་ནས་གྲུབ།

འཕྲིན་སྟེགས། weikangba

<