གླིང་སེང་ཆེན་གྱི་བྱུང་བ་མདོར་བསྡུས།༼ ཚན་བཤུས། ༽

2016-09-21

གླིང་གེ་སར་རྒྱལ་པོ། 

  དེ་ཡང་གླིང་གི་མི་རྒྱུད་ནི། བོད་མིའི་ལྡོང་དྲུག་གི་ནང་ཚན་ལས། སྨུག་པོ་ལྡོང་གི་རིགས་རྒྱུད་རེད། ལྡོང་ར་ཁྲ་རྒན་པོ་ལ་བུ་གསུམ་བྱུང་བ་རྣམས་ཀྱིས་རྨ་ཆུའི་སྟོད་སྨད་བར་གསུམ་དུ་གཞི་བཟུང་ནས་བསྡད་པ་ལ་མི་རྒྱུད་མང་དུ་འཕེལ་ཏེ་སྡེ་ཆེན་པོར་ཆགས། དེ་ནས་བཟུང་བུ་སྐྱེས་པ་སྟག་ཤར་དཔའ་བོ་ཤ་སྟག་བྱུང་། ལྡོང་ཆོས་འཕེན་ནག་པོ་ལ་མ་མི་གཅིག་པའི་བུ་གསུམ་བྱུང་བ་ལས། གླིང་ཆེ་རྒྱུད། འབྲིང་རྒྱུད། ཆུང་རྒྱུད་གསུམ་བྱུང་ནས་མི་རྒྱུད་རབ་ཏུ་འཕེལ་ཏེ། སྡེ་ཤོག་ཆེ་ཞིང་བཙན་ཕྱུག་འཛོམས་པས་སྙན་གྲགས་ཤིན་ཏུ་ཆེ་བ་བྱུང་། སྨུག་པོ་ལྡོང་གི་མི་རྒྱུད་འབྲོག་སྡེ་ཆེན་པོ་འདི་ལ་གླིང་རུ་ཐོགས་པའི་རྒྱུ་མཚན། བཙན་ཕྱུག་འཛོམས་པས་ཡུལ་ཁམས་རྣམས་སུ་སྙན་གྲགས་དང་ལབ་གླེང་ཤིན་ཏུ་ཆེ་བ་བྱུང་སྟབས། མིང་ལ་གླེང་རུ་ཞེས་ཐོགས་ནའང་ཕྱིས་སུ་ཡི་གེ་འགྱུར་ནས་གླིང་རུ་ཞེས་གྲགས་པ་བྱུང་། གླིང་གི་བུ་རྒྱུད་སྐྱ་ལོ་ཟེར་བས། བྱང་བཟའ་ཟེར་བ་བག་མར་བླངས་པ་ལ་རྒ་སྐྱ་ལོའི་སེང་ལྕམ་འབྲུག་མོ་ཟེར་བ། ཕྱིས་སེང་ཆེན་གྱི་བཙུན་མོར་གྱུར་པ་དེ་འཁྲུངས། གླིང་གི་སེང་བློན་ཟེར་བས། རྒྱ་བཟའ་ལྷ་སྐྱིད་སྒྲོལ་མ་དང་། འགོག་བཟའ་གཉིས་བག་མར་བླངས་པས། རྒྱ་བཟའ་ལ་དཔའ་བོ་རྒྱ་ཚ་ཞལ་དཀར་འཁྲུངས། འགོག་བཟའ་ལ་གླིང་རྗེ་གེ་སར་འཁྲུངས། འཁྲུངས་ཡུལ་ནི་ཁམས་ཀྱི་སྐྱིད་སོས་ཡག་གི་ཁ་མདོ་རེད་ཟེར། འཁྲུངས་པའི་ལོ་ཚིགས་ནི་མདོ་སྨད་ཆོས་འབྱུང་དེབ་ཐེར་རྒྱ་མཚོ་ལས། གེ་སར་རྒྱལ་བོ་འཁྲུངས་ལོ་ནི་ལྕགས་བྱི་དང་ཆུ་སྦྲུལ་ལ་འདོད་མཁན་གཉིས་སྣང་བ་གང་ཡིན་ཀྱང་རབ་བྱུང་དང་པོ་ཚུགས་ཁ་མའི་དྲུག་ཅུ་སྐོར་དེར་གཏོགས་ལ། རླངས་བྱང་ཆུབ་འདྲེ་འཁོལ་དང་སྨྲྀ་ཏི་ཛྙཱ་ན་ཀིརྟི་སྤྱན་དྲངས་ཏེ། ཆོས་ཞུས་པ་དང་། གཙུག་ལ་ཁང་བཞེངས་པས་ཀྱང་ཤེས་ནུས། ཞེས་སྒྲུབ་བྱེད་ནུས་ལྡན་བཀོད་པ་ལྟར་རོ། །ཡང་རབ་བྱུང་དང་པོའི་ས་སྟག་ལ་འཁྲུངས་པར་འདོད་མཁན་བྱུང་བ་དང་དེ་གཉིས་ཀྱི་བར་ཁྱད། སྔ་མའི་ལྕགས་བྱི་དང་དེང་འདིའི་བར་ལ་ལོ་ངོ་སོ་བརྒྱད་དང་། སྔ་མའི་ཆུ་སྦྲུལ་དང་དེའི་བར་ལ་ཞེ་ལྔ་ཙམ་ལས་ཁྱད་པར་ཆེན་པོ་མེད། འདི་དག་ནི་མཁས་པའི་གསུང་ཡིན་ཕྱིར་དཔྱད་གཞིར་འོས། སྲོང་བཙན་གྱི་སྔོན་དང་། དེའི་དུས་ཨེ་ཡིན་བསམ་ཟེར་བ་སོགས་བླུན་པོའི་གཏམ་ལ་ཚད་བཟུང་མེད་པས་དཔྱད་ཀྱིས་ག་ལ་ལང་། གེ་སར་འཁྲུངས་རྗེས་བུ་ཆུང་དེ་རྒྱ་ཚའི་མདུན་དུ་ཁྱེར་བས། རྒྱ་ཚ་རང་གི་ནུ་བོ་ཞིག་འཁྲུངས་པ་ལ་ཤིན་ཏུ་དགའ་ནས། ཨ་རེ་དགའ། ད་ངའི་བསམ་པ་གྲུབ་སོང་བ་ཡིན་སོགས་གསུངས། ཁྱེའུ་རྒྱ་ཚ་ལ་དགའ་བའི་རྣམ་འགྱུར་གྱིས་ཇོར་སེ་བཞུགས་པས། རྒྱ་ཚས་ནུ་བོའི་མིང་ལ་ཇོ་རུ་ཞེས་ཐོགས་ཤིག་གསུངས་པ་བཞིན་རེ་ཞིག་གི་བར་དུ་ཇོ་རུ་ཞེས་གྲགས་སོ། །

  དེ་ནས་ཇོ་རུ་ཅུང་ཟད་ལག་ཆགས་པའི་སྐབས་སུ། གླིང་སྡེའི་དཔོན་ཁྲོ་ཐུང་གིས་ཇོ་རུ་བློ་རིག་ཅན་ཞིག་ཡིན་པ་མཐོང་སྟེ། འདི་ཆེར་སྐྱེས་དུས་དཔོན་ས་འཕྲོག་ཉེན་ཡོད་སྙམ་ནས། འགོག་མོ་འདྲེ་རེད་ཟེར་ནས། འགོག་མོ་མ་བུ་གཉིས་རྨ་སྨད་གཡུ་ལུང་སུམ་མདོར་རྒྱང་འཕུད་བཏང་། དེ་ནས་ཇོ་རུ་ལག་ཆགས་ཡག་གི་སྐབས་ཤིག་ཏུ། གླིང་གི་རྟ་རྒྱུག་བྱེད་པའི་ཆེད་དུ། ཚོགས་ཆེན་ཞིག་འཚོགས་ཏེ་གླུ་ལེན་གར་རྩེད་སོགས་ཀྱི་སྟོན་ཆེན་ཞིག་བྱས། དེའི་སྐབས་ཇོ་རུ་གླིང་ཡུལ་དུ་སླེབས་ཏེ་གློ་བུར་དུ་ཚོགས་ཆེན་དུ་ཞུགས། ཁྲོ་ཐུང་གཙོར་བྱས། གླིང་ཆེ་རྒྱུད། འབྲིང་རྒྱུད་གཉིས་མི་དགའ་ཡང་། ཇོ་རུ་ཆུང་རྒྱུད་ཚང་ཡིན་པས། ཆུང་རྒྱུད་ཚང་དགའ་སྤྲོའི་ནམ་མཁའ་ལངས། འབྲུག་མོས་གཉེན་འདེམས་ཀྱི་མདའ་མོ་ནམ་མཁའ་ལ་འཕངས་པ་ཇོ་རུའི་ཐོག་ཏུ་ལྷུང་། ཇོ་རུ་དང་གཉེན་བསྒྲིག་བྱུང་། ཇོ་རུ་རང་ཡུལ་དུ་ཕེབས། དེ་ནས་རྟ་རྒྱུག་བྱེད་རྒྱུ་གྲོས་འཆམ་བྱུང་སྟེ་དུས་བཏབ་ནས། དུས་ཐོག་ཏུ་གླིང་ཆུང་རྒྱུད་ཚང་དང་མི་མང་གི་ཁ་ཐོག་ཏུ་སོང་སྟེ་ཇོ་རུ་ཡང་གདན་དྲངས། མཁར་སྟག་རྩེའི་མདུན་དུ་སྒར་བཏབ། གླིང་གི་དཔའ་རྟུལ་རྣམས་དང་མི་སྡེ་རྣམས་དེར་འདུས་པ་སའི་རྩི་ཤིང་བཞིན་དུ་གྱུར། གླིང་གི་རྒྱལ་སྲིད། ཕ་ཟོག་ཡོད་དགུ། སྐུ་གསུང་ཐུགས་རྟེན་དང་བཅས་པ་རྟ་རྒྱུག་གི་སྐུག་ལ་བཞག་ནས། ལྷ་བསང་བཅུ་གསུམ་བཏང་སྟེ་རྟ་རྒྱུག་བྱས། ཇོ་རུས་སྔར་ནས་ཁ་ལོ་བཏུལ་ཟིན་པའི་ལྷ་རྟ་རྐྱང་རྒོད་ལ་བཞོན་ནས་གཅིག་བསྒྱུར་གཉིས་བསྒྱུར་གྱིས་སྔོན་ལ་སླེབས་ཏེ་ཁྲི་ཁར་གཟི་བརྗིད་དང་ལྡན་པར་བཞུགས་སོ། །

འཕྲིན་སྟེགས། weikangba

<