མངོན་བརྗོད་རྒྱ་མཚོའི་ཆུ་ཐིགས།

2020-01-14
0

དུས་དང་བསྐལ་བ་ལ་སོགས་པའི་རབ་བྱེད།  །བགྲང་བྱ་སླར་བྱུང་ཡང་དག་འགྲོ། །དུས་སྤྱིའི་མིང་ཡིན་ཉིན་མོ་ལ། །གདུགས་དང་མུན་གསལ་བདུད་འཇོམས་ཟེར། །བྱ་བྲལ་སྣང་མེད་མེལ་ཚེ་ཅན། །སྔོ་སངས་ཆགས་དུས་མཚན་མོའི་མིང༌། །དགའ་བཟང་རྒྱལ་སྟོང་རྫོགས་པ་ལྔ། །ཟླ་བའི་ཕྱོགས་རེར་ལན་གསུམ་འཁོར། །དཀར་ཕྱོགས་གང་ཕྱོགས་ཕྱོགས་སྔ་མ། །ཞི་དང་རྒྱས་ཕྱོགས་ཡར་ངོའི་མིང༌། །ནག་ཕྱོགས་དམར་ཕྱོགས་ཕྱོགས་ཕྱི་མ། །དབང་དང་དྲག་ཕྱོགས་མར་ངོའི་མིང༌། །འཇལ་བྱེད་དབུགས་སྐྱེས་ལོའི་ཡན་ལག །ཕྱོགས་ཅན་དུས་ཀྱི་ཟླ་བའི་མིང༌། །བཟོད་ལྡན་མ་དང་ལོའི་ཐོག་མ། །ཧོར་ཟླ་བཅུ་གཅིག་པ་ཡི་མིང༌། །ཚིམ་བྱེད་ནུས་ཟླ་རྒྱལ་ཟླའི་མིང༌། །དཀའ་ཐུབ་ཟླ་བ་མཆུ་ཟླའི་མིང༌། །འབྲས་ཟླ་དབོ་ཟླའི་མིང་དུ་གྲགས། །འདོད་དུས་ནག་པ་ཟླ་བའི་མིང༌། །མེ་ཏོག་ཅན་དང་སྦྲང་དུས་ནི། །ས་གའི་མིང་ཡིན་སྣྲོན་ཟླ་ལ། །འདོད་འཕེལ་དག་བྱེད་ཟླ་བ་ཟེར། །ཆུ་སྟོད་ཧོར་ཟླ་དྲུག་པའི་མིང༌། །མཁའ་སྤྲིན་ཅན་ནི་གྲོ་བཞིན་མིང༌། །སྤྲིན་བཟང་ཁྱུ་མཆོག་ཁྲུམས་ཟླའི་མིང༌། །ལྟད་མོའི་ཟླ་བ་ཐ་སྐར་མིང༌། །གླུ་དབྱངས་ཟླ་བ་མང་པོ་འཛིན། །སྨིན་དྲུག་ཟླ་བའི་མིང་དུ་གྲགས། །གྲང་རེག་ཅན་དང་བསིལ་ལྡན་མ། །ཁ་བའི་དུས་རྣམས་དགུན་གྱི་མིང༌། །དྲི་ཞིམ་དྲོད་འབེབས་འདོད་པའི་དུས། །མེ་ཏོག་ལྡན་དུས་དཔྱིད་གྱི་མིང༌། །བདེ་བྱེད་ངེས་སྲེག་ཚ་གདུང་ཅན། །སོས་ཀའི་མིང་ཡིན་ཆར་འབབ་དུས། །སྤྲིན་འབྱུང་ཆར་ལྡན་དབྱར་གྱི་མིང༌། །འབྲས་ལྡན་དུས་ཀྱི་ལྔ་པ་དང༌། །མདའ་སྦྱིན་སྟོན་གྱི་མིང་དུ་གྲགས། །འགྲོ་འོང་འདོར་བྱེད་ཟླ་བའི་ཕྲེང༌། །བགྲང་གཞི་བགྲང་བྱ་ལོ་ཡི་མིང༌། །རབ་བྱུང་རྣམ་བྱུང་དཀར་པོ་དང༌། །རབ་མྱོས་སྐྱེས་བདག་ཨིངྒ་ར། །དཔལ་གདོང་དངོས་པོ་ན་ཚོད་ལྡན། །འཛིན་བྱེད་དབང་ཕྱུག་འབྲུ་མང་པོ། །མྱོས་ལྡན་རྣམ་གནོན་ཁྱུ་མཆོག་དང༌། །སྣ་ཚོགས་ཉི་མ་ཉི་སྒྲོལ་བྱེད། །ས་སྐྱོང་མི་ཟད་ཐམས་ཅད་འདུལ། །ཀུན་འཛིན་འགལ་བ་རྣམ་འགྱུར་དང༌། །བོང་བུ་དགའ་བ་རྣམ་རྒྱལ་དང༌། །རྒྱལ་བ་མྱོས་བྱེད་གདོང་ངན་དང༌། །གསར་བྱུང་རྣམ་འཕྱང་སྒྱུར་བྱེད་དང༌། །ཀུན་ལྡན་འཕར་བ་དགེ་བྱེད་དང༌། །མཛེས་བྱེད་ཁྲོ་མོ་སྣ་ཚོགས་དབྱིག །ཟིལ་གནོན་སྤྲེའུ་ཕུར་བུ་དང༌། །ཞི་བ་ཐུན་མོང་འགལ་བྱེད་དང༌། །ཡོངས་འཛིན་བག་མེད་ཀུན་དགའ་དང༌། །སྲིན་པོ་མེ་དང་དམར་སེར་ཅན། །དུས་ཀྱི་ཕོ་ཉ་དོན་གྲུབ་དྲག །བློ་ངན་རྔ་ཆེན་ཁྲག་སྐྱུག་པ། །མིག་དམར་ཁྲོ་བོ་ཟད་པ་རྣམས། །མེ་ཡོས་ལ་སོགས་དྲུག་ཅུའི་མིང༌། །ཡོངས་གྱུར་སྤྱད་ཟིན་ལོའི་ཕུང་པོ། །བསྐལ་པའི་མིང་དུ་གྲགས་པ་ཡིན། །དུས་དང་བསྐལ་བ་ལ་སོགས་པའི་རབ་ཏུ་བྱེད་པའོ། །མངོན་བརྗོད་ཀྱི་བསྟན་བཅོས་རྒྱ་མཚོའི་ཆུ་ཐིགས་ཞེས་བྱ་བ་ལས་མཐོ་རིས་ཀྱི་སྡེ་ཡན་ལག་དང་བཅས་པ་བཤད་ཟིན་ཏོ།།  །།

ས་འོག་གི་སྡེ་ཚན་དང་བཅས་པ།  །ས་འོག་གདེངས་ཅན་དམྱལ་བ་དང༌། །ཡི་དྭགས་ཆུ་དང་ཆུའི་སྲོག་ཆགས། །གཟིངས་དང་ཆུ་སྐྱེས་སོགས་དབྱེ་བ། །ཡན་ལག་དང་བཅས་འདིར་བཤད་བྱ། །བཅུ་འོག་རྐང་འོག་སྟོབས་ལྡན་གནས། །ཀླུ་ཡི་འཇིག་རྟེན་ས་འོག་མིང༌། །རབ་རིབ་སྨག་རུམ་མཁའི་པགས་པ། །ཤེ་མུན་ལྡོངས་བྱེད་མུན་པའི་མིང༌། །རི་གནས་གདེངས་ཅན་ཀ་དྲུའི་བུ། །ན་ག་ཀླུ་ཡི་མིང་དུ་བཤད། །རྐང་སྦས་ལྟོ་འཕྱེ་མིག་གིས་ཐོས། །ལྕེ་གཉིས་བྲང་འགྲོ་རླུང་ཟས་ཅན། །དུག་འཛིན་འཁྱོག་འགྲོ་སྦྲུལ་གྱི་མིང༌། །ནག་པོ་བརྩེགས་པ་ཚངས་པའི་བུ། །བེའུའི་ལྟེ་བ་དུག་གི་མིང༌། །འདོད་པའི་འབྲས་བྲལ་ངན་འགྲོའི་མཐིལ། །བདེ་མེད་དམྱལ་བའི་མིང་དུ་གྲགས། །ངན་ཁྱབ་དཔལ་མིན་ཕུན་ཚོགས་མིན། །ཆུ་བོ་རབ་མེད་ཡི་དྭགས་མིང༌། །བརྣག་དཀའ་ཟུག་རྔུ་བྲོ་འཚལ་བ། །མནར་བ་གདུང་བ་སྡུག་བསྔལ་མིང༌། །ཆུ་སྤེལ་ཆུ་གཏེར་ཟླ་བས་འཕེལ། །རིན་ཆེན་འབྱུང་གནས་སིནྡྷུའི་བདག །ཟླ་བའི་མ་མ་རྒྱ་མཚོའི་མིང༌། །དག་བྱེད་ངན་སེལ་འབྲུ་ཕན་དང༌། །བཏུང་བྱ་ཉལ་འགྲོ་ཆུ་ཡི་མིང༌། །ཛ་ཧུའི་བུ་མོ་གསེར་ལྡན་མ། །ལམ་གསུམ་ལྷ་ཆུ་གངྒཱ་མིང༌། །རྩོད་ཅན་ཉི་མའི་བུ་མོ་དང༌། །ཞི་བའི་སྲིང་མོ་པཀྵུའི་མིང༌། །རྩེད་འཇོའི་ཆུ་བོ་ཟླ་བ་སྐྱེས། །སྔོན་གྱི་གང་གཱ་སིནྡྷུའི་མིང༌། །ཁྲག་འབབ་བརྒྱ་གྱེས་སྲིད་སྒྲུབ་མ། །ལག་པའི་ཆུ་བོ་སི་ཏ་མིང༌། །འཛུམ་དཀར་ཆུ་སྦུར་ལྦུ་བ་སྟེ། །ཆུ་འཁྱགས་ཆབ་རོམ་འཁྱགས་པའི་མིང༌། །ཤཾ་ཀ་ཆུ་སྲིན་གཤེད་དུང་སྟེ། །སྐྱེ་བ་ལྔ་པ་གཡས་འཁྱིལ་མིང༌། །མུ་ཏིག་འབྱུང་གནས་ཉ་ལྕིབས་ཏེ། །ན་ཀྲ་འཛིན་ཁྲི་ཆུ་སྲིན་མིང༌། །གསེར་མིག་ཅན་དང་མིག་མི་འཛུམ། །ཆུར་ཉལ་རྒྱབ་རིང་ཉ་ཡི་མིང༌། །འགྲམ་སྐྱོང་བུལ་འགྲོ་ངན་ཤུབས་ཅན། །ཡན་ལག་ལྔ་པ་རུས་སྦལ་མིང༌། །ལྕེ་མེད་འཕར་འགྲོ་སྦལ་བ་སྟེ། །ཆོ་ལོའི་ས་བོན་འགྲོན་བུ་མིང༌། །ཉ་འཛིན་ཆུའི་སྤྲེའུ་སྐད་ཅིག་དབུགས། །འུག་པ་མཆོད་བྱེད་སྲམ་གྱི་མིང༌། །ཆུ་གཏེར་ལམ་ནི་གཟིངས་ལ་སྟེ། །ཞོ་ཤ་རྣམ་བདུན་དེད་དཔོན་མིང༌། །རྟགས་གསུམ་སྒྲོལ་བྱེད་རྟ་མགོ་ཅན། །ཆུ་ཡི་ཤིང་རྟ་གྲུ་ཡི་མིང༌། །མཉན་པ་གདོས་དང་རྣ་བ་འཛིན། །སྐྱ་བ་འཛིན་རྣམས་གྲུ་མཁན་མིང༌། །དཔལ་གོས་འདབ་བརྒྱ་ཆུའི་ལང་ཚོ། །ཆུ་སྐྱེས་འདམ་སྐྱེས་པད་མའི་མིང༌། །དབང་མཆོག་སྟེང་འཐུང་མིག་གི་གཉེན། །ས་ཡི་གདུ་བུ་ཨུད་པལ་མིང༌། །སྟེང་འཐུང་དཀར་པོ་མཚན་མོ་བཞད། །ས་མོས་ས་དགའ་ཀུནྡའི་མིང༌། །ཞེས་པ་མངོན་བརྗོད་ཀྱི་བསྟན་བཅོས་རྒྱ་མཚོའི་ཆུ་ཐིགས་ཞེས་བྱ་བ་ལས་ས་འོག་གི་སྡེ་ཚན་ཡན་ལག་དང་བཅས་པ་བཤད་ཟིན་ཏོ།། །།

  • 顶 0