སྔགས་གྲྭ་སློབ་དཔོན་ཀརྨ་མཁས་མཆོག་གཞན་ཕན་དབང་པོའི་སྡེའི་རྣམ་ཐར།

2022-02-03
0

སྔགས་གྲྭ་སློབ་དཔོན་ཀརྨ་མཁས་མཆོག་གཞན་ཕན་དབང་པོའི་སྡེའི་རྣམ་ཐར་སྐོར་ཉུང་ངུར་གླེང་བ།

                                                                                    མྱང་བློ་གྲོས་རབ་གསལ།


     སྔགས་གྲྭ་སློབ་དཔོན་ཀརྨ་མཁས་མཆོག་གཞན་ཕན་དབང་པོའི་སྡེའམ་དཔལ་ཁང་ལོ་ཙཱའི་སྐུ་སྐྱེར་གྲགས་པ་ཁོང་གི་རྣམ་ཐར་གཏན་ནས་མ་མཐོང་པས་གང་དུ་སྐྱེས་པ། ནམ་སྐྱེས་པ། བླ་མ་གང་ལ་བརྟེན། སློབ་སྦྱོང་གང་ནས་བྱས་པ། མཛད་འཕྲིན་གང་འདྲ་བསྐྱངས་པ། བརྩམ་ཆོས་གང་དག་ཡོད་པ་བཅས་ནི་ཐམས་ཅད་ལ་དྲི་བ་འབའ་ཞིག་ཏུ་གྱུར་ཡོད།

  འདིའི་སྐོར་བཀའ་རྒྱུད་པའི་ལོ་རྒྱུས་ལ་མཁྱེན་སྤྱན་ཡངས་པ་ཚོས་གཅིག་འབྲི་བར་མཛད་ན་ཧ་ཅང་ཕུན་སུམ་ཚོགས་པ་ཡོང་ངེས་ཡིན་མོད། ཁོང་རྣམ་པས་དེ་འདྲ་མཛད་པ་མི་སྣང་བས། ངན་པ་ཁ་མང་ན། བཟང་པོས་བློ་མི་རྙེད་པ་ཡིན་ནམ་ཅི་ཆ། འདིར་བླ་མས་ཅི་གསུང་མ་ཞེས་གོང་གྲྭ་པས་འདོན་སྔགས་རྡོལ་རོ་རོ་ཞེས་པའི་དཔེ་ལྟར་ཅུང་ཞུ་བར་འདོད་པ་ལ་སྤྱིར་ལོ་རྒྱུས་གང་ཞིག་སྤུས་ལེགས་པོ་ཡོང་དགོས་ན་ངེས་པར་དུ་རྒྱུ་ཆ་ཕུན་སུམ་ཚོགས་པ་རེ་ཡོད་དགོས་ལ། འདིར་ཡང་ཁོང་གི་རྣམ་བསྡུས་འབྲི་བར་བྱེད་པའི་རྒྱུ་ཆ་གཙོ་བོ་ནི་སྔགས་གྲྭ་སློབ་དཔོན་ཀརྨ་མཁས་མཆོག་གཞན་ཕན་དབང་པོའི་སྡེའི་གསུང་འབུམ་ལག་བྲིས་མ་པོད་གཅིག་མཇལ་རྒྱུ་བྱུང་བ་དང་། དེའི་ཁར་སྐྱབས་རྗེ་དཔའ་བོ་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་གི་བླ་ན་མེད་པའི་མཛད་འཕྲིན་ལས་བྱུང་བའི་མ་ཧཱ་ཤྲི་གསུང་རབ་གླིང་གིས་བསྒྲིགས་པའི་སྔགས་གྲྭ་སློབ་དཔོན་ཀརྨ་མཁས་མཆོག་གཞན་ཕན་དབང་པོའི་སྡེའི་གསུང་འབུམ་དྲ་དེབ་པོད་ལྔ་པོ་བཅས་ཡིན། །

                                                        ཀརྨ་མཁས་མཆོག་གཞན་ཕན་དབང་པོའི་སྡེ།

  དེ་ཡང་ཀརྨ་མཁས་མཆོག་གཞན་ཕན་དབང་པོའི་སྡེ་ནི་ཀརྨ་པ་སྐུ་ཕྲེང་དགུ་པ་དབང་ཕྱུག་རྡོ་རྗེ་དང་། ཞྭ་དམར་དཀོན་མཆོག་ཡན་ལག་བཅས་ཀྱི་སློབ་མ་ཡིན་ཞིང་། ཁོང་གི་རྣམ་ཐར་མཇལ་ཡུལ་དུ་མེད་པར་འཁྲུངས་ཡུལ་དང་ཡབ་ཡུམ་སོགས་ཀྱི་མཚན་གང་ཡང་མི་གསལ། ཁོང་ལ་བརྩམ་ཆོས་མང་པོ་བཞུགས་པས་དེ་དག་གི་མཛད་བྱང་ལས་ཁོང་ཕེབས་བཞུགས་དུས་ཀྱི་ལོ་ཚིགས་ཕྱོགས་ཙམ་རྟོགས་ཐུབ་པར་འགྱུར་ངེས་པས་དེའི་སྐོར་ཉུང་ཙམ་ཞུས་ན།
     དེ་ཡང་ཁོང་ནམ་སྐྱེས་པ་ནི་ཁོང་གིས་མཛད་པའི་བཅོམ་ལྡན་འདས་མ་རྡོ་རྗེ་རྣལ་འབྱོར་མའི་ལོ་རྒྱུས་རྡོ་རྗེ་ཐེག་པའི་ཟབ་གསང་འདོད་དགུའི་བུམ་བཟང་ཞེས་བྱ་བ་བཞུགས་སོ། །ཞེས་པའི་མཛད་བྱང་དུ་“དེ་ལྟར་སྒྲུབ་བརྒྱུད་རིན་པོ་ཆེ་ཀརྨ་ཀཾ་ཚང་གི་ཐུགས་དམ་ཟབ་པ་ལས་ཀྱང་ཆེས་ཟབ་པ་བཅོམ་ལྡན་འདས་མ་རྡོ་རྗེ་རྣལ་འབྱོར་མའི་ལོ་རྒྱུས། རྡོ་རྗེ་ཐེག་པའི་ཟབ་གསང་འདོད་དགུའི་བུམ་བཟང་ཞེས་པ་འདི་ཉིད་དོན་གཉེར་མང་དག་གིས་བསྐུལ་བར་བརྟེན་