གཙང་སྨྱོན་ཧེ་རུ་ཀ

2019-04-04
0

ཁོང་ནི་རབ་བྱུང་བརྒྱད་པའི་ནང་དུ་བྱོན་ལ་མཁས་གྲུབ་གཉིས་ལྡན་གྱི་སྐྱེས་བུ་དམ་པ་ཞིག་ཡིན། རབ་ཏུ་བྱུང་སྟེ་སློབ་གཉེར་མཛད་ཅིང་། རྗེ་བཙུན་ཤ་ཧ་རབ་འབྱམས་པ་སངས་རྒྱས་སེང་གེ་སོགས་ཀྱི་མདུན་ནས་བཀའ་བརྒྱུད་ཀྱི་ཆོས་སྐོར་ཡོངས་སུ་རྫོགས་པ་གསན་ཏེ། ཙ་རི་སོགས་གནས་ངེས་མེད་དུ་ཕེབས་ནས་སྒྲུབ་པ་ཉམས་ལེན་མཛད་དེ་སྐུ་ཚེ་མཐའ་འཁྱོལ་བ་གནང་ངོ་། །

      གཙང་སྨྱོན་ཧེཿརུ་ཀ་རུས་པའི་རྒྱན་ཅན་ནི་རབ་བྱུང་བརྒྱད་པའི་ཆུ་སྤྲེལ་སྤྱི་ལོ1452ལོར་གཙང་མྱང་སྟོད་སྟག་ཚལ་དུ་མྱང་རལ་པ་ཅན་དང་ཉི་མ་འོད་ཟེར་སོགས་ཀྱི་རྒྱུད་པ་ཡབ་སྔགས་འཆང་སངས་རྒྱས་དཔལ་ལྡན་དང༌། ཡུམ་སངས་རྒྱས་འདྲེན་གཉིས་ཀྱི་སྲས་སུ་སྐུ་འཁྲུངས། དགུང་ལོ་བདུན་པ་ས་སྟག་སྤྱི་ལོ1458ལོར་མཁན་ཆེན་ཀུན་དགའ་སངས་རྒྱས་ཀྱི་དྲུང་དུ་རབ་ཏུ་བྱུང་སྟེ་མཚན་སངས་རྒྱས་རྒྱལ་མཚན་ཞེས་གསོལ། དེ་ནས་བཟུང་དགུང་ལོ་བཅུ་བདུན་གྱི་བར་རང་ཡུལ་དུ་སློབ་གཉེར་མཛད།

      དགུང་ལོ་བཅོ་བརྒྱད་པར་ཙ་རིར་བྱོན་ཏེ་རྗེ་བཙུན་ཤ་ཧ་རབ་འབྱམས་པ་སངས་རྒྱས་སེང་གེ་དང་མཇལ། རི་ཆོས་སྐོར་གསུམ། ཐར་གྲུ་སྐོར་གསུམ། ནཱ་རོ་ཆོས་དྲུག  ཕྱག་རྒྱ་ཆེན་པོ་ལྔ་ལྡན་ལྷན་གཅིག་སྐྱེས་སྦྱོར། དོ་ཧ་སྐོར་གསུམ་དང་མཛོད་དྲུག་རོ་སྙོམས་སོགས་བཀའ་བརྒྱུད་ཀྱི་ཆོས་སྐོར་ཕལ་མོ་ཆེའི་ལུང་གསན། རྗེ་བཙུན་མ་ལྷན་ཅིག་སྐྱེས་མའི་དཀྱིལ་འཁོར་དུ་དབང་བསྐུར་ཏེ་གསང་མཚན་མི་བསྐྱོད་རྡོ་རྗེ་ཞེས་གསོལ། དེ་ནས་དཔལ་འཁོར་ཆོས་སྡེར་བྱོན་ནས་གཡུ་ལུང་བ་ཡོན་ཏན་རྒྱ་མཚོའི་དྲུང་ནས་ཆོས་མང་པོ་གསན་ཞིང༌། དེ་བཞིན་སློབ་དཔོན་ཀུན་དགའ་ཉི་མ་དང༌། པཎ་ཆེན་དོན་གྲུབ་གྲགས་པ་སོགས་བསྟེན་ནས་གསང་སྔགས་ཀྱི་དབང་དང་རྒྱུད་ཀྱི་བཤད་པ་བསྐྱེད་རྫོགས་ཀྱི་གདམས་པ་སོགས་མང་པོ་གསན།

       དེ་ནས་ཡུལ་ངེས་མེད་དུ་བྱོན་ཅིང་ཆ་ལུགས་ཀྱང་སྐབས་འགའ་ཞིག་ཏུ་སྐུ་གཅེར་བུ་ལ་མིའི་གཡང་གཞི་ཁྲག་ཅན་གསོལ། རྒྱུ་རློན་གྱིས་ག་ཤ་དང་གདུ་བུ་བྱས། མི་ཐོད་རློན་པར་ཀླད་པ་དང་རྒྱུ་མ་སོགས་རྩིབས་མས་དཀྲུགས་ཏེ་གསོལ། ཕལ་ཆེར་ཧེཿརུ་ཀའི་ཆ་བྱད་རུས་རྒྱན་དང་ཐོད་པ། རྐང་གླིང༌། ཁ་ཊཱཾ་རྣམས་འཆང་ཞིང་དུར་ཁྲོད་དང་གྲོང་གསེབ་ངེས་མེད་དུ་བྱོན་ནས་ཐ་མལ་གྱི་བློར་མི་ཆུད་པའི་ཐོ་ཅོའི་སྤྱོད་པ་སྣ་ཚོགས་མཛད་པས་གཙང་སྨྱོན་ཞེས་གྲགས།

      སྤྱིར་མཛད་འཕྲིན་མཐའ་ཡས་པ་བསྐྱངས་མོད་རག་ཙམ་ནི་བལ་ཡུལ་གྱི་འཕགས་པ་ཤིང་ཀུན་ཞིག་གསོ་དང༌། གྲུབ་གནས་མང་པོར་བཀའ་བརྒྱུད་ཀྱི་སྒྲུབ་སྡེ་བཙུགས་པ། སྙན་བརྒྱུད་གླེགས་བམ་དུ་བཀོད་པ་པོ་ཏི་བཅུ་གསུམ་ལ་ཞུ་དག་གཙང་མ་དང་རབ་བྱུང་བརྒྱད་པའི་ས་སྤྲེལ་སྤྱི་ལོ1488ལོར་རྗེ་བཙུན་མི་ལའི་རྣམ་ཐར་ལྗགས་རྩོམ་མཛད། ཉམས་མགུར་ཕྱོགས་གཅིག་ཏུ་བསྒྲིགས་ཤིང་པར་དུ་བརྐོས། གྲུབ་པའི་གོ་འཕང་མཐོན་པོར་གཤེགས་ཀྱང་ལས་འབྲས་ལ་རྩི་འཇོག་ཆེ་བས་དགེ་སྡིག་ཆུང་ངུ་ཙམ་ཡང་ཁྱད་དུ་མི་གསོད།

      སློབ་མ་ཡང་གྲངས་ཀྱིས་མི་ཆོད་པ་འདུས་མོད། ཡོངས་གྲགས་སུ་ཐུགས་སྲས་ཞེ་དགུ། ཐུན་མོང་མ་ཡིན་པའི་ཐུགས་སྲས་བརྒྱད། བླ་ཆེན་བླ་ཆུང་དྲུག་ཅུ། རྟོགས་ལྡན་ཉེར་བརྒྱད། སྟོན་སྒོམ་ཉི་ཤུ། གྲུབ་ཆེན་བཅོ་བརྒྱད་སོགས་བསམ་གྱིས་མི་ཁྱབ་པ་བྱོན། མཐར་དགུང་ལོ་ལྔ་བཅུ་རྩ་དྲུག་པ་རབ་བྱུང་དགུ་པའི་མེ་ཡོས་སྤྱི་ལོ1507ལོར་རས་ཆུང་ཕུག་ཏུ་སྐུ་གཤེགས་སོ། །


  • 顶 0