ཨརྱ་དེ་ཝའི་བྱུང་བ་བརྗོད་པ།

2018-06-21

  ཀུ་མ་ར་ཛི་བས་རྒྱ་ཡིག་ཏུ་བསྒྱུར། དོར་ཞི་གདོང་དྲུག་སྙེམས་བློས་བོད་ཡིག་ལ་བསྒྱུར།

 

  ཨརྱ་དེ་ཝ་ནི་སློབ་དཔོན་ཀླུ་སྒྲུབ་ཀྱི་སློབ་མའི་གཙོ་བོ་ཞིག་ཡིན། རྒྱ་གར་ལྷོ་ཕྱོགས་ཀྱི་སིང་ག་ལའི་གླིང་དུ་འཁྲུངས་ཤིང་། རྒྱལ་པོའི་སྲས་པོ་ཡིན་པར་གྲགས། ཆུང་དུས་ནས་རིག་ཡག་ཡིན་ལ། བྲམ་ཟེའི་གཞུང་ལུགས་སོགས་ཤེས་བྱའི་གནས་ལ་ཤིན་ཏུ་མཁས་པར་གྱུར། ཁེངས་དྲེགས་ཆེ་ཞིང་འཇིག་རྟེན་གྱི་རིག་པའི་གཞུང་ལུགས་ཕལ་ཆེར་ཁོ་བོས་མི་ཤེས་པ་མེད་མོད་གཞན་དག་གིས་མ་ཤེས་པར་འདུག་ཟེར་རོ། ། ཨརྱ་དེ་ཝ་ལ་སྤྱན་གཅིག་ལས་མེད། དེའི་རྒྱུ་མཚན་ནི་སིང་ག་ལ་ན་ལྷ་ཆེན་པོའི་ལྷ་ཁང་ཞིག་ཡོད་ལ། དེའི་ནང་ན་ལྷ་དབང་ཕྱུག་ཆེན་པོའི་འཇིམ་གཟུགས་ཆེན་པོ་ཞིག་བཞེངས་ཡོད་པ་རྒྱུན་དུ་མི་རྣམས་ཡོང་ནས་ཕྱག་དང་མཆོད་པ་འབུལ་གྱིན་འདུག ཉིན་ཞིག་རྒྱལ་སྲས་དེ་ཝ་ལྷ་ཁང་དེར་སོང་ནས་ལྟད་མོ་ལྟ་བསམས་པ་ལ། སྒོ་གཉེར་གྱིས་སྒོར་བཀག་ནས་ལྷ་ཆེན་པོ་ནི་དྲག་ཅིང་གཏུམ་པས། གམ་དུ་བཅར་ན་ཐུགས་ཁྲོས་པས་ལྷ་ཁང་ནང་དུ་འགྲོ་མི་ཉན་ཟེར། རྒྱལ་སྲས་ཀྱིས་ལྷ་ཆེན་གྱི་སྐུ་གཟུགས་བཞེངས་པ་མི་མང་ལ་སྟོན་ཕྱིར་མིན་ནམ། བལྟར་མི་འཇུག་ན་རྟེན་བཞེངས་ནས་ཅི་བྱེད་གསུངས་ཤིང་། ཁོང་རྒྱལ་སྲས་ཡིན་སྟབས་སྒོ་གཉེར་གྱིས་ཀྱང་འགོག་མ་ཐུབ་པར་ནང་དུ་བཏང་། རྒྱལ་བུས་སྐུ་གཟུགས་ལ་བལྟས་པ་ན། ལྷ་ཆེན་པོའི་སྐུ་དེ་ངེས་པར་མཐོ་ཞིང་བརྗིད་ལ། མིག་བགྲད་ནས་ཁྲོས་པའི་ལྟ་སྟངས་ཅན་ཞིག་ཏུ་འདུག དེ་ལ་རྒྱལ་བུས་སྨྲས་པ། ཁྱེད་ལྷ་ཆེན་པོ་རེད། མང་མང་གིས་ཁྱེད་ལ་མཆོད་འདུག་པས་ཞི་དུལ་བྱམས་པའི་ཉམས་སྟོན་དགོས་པ་ལ། ཁྱོད་མིག་བགྲད་ནས་ལྟ་དོན་ཅི་ཡིན། ཁོ་བོས་ཁྱོད་ཀྱི་མིག་གཅིག་བཏོན་པར་བྱས་ནས་མཇལ་སྐོར་པ་རྣམས་མི་སྐྲག་པར་བྱེད་ཟེར་ནས་གྲི་བཙུགས་ཏེ་ལྷ་ཆེན་པོའི་མིག་གཅིག་བཏོན་པར་བྱས་སོ། ། དེའི་མཚན་མོར་རྒྱལ་བུས་མཆོད་རྫས་མང་བོ་བཤམས་ནས་ལྷ་ཆེན་པོར་མཆོད་ཅིང་བསྟོད་པས། ལྷ་ཆེན་པོས་དངོས་སུ་ཞལ་གཟིགས་བསྟན་པ་ལྷ་ཁང་དེར་བཞེངས་པའི་གཟུགས་དང་འདྲ་ཞིང་འཇིགས་རྔམ་སྟོན་པ་ཞིག་ཏུ་འདུག ལྷ་ཆེན་པོས་ཉིན་དཀར་ཁྱོད་ཀྱིས་སྨྲས་པའི་གཏམ་དེ་ཁོ་བོས་ཐོས། ཁོ་བོའི་རང་བཞིན་འཇིགས་སྐྲག་བྱེད་དགོས་པ་ཞིག་མིན་ཡང་། འབག་བཟོས་དེ་འདྲའི་འཇིགས་ཉམས་ཤིག་བཟོས་པ་རེད། གཞན་དག་ཁོ་བོར་སྐྲག་ནས་དད་ཅིང་། ཁྱོད་ཀྱིས་ཁོ་བོར་བརྙས་བཅོས་བྱས་པ་རེད་ཟེར། རྒྱལ་བུས་འོ་ན་ཁྱོད་ང་ལ་རེ་བ་ཅི་ཡོད་ཅེས་པས་ལྷ་ཆེན་པོས་ཁྱོད་ཀྱིས་ཁོ་བོའི་མིག་བྲུས་པས། ཁྱོད་ཀྱི་མིག་གཅིག་ཁོ་བོའི་མིག་གི་ཚབ་ཏུ་སྟེར་དགོས་པས་ཁྱོད་ཀྱིས་སྟེར་ཕོད་དམ་ཟེར། དེ་ལ་དཀའ་ལས་ཅི་ཡོད་ཟེར་ནས་རང་གི་མིག་གཡོན་པ་བྲུས་ནས་ལྷ་ཆེན་པོར་བྱིན་པ་ལ། ལྷ་ཆེན་པོས། ཁྱོད་ནི་བླ་ན་མེད་པའི་གཏོང་ཕོད་ལྡན་ཞེས་བསྔགས་བརྗོད་བྱས་སོ། ། སིང་ག་ལའི་རྒྱལ་ཁབ་ཀྱི་རྒྱ་མཚོའི་ཕ་རོལ་ན་ཀླུ་སྒྲུབ་བཞུགས་པའི་རྒྱལ་ཁབ་དེ་ཡོད་པས། དེ་ཝས་སྔར་ནས་ཀླུ་སྒྲུབ་ཀྱི་མཚན་ཐོས་ཤིང་། ཁེངས་དྲེགས་དང་ང་རྒྱལ་གྱིས་ཀླུ་སྒྲུབ་དང་རྩོད་པ་བྱེད་པར་སོང་ངོ་། །

  ཀླུ་སྒྲུབ་ཀྱིས་ཀྱང་དེ་ཝའི་མཁས་པའི་སྙན་གྲགས་གསན་ཡོད་པས་དེ་ཡོང་བར་ཤེས་ནས། སློབ་མ་ཞིག་ལ་ཆུ་གཙང་ལྷུང་བཟེད་གང་བཏེགས་སུ་བཅུག་ནས་བསུ་བར་མངགས། དེ་ཝས་ཀྱང་དེའི་མཚོན་དོན་ཤེས་ནས་ཅི་ཡང་མི་སྨྲ་བར་རུམ་གྱི་རྒྱ་ཁབ་ཅིག་བླངས་ནས་ལྷུང་བཟེད་ཀྱི་ཆུ་ནང་དུ་དོར་རོ། ། འོ་ན་དེའི་མཚོན་དོན་ཅི་ཡིན་ཟེར་ན། ཆུ་གཙང་ལྷུང་བཟེད་གང་ནི་གཙང་ཞིང་དྲི་མ་མེད་པའི་ཡོན་ཏན་གྱིས་ངའི་བློ་ཡི་བང་མཛོད་གང་ཡོད་ཅེས་པའི་བརྡ་དང་། ཆུར་རྒྱ་ཁབ་དོར་བ་ནི་རྒྱ་ཁབ་ཆུ་ཡི་གཏིང་དུ་ཐོན་པ་ལྟར་ཁྱོད་ཀྱི་ཡོན་ཏན་གྱི་གཏིང་ལོན་པར་བྱེད་འདོད་ཅེས་པའི་བརྡ་རེད།

  སློབ་མ་དེས་ཆུ་ཡི་ལྷུང་བཟེད་ཁྱེར་ནས་སློབ་དཔོན་གྱི་དྲུང་དུ་སོང་། སློབ་དཔོན་གྱིས་ལྷུང་བཟེད་དུ་རྒྱ་ཁབ་འཕངས་པ་གཟིགས་ནས་ཐུགས་དགྱེས་ནས་དེ་གན་དུ་བོས། དེ་ནི་ཁེངས་དྲེགས་ཀྱིས་སློབ་དཔོན་ལ་རྩོད་ཕྱིར་དུ་འོང་བ་ཡིན་ཡང་། ཞལ་མཇལ་བ་ན་སློབ་དཔོན་ཤིན་ཏུ་ཞི་ཞིང་དེས་པ་ཚིག་འཇམ་པོར་སྨྲ་བ་མཐོང་ནས་རྩོད་པའི་གཏམ་མ་གླེངས་པར་ཞལ་བརྡ་བྱས། དེས་དཀའ་གནད་མང་དུ་དྲིས་པ་ལ། སློབ་དཔོན་གྱིས་རེ་རེ་བཞིན་ལན་འབྱོར་པོ་བཏབ་པས་དེའི་ཁེངས་དྲེགས་བཅོམ་ཞིང་། སྐུ་ཡོན་གྱི་ཐད་ནས་རང་ཉིད་སློབ་དཔོན་གྱི་དོ་ཟླ་མིན་པར་མཁྱེན། སངས་རྒྱས་པའི་གཞུང་ལུགས་ཟབ་ཅིང་རྒྱ་ཆེ་བ། ཕྱི་རོལ་པའི་ཆོས་ལས་ཤིན་ཏུ་ཁྱད་པར་འཕགས་པ་ཞིག་ཡིན་དགོངས་ནས་སློབ་དཔོན་ལ་སྙིང་ནས་དད་གུས་སྐྱེས་ཤིང་། སློབ་དཔོན་དུ་བསྟེན། སྔོན་ཆད་ཀྱི་ཕྱི་རོལ་པའི་ལྟ་བ་དོར་ནས་ནང་བའི་ཆོས་སུ་ཞུགས་སོ། ། སློབ་དཔོན་དགུང་ལོ་མཐོན་པོར་བསླེབས་ཀྱང་རང་གི་ཟབ་ཆོས་ཀྱི་སྣོད་དུ་གྱུར་པའི་སློབ་མ་སྔོན་ཆད་མ་བྱུང་ཞིང་། ཨརྱ་དེ་ཝ་ནི་ཐེག་ཆེན་གྱི་ཆོས་རྒྱུན་འཛིན་པའི་སྣོད་ཅིག་ཏུ་འགྱུར་བར་མཁྱེན་ནས་དགྱེས་བཞིན་དུ་རྗེས་སུ་བཟུང་ཞིང་གཞུང་ལུགས་དང་ཟབ་ཆོས་ཀྱི་གདམས་པ་བུམ་པ་གང་བྱོའི་ཚུལ་དུ་གནང་། དེས་ཀྱང་དམན་ས་བཟུང་ཞིང་གུས་པའི་བརྟུལ་ཞུགས་ཀྱིས་སློབ་དཔོན་གྱི་དྲུང་དུ་ལོ་དུ་མར་སློབ་སྦྱོང་བྱས་སོ། །

  ཡུལ་དབུས་མ་ག་དྷའི་རྒྱལ་ཁབ་ནི་སྔར་ཆང་བའི་ཆོས་དར་ཆེ་ས་ཞིག་ཡིན་ཡང་། བར་སྐྲབས་ཤིག་ལ་ཕྱི་རོལ་པ་དབང་ཆེ་བར་གྱུར་རས། ང་བའི་ཆོས་ཀྱི་མགོ་གནོན་པར་བྱེང་ཅིང་དགེ་འདུན་གྱི་སྡེ་རྣམས་སུ་གྷནྜིའི་སྒྲ་ཡང་གྲགས་མི་ཆོག་པར་བྱས། སློབ་དཔོན་གྱིས་གནས་ཚུལ་དེ་གསན་ནས་བསྟན་པ་ནུབ་ལ་ཐུག་པ་ལ་མ་བཟོད་པར་མུ་སྟེགས་པ་རྩོད་པས་ཚར་གཅོད་ཕྱིར་ཡུལ་དབུས་སུ་བསྐྱོད་པར་དགོངས་པ་ན། ཨརྱ་དེ་ཝས་ཁྱེད་དགུང་ལོ་བགྲེས་ཤིང་ལམ་གྱི་དཀའ་ངལ་ཡང་ཆེ་བས་ཕེབས་མི་དགོས། ཁོ་བོ་སོང་བས་འཐུས་ཞེས་ཞུས། སློབ་དཔོན་གྱིས་དེ་ཝས་རྩོད་ཐུབ་མི་ཐུབ་ཉམས་སད་ཕྱིར་རང་ཉིད་ཀྱིས་ཕྱི་རོལ་པའི་གྲུབ་མཐའ་བཟུང་ནས་དེ་ཝ་དང་ཉིན་ཞག་དུ་མར་བརྩད་ཀྱང་དེ་ཝས་དམ་བཅའ་མ་ཤོར་བས་སློབ་དཔོན་ཐུགས་དགྱེས་ནས་རང་གི་ཚབ་ཏུ་དེ་ཝ་མངགས། ཨརྱ་དེ་ཝ་མ་ག་དྷར་ལྷགས་ནས་རྒྱལ་པོའི་ཕོ་བྲང་དུ་རྩོད་པའི་གནས་བཅས་ནས་རྩོད་ཡིག་ཕྱོགས་ཕྱོགས་སུ་བཏང་། རྩོད་ཡིག་ཏུ་རྩོད་པའི་དམ་བཅའ་གསུམ་བཞག་པའི་དང་པོ་ནི། འཕགས་པའི་སྐྱེས་བུའི་ནང་ན་སྐྱེས་མཆོག་སངས་རྒྱས་འདྲ་བ་མེད་ཅེས་དང་། གཉིས་པ། ཆོས་ཀྱི་ནང་ན་ཡང་དག་བདེན་པ་སངས་རྒྱས་ཀྱི་ཆོས་འདྲ་བ་མེད་ཅེས་དང་། གསུམ་པ། ལམ་ཞུགས་སྐྱེས་བུའི་ནང་ན་འཕགས་པའི་དགེ་འདུན་འདྲ་བ་མེད་ཅེས་དང་། སུ་ཞིག་གིས་ཁོ་བོའི་དམ་བཅའ་གསུམ་པོ་འདི་ཟློག་ཐུབ་ན་ཁོ་བོའི་མགོ་བོ་བཅད་ནས་དབུལ་ཆོག་ཅེས་པར་བསྒྲགས་སོ། ། ཕྱི་རོལ་པ་རྣམས་དེ་ཝས་རྩོད་པའི་དུས་བཏབ་པ་ཚོར་ནས་ཕྱོགས་ཕྱོགས་ནས་རྩོད་པ་དང་ལྟད་མོ་བལྟ་ཕྱིར་འདུས། དེ་ཝའི་བརྡ་སྦྱར་གྱི་ཡི་གེ་དེ་མཐོང་ནས་ཕྱི་རོལ་པ་ཁ་ཤས་ཀྱང་དེ་ཝའི་དྲུང་དུ་ལྷགས་ནས་མགོ་སྒུར་མ་འདོད་པར་ཁྱོད་ཀྱིས་སྲོག་རྒྱལ་ལ་བཞག་ན་ཁོ་ཚོས་ཀྱང་ཁྱོད་རྒྱལ་ན་ཚེ་སྲོག་བཅད་ཆོག་ཟེར་བ་ལ། དེ་ཝས་བཞད་དེ་སྨྲས་པ། ཁོ་བོས་ཁྱོད་ཅག་གི་མགོ་བཅད་ནས་ཅི་བྱེད། ཁྱོད་ཅག་གི་སྐྲ་བཅད་ནས་ཁོ་བོའི་ཆོས་ལ་ཞུགས་པས་ཆོག་གསུངས་སོ། ། དེ་ནས་ཟླ་བ་གསུམ་ཙམ་ལ་ཕྱི་རོལ་པ་རྣམས་རེས་མོས་བྱས་ནས་རྩོད་པ་བྱས་ཀྱང་རྒྱལ་ཁ་མ་ལོན་པའི་ཐོག་ཁོ་ཚོའི་ལྟ་བ་དེ་ནོར་འཁྲུལ་ཡིན་པར་ཤེས་ནས་བློ་མིག་ཆེར་ཕྱེ་སྟེ་ནང་བའི་ཆོས་ལ་དད་པར་གྱུར། སློབ་དཔོན་གྱིས་ཕྱི་རོལ་པ་ནང་བའི་ཆོས་འོག་བཅུག་པ་འབུམ་གཏེར་བྱུང་ཞིང་། མ་ག་དྷའི་ཡུལ་དུ་སླར་ཡང་རྒྱལ་བསྟན་དར་བར་མཛད། སློབ་དཔོན་ཕྱི་རོལ་པ་ལས་རྩོད་པའི་རྒྱལ་བའི་རྗེས་དྲན་དུ་གྷནྜིའི་མཆོད་རྟེན་བཞེངས། ཕྱིས་སུ་སློབ་དཔོན་ཞོན་ཙང་མ་ག་དྷར་བྱོན་སྐབས་མཆོད་རྟེན་དེ་དངོས་སུ་མཇལ་མྱོང་ཟེར། རྗེས་སུ་འཕགས་པ་དེ་ཝ་འདི་ཉིད་ཡུལ་དབུས་དང་རྒྱ་གར་བྱང་ཕྱོགས་སོགས་རྒྱལ་ཁམས་མང་བོར་བྱོན། སློབ་མ་མང་དུ་སྐྱོང་བཞིན་ཐེག་ཆེན་གྱི་བསྟན་པ་སྤེལ་བར་དགོངས་ནས་སླར་ཡང་རྒྱ་གར་ལྷོ་ཕྱོགས་སུ་ཕེབས་པ་ན། སློབ་དཔོན་ཀླུ་སྒྲུབ་སྐུ་གཤེགས་ནས་མི་བཞུགས་པ་དང་། དེ་གའི་རྒྱལ་པོ་ཞིག་ཕྱི་རོལ་པའི་ཆོས་ལ་དད་པ་དེའང་སློབ་དཔོན་འདི་ཆེད་དུ་བྱོན་ནས་ནང་བའི་ཆོས་ལ་བཀོད། སློབ་དཔོན་དགུང་ལོ་མཐོན་པོར་བསླེབས་སྐབས་རི་ཁྲོད་ཀྱི་དབེན་གནས་སུ་བཞུགས་ནས་གསུང་རྩོམ་མཛད་ཅིང་ཐེག་ཆེན་སྤེལ།

  སློབ་དཔོན་འདིས་སྐུ་ཚེ་གང་བོར་ཕྱི་རོལ་པ་རྩོད་པས་ཚར་བཅད་ཅིང་། ཚེ་མཇུག་ཏུ་ཡང་ཕྱི་རོལ་པའི་ལྟ་བ་སུན་འབྱིན་པའི་གསུང་རྩོམ་མང་དུ་མཛད། ཕྱི་རོལ་པ་སེམས་ཁོང་ཤིན་ཏུ་དོག་པ་ཞིག་གིས་སློབ་དཔོན་འདིས་ཕྱི་རོལ་པ་མང་བོ་རྩོད་པས་ཕམ་པ་ལ་མ་བཟོད་པར་འཁོན་ལན་བསློག་པར་འདོད་ནས། དེ་ཝ་ཁྱོད་ཀྱིས་ཁ་ལྕེའི་སྒོ་ནས་ཁོ་བོ་ཅག་ལས་རྒྱལ་ན་ཁོ་བོས་རལ་གྲིའི་སྒོ་ནས་ཁྱོད་ལས་རྒྱལ་བར་བྱེད་ཅེས་དམ་བཅས་སོ། ། དེ་ནས་ལན་མང་བོར་སློབ་དཔོན་དགྲོང་བའི་སྦྱོར་བ་བརྩམས་ཀྱང་དྲུང་ན་སློབ་མ་མང་བས་གླགས་མ་རྙེད། ཉིན་ཞིག་སློབ་དཔོན་ཤིང་གི་དྲུང་དུ་ཏིང་ངེ་འཛིན་ལ་སྙོམས་པར་བཞུགས་པའི་ཚེ་ཕྱི་རོལ་པས་བསྒུགས་ནས་སློབ་དཔོན་གྱི་དྲུང་དུ་སོང་ནས། ཨརྱ་དེ་ཝ་ཁྱོད་ཀྱིས་ཤེས་སམ། ངས་ཁྱོད་ལ་བསྒུགས་ནས་ཡུན་རིང་སོང་། སྔོན་ཆད་ཁྱོད་ཀྱི་ཁ་ལྕེ་ཡིས་ཁོ་བོའི་སློབ་དཔོན་དག་ལས་རྒྱལ། དེ་རིང་ཁྱོད་ཀྱི་ལྟོ་བ་གཤགས་ནས་སུ་ངར་བལྟ་ཟེར་ནས་སློབ་དཔོན་ལ་གྲི་བརྒྱབ་བོ། ། གྲི་བརྒྱབ་རྗེས་སློབ་དཔོན་རེ་ཞིག་གི་བར་དུ་བསྲན་ནས་བསྡད་ཅིང་། གྲི་རྒྱག་མཁན་ལ་ཁོང་ཁྲོ་མི་ལང་བར་མ་ཟད། མི་འོས་པའི་སྤྱོད་པར་སྙིང་རྗེ་དྲག་པོ་སྐྱེས་ནས། གཞོན་ནུ་ཉོན་ཅིགགཞུང་ལུགས་སྟེང་གི་རྩོད་པ་ནི་ཡིན་མིན་གྱི་ཤན་འབྱེད་པ་ལས། མཚོན་གྱིས་རྒོལ་ག་ལ་རུང་། ཁྱོད་ཀྱིས་ཁོ་བོའི་ལུས་བརླགས་ཀྱང་སངས་རྒྱས་ཀྱི་ཆོས་བརླག་པར་མི་ནུས། གཏི་མུག་གིས་ཁྱོད་ཀྱི་དྲན་རིག་བརླགས་ནས་འོས་མིན་གྱི་བྱ་བ་འདི་བྱས་པ་རེད། ཁོ་བོ་ཁྱོད་ལ་ཁོང་ཁྲོ་མི་ལང་ཁྱོད་མྱུར་དུ་ཐག་རིང་དུ་ཕྲོས་ཤིགངའི་སློབ་མ་རྣམས་ཐོན་རན་ཡོད། སློབ་མའི་ནང་ན་བཟོད་པའི་ཕར་ཕྱིན་མ་ཐོབ་པ་སྐོར་ཞིག་ཡོད་པས་དེ་དག་གིས་ཁྱོད་ལ་སྲོག་སྐྱིན་ལེན་སྲིད་གསུངས། ཕྱི་རོལ་པ་དེས་སློབ་དཔོན་ཐུགས་རྒྱུད་འཇམ་ཞིང་ཁོང་ཁྲོ་མེད་པ་དེ་མཐོང་ནས་གྲིས་རྒྱག་པའི་མཚམས་བྱས་ནས་འགྱོད་བཤགས་ཕུལ་ཏེ་བྲོས་སོ། ། སློབ་མ་རྣམས་ཐོན་པའི་ཚེ་སློབ་དཔོན་ཁྲག་གི་ནང་དུ་ཉལ་བ་མཐོང་ངོ་། ། བཟོད་པ་མ་ཐོབ་པའི་སློབ་མ་སྐོར་ཞིག་ཁོང་ཁྲོ་ལངས་ནས། གཏེ་བོ་ལག་དམར་དེ་གསོད་དགོས་ཟེར་ནས་ར་མདའ་བརྒྱུག་པར་རྩོམ་པ་ན། སློབ་དཔོན་གྱིས་དགྲ་ལ་བཟོད་པ་སྒོམ་དགོས། དེ་ཡང་རྨོངས་པའི་དབང་གིས་བྱས་པ་རེད། ང་ཡང་ན་སོ་རྒས་ཤིང་གཞན་གྱིས་མ་བསད་ན་ཡང་འཆི་བ་ལས་འོས་མེད། གཅིག་གིས་གཅིག་ལ་འཁོན་ལན་བསློགས་པས་ཅི་ལ་ཕན་ཟེར་ནས་ཞི་བར་གཤེགས་སོ། །

  ཨརྱ་དེ་ཝ་ལ་གསུང་རྩོམ་མང་དུ་ཡོད་པར་གྲགས་ལ། དུས་ཕྱིས་མིག་སྔར་མཇལ་རྒྱུ་ཡོད་པ། 《རྣལ་འབྱོར་སྤྱོད་པའི་དབུ་མ་བཞི་བརྒྱ་པ》དང་། 《དབུ་མ་ཡི་གེ་བརྒྱ་པ》གཉིས་ཡིན། 《དབུ་མ་ཡི་གེ་བརྒྱ་པ》ཟེར་བ་དེ་ཕྱི་རོལ་པས་གྲི་བརྒྱབ་ནས་གཤེགས་ཁར་རང་གི་སྐུ་ཁྲག་གིས་བྲིས་པ་ཡིན་པར་གྲགས་སོ། །

<