བོད་ཀྱི་བག་སྟོན་གཏམ་བཤད་གསེར་གྱི་མེ་ཏོག་ཕྲེང་བ།

2020-03-20
0

     དོ་ནུབ་མགྲོན་ཚུར་བྱོན་མཁན་རྣམས་ལ་ཆ་བཞག་ན།   མི་ཕོའི་ནང་དུ་མིག་རྩ་དྭངས་པ།   རྟ་ཕོའི་ནང་དུ་རྔ་མཇུག་རིང་བ། གཏམ་གྱི་ནང་དུ་སྲོག་ཤིང་།  དམག་གི་ནང་དུ་དཔའ་བོ།  ལས་བྱེད་ཀྱི་ནང་དུ་སྔ་འགྲོ།   མི་དམངས་ཀྱི་ནང་དུ་ཧུར་བརྩོན།  མི་ལ་མ་ལྟ་གཏམ།  བྱ་ལ་མ་ལྟ་སྒྲོ།   ཟ་བ་ལ་མ་ལྟ་རུས་པ་ལ་ལྟ་ནས་དོ་ནུབ་བཀྲ་ཤིས་པའི་གཡང་གདན་ཐོག་ལ་ཕེབས་ཐུབ་རོགས་ཡོང་རྒྱུ་ལ་དགའ་སྤྲོ་དཔེ་དང་དམ་པ་ཆེ་སྣང་།

    བག་མ་ལ་ཆ་བཞག་ན། རྒན་པོ་རྣམས་ཀྱིས་གཡང་གིས་གསོ། མ་སྲུ་རྣམས་ཀྱིས་གླུ་ཡིས་གསོ། བུ་ཚ་བུ་མོ་རྣམས་ཀྱིས་བྲོ་དང་ཁྲོམ་གཞས་ཀྱིས་གསོ།  ཇ་ཆང་གཉིས་ཀྱིས་ཟམ་བཙུགས།  ཕྲུག་དཀར་ལྗང་གཉིས་ཀྱིས་གདན་ཐོག  གཡུ་བྱུ་རུ་གཉིས་ཀྱི་རྒྱན་ཆ།  དར་གོས་ཅན་གཉིས་ཀྱི་ཐོག་ལ།  དོ་ནུབ་བཀྲ་ཤིས་པའི་གཡང་གདན་ཐོག་ལ་བཞུགས་གདན་འཇགས་རོགས་བྱེད་རྒྱུ་ལ་དགའ་སྤྲོ་དཔེ་དང་དམ་པ་ཆེ་སྣང་ཟེར་ཏེ་ལབ་དོན་ཞུ་དགོས་སྣང་ལ།

    དར་བཏགས་རྣམ་པ་བྱོན་རོགས་བྱེད་མི་རྣམས་ལ་ཆ་བཞག་ན།  ལ་ཆེ་ནས་མ་བསམ་བྱོན་རོགས་བྱེད།  ལ་ཁ་ཁ་བས་མ་བཀག  ཆུ་ཆེ་ནས་མ་བསམ་བྱོན་རོགས་བྱེད།   ཆུ་རབ་ཟམ་གྱིས་མ་བཀག  ཁྲ་གསལ་གསལ། གྲལ་རོགས་རོགས། དོ་ནུབ་བཀྲ་ཤིས་པའི་གཡང་རའི་ནང་ཕེབས་ཐུབ་རྒྱུ་ལ་དགའ་སྤྲོ་དཔེ་དང་དམ་པ་ཆེ་སྣང་།

བོད་ཀྱི་བག་སྟོན་གཏམ་བཤད་གསེར་གྱི་མེ་ཏོག་ཕྲེང་བ།

     གནམ་འཁོར་ལོ་རྩིབས་དགུའི་གུར་ཕུབས།  ས་པད་མ་འདབ་བརྒྱ་ཡིས་གདན་བཏིང་། བར་བཀྲ་ཤིས་རྟགས་བརྒྱད་ཀྱིས་གྲལ་བཀོད། གྲལ་གཡས་གྲལ་གཡོན་གྲལ་གདོང་གྲལ་གསུམ།  གྲལ་གཡས་གྲལ་མགོ་ལ་ཉི་མ་ཤར།  གྲལ་གཡོན་གྲལ་མགོ་ལ་ཟླ་བ་གསལ། གདོང་གྲལ་མགོ་ལ་སྨིན་དྲུག་ཚོགས།  གྲལ་མགོ་ལ་ཕ་དང་ཨ་ཁུ་བཟང་པོ།  གྲལ་རྐེད་ལ་མ་དང་མ་སྲུ།  གྲལ་མཐར་བུ་ཚ་བུ་མོ་རྣམས་ཀྱིས་ཐབ་སྐོར་རོགས་བྱེད་པ་ལ་དགའ་སྤྲོ་དཔེ་དང་དམ་བ་ཆེ་སྣང་ཟེར་ཏེ་ལབ་དོན་ཞུ་དགོས་སྣང་ལ།

  • 顶 0