ཀླུ་ཆུའི་སྟོན་བཤད།

2016-09-27
0
   ཡ་་་་་་དེ་རིང་གི་ཉི་མ་བཟང་བོ། སྐར་མ་བཟང་བོ། བཀྲ་ཤིས་པའི་ཉི་མ།  ཕུན་སུམ་ཚོགས་པའི་ཉི་མ། བསམ་དོན་འགྲུབ་པའི་ཉི་མ།གནམ་ལ་བཀྲ་ཤིས་འཁོར་ལོ་རྩིབས་བརྒྱད། ས་ལ་བཀྲ་ཤིས་པདྨ་འདབ་བརྒྱད།  བོད་ལ་བཀྲ་ཤིས་དོན་ཀུན་འགྲུབ་པའི་ཉིན་འདི་ལ།མདོ་སྨད་ཀླུ་ཆུའི་ས་ཁུལ་གྱི་གཞི་བྱེས་སྤུན་ཟླ་རྣམ་པ་བཀྲ་ཤིས་བདེ་ལེགས་ཞུ།

    ཡ་་་་་་ད་གཏམ་གྱི་མགོ་མ་ཀུ་རེ་ཡིན།གཏམ་ཀུ་རེ་བཤད་ན་སྣང་བ་སྐྱིད། ཟས་ཀྱི་མགོ་མ་མཆོད་ཁ་ཡིན་ཟས་མཆོད་གསུམ་འཕངས་ན་ཅི་བསམ་འགྲུབ་པ། ངས་དེ་རིང་བཀྲ་ཤིས་ལྷ་ཉིན་དཀར་པོ་ལ།བདུད་རྩི་ཆང་གི་མཆོད་ཅིག་འཕེན། 

    ཡ་་་་་་་ད་མཆོད་ཨོ་ཨ་ཧཱ།  མཆོད་ཨོ་ཨ་ཧཱ།  མཆོད་ཨོ་ཨ་ཧཱ། མཆོད་བླ་མ་ཡི་དམ་མཆོད། སངས་རྒྱས་བྱངསེམས་མཆོད། དཔའ་བོ་མཁའ་འགྲོ་མཆོད།སྐལ་བཟང་སངས་རྒྱས་སྟོང་གི་རྒྱལ་བོ། སངས་རྒྱས་ཤཀྱ་ཐུབ་པ་མཆོད། ད་ན་ཀོ་ཤའི་མཚོ་གླིང་ནས་ཨོ་རྒྱན་པད་མ་འབྱུང་གནས་མཆོད།གཡུ་ལོ་བཀོད་པའི་ཞིང་ཁམས་ནས།  རྗེ་བཙུན་འཕགས་མ་སྒྲོལ་མ་མཆོད།  དགའ་ལྡན་ཆོས་ཀྱི་ཞིང་ཁམས་ནས་རྗེ་རྒྱལ་བ་བློ་བཟང་གྲགས་པ་མཆོད།  པོ་ཏ་ལ་ཡི་གནས་མཆོག་ནས་ལྷ་སྐལ་ཐུགས་རྗེ་ཆེན་པོ་མཆོད།  གཙང་བཀྲ་ཤིས་ལྷུན་པོའི་ལྷ་མཁར་ནས།  པན་ཆེན་སྣང་བ་མཐའ་ཡས་མཆོད། མདོ་སྨད་ས་ཡི་ཐིག་ལེ་ནས།  ཡབ་རྗེ་སྐལ་ལྡན་རྒྱ་མཚོ་མཆོད། སྒར་གསར་ཆོས་གླིང་དགོན་པ་ནས།སྡེ་ཁྲི་འཇམ་དབྱངས་ཐུབ་བསྟན་མཆོད།བོད་གངས་ཅན་གཡང་གི་ར་བ་ནས།  སྐྱེས་ལྷ་རྨ་ཆེན་སྦོམ་ར་མཆོད།  ཀླུ་ཆུའི་ཕྱུག་ལུང་ཐང་ཆེན་ནས།ལྷ་སྲས་ཨ་མྱེས་དམག་དཔོན་མཆོད།ཕ་དང་ཨ་ཁུའི་དགྲ་ལྷ་མཆོད། སྟག་ཤར་གཞོན་ནུའི་རླུང་རྟ་མཆོད། མ་དང་སྲུ་མོའི་ཟས་ལྷ་མཆོད། དེ་རིང་འདིར་བཞུགས་མགྲོན་པོ་རྣམས་ཀྱི་མགྲོན་ལྷ་ཡང་ཞིག་མཆོད་ཟེར་རྒྱུ། 

    ཡ་་་་་་རྒྱ་གར་རྡོ་རྗེ་གདན་གྱི་བྱང་ཕྱོགས།  བོད་ཁ་བ་ཅན་གྱི་གནས་མཆོག་ལྷ་ཐུགས་རྗེ་ཆེན་པོའི་ཞིང་ཁམས་འདིར།
གངས་རི་ཤེལ་གྱི་མཆོད་རྟེན་འདྲ་བ་བརྒྱད་ཀྱིས་མཐའ་ནས་བསྐོར། གཡུ་ཡི་མེ་ལོང་འདྲ་བའི་མཚོ་མོ་ནང་ནས་འཁྱིལ་ལེ། གཞོང་དང་སྤང་ལྗོངས་སྨན་གྱིས་གང་ངེ༌།ས་འོག་ཐམས་ཅད་གཏེར་གྱིས་གང་ངེ༌།  ས་སྟེང་ཐམས་ཅད་གཡང་གི་འཁྱིལ་བའི་རྒྱལ་ཁམས་འདི་ནས། སྟོད་ནས་མངའ་རིས་བསྐོར་གསུམ་ཆགས།  བར་ནས་དབུས་གཙང་རི་བཞི་ཆགས།སྨད་ནས་མདོ་ཁམས་སྒང་དྲུག་ཆགས།

    ཡ་་་་་  མདོ་སྨད་ས་ཡི་ཐིག་ལེ།    ཀླུ་ཆུའི་གསེར་ལྗོངས་གཡང་གི་ར་བ་འདི་ཡང༌།   ཆོས་མདོ་སྔགས་ཀྱི་བསྟན་པ་དར་ས།  དཔལ་འབྱོར་གྱི་མཚོ་མོ་བརྡོལ་ས། རིག་པའི་གནས་བཅུ་ལ་ནང་བྱིན་ཆུད་ས།  རིག་པ་འབྱུང་བའི་གྲོང་ཁྱེར་འདི་ནས། དམ་པའི་ལྷ་སྡེ་དང༌། འཇིག་རྟེན་མི་སྡེ་ཆགས་ཚུལ་རེ་བཤད་ན།  སྤྱི་དཔོན་ནང་སོའི་བཀའ་ཁྲིམས་འོག་ནས།  རྒྱལ་ཁྲིམས་གདུགས་དཀར་གཅིག་གིས་ཁྱབ་ནོ།ཨ་གྲུང་ཚོ་བ་བཅུ་གཉིས་ཡོད་ནིས་ཟེར་གི ཕྱི་ཤོག་དྲུག་དང་བཅོ་བརྒྱད་ཡོད་ནིས་ཟེར་གི  ཤོལ་ཤོག་གསུམ་དང་ཉེར་གཅིག་ཡོད་ནིས་ཟེར་གི།  ཁང་སྐྱ་ལེབ་ཅན་ལ་ཁྲི་སྡེ་ཡོད་ནིས་ཟེར་གི  སྦྲ་རོག་རོག་ཅན་ལ་ཁྲི་སྡེ་ཡོད་ནིས་ཟེར་གི  གུར་དཀར་པོ་ཅན་ལ་ཁྲི་སྡེ་ཡོད་ནིས་ཟེར་གི     སྨད་རྒྱ་ནག་ནས་འོང་བའི་སྟོང་སྡེ་ཡོད་ནིས་ཟེར་གི།   བྱང་ཧོར་ནས་མཆེད་པའི་སྟོང་སྡེ་ཡོད་ནིས་ཟེར་གི།   གཙང་ལ་སྟོད་ནས་མཆེད་པའི་དམག་་སྡེ་ར་ཡོད་ནིས་ཟེར་ག 

    ཡ་་་་་་ ས་རྡོ་རྗེ་འདྲ་བའི་སྐེད་པ་ན་ཆགས་ནོ།  ཆོས་སྡེ་སྣོད་གསུམ་གྱི་རང་སྒྲ་སྒྲོག་ས།   ལེགས་བཤད་གསེར་གྱི་ཐང་མ་བརྡལ་ས།  དམ་པའི་ཆོས་ཀྱི་དགའ་སྟོན་འགྱེད་ས།  ལུང་རིགས་ཆོས་ཀྱི་དབྱངས་སྙན་སྒྲོགས་ས།  ཉམས་རྟོགས་ཅན་གྱི་བླ་མ་བཞུགས་ས།   མཁྱེན་རྒྱ་ཅན་གྱི་མཁས་པ་བྱོན་ས།  བྱིན་རླབས་ཅན་གྱི་རྟེན་གསུམ་མང་ས།  གཅིག་མཇལ་ན་ཐར་བའི་ས་བོན་བསྐྲུན་ས།  དཔལ་ན་ལེན་དྲ་ཡི་དོ་ཟླ་ཡོང་ས་འདི། ས་མདོ་སྨད་ཀླུ་ཆུ་རྫོང་འདི་ཡིན་ན་ཟེར་རྒྱུ།

    ཡ་་་་་་ས་མདོ་སྨད་ཀླུ་ཆུ་རྫོང་འདི་ཡིན་ན།བློན་ཆེནམགར་སྟོང་བཙན་གྱི་གདུང་རྒྱུད་ཡིན་ནིས་ཟེར་གི།   རིགས་རྒྱུད་ཡག་པ་ལྷ་ལས་མཆེད་ཅིང༌།   རུས་རྒྱུད་དཀར་བོ་དུང་ལས་མཆེད་པའི། ཁང་བ་ཀ་བཞི་གདུང་བརྒྱད་བཞེངས།  དེ་ནས་ཐང་དགེ་ལུང་བ་ཆགས།   རིམ་བཞིན་ཟམ་ཚ་རི་དྲུག་ཆགས།དེ་ནས་རོང་འབྲོག་ཚོ་བ་ཉེར་དགུ་ཆགས་ནིས་ཟེར་ག 

    ཡ་་་་་་གཡས་རི་བཀྲ་ཤིས་དུང་དཀར།    གཡོན་རི་འདོད་འབྱུང་བུམ་བཟང༌།  མདུན་རི་ཨ་མྱེས་དམག་དཔོན།རྒྱབ་རི་གཏེར་རྫོང་ཕྱུག་མོ།བྲག་དཀར་ལྷ་རྒྱལ་དཀར་པོ།རྫ་དམར་རི་རྒྱལ་ལྷུན་པོ། ཁྲ་མོའི་བྲག་གི་འདུ་རྫོང༌།  བར་དགུའི་རྫ་ར་སྨུག་ཆུང༌།མགོ་མང་རྒྱ་དེ་ཕྱུག་མོ།  ཟངས་ངའི་གཡུ་མཚོ་ཕྱུག་མོ།རྫོང་ཆེན་གཡང་ར་ཕྱུག་མོ།རྫས་ཚའི་ཁྱུང་མགོ་ཕྱུགས་མོ།ཟམ་ཚའི་མཛོད་ར་ཕྱུགས་མོ།ས་འདི་རུ་མཆེད་པའི་རུས་ལྷ་ཡིན་ནིས་ཟེར་གི

    ཡ་་་རྩྭ་སྐྱེས་སྐྱེས་ཚང་མ་སྨན་ཏོག་ཡིན་ས།  འབྲུ་རིགས་སྣ་ལྔ་ལ་སོགས་ཞལ་ཟས་རོ་བརྒྱ་ལྡན་ས།  འབྲི་ཐུལ་མ་རྣ་ཙོར་ལྡེམ་མེ་བྲེ་སེར་འབྲོང་ལ་འདྲེས་ས།  རྟ་མདོ་བ་རྨིག་སྒྲ་ལྡིར་རེ་གཡུ་འབྲུག་ཚང་ནས་ལངས་འདྲ།  ལུག་ཚེར་མོ་བལ་ཁ་གྱི་ལེ་ནམ་མཁའི་སྤྲིན་དང་མཉམ་འདྲ།མ་སྲུ་མོ་གཡུ་བྱུར་ལྡེམ་མེ་རྨ་བྱའི་སྒྲོ་གར་ཕུབ་འདྲ།  ཕ་ཨ་ཁུ་འཛུམ་ཆུང་ཤོད་ལེ་རི་རྒྱལ་བཞིན་དུ་བརྟན་ས།  འདི་་་་་ འདྲའི་ཕ་ས་སྐྱིད་པོ་འདི།  ཕ་ཡུལ་ཀླུ་ཆུའི་རོང་འབྲོག་ཡིན་ནིས་ཟེར་ག  

    ཡ་་་་་་་  དབྱར་གསུམ་ལོ་ཡག་སྙེ་མའི་གར་སྟབས་བསྒྱུར་ན།  གོས་ལྗང་སྨུག་གི་ན་བཟའ་ཐང་ལ་བཏིང་འདྲ།   སྟོན་གསུམ་སེར་པོ་གསེར་གྱི་འོད་མདངས་འཚེར་ན།   ཞིང་འབྲུ་དྲུག་གི་སྙེ་མ་མཛོད་དུ་སྤུངས་འདྲ།   འདི་སྡེ་གྲུ་བཞི་ཆགས་གི་གཡང་རྟེན། འབྲུ་རིགས་སྣ་ལྔའི་འི་བང་མཛོད་ཡིན་ནིས་ཟེར་ག།

    ཡ་་་་་བྱ་དང་བྱིའུས་སྤྲོ་གླུ་ལེན་ས།   སྨད་ཀྱི་ཞིང་ས་གསེར་གྱི་གཞོང་བ་ལ།   འབྲུ་དྲུག་ལོ་ཡག་གི་སྙེ་མ་མགོ་ལྕོག་ ལྡེམ་ས།  མ་བཏབ་ལྗོན་པའི་གཡུ་ལོའི་བར་ན།བཟའ་ཤིང་གི་འབྲས་བུ་གཡུར་དུ་ཟ་ས།  ལུང་བ་དུང་དཀར་གཡས་འཁྱིལ་འདྲ་བའི་ནང་ན། སྡེ་ཆེན་པོ་ནོར་བུ་མཛོད་ལ་སྤུངས་འདྲ།

    ཡ་་་་་་་་སྟ་རེ་བསྲིངས་ན་ནགས་ལ་རྩེབས་ས།  ཐོམ་བུ་བསྲིངས་ན་ཆུ་ཁར་རྩེབས་ས། ས་ལ་དགེ་བཅུ་ཚང་ས། མི་ལ་བདེ་སྐྱིད་འཛོམས་ས་འདི།སྡེ་ཆེན་པོ་ཐང་ལུང་དཔོན་ཚང་རེད་ཟེར་ག།

ཡ་་་་་་སྟོད་ཧི་མ་ལ་འདི་གངས་གི་བདག་པོ།   ཞི་བདེ་རྒྱ་མཚོ་ཆེན་པོ་ཆུ་ཡི་བདག་པོ།  ས་དོག་མོ་གཡང་ར་གྲུ་བཞི་གཏེར་གྱི་བདག་པོ།  ང་མགོ་ནག་བོད་པ་རྟེན་འབྲེལ་གྱི་བདག་པོ་ཡིན་པས།  ངས་མཚམས་འདི་ནས་ཁ་གཡང་བཀྲ་ཤིས་འཁྱིལ་བ་རེ་འཇོག་ཡ།
མཐོ་བ་ནམ་མཁའི་དབྱིངས་ཀྱི་བཀྲ་ཤིས་ཤོག
གསལ་བ་ཉི་ཟླའི་འོད་ཀྱིས་བཀྲ་ཤིས་ཤོག 
བརྟན་པ་མི་འགྱུར་ལྷུན་པོ་བཀྲ་ཤིས་ཤོག 
སྙན་པ་ཁུ་བྱུག་གདངས་ཀྱི་བཀྲ་ཤིས་ཤོག
གྲགས་པ་གཡས་འཁྱིལ་དུང་གི་བཀྲ་ཤིས་ཤོག
བྱ་བ་རྟགས་བརྒྱད་ལས་ཀྱི་བཀྲ་ཤིས་ཤོག
མི་རྣམས་ཚེ་ཐག་རིང་བའི་བཀྲ་ཤིས་ཤོག 
འཛམ་གླིང་ཞི་བདེ་ཡོང་བའི་བཀྲ་ཤིས་ཤོག 
གངས་ཅན་བོད་ལ་རླུང་རྟ་དར་བའི་བཀྲ་ཤིས་ཤོག
ཆོས་སྲིད་མཚོ་ལྟར་རྒྱས་པའི་བཀྲ་ཤིས་ཤོག
བཀྲ་ཤིས་གཡང་དུ་འཁྱིལ་བའི་བཀྲ་ཤིས་ཤོག

  • 顶 0