རླུང་བརྟག་ཚུལ།

2019-01-29
0

 

 རླུང་བརྟག་ཚུལ་ནི།    སྟོན་དགུན་ཤར་ལྷོའི་རླུང་བྱུང་ན། །དེ་ཉིན་ཆར་བ་འབབ་མི་འགྱུར། །དཔྱིད་དབྱར་ནུབ་བྱང་རླུང་ལངས་ན། །ནམ་མཁའ་ངེས་པར་དྭངས་པར་འགྱུར། །སྔ་དྲོ་རླུང་ལངས་རྒྱུན་མི་རིང་། །ཕྱི་དྲོ་རླུང་ལངས་ཆར་བ་ཆེ། །དཔྱིད་དབྱར་ཤར་ལྷོའི་རླུང་ལངས་ན། །གནམ་ལ་དྲི་བ་བྱ་མི་དགོས། །སྟོན་དགུན་ནུབ་བྱང་རླུང་ལངས་ན། །ནམ་མཁའ་ངེས་པར་དྭངས་པར་འགྱུར། །དབྱར་གྱི་དུས་སུ་རླུང་ཁད་འཇམ། ། གྲུ་བོ་ཆུ་བོར་བགྲོད་པ་བདེ། །སྟོན་གྱི་དུས་སུ་རླུང་འབྱུང་བས། །ཆུ་བོའི་རླབས་ཆེན་འཕྱུར་བར་འགྱུར། །དབྱར་དུས་རླུང་ནི་མཚན་སྦྲེལ་ན། །ཉིན་གྱི་སྔོན་དུ་རླུང་ཆག་འགྱུར། །ཆར་རྗེས་ཤར་ལྷོའི་རླུང་བྱུང་ན། །ཕྱི་དྲོ་རླུང་ནི་ཆེས་ཆེར་ལྡང་། །སྔ་དྲོའི་དུས་སུ་ཆར་རླུང་བྱུང་། །རླུང་ཆེན་ཉམས་པར་འགྱུར་བ་ཡིན། །ཚེས་གསུམ་རླུང་ཆེན་ལངས་གྱུར་ན། །ཚེས་བཞི་ལ་ཡང་རླུང་ལྡང་ཉེ། །ཉི་ཤུ་གསུམ་གྱི་ཉི་མ་ལ། །ཤིན་ཏུ་ཆེ་བའི་རླུང་འབྱུང་ངོ་། །ཚེས་བདུན་ཚེས་པ་བརྒྱད་དག་ལ། །ངེས་པར་རླུང་ཡོད་འཕྲིན་སྔོན་འབྱུང་། །དཔྱིད་དུས་ཁ་བ་བབས་པའི་རྗེས། །ཞག་པོ་བརྒྱད་དང་ཉི་ཤུ་ན། །ངེས་པར་རླུང་ཡོད་སེམས་ལ་ཞོག །ཟླ་བ་གཉིས་པར་ཆར་རླུང་མང་། །མགྲོན་པོ་དག་གི་སེམས་ལ་ཞོག །ཚེས་པ་བརྒྱད་དང་བཅུ་གསུམ་དང་། །བཅུ་དགུ་དང་ནི་ཉི་ཤུ་གཅིག །ཟླ་བ་གསུམ་པའི་ཚེས་བརྒྱད་བཅས། །ཆར་བ་ངེས་པར་བབས་གྱུར་ན། །ཟླ་བ་བཞི་བའི་བཅོ་བརྒྱད་ལ། །ཆར་བ་འབབ་པར་འགྱུར་བ་ཡིན། །རླུང་ཆར་འབྲང་བའི་རླན་ཡང་འབྱུང་། །གྲུར་ཞུགས་མིས་ཀྱང་བཤོལ་དུ་མེད། །ཟླ་བ་ལྔ་བའི་ཚེས་ལྔ་ལ། །རླུང་གི་ཉམས་ཤིག་བྱུང་གྱུར་ན། །གཉིས་དང་དགུ་དག་ངེས་པར་བྱ། །ནུབ་བྱང་ངོས་ནས་རླུང་ཆེན་ལངས། །ལྷོ་རུ་རིམ་གྱིས་ཆེ་བར་འགྱུར། །ཟླ་བ་དྲུག་པའི་ཚེས་བཅུ་གཅིག །བཅུ་གཉིས་དག་ལ་འཛེམས་པ་གཅེས། །ཟླ་བ་བདུན་པའི་ཡར་ངོ་ལ། །རླུང་བྱུང་སྟོན་དུས་གྲུ་མི་གཏོང་། །ཟླ་བ་བརྒྱད་པའི་དཀྱིལ་གྱི་དུས། །ངེས་པར་རླུང་འབྱུང་ཆར་བ་ཡོད། །

 

 

 

  • 顶 0