ཆོས་ཁས་ལེན་ཚུལ་དང་སྐྱབས་འགྲོ་བསླབ་བྱ་མདོར་བསྡུས།

2016-09-09

 

  ཆོས་ལུགས་སྲོལ་རྒྱུན་གྱི་ལམ་སྲོལ་གང་ཡང་རུང་བ་ཁས་ལེན་མི་ལེན་དང་། ལྷ་དང་བླ་མ་གང་ཡང་རུང་བར་དད་པ་བྱེད་དང་མི་བྱེད། ཁ་འདོན་དགེ་སྦྱོར་བྱེད་མི་བྱེད། བླ་མས་གསུང་ཚད་ཁས་ལེན་མི་ལེན་དང་། བླ་མས་ཅི་མཛད་ལེགས་མཐོང་ཡིན་མིན། ལྷ་ཁང་དང་སྐུ་གསུང་ཐུགས་རྟེན་ལ་ཕྱག་འཚལ་བསྐོར་བ་དང་། བླ་མ་དང་དགོན་པ་གྲྭ་ཚང་གི་སྦྱིན་བདག་བྱས་མ་བྱས་ཙམ་གྱིས་ཆོས་ཁས་ལེན་དང་མི་ལེན་དུ་མི་འཇོག  དཀོན་མཆོག་གསུམ་ལ་སྐྱvབས་སུ་འགྲོ་ཞིང་སྐྱབས་སུ་སོང་བའི་བསླབ་བྱ་ལ་ཚུལ་བཞིན་སློབ་མཁན་ཞིག་གིས། གཞན་ཕན་གྱི་བསམ་བློ་ཡོད་པའི་ཐོག་ནས་ལུས་ངག་ཡིད་གསུམ་གྱི་ཀུན་སྤྱོད་འཚེ་བ་མེད་པ། ཡ་རབས་སྤྱོད་བཟང་། འཇིག་རྟེན་མི་ལུགས་དང་མཐུན་པ། ཀུན་སློང་བཟང་པོས་བྱ་བ་ལེགས་པ་ཞིག་བྱེད་ཀྱི་འདུག་ན་དེས་ཆོས་བྱས་པ་དང་ཆོས་ཁས་ལེན་པར་འཇོག 

  སྐྱབས་སུ་སོང་བའི་བསླབ་བྱ་ལ་ཚུལ་བཞིན་དུ་སློབ་དགོས་ཏེ། དཔེར་ན་དགྲ་མ་རུང་བས་གཙེས་པའི་ཚེ་རྒྱལ་བོ་ཆེན་པོ་སོགས་ལ་མགོན་བཙལ་ན་དེས་སྐྱོབ་ནུས་ཀྱང་། རྒྱལ་བོ་དེ་ཉིད་ཀྱི་བཀའ་ཁྲིམས་མ་བརྩིས་ན་དེར་ཡང་ཆད་པ་འཕོག་པ་བཞིན། དཀོན་མཆོག་ལ་སྐྱབས་སུ་སོང་ཡང་དེའི་བསླབ་བྱ་ལས་འབྲས་ཀྱི་བླང་དོར་སོགས་སངས་རྒྱས་ཀྱི་བཀའ་བཞིན་དུ་མ་བསྲུངས་ན་དཀོན་མཆོག་གིས་ཀྱང་སྐྱོབ་ཐབས་དང་བྲལ་འགྲོ་བ་ཆོས་ཉིད་ཡིན་པས་བསླབ་བྱའི་རིམ་པ་འདི་ལ་ནན་ཏན་སྙིང་བོར་བྱས་ཏེ་འབད་དགོས་སོ། དེའང་བསྡུ་བ་ལས། བཤེས་གཉེན་དམ་པ་བསྟེན་པ༑ དེ་ལས་ཆོས་ཉན་པ། ཆོས་ཀྱི་དོན་ཡིད་ལ་བྱེད་པ། དེ་ཐར་པའི་རྒྱུར་འགྲོ་ངེས་སུ་བསྒྲུབ་པ་བཞི་དང་། སྒོ་གསུམ་བག་མེད་དུ་མི་གཏོང་བ། བསླབ་གཞི་ཅི་ནུས་སུ་འཛིན་པ། སྙིང་རྗེའི་དབང་གིས་སེམས་ཅན་གཞན་ཡང་དེ་ལ་སྦྱོར་བ། བཀའ་དྲིན་རྗེས་སུ་དྲན་ནས་རྟག་ཏུ་དཀོན་མཆོག་མཆོད་པ་ལ་བརྩོན་པ་དང་བཞི་སྟེ། བརྒྱད་གསུངས་སོ། འདི་རྣམས་ནི་གྲོང་ཁྱེར་ཆེན་པོའི་ལྕགས་རི་བཞིན་མཐའ་ནས་བསྲུང་སྟེ་ལྟུང་འགོག་ཚུལ་རྒྱ་ཆེན་པོའི་དབང་དུ་བྱས་པ་ཡིན་ལ། ལས་དང་པོ་བར་གནད་ཐོག་ཏུ་མེ་བཙའ་བཏབ་པ་བཞིན་འབྱུང་ཉེ་བའི་དགག་བྱ་རྣམས་དམིགས་ཕུག་སྟེ་འགོག་ཚུལ་དང་། ལག་ལེན་ཡང་འཕྲལ་དུ་གང་གཙོ་ངོས་བཟུང་ནས་བསྟན་ན་ཕལ་ཆེ་བས་འདིར་མན་ངག་ནས་འབྱུང་བ་བཞིན་བཤད་པ་ལ། དགག་པའི་བསླབ་བྱ་དང་། བསྒྲུབ་པའི་བསླབ་བྱའོ། དང་པོ་ནི། མྱ་ངན་ལས་འདས་པ་ལས། གང་ཞིག་གསུམ་ལ་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་སོང་བ་མ་ཡིན་ནོ། །དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གསོད་པའི་སེམས་དང་བྲལ། །དགེ་འདུན་ལ་ཡང་སྐྱབས་འགྲོ་བ། །མུ་སྟེགས་ཅན་དང་འགྲོགས་པ་མིན། །ཞེས་གསུངས་པ་ལྟར། སངས་རྒྱས་ལ་སྐྱབས་སུ་སོང་བས་འཇིག་རྟེན་པའི་ལྷ་ལ་གཏན་གྱི་སྐྱབས་མི་འཚོལ། དེའང་ཚངས་པ་དང་དབང་ཕྱུག་སོགས་ལའང་གཏན་གྱི་སྐྱབས་མི་འཚོལ་ན། ཡི་དྭགས་ཀྱི་རིགས་སུ་གྱུར་བའི་ལྷ་འདྲེ་ལ་སྐྱབས་མི་འཚོལ་བ་ལྟ་ཅི་སྨོས། གཞི་བདག་སོགས་ལ་གཏོར་མ་གཏོང་བའི་ཚེ་སྙིང་རྗེའི་བསམ་པ་དང་གནས་ཀྱི་གྲོགས་འཚོལ་བའི་བསམ་པས་གཏོང་ཞིང་ཕུགས་ཀྱི་རེ་ལྟོས་མི་འཆའ་བ་གལ་ཆེ་སྟེ། གནས་སྐབས་ཀྱི་བྱ་བ་ཕྲན་བུ་རེའི་གྲོགས་བྱས་པ་ལ་མགོ་འཁོར་ཏེ་གཏན་གྱི་འདུན་མའི་རྩ་བ་འཕྱུགས་ན་ཉེན་ཤིན་ཏུ་ཆེ། ཆོས་ལ་སྐྱབས་སུ་སོང་ན་ཆོས་དང་མཐུན་དགོས་ཤིང་། དེའང་བཞི་བརྒྱ་བ་ལས། མདོར་ན་ཆོས་ནི་མི་འཚེ་བར། །དེ་བཞིན་གཤེགས་པ་རྣམས་ཀྱིས་གསུངས། །ཞེས་ཆོས་ཀྱི་ངོ་བོ་མི་འཚེ་བར་གསུངས་པ་ཡིན་པས། བསླབ་བྱའང་སེམས་ཅན་ལ་གནོད་འཚེ་སྤོང་ཞིང་མུ་སྟེགས་ཅན་གྱི་གཞུང་སོགས་ལོག་པའི་ཆོས་ལ་ཡིད་བརྟན་མི་འཆའ། དགེ་འདུན་ལ་སྐྱབས་སུ་སོང་བའི་གྲོགས་མུ་སྟེགས་ཅན་དང་མི་འགྲོགས་ཤིང་། ལས་འབྲས་ལ་ཡིད་མི་ཆེས་ཤིང་ཆོས་ལ་སྐུར་བ་འདེབས་པའི་མི་དང་མཛའ་གྲོགས་མི་བྱེད་དེ། དམ་ཚིག་ཉམས་པ་དང་འགྲོགས་ན་དེའི་ཉམས་གྲིབ་ཀྱིས་ཡོན་ཏན་ཐམས་ཅད་འགྲིབ་ཅིང་དངོས་གྲུབ་གྱི་སྒོ་འགག་པར་གསུངས་སོ། ། 

<