མ་ཕམ་གཡུ་མཚོ།

2018-08-27
0

 

   འཛམ་གླིང་སྟེང་གི་མཚོ་འཕགས་ཆེས་མཐོ་བའི་ཚྭ་མེད་མཚེའུ་སྟེ། ལྷ་དབང་ཕྱུག་གི་བཙུན་མོ་ལྷ་མོ་ཨུ་མའི་བླ་མཚོའམ་ཁྲུས་རྫིང་དུ་གྲགས་པའི་མ་ཕམ་གཡུ་མཚོ་ཞེས་པ་ནི་བོད་ལྗོངས་སྟོད་མངའ་རིས་སྐོར་གསུམ་གྱི་ཡ་གྱལ་སྤུ་ཧྲེང་རྫོང་གི་ཁོངས་སུ་ཡོད་ལ། མཚོ་དེ་ལ་མལ་དྲོས་མཚོ་དང་མ་དྲོས་མཚོ། མ་པང་མཚོ། མ་ཕམ་མཚོ། པད་མ་བླ་མཚོ་ལ་སོགས་མིང་གི་རྣམ་གྲངས་དུ་མ་ཞིག་ཀྱང་ཡོད་དོ།། 

   ངོ་སྤྲོད།

  ལྷ་དབང་ཕྱུག་གི་བཙུན་མོ་ལྷ་མོ་ཨུ་མའི་བླ་མཚོའམ་ཁྲུས་རྫིང་དུ་གྲགས་པའི་མ་ཕམ་གཡུ་མཚོ་ཞེས་པ་ནི་བོད་རང་སྐྱོང་ལྗོངས་ཀྱི་སྟོད་མངའ་རིས་སྐོར་གསུམ་གྱི་ཡ་གྱལ་སྤུ་ཧྲེང་རྫོང་གི་ཁོངས་སུ་ཡོད་ལ། མཚོ་དེ་ལ་མལ་དྲོས་མཚོ་དང་མ་དྲོས་མཚོ། མ་པང་མཚོ། མ་ཕམ་མཚོ། པདྨ་བླ་མཚོ་ལ་སོགས་མིང་གི་རྣམ་གྲངས་དུ་མ་ཞིག་ཀྱང་ཡོད།

  དེ་ཡང་སྔོན་བསྐལ་བ་ཆགས་པའི་དུས་སུ་མཚོ་འདི་མེད་པ་ལ་དེའི་རྗེས་དུས་ཤིག་ཏུ་འཁོར་ལོས་བསྒྱུར་བའི་རྒྱལ་པོ་སྨྱུག་སྦུམ་ཞེས་བྱ་བ་ས་བཅུའི་བྱང་ཆུབ་སེམས་པ་ཞིག་བྱུང་ཞིང་རྒྱལ་བོ་དེ་དུས་ནམ་ཞིག་སྐྱེད་མོས་ཚལ་དུ་འབྱོན་པའི་ལམ་ཁར་སྐྱེས་རྒ་ན་འཆིའི་སྡུག་བསྔལ་ལ་གཟིགས་ཏེ་སྐྱོ་བ་ཤིན་ཏུ་སྐྱེས་ནས་རྒྱལ་པོས་བླ་མཆོད་བྲམ་ཟེ་དུས་སྦོག་ཅེས་བྱ་བ་ལ་བཀའ་བསྩལ་བ། སྐྱེ་རྒ་ན་འཆིའི་སྡུག་བསྔལ་འདི་དག་བདག་ཅན་སྐྱེ་བོ་ཀུན་གྱི་ཐུན་མོང་གི་ཆོས་ཡིན་ནམ་འོན་ཏེ་འདི་ཉིད་ཁོ་ནའི་ཡིན། བྲམ་ཟེས་སྨྲས་པ་ལྷ་འདི་ལ་ཕན་ཐབས་མཆིས་ཏེ་གཏན་པ་མེད་པའི་སྦྱིན་གཏོང་རིགས་སོ།། ཞེས་གསོལ་བས། རྒྱལ་པོས་ཀྱང་སྦྱིན་གཏོང་གི་ཁང་པ་བརྩིགས་ཤིང་། འཛམ་གླིང་གི་མི་ཐམས་ཅད་བསྡུས་ནས་ལོ་བཅུ་གཉིས་ཀྱི་བར་དུ་ཟས་དང་གོས་དང་ནོར་ལ་སོགས་པ་ཅི་འདོད་པའི་གཏན་པ་མེད་པའི་སྦྱིན་གཏོང་རྒྱ་ཆེན་པོ་མཛད་པའི་ཚེ་ས་ལ་དོང་ཆེན་པོ་བྲུས་ནས་དེར་འབྲས་གཙོས་པའི་ཁུ་བ་རྣམས་འཕོ་བ་ལས་ལོ་བཅུ་གཉིས་ལོན་པ་ན་དོང་གང་ནས་མཚོ་ཆེན་པོ་མ་དྲོས་སུ་འགྱུར་བར་གྲགས་སོ།།

  མཚོ་འདི་ཉིད་ཀྱི་དབྱིབས་ནི་གྲུ་བཞི་ཡིན་ཞིང་མཚོའི་དཀྱིལ་མཐོ་ལ་མཐའ་དམའ་བ་དབྱིབས་ལེགས་ཤིང་ལྟ་ན་སྡུག་པ། ནང་དུ་ཡོན་ཏན་ཡན་ལག་བརྒྱད་དང་ལྡན་པའི་ཆུས་གང་བ། མེ་ཏོག་སྣ་ཚོགས་པས་བརྒྱན་ཞིང་ཆུ་བྱ་སྣ་ཚོགས་སྐད་སྙན་སྒྲ་སྒྲོགས་པ་བཅས་ཀྱི་ཁྱད་ཆོས་ལྡན་ཡོད་ལ་གངས་ལྗོངས་ཀྱི་མཛེས་རྒྱན་དུ་གྱུར་བའི་མཚོ་ཆེན་བཞིའི་གྲས་ཡིན་པ་དང་མཚོ་གཞན་གསུམ་ལས་ཀྱང་གཏིང་ཟབ་ཤོས་དང་། མཁའ་རླུང་མཐོ་ཤོས་བཅས་ཀྱི་ཁྱད་འཕགས་ཀྱི་རང་བཞིན་མངོན་གསལ་དུ་གྲུབ་ཡོད་པས་ཕྱི་ནང་ཀུན་གྱི་རྩ་ཆེར་འཛིན་ཞིང་ཡུལ་གྲུ་ཀུན་ཏུ་སྙན་གྲགས་ཆེ་བ་ཞིག་ཡིན།

  མཚོ་འདི་ཡི་མཐོ་ཚད་ནི་མཚོ་ངོས་ལས་སྤྱི་ཁྲི་བཞི་སྟོང་དྲུག་བརྒྱ་ཙམ་ཟིན་གྱི་ཡོད་པ་དང་། མ་ཕམ་གཡུ་མཚོའི་མཚོ་ཞེང་གི་རྒྱ་ཁྱོན་མངོན་གསལ་དུ་སྤྱི་ལེ་གྲུ་བཞི་མ་སུམ་བརྒྱ་ཉི་ཤུ་ཟིན་གྱི་ཡོད་ཅིང་མཚོའི་གཏིང་ཚད་ནི་སྤྱི་ཁྲི་དགུ་བཅུ་གོ་གཉིས་ལྷག་ཙམ་ཟིན་གྱི་ཡོད། དེ་བཞིན་མ་ཕམ་གཡུ་མཚོའི་དྭངས་ཚད་ཀྱང་སྤྱི་ཁྲི་བཅོ་ལྔ་གསལ་གྱི་ཡོད་ཅེས་བརྗོད་ལ་མཚོ་སྐོར་རྐྱང་པ་གཅིག་ལ་སྤྱི་ལེ་བརྒྱད་ཅུ་གྱ་བཞི་ཡོད་པས་རྟ་ལམ་ཉི་མ་གཅིག་གིས་འཁོར་བ་དང་སྤྱིར་བཏང་མིས་ཉིན་བཞི་ལ་མཚོ་སྐོར་གཅིག་འཁོར་གྱི་ཡོད་པར་གསུངས།

  དེ་ལྟ་བུའི་མཚོ་ལ་མ་དྲོས་མཚོ་དང་། པདྨ་བླ་མཚོ། ཡོངས་གྲགས་ཆེ་བ་མ་ཕམ་གཡུ་མཚོ་ཞེས་གསུམ་དུ་བརྗོད་ཅིང་། དེ་ཡང་མ་དྲོས་མཚོ་ཞེས་པ་ནི་ཀླུ་ཡི་རྒྱལ་པོ་མ་དྲོས་པའི་ཕོ་བྲང་ཡིན་པས་ན་མ་དྲོས་མཚོ་ཞེས་དང་། པདྨ་བླ་མཚོ་ཞེས་པ་ནི་དབྱིབས་པདྨ་འདབ་བརྒྱད་དང་མཚུངས་ཤིང་འདབ་མ་རེ་རེའི་ཕུ་ནས་ཆུ་རེ་འབབ་པས་ན་པདྨ་བླ་མཚོ། མཚོ་འདི་ཉིད་ལ་མ་ཕམ་ཞེས་འབོད་པ་ནི་འདི་ཉིད་ཀྱི་ཆུ་ཡན་ལག་བརྒྱད་དང་ལྡན་པ་ཁོ་ན་ཡིན་ཞིང་ཡོན་ཏན་གྱིས་མ་ཕམ་ཞེས་དང་མཚོའི་ཁ་དོག་གཡུ་ལྟར་སྔོ་བས་མ་ཕམ་གཡུ་མཚོར་གྲགས་སོ།།

  དཔྱད་གཞིའི་ཡིག་ཆ།

  1  མཚོ་སྔོན་པོ་དྲ་བ།    

  2  པའེ་ཏུའུ་རིག་མཛོད།    

  • 顶 0