འབའ་ཐང་།

2018-11-02
0

 

   འབའ་ཐང་རྫོང་ནི་དཀར་མཛེས་ཁུལ་གྱི་ལྷོ་ནུབ་ཏུ་གནས་ཤིང་། སི་ཁྲོན་དང་ཡུན་ནན། བོད་ལྗོངས་བཅས་ཀྱི་འབྲེལ་མཚམས་སུ་ཆགས་ཡོད། རྫོང་ཡོངས་ཀྱི་མཚོ་འཕགས་ཆ་སྙོམས་སྨི3300ཡོད། མངའ་ཁོངས་ཀྱི་རྒྱ་ཁྱོན་ལ་སྤྱི་ལེ་གྲུ་བཞི་མ7844ཡོད་ཅིང་། མི་འབོར་ཁྲི5ལ་ཉེ་བ་ཡོད་ཅིང་དེའི་ནང་དུ་བརྒྱ་ཆ95ཡན་ནི་བོད་རིགས་ཡིན། རྫོང་སྲིད་གཞུང་འབའ་ཐང་བྱ་ཁྱུང་གྲོང་རྡལ་དུ་གནས་ཡོད་ཅིང་མཚོ་འཕགས2600ཡོད། མངའ་ཁོངས་སུ་གནམ་གཤིས་དྲོ་གྲང་རན་ཞིང་རི་ཀླུང་མཛེས་སྡུག་ལྡན་པ་དང་ཐོན་ཁུངས་ཕུན་སུམ་ཚོགས་པས་འབའ་ནོར་བུའི་ས་ཆ་ཞེས་པའི་མཚན་སྙན་ཐོབ།

   མིང་གི་བྱུང་ཚུལ།

  འབའ་ཐང་རྫོང་ནི་ལྷ་ཡུལ་ནས་འབྱུང་བའི་ལྷ་ལུག་དཀར་པོ་འབའ་ཐང་གི་སར་བབས་པའི་ཚེ་འབའ་ཞེས་པའི་སྒྲ་གྲག་པ་ལ་བརྟེན་ནས་བཀྲ་ཤིས་པའི་རྟགས་མཚན་རེད་ཅེས་མིང་དེ་ལྟར་བཏགས་པ་དང་། འབའ་ཐང་གི་ས་དབྱིབས་བྱ་ཁྱུང་ཞིག་གི་དབྱིབས་དང་འདྲ་ཞིང་དེ་ཡང་བྱ་རྒྱལ་ཁྱུང་ནམ་མཁའ་ལ་ལྡིང་སྐོར་བརྒྱབ་ནས་ཁྱུང་སྐད་སྒྲོག་པའི་ཚེ་ས་གཞིའི་ཐང་ལ་ཡོད་པའི་ལུ་གུ་སྐྲག་ནས་འབའ་སྒྲ་རྒྱག་པས་འབའ་ཐང་ཞེས་མིང་ཐོགས་པ་རེད་ཅེས་ཀྱང་བཤད་སྲོལ་ཡོད་པ་དང་། འབའ་པ་སྐལ་བཟང་འཕྲིན་ལས་ཀྱིས་བརྩམས་པའི་འབའ་ཐང་ཞེས་པའི་མིང་དོན་འཇུག་སྟངས་སྐོར་ཅུང་ཟད་དཔྱད་པ་ཞེས་པ་ལས། འབའ་ཐང་ཞེས་པའི་མིང་འཇུག་སྟངས་ཐད་འབའ་ཐང་གི་ལོ་རྒྱུས་གསར་རྙིང་ཁག་ན་འཕགས་པ་མ་འགག་པ་མི་ཡི་རྣམ་པར་རོལ་ནས་ས་དེ་གར་ཕེབས་སྐབས་སྲིད་པའི་ལྷ་ལུག་དཀར་པོས་འབལ་ཞེས་པའི་སྒྲ་སྒྲོག་པར་བརྟེན་འབལ་ཞེས་མིང་ཐོགས་པ་དང་། ཕྱིས་སུ་འབའ་ཞེས་སྒྲ་ཟུར་ཆགས་པ་ཡིན་ཞེས་དང་། ཡང་རྒྱ་ཡིག་ཐོག་ཡོད་པའི་འབའ་ཐང་གི་ལོ་རྒྱུས་ཁག་ན་སྔོན་ས་གནས་དེ་འབྲོག་པའི་ས་ཆ་ཞིག་ཡིན་པ་དང་ས་གནས་དེར་འབྲོག་པའི་ཁྱིམ་ཚང་ཆེན་པོ་ཞིག་ཡོད། ཉིན་ཞིག་ཆུ་ལོག་གི་འཇིགས་པ་བྱུང་ནས་འབྲོག་ལུག་རེ་རེ་བཞིན་འབའ་འབའ་ཞེས་སྒྲོག་ནས་ཆུ་ནང་འཐིམས་སོང་བ་དང་། འབྲོག་པའི་ཕ་རྒན་གྱིས་རང་བུ་ཡི་མིང་ནས་ཐང(བུ་དེའི་མིང་ལ་ཐང་ཟེར)ཞེས་ཡང་ཡང་བོས་པར་བརྟེན་འབའ་ཐང་ཞེས་པའི་མིང་ཐོགས་རབས་བཤད་སྲོལ་འདུག   འབའ་སྡེ་དང་འབའ་ཐང་གཉིས་དོན་གཅིག་པ་ཡིན་ཞིང་། འབའ་སྡེ་ཞེས་པ་དེ་གཙོ་བོ་སྐབས་དེའི་སྲིད་འཛིན་ཁྱབ་ཁོངས་ཀྱི་མིང་དང་སྦྲེལ་ནས་བཏགས་པ་ཞིག་སྟེ། གཙང་སྡེ་པ་དང་སྡེ་པ་གཞུང་ཞེས་པའི་མིང་འདོགས་སྟངས་ལྟར་སྐབས་དེའི་འབའ་ཐང་སྲིད་གཞུང་ལ་འབའ་སྡེ་པ་ཟེར་བ་དང་དེའི་ཁྱབ་ཁོངས་ཡོད་པའི་སྡེ་འབངས་ཚང་མར་འབའ་སྡེ་ཞེས་ཟེར།འབའ་ཐང་ཞེས་པ་ནི་རིགས་རུས་དང་ས་གནས་ཆགས་བབ་གཉིས་ལྷན་དུ་སྦྲེལ་ནས་བཏགས་པའི་མིང་ཡིན་ཞིང་། འབའ་ནི་ས་དེའི་མི་རྣམས་ཀྱི་མཆེད་ཁུངས་ཀྱི་རུས་མིང་དང་། ཐང་ཞེས་པ་ནི་ས་དེའི་གནས་བབ་དེ་གཤོངས་རོང་ཡིན་པར་བརྟེན་ནས་བཏགས་པ་ཞིག་ཡིན། དེང་སང་འབའ་པའི་མི་མང་པོ་ཞིག་གིས་འབའ་ཐང་ཞེས་པ་དེ་ཕྱིས་འབྱུང巴塘ཞེས་པའི་རྒྱ་སྐད་ཟུར་ཆགས་པར་བསམས་ཏེ་དེང་སྐབས་འབའ་ཐང་རྫོང་གི་ཁྱབ་ཁོངས་རང་ལ་ངོས་འཛིན་མཁན་ཡང་ཡོད་མོད། རྒྱལ་དབང་དྲུག་པ་རིག་འཛིན་ཚངས་དབྱངས་རྒྱ་མཚོ་དང་རྐརྨ་པའི་རྣམ་ཐར་སོགས་ལོ་རྒྱུས་རྙིང་པ་མང་པོར་འབའ་ཐང་ཞེས་པའི་མིང་དེ་བཀོད་ཡོད་པས་ཐ་སྙད་དེ་གསར་བྱུང་ཞིག་གཏན་ནས་མིན། དེས་ན་དོན་དངོས་ཐོག་འབའ་ཐང་དང་འབའ་སྡེ་གཉིས་མིང་འདོགས་སྟངས་ཙམ་ལས་དོན་གཅིག་པ་ཡིན།

 

 

  

  • 顶 0