བསླབ་བྱ་ཁག་གཅིག

2017-11-17

 

  ཡུལ་ཨན་ཏ་ན་ཞེས་པར་དགེ་སློང་བསོད་སྙོམས་པ། དགོན་པར་གནས་པ་ལ་དགའ་བ། སྤྱོད་ལམ་པ་ཞིག་ལ་སློབ་མ་དགེ་ཚུལ་ཞིག་ཡོད་དོ།། དགེ་སློང་ལ་རྒྱུན་པར་བསོད་སྙོམས་སྟོབ་མཁན་གྱི་དགེ་བསྙེན་ཞིག་ཀྱང་ཡོད་དོ།། ཉིན་ཞིག་ན་དགེ་བསྙེན་དེ་རང་ལ་ཁྱིམ་བདག་མཛའ་བོ་ཞིག་ཡོད་པ་ཚང་གི་དུས་སྟོན་དུ་སོང་། ཁོ་ལ་བུ་མོ་ཞིག་ཡོད་པ་དེས་ཁྱིམ་བསྲུངས་ནས་ཡོད་དོ།། དེའི་ཉིན་པར་དགེ་བསྙེན་དེ་བྲེལ་བས་བསོད་སྙོམས་བསྐྱལ་བ་བརྗེད་ནས་ཉིན་གུང་ཡོལ་ལ་ཁད་པ་དང་། དགེ་སློང་གིས་རང་གི་དགེ་ཚུལ་ལ། སོང་ལ་ཆགས་པར་མ་བྱེད་པར་བསོད་སྙོམས་ལོངས་ཤིག་ཅེས་དགེ་ཚུལ་བསོད་སྙོམས་ལེན་དུ་བཏང་ངོ་།། དགེ་ཚུལ་ཁྱིམ་དེར་ཕྱིན་པ་དང་། སྒོ་བརྡུངས་པ་ན། བུ་མོས་སུ་ཡིན་ཞེས་བོས་སོ།། དགེ་ཚུལ་གྱིས་བདག་སློབ་དཔོན་གྱི་བསོད་སྙོམས་ལེན་དུ་འོངས་སོ་ཞེས་སྨྲས་པ་དང་། བུ་མོ་དེ་རབ་ཏུ་དགའ་ནས་ད་ནི་རེ་བ་རྙེད་དོ་སྙམ་ནས་སྒོ་ཕྱེས་ཏེ། དགེ་ཚུལ་ནང་དུ་འོངས་པ་དང་། བུ་མོ་ལོ་བཅུ་དྲུག་ལས་མ་ལོན་པ་སྐྱེ་གཟུགས་ཧ་ཅང་ལེགས་ཤིང་། བལྟ་ན་སྡུག་པ་ཞིག་སྟེ། བུ་མོས་འདོད་པས་བསླུའོ་སྙམ་ནས་དགེ་ཚུལ་དེའི་དྲུང་དུ་ཆགས་པའི་རྣམ་འགྱུར་མང་དུ་བསྟན་ཏེ། དགེ་ཚུལ་དེ་ལ་བཏེགས་སོ།། དགེ་ཚུལ་དེ་འདི་སྙམ་དུ་བུ་མོ་“མོ་དེས་ལུས་སྨད་ལྔ་ས་ལ་གཏུགས་ནས་ཕྱག་བྱས་ཏེ། དགེ་ཚུལ་ལ་འདི་སྐད་ཅེས་སྨྲས་སོ།། བདག་རྟག་ཏུ་རེ་བ་ཡང་དེང་གི་དུས་གྲུབ་བོ།། བདག་ཁྱོད་ལ་སྨྲ་བ་ཞིག་ཡོད་དེ། རྟག་ཏུ་དྲན་པ་ལ་སྐབས་མ་རྙེད་དོ།། ཁྱོད་ཀྱང་རྟག་ཏུ་བདག་ལ་དགོངས་པ་འདྲ་ན། བདག་གི་རེ་བ་བསྐང་དུ་གསོལ། ཁྱིམ་འདིའི་ནང་ན་རིན་པོ་ཆེ་དང་། བང་མཛོད་མང་པོ་ནི་རྣམ་ཐོས་ཀྱི་བུའི་གཏེར་དང་འདྲ་བར་ཡོད་ཀྱང་བདག་པོ་མེད་ཀྱིས། ཁྱོད་ཁྱིམ་དང་བཅས་པའི་བདག་པོ་མཛད་དུ་གསོལ། བདག་ཁྱོད་ཀྱི་ཁོལ་མོ་བགྱི་ན། བདག་གི་རེ་བ་བསྐང་དུ་གསོལ། དགེ་ཚུལ་གྱིས་བསམས་པ། བདག་གི་སྡིག་པའི་ལས་ཅི་ཞིག་བྱས་ན། འདི་ལྟ་བུའི་རྐྱེན་དང་ཕྲད་པར་གྱུར། བདག་ལུས་དང་སྲོག་ཡལ་བ་ཡང་བླའི། དུས་གསུམ་གྱི་སངས་རྒྱས་ཀྱིས་བཅས་པའི་ཚུལ་ཁྲིམས་ཉམས་པར་མི་བྱའོ།།

  སྔོན་དགེ་སློང་དག་སྨད་འཚོང་མའི་ནང་དུ་ཕྱིན་ཀྱང་མེའི་དོང་དུ་མཆོང་ཡང་བླའི། ཚུལ་ཁྲིམས་ཉམས་པར་མི་བྱེད་དོ།། གཞན་ཡང་དགེ་སློང་དག་ནི་མི་རྒོད་ཀྱིས་བཅོམ་ནས། རྩྭ་ལ་བཏགས་ཏེ་རླུང་གིས་བཤུད་ཅིང་། ཉི་མས་བསྲེགས་པ་དང་། སྲིན་བུ་མང་པོས་ཟ་ཡང་ཚུལ་ཁྲིམས་བསྲུང་བའི་ཕྱིར་རྩྭ་གཅོད་ཅིང་མི་འགྲོ་བ་ལ་སོགས་པ་ཡིན་ན་དེ་དག་འབའ་ཞིག་སངས་རྒྱས་ཀྱི་ཉེ་གནས་སུ་ཚུལ་ཁྲིམས་བསྲུངས་པ་ཡིན་གྱིས་བདག་ཅག་གིས་བསྲུངས་པ་མ་ཡིན་ནམ། དེ་བཞིན་གཤེགས་པ་ཡང་དེ་འབའ་ཞིག་གི་སྟོན་པ་ཡིན་གྱི། བདག་ཅག་གི་སྟོན་པ་མ་ཡིན་ནམ། དཔེར་ན་ཙམ་པ་ཀའི་མེ་ཏོག་ཟར་མ་དང་ལྷན་ཅིག་ཏུ་བཙིར་ན། ཙམ་པ་ཀའི་དྲི་ཞིམ་པོ་ཟར་མའི་མར་ལ་བྲོ་བར་འགྱུར་ཏེ། བདག་ཀྱང་དེ་ལྟ་མ་ཡིན་ནམ། དགེ་བའི་བཤེས་གཉེན་གྱིས་ཡོངས་སུ་ཟིན་ན། ཅིའི་ཕྱིར་དེང་འདིར་སྡིག་པ་མི་དགེ་བའི་ཆོས་བྱེད་པར་འགྱུར། ལུས་དང་སྲོག་ཡལ་ཡང་བླའི། ནམ་དུ་ཡང་ཚུལ་ཁྲིམས་ཉམས་ཤིང་། སངས་རྒྱས་དང་། ཆོས་དང་། དགེ་འདུན་དང་། ཕ་མ་དང་། སློབ་དཔོན་དང་། བླ་མའི་རིགས་སུན་པར་མི་བྱའོ།།

  ཡང་བསམས་པ། གལ་ཏེ་བདག་བྲོས་ན་ནི་བུ་མོ་དེ་འདོད་ཆགས་ཀྱིས་གདུང་བས་ཁྲེལ་དང་ངོ་ཚ་ཡང་མེད་དེ། ཕ་རོལ་ཏུ་བདག་ཟིན་ནས། བདག་ལ་སྐུར་བ་འདེབས་པར་འགྱུར་ཏེ། གྲོང་མི་དག་གིས་མཐོང་ན་སུན་འབྱིན་པར་འགྱུར་གྱིས། བདག་ནི་ངེས་པར་ཁང་པ་འདི་ཉིད་དུ་ཚེ་འཕོས་པར་“བྱའོ་སྙམ་དུ་བསམས་ནས། བུ་མོ་དེ་ལ་འདི་སྐད་ཅེས་སྨྲས་སོ།། སྒོ་དག་དམ་དུ་ཆོད་ཅིག བདག་ནི་ཁང་པ་ཅིག་གི་ནང་དུ་བྱ་བ་ཅུང་ཟད་ཡོད་པ་དེ་བྱས་ནས་“ཁྱོད་དང་འཕྲད་པར་བྱའོ།། ཞེས་བསྒོས་ནས། བུ་མོ་ཕྱིར་སྒོ་གཅོད་དུ་སོང་བའི་འོག་ཏུ་དགེ་ཚུལ་ཁང་པ་ཞིག་གི་ནང་དུ་ཞུགས་ནས་སྒོ་གཏན་དམ་དུ་བཅུག་སྟེ། ནང་ནས་སྤུ་གྲི་རྙེད་པས་རབ་ཏུ་དགའ་སྟེ། ལུས་ལ་གྱོན་པའི་གོས་རྣམས་ཕུད་ནས་གདང་བུ་ལ་གཟར་ཏེ། ཐལ་མོ་སྦྱར་ནས་གྲོང་ཁྱེར་ཀུ་ཤ་གང་ན་བར་སངས་རྒྱས་མྱ་ངན་ལས་འདས་པའི་གནས་ལོགས་སུ་པུས་མོ་ས་ལ་བཙུགས་ནས། འདི་སྐད་ཅེས་ཡི་དམ་བཅས་སོ།།

  བདག་གིས་ནི་སངས་རྒྱས་དང་ཆོས་དང་། དགེ་འདུན་སྤོང་བ་མ་ལགས། མཁན་པོ་དང་། སློབ་དཔོན་སྤོང་བ་མ་ལགས། ཚུལ་ཁྲིམས་སྤོང་བ་མ་ལགས་ཀྱིས། ཚུལ་ཁྲིམས་བསྲུང་བའི་སླད་དུ་ལུས་འདི་སྤང་ངོ་།། བདག་གར་སྐྱེས་ཀྱང་སངས་རྒྱས་ཀྱི་བསྟན་པ་ལ་རབ་ཏུ་བྱུང་བ་དང་། ཚངས་པར་སྤྱོད་པ་རྣམ་པར་དག་པ་དང་། ཟག་པ་ཟད་པ་དང་། འབྲས་བུ་གྲུབ་པར་གྱུར་ཅིག་ཅེས་སྨོན་ལམ་བཏབ་ནས། རང་གི་མགུལ་བ་བཅད་ནས་ཚེ་འཕོས་སོ།། ཁྲག་གིས་གཡོགས་ནས་ལུས་ཀྱང་ཁྲག་གིས་དམར་པོར་གྱུར་ཏེ། དེའི་ཚེ་ན་བུ་མོས་བསམས་པ་རིང་བར་ཐོགས་སྙམ་ནས་སྒོའི་དྲུང་དུ་སོང་སྟེ་བོས་ན་ཅང་མི་ཟེར་རོ།། བུ་མོས་སྒོ་ཕྱེས་ཏེ་བལྟས་པ་ན་ཚེ་འཕོས་ཟིན་པ་མཐོང་ནས།“བསམ་པ་བཞིན་དུ་མ་གྱུར་པས། འདོད་པའི་སེམས་ཀྱང་ཞི་སྟེ། བུ་མོ་ཤིན་ཏུ་མི་དགའ་བས་གདུངས་པས་སྐྲ་ཡང་བཤིག གདོང་ཡང་སེན་མོས་བྲད་དེ། ས་ལ་འགྲེ་ཞིང་ངུའོ།།

<