དཔལ་རྡོ་རྗེ་འཇིགས་བྱེད་སེར་པོ་ལ་བརྟེན་པའི་ཤིན་ཏུ་ཟབ་པའི་མན་ངག་བཞུགས་སོ། །

2018-09-13
0

 

 

༄༅༅། །ན་མོ་བཛྲ་བྷཻ་ར་ཝཱ་ཡ། རང་ཉིད་རྡོ་རྗེ་འཇིགས་བྱེད་དུ་གསལ་བའི་མདུན་དུ། ཆོས་འབྱུང་ཕྱི་དཀར་ལ་ནང་དམར་བའི་ནང་དུ། སྣ་ཚོགས་པདྨ་འདབ་མ་བརྒྱད་པའི་སྟེང་དུ། སྣ་ཚོགས་རྡོ་རྗེའི་ལྟེ་བར་གཞལ་ཡས་ཁང་གྲུ་བཞི་སྒོ་བཞི་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པའི་ལྟེ་བར། པདྨ་ཟླ་བ་ཉི་མའི་སྟེང་དུ། ཧཱུཾ་ལས་རྡོ་རྗེ་རིན་པོ་ཆེ་ཧཱུཾ་གིས་མཚན་པ། དེ་ཡོངས་སུ་གྱུར་པ་ལས། དཔལ་རྡོ་རྗེ་འཇིགས་བྱེད་སྐུ་མདོག་སེར་པོ་མ་ཧེའི་ཞལ་ཅན་ཕྱག་གཉིས་པ། ཕྱག་གཡས་པ་ནོར་བུ་དབང་གི་རྒྱལ་པོ་ནམ་མཁའ་ལ་འཕྱར་བ། གཡོན་མཚན་ལྡན་གྱི་ཐོད་པ་བདུད་རྩིས་གང་བ་དང་། རྩྭ་དུར་བའི་སྡོང་པོ་སྦྲགས་ནས་འཛིན་པ། སྐུ་སྟོང་ལ་དར་སེར་པོ་སྣ་ཚོགས་ཀྱི་ན་བཟའ་གསོལ་ཞིང་། རིན་པོ་ཆེ་སེར་པོ་སྣ་ཚོགས་ཀྱིས་བརྒྱན་པ། སྤྱི་བོར་འཇམ་དཔལ་གྱི་ཞལ་སེར་པོ་ཡིད་ཙམ་འཛུམ་པ། གཞོན་ནུའི་རྒྱན་གྱིས་བརྒྱན་པ། ཞབས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་བཞུགས་པ། དེའི་ཐུགས་ཀར་ཡེ་ཤེས་སེམས་དཔའ་འཇམ་དཔལ་གཞོན་ནུར་གྱུར་པ་སྐུ་མདོག་སེར་པོ་ཞལ་གཅིག་ཕྱག་གཉིས། ཕྱག་གཡས་ནོར་བུ་དབང་གི་རྒྱལ་པོ་དང་རལ་གྲི་སྦྲགས་ནས་ནམ་མཁའ་ལ་འཕྱར་བ། ཕྱག་གཡོན་རྩྭ་དུར་བའི་སྡོང་པོ་དང་གླེགས་བམ་ཐུགས་ཀར་བསྣམས་པ། དར་སེར་པོའི་ན་བཟའ་གསོལ་བ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། །དེའི་ཐུགས་ཀར་ཏིང་ངེ་འཛིན་སེམས་དཔའ་ཧཱུཾ་ཡིག་སེར་པོ། །མིག་གཉིས་སུ་ས་སྙིང་གི་རང་བཞིན་ཀྵཾི་ཀྵཾི་དཀར་པོ་ལས་རྡོ་རྗེའི་མིག་དཀར་པོ། །རྣ་བ་གཉིས་སུ་ཕྱག་རྡོར་གྱི་རང་བཞིན་ཛྲི་ནག་པོ་ལས་རྡོ་རྗེའི་རྣ་བ་ནག་པོ། སྣ་གཉིས་སུ་ནམ་སྙིང་གི་ངོ་བོ་ཁཾ་སེར་པོ་ལས་རྡོ་རྗེའི་སྣ་སེར་པོ། ལྕའི་རྩ་བར་འཇིག་རྟེན་དབང་ཕྱུག་གི་ངོ་བོ་གཾ་ལས་རྡོ་རྗེའི་ལྕེ་དམར་པོ། །དཔྲལ་བར་སྒྲིབ་སེལ་གྱི་ངོ་བོ་ཀཾ་ལས་རྡོ་རྗེའི་ལུས་ལྗང་ཁུ། ལྟེ་བར་ཀུན་བཟང་གི་ངོ་བོ་སཾ་ལས་རྡོ་རྗེའི་ཡིད་དཀར་པོ། །སྤྱི་བོར་སྐུ་རྡོ་རྗེའི་ངོ་བོ་ཨོཾ་དཀར་པོ། །མགྲིན་པར་གསུང་རྡོ་རྗེའི་ངོ་བོ་ཨཱཿདམར་པོ། །ཐུགས་ཀར་ཐུགས་རྡོ་རྗེའི་ངོ་བོ་ཧཱུཾ་སྔོན་པོ། །ཐུགས་ཀའི་ཧཱུཾ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་སྦྱན་དྲངས། ཛཿཧཱུཾ་བཾ་ཧོཿསླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་པས། དབང་གི་ལྷ་རྣམས་སྤྱན་དྲངས། ཨརྒྷཾ་སོགས་ཀྱིས་མཆོད་ནས། དབང་བསྐུར་བ་ལས་མི་བསྐྱོད་པས་དབུ་བརྒྱན་པར་གྱུར། བྱིན་གྱིས་བརླབས་པའི་མཆོད་རྫས་ནམ་མཁའ་གང་བ་རྣམས་ཀྱིས་མཆོད་པར་བསམས་ལ། ཨོཾ་ཡ་མཱནྟ་ཀ་སྔོན་དུ་འགྲོ་བའི་ཨརྒྷཾ་སོགས་ཆུ་གཉིས་རོལ་མོ་ནང་མཆོད་དང་བཅས་པས་མཆོད། གཉིས་མེད་ཐུན་མོང་སོགས་ཀྱིས་བསྟོད་ལ། མདུན་བསྐྱེད་ཀྱི་ཐུགས་ཀའི་ཏིང་ངེ་འཛིན་སེམས་དཔའི་མཐའ་སྐོར་ལ་སྔགས་འཁོར་བ་ལས་མདུན་གྱི་རྩ་ཞལ་གྱི་ཤངས་བུག་གཡས་ནས་འཐོན་རང་གི་རྩ་ཞལ་གྱི་ཤངས་བུག་གཡོན་ནས་ཞུགས་སྙིང་ཁའི་ཧཱུཾ་ལ་ཐིམ་དེ་ལས་འཐོན་རང་གི་རྩ་ཞལ་གྱི་སྣ་བུག་གཡས་ནས་འཐོན། མདུན་གྱི་ཤངས་བུག་གཡོན་ནས་ཞུགས་པའི་སྔགས་ཕྲེང་འོད་ཟེར་སེར་པོ་ལས་དོན་གཉིས་བྱས། རང་གཞན་གྱི་ལུས་སེམས་ལ་ཁྱབ་པས་སྡིག་སྒྲིབ་ཞི་ཞིང་། ཆེ་དང་བསོད་ནམས་ཡེ་ཤེས་སོགས་ཡོན་ཏན་ཐམས་ཅད་རྒྱས་པར་བསམས་ལ། ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུཾ་ཕཊ། ཨོཾ་པུ་ཎྱེ་པུ་ཎྱེ་མ་ཧཱ་བུ་ཎྱེ་ཨ་པ་རི་མི་ཏ་ཨཱ་ཡུར་པུ་ཎྱ་ཛྙཱ་ན་སཾ་བྷ་རོ་པ་ཨུ་པ་ཙ་ཡ་ཀ་རི་ནི་སྭཱ་ཧཱ། ཞེས་བཟླས་པའི་རྗེས་སུ་ཨརྒྷཾ་སོགས་ཀྱིས་མཆོད། ནོངས་པ་བཟོད་པར་གསོལ། ཡིག་བརྒྱ་བཟླས། མདུན་བསྐྱེད་རང་ལ་བསྡུ་བའམ་གཤེགས་པ་གང་རུང་བྱས་ལ། བསྔོ་བ་སྨོན་ལམ་བཀྲ་ཤིས་དང་བཅས་པ་བྱའོ། །ཤིན་ཏུ་ཟབ་པའི་མན་ངག་གུ་ཏྱྀ་ཨྠྀ། །ཞེས་པ་འདི་རྗེ་བཙུན་ཙོང་ཁ་པ་ཆེན་པོའི་གསུང་གི་བདུད་རྩི་བླ་ན་མེད་པའོ། །བཀྲ་ཤིས། དགེའོ། ། 

  • 顶 0