ཕུར་པ།

2019-10-14
0

ཕུར་པའམ་ཕུར་བུ་ཞེས་པ་སྤྱིར་ན་དུད་འགྲོ་འདོགས་བྱེད་སོགས་ས་ལ་གདབ་བྱ་ཞིག དཔེར་ན། ལྕགས་ཕུར། ཤིང་ཕུར། གུར་ཕུར། གདང་ཕུར་སོགས་ལ་བྱེད་ཀྱང་། འདིར་གདོན་བགེགས་འདུལ་བྱེད་ཀྱི་སྔགས་ཆས་ཤིག འདི་ལ་དུང་དཀར་ཚིག་མཛོད་ལས། སངས་རྒྱས་ཆོས་ལུགས་ཀྱི་གསང་སྔགས་རྙིང་མའི་གཞུང་ལས་བཤད་པའི་དཔལ་ཆེན་རྡོ་རྗེ་ཕུར་བ་ཞེས་སྐུ་སྟོད་ཁྲོ་བོ་ལ་སྐུ་སྨད་ཕུར་པའི་དབྱིབས་སུ་ཡོད་པའི་ལྷ་ཞིག་སྟེ། དེ་ལ་ཡང་ཕུར་པ་ལྷ་ནག་དང་། ལྷ་ཁྲ་སོགས་མི་འདྲ་བ་ཁ་ཤས་ཡོད་ཚོད་འདུག་ཀྱང་དཔྱད་གཞི་བདག་གིས་མ་མཐོང་། ཞེས་གསུངས།

གཞི་རྩའི་གནས་ཚུལ།

 གོ་དོན།

    ཕུར་པའི་སྒྲ་བཤད་དམ་གོ་དོན་ལ་རྗེས་དཀར་ཨོ་རྒྱན་བརྩོན་འགྲུས་ཀྱིས་སྔགས་ཆས་རྣམ་བཤད་དུ། དེ་ཡང་ཕུར་པ་ཞེས་པའི་སྒྲ་བཤད་དམ་གོ་དོན་ནི་ཕུར་ནི་ཡུལ་ཅན་རིག་པའི་ཡེ་ཤེས་དང་། བ་ནི་ཡུལ་སྣང་སྣ་ཚོགས་སུ་སྣང་བའི་ཆོས་ཐམས་ཅད་ལ་བྱེད་པ་ཡིན་ཞིང་དོན་དམ་པར་རིག་སྟོང་གཉིས་སུ་མེད་པའི་ཡེ་ཤེས་ཀྱིས་ཆོས་ཐམས་ཅད་སྤྲོས་པའི་མཚན་མ་རྣམ་པར་ཞི་བའི་རང་བཞིན་ཇི་ལྟ་བ་བཞིན་དུ་རྟོགས་ཤིང་། ཐ་སྙད་དུ་ཆོས་རྣམས་བདེན་པར་མ་གྲུབ་པར་སྒྱུ་མ་ལྟ་བུར་གཟིགས་པའི་ཡེ་ཤེས་ཀྱིས་འཁོར་འདས་ཀྱིས་བསྡུས་པའི་ཡུལ་སྣང་སྣ་ཚོགས་སུ་འཆར་བའི་དངོས་པོ་ཐམས་ཅད་འོད་གསལ་རིག་པ་ཉག་གཅིག་གི་རྒྱན་དང་རོལ་བ་རྩལ་གྱི་རང་བཞིན་དུ་མཐོང་བ་ནི་དོན་གྱི་ཕུར་པ་ཞེས་བྱ་བ་ཡིན་ཏེ། ཡཀྵ་ཟ་བྱེད་འབར་བའི་རྒྱུད་ལས། ཕུར་ནི་རིག་པའི་ཡེ་ཤེས་ཏེ། །པ་ནི་སྣ་ཚོགས་དངོས་པོའོ། །སྣ་ཚོགས་སེམས་ཀྱི་ཆོ་འཕྲུལ་དུ། །རྟོགས་ན་ཕུར་པ་ཞེས་སུ་གྲགས། །ཞེས་དང་། ཕུར་པ་མྱང་འདས་ཀྱི་རྒྱུད་ལས། བྱང་ཆུབ་སེམས་ཀྱི་ཕུར་བུ་ནི། །ཕུར་བུ་ཀུན་གྱི་རྒྱུ་རུ་གྲགས། །དོན་གྱི་ཕུར་པ་བྱང་ཆུབ་སེམས། །བྱང་ཆུབ་སེམས་ཀྱི་ཕུར་པ་ཡིས།། འཁོར་བ་ངན་སོང་མྱ་ངན་བཟློག ། ཅེས་གསུངས་པའི་ཕྱིར།

  • 顶 0